Лука 11 - Јаҥы Кереес

Канайда мӱргийтени керегинде

¹ Иисус бир јерде мӱргиген. Мӱргип божоордо, ӱренчиктериниҥ бирӱзи Ого айтты: – Кайракан, Иоанн бойыныҥ ӱренчиктерин ӱреткени чилеп, бисти де мӱргиирге ӱретсеҥ.

² Иисус олорго айтты: – Мӱргизеер, мынайда айдыгар: Теҥеридеги Адабыс! Адыҥ Сениҥ агарулалзын, Каандыгыҥ Сениҥ келзин! Канайып теҥериде, анайып јерде де табыҥ Сениҥ болзын.

³ Кӱнӱҥ сайынгы калажысты кажы ла кӱн берип тур.

⁴ Кинчектеристи ташта, нениҥ учун дезе биске тӧлӱлӱ не ле кижиниҥ јаманын бис те таштап јадыс. Јеткерге бисти кийдирбе, је јаманнаҥ бисти аргада.

Суранып јӱрген најы керегинде

⁵ Иисус оноҥ айтты: – Кажы бирӱгерде најы бар болзын. Ого тӱн аразында келип, мынайда айткан болдыгар: «Најым, меге тӧлӱге ӱч болчок калаш берзеҥ.

⁶ Айлыма јолго јӱрген најым тӱшти, оны азыраар курсак јок».

⁷ Онызы дезе айыл ичинеҥ мынайда айтпай кайтсын: «Мени шакпыратпа. Эжигим бӧктӱ, балдарым мениле кожо тӧжӧктӧ јаткылары. Туруп, сеге курсак берип болбозым».

⁸ Айдып турум слерге: најы болгон адында ол, туруп, калашты бербезе де, турумкай болзогор, ого туруп, нени сураганаарды ончозын алып берерге келижер.

⁹ Мен де айдып турум слерге: сурагар – слерге берилер, бедирегер – таап аларыгар; токылдадыгар – слерге ачып бергилеер.

¹⁰ Сураган кижи алат, бедирегени табат, токылдатканга ачып берер.

¹¹ Уулы калаш сурагажын, ого таш алып берер ада слердиҥ ортогордо бар ба? Уулы балык сурагажын, кем балыктыҥ ордына ого јылан алып берер?

¹² Јымыртка сурагажын, кем ого скорпион алып берер?

¹³ Анайдарда, јаман бойыгар, балдараарга јакшыны берерин билер болзогор, анчада ла Теҥеридеги Ада Оноҥ сурап турган улуска Агару Тынды берер!

Иисус па айса веельзевул ба?

¹⁴ Бир катап Иисус тил јок шилемирди чыгарган. Шилемир чыгарда, тил јок кижи эрмектене берген, улус алаҥ кайкаган.

¹⁵ Кезиктери айдышты: – Ол шилемирлерди шилемир бийи веельзевулдыҥ кӱчиле чыгара сӱрӱп турбай.

¹⁶ Бир кезиги Оны ченеп, теҥеридеҥ билди кӧргӱс – дежип турдылар.

¹⁷ Је Иисус олордыҥ ичиндеги сагыжын билип, айтты: – Каандык ичинде калык ӧштӧшсӧ, каандык ээн калар; биледе бой-бойы урушса, биле јайрадылар.

¹⁸ Сатана бойына бойы удура болзо, оныҥ каандыгы чыдажар беди? Слер дезе Мени шилемирлерди веельзевулдыҥ кӱчиле чыгара сӱрӱп турбай – дейдигер.

¹⁹ Веельзевулдыҥ кӱчиле шилемирлерди чыгара сӱрӱп турган болзом, слердиҥ уулдарыгар кемниҥ кӱчиле чыгара сӱрӱп јат? Оныҥ учун олор слерди јаргылаар.

²⁰ Је шилемирлерди чыгара сӱрӱп турганым Кудайдыҥ кӱчинеҥ болзо, слерге Кудайдыҥ Каандыгы јеткени бу туру.

²¹ Кӱчтӱ кижи мылтык тудунып, айлын каруулдаза, оныҥ јӧӧжӧзи бӱдӱн болор.

²² Ого бойынаҥ кӱчтӱ кижи табарып, оны јеҥзе, ол тушта оныҥ иженген мылтыгын айрып, тоноп алганын ӱлеп берер.

²³ Мениле кожо эмези – Меге удура болгоны. Мениле кожо јуубаганы дезе, кородып турганы.

²⁴ Кара јелбис кижиниҥ ӧзӧк-буурынаҥ чыкканда, амыр бедиреп, суу јок јерлерде тенип јӱрет. Таппай салала, «Чыгып барган айлыма бурылатам» – дейле,

²⁵ барып кӧрзӧ, айлы сибирилген, јуунадылган болот.

²⁶ Барып, бойынаҥ јаман ӧскӧ јети јелбис ээчиткенче келет, кирип, анда јуртай бергилейт. Байагы кижиге мынызы башкызынаҥ коомой болор.

²⁷ Ол мыны айдып турарда, улус ортодоҥ бир ӱй кижи ӱнин бийиктедип, – Сени карындап алып јӱрген, Сени эмискен эне кежиктӱ! – деди.

²⁸ Је Ол айтты: – Кудайдыҥ сӧзин угуп, бӱдӱрип јӱргени кежиктӱ!

²⁹ Улус там ла кӧптӧп јуулыжып турарда, Ол айдып баштады: – Кал, кинчектӱ ӱйе бу. Ол билдилер бедирейт. Је Ионаныҥ билдизинеҥ ӧскӧ, ого билди берилбес.

³⁰ Иона Ниневияныҥ калыгына билди болгон чылап, Кижи Уулы да бу ӱйеге билди болор.

³¹ Тӱштӱктиҥ абакай-кааны Јаргы болор кӱнде бу ӱйениҥ улузыла кожо туруп, олорды бурулаар: ол Соломонныҥ ойгор сӧзин угайын деп, јака јердеҥ келип јӱрген эди. Је бат, мында Турганы Соломонноҥ јаан.

³² Ниневияныҥ улузы Јаргы болор кӱнде бу ӱйениҥ улузыла кожо туруп, олорды бурулаар. Олор Ионаныҥ јарлыктаганын угала, кинчегин алынып, Кудайга баштанган. Је бат, мында Турганы Ионадаҥ јаан.

³³ Ӱспекчинди камысканда, оны туйук јерге эмезе табак алдына тургуспайтан. Карын, ӱйге кирген улус јарыкты кӧрзин деп, оны јарыткыштыҥ ӱстине тургузатан.

³⁴ Эт-кан јарыткыжы – кӧс. Кӧзиҥ ару болзо, ончо эди-каныҥ да јарык болор, кӧстӧҥ коомой болзоҥ, эди-каныҥ да караҥуй болор.

³⁵ Калак, кӧксиҥдеги јарык караҥуй болуп калбазын!

³⁶ Эди-каныҥ ончо јарык болзо, караҥуй јери јок болзо, јарыткыштыҥ јарыгы сени јарыткандый, ончо бойыҥ јарык болор.

Фарисейлер ле јасакчылар керегинде

³⁷ Иисус айдып божоордо, бир фарисей Оны айлына ажанарга кычырды. Ол келип, кыйын отурды.

³⁸ Фарисей дезе, Оныҥ ажанар алдында колын јунбаганын кӧрӱп, кайкады.

³⁹ Је Кайракан ого айтты: – Слер, фарисейлер, айак-казанаардыҥ тыштын арчып јадыгар, ичигер дезе тоношло, јаманла толо.

⁴⁰ Керсӱ эместер! Тыштын бӱдӱрген Кудай, ичин де бӱдӱрген эмес пе?

⁴¹ Не барыгардаҥ быйан эдип јӱрзегер, ол тужында слерде ончозы ару болор!

⁴² Је слерге, фарисейлер, ачу-корон! Слер мятаныҥ, рутаныҥ, не ле маала ажыныҥ онынчы ӱлӱӱзин берип јадыгар, је Кудайдыҥ јаргызын ла сӱӱжин ундып јадыгар. Бирӱзин эткенде, экинчизин де ундыбас керек.

⁴³ Слерге, фарисейлер, ачу-корон! Слер синагогаларда ичкери ӧдӱп отурарын, тепсеҥдерде уткыдарын јакшызынып јадыгар.

⁴⁴ Слерге, бичикчилерге ле фарисейлерге, эки јӱстӱлерге, ачу-корон! Слер темдектелбеген сӧӧк салар оро ошкожыгар: улус онызын билбей, ӱстиле базып јӱргӱлейт.

⁴⁵ Јасакчылардаҥ кем де Ого айтты: – Ӱредӱчи! Мынайда айдып, бисти де тарындырып јадыҥ.

⁴⁶ Је Ол айтты: – Слерге де, јасакчылар, ачу-корон! Слер улуска апарарга эп јок јӱк артадыгар, бойыгар дезе олорго сабарыгардыҥ бирӱзин де тийгиспейдигер!

⁴⁷ Слерге ачу-корон! Слер јарлыкчыларга сӧӧк салар јерлер тудуп јадыгар, олорды дезе адаларыгар ӧлтӱрген!

⁴⁸ Онызыла слер адаларыгардыҥ эткен керегин јарадып турганыгарды керелейдигер: адаларыгар јарлыкчыларды ӧлтӱрген, слер дезе олорго сӧӧк салар јерлер тудуп јадыгар.

⁴⁹ Оныҥ учун Кудайдыҥ Ойгоры айткан: «Олорго јарлыкчылар ла апостолдор ийерим. Је олордыҥ кезигин ӧлтӱрер, кезигин дезе сӱрӱп ийер.

⁵⁰ Телекей бӱдердеҥ ала тӧгӱлген јарлыкчылардыҥ каны бу ӱйедеҥ некелзин:

⁵¹ Авельдиҥ канынаҥ ала тагыл ла байзыҥныҥ ортозында ӧлтӱрткен Захарияныҥ канына јетире». Эйе, айдып турум слерге: мынызы бу ӱйедеҥ некелер!

⁵² Слерге, јасакчыларга, ачу-корон! Слер билгирдиҥ тӱлкӱӱрин алып алганыгар: ого бойыгар да кирбегенеер, кирейин деген улуска да буудак эткенигер.

⁵³ Иисус мыны олорго айдып турарда, бичикчилер ле фарисейлер Ого ачынып, кӧп сурактар берип,

⁵⁴ Оны бурулаарга, айткан сӧзинеҥ јик табарга, умзанып турдылар.