Колоссыдагыларга серкпеге самаразы 4 - Јаҥы Кереес

¹ Слер де, бийлер, кулдарга чынынча, чындыгынча эдип јӱригер. Слерде де теҥериде Бий барын ундыбагар.

Алкыш сӧстӧр

² Јаантайын мӱргигер, мӱргӱде сергек болыгар, алкыш-быйан айдыгар.

³ Анайда ок бис те учун мӱргигер. Кудай биске сӧс айдар ла Христостыҥ јажыдын јарлаар арга берзин. Бого болуп мен кижендӱ јӱрӱп јадым.

⁴ Мен канайып айдар учурлу, анайып бу јажыт керегинде мени ачыгынча айткадый болзын деп мӱргигер.

⁵ Кудайга бӱтпес улусла бойыгарды керсӱ тудуныгар, ончо бар айалганы тузаланыгар.

⁶ Сӧзигер јаантайын јакшылыкту ла чечен болзын. Кажы ла кижиге канайып каруу јандыратанын билип јӱригер.

Эзен айттырыштар

⁷ Мен керегинде ончозын слерге сӱӱген Тихик карындаш айдып берер. Ол Кайраканга чындык ишчи, мениле кожо иштеп јӱрген кижи болор.

⁸ Слердиҥ айалгаларды слерди билзин деп, јӱректеригер коот алзын деп, оны слерге ийгеним ол.

⁹ Оныла кожо чындык ла сӱӱген Онисим карындаш барып јат. Ол слердиҥ улустаҥ. Олор мындагы айалгаларды слерге ончозын айдып берер.

¹⁰ Мениле кожо киженде Аристарх слерге эзен айдат. База Варнаваныҥ Марк бӧлӧзинеҥ слерге эзен. Марк керегинде јакаруларды алганыгар: слерге келзе, уткыгар.

¹¹ Анайда ок Иуст деген Иисустаҥ слерге эзен. Томдолгондордоҥ јаҥыс олор мениле кожо Кудайдыҥ Каандыгына болуп иштеп јадылар. Олор меге коот болгондор.

¹² Слердиҥ улустаҥ Христос Иисустыҥ кулы Епафрас эзен айдат. Слерди толо кеминде болзын деп, Кудайдыҥ табын бӱдӱреринде туркаары болуп јӱрзин деп мӱргип, ол слер учун јаантайын тартыжат.

¹³ Ол слерге болуп, Лаодикиядагы ла Иерапольдогы карындаштарга болуп кӱчин кысканбай иштеп, кичеемел эдип јат деп, керелеп турум.

¹⁴ Бистиҥ карузыган эмчибис Лука ла Димас слерге эзен айдадылар.

¹⁵ Лаодикиядагы карындаштарга, анайда ок Нимфанга, оныҥ айылдагы серкпезине эзен айдыгар.

¹⁶ Бу самара слерде кычырылза, ол Лаодикиядагы да серкпеде кычырылзын. Слер Лаодикиядаҥ келер самараны кычырыгар.

¹⁷ Архиппке айдыгар: «Сен, Архипп, Кайраканнаҥ алган ишти кыйалтазы јогынаҥ бӱдӱр».

¹⁸ Мен, Павел, бу сӧстӧрди акту бойымныҥ колымла бичип турум: «Мениҥ кӱлӱӱмди ундыбагар. Кудайдыҥ јакшылыгы слерле болзын. Аминь».