Галаттарга 5 - Јаҥы Кереес

Јайымыгарды бербегер

¹ Јайым јӱрзин деп, бисти Христос јайымдаган. Анайдарда, бек турыгар, кулданышка бойыгарды комуттадарга бербегер.

² Бат мен, Павел, слерге айдып турум: бойыгарды томдоорго берзегер, слерге Христостоҥ бир де туза болбос.

³ Томдолып турган не ле кижиге база катап керелеп турум: ол ончо Јасакты бӱдӱрер учурлу.

⁴ Слер, бойыгарды Јасакла актап турган улус, Христос јок арттыгар, јакшылыкты јылыйттыгар.

⁵ Бис дезе Кудайга бӱткенис ажыра акту болорыс деп, тынысла иженип, сакыйдыс.

⁶ Томдолгоны ба, томдолбогоны ба, Христос Иисустыҥ алдында учур јок ине. Је сӱӱш ажыра болуп турган Кудайга бӱдери учурлу.

⁷ Слер јакшы баштадыгар. Чындыкка бакпазын деп, слерди кем токтотты?

⁸ Андый бӱдӱндирӱ слерди Кычырып алганынаҥ эмес.

⁹ Бир эмеш ачыткы ончо кулурды ачыдат.

¹⁰ Слер керегинде меге Кайракан бӱдӱмји берип јат: слер башкалап сананбазыгар. Слерди тӱймедип турган кижи, кем де болзо, кезедилер.

¹¹ Карындаштар, эмди де томдошты јарлап јӱрген болзом, мени не учун истеп јадылар? Ол тушта керӱ агаш буудак болбос эди.

¹² Слерди тӱймедип турган улус дезе бойындазын кескей.

¹³ Јайым јӱрерге кычырылдыгар ине, карындаштар. Јайымыгар јӱк эт-канныҥ керексигенин јеткилдеер арга болбозын. Карын, бой-бойыгарга сӱӱшле јалчыланыгар.

¹⁴ Ончо Јасак бир сӧстӧ салынган: «Бойыҥды сӱӱгеҥдий, јуугыҥды сӱӱп јӱр».

¹⁵ Калак! Челдежип, јижип турган болзогор, кырыжып койдыгар.

Тынныҥ ла эт-канныҥ керектери

¹⁶ Айдып турум: тынла јӱригер, ол тушта эт-канныҥ кычазына бакпазыгар.

¹⁷ Эт-кан тынга удурлашты кӱӱнзейт, тын – эт-канга удурлашты. Олор бой-бойлорына удурлажып јадылар. Анайдарда, эдейин дегенди этпейдигер.

¹⁸ Је тынга башкартып турган болзогор, слерди Јасак бийлеп болбос.

¹⁹ Эт-канныҥ керектери иле: балыр јӱрӱм, быјар, токтодынбазы,

²⁰ чалуга бажырыш, илбизин, ӧштӧш, кериш-чугаан, кӱнӱркеш, чугул, ӧӧн-бӧкӧн, бӧлиниш, јайрадуга экелеечи тӧгӱн ӱредӱ,

²¹ јаман кӧрӱш, ӧлтӱриш, аракыдаш, той-јыргал ла бого тӱҥей немелер. Озолондыра айткан эдим, эмди де айдып турум: мынайда кылынып јӱргендер Кудайдыҥ Каандыгын энчиленбес.

²² Тыннаҥ туулганы: сӱӱш, сӱӱнчи, амыр, узакка чыдажыш, быйанзыш, буурзаш, бӱдӱмји,

²³ јобожыш, тудуныш. Мыны ончозын јаргылаар Јасак јок.

²⁴ Је Христостыйы болгон улус бойлорыныҥ эди-канын кӱӱнземелиле, кычазыла кожо кере тартып койгон.

²⁵ Тынла јӱрӱп турган болзобыс, јӱрӱмисти Тын башкарар учурлу.

²⁶ Јакшыркабайлы, сайгакташпайлы, кӱйӱнишпейли.