Zanaw 1 - ALA KA KUMA

Sɛbɛ nin kuun

¹ Dawuda deen Solomani ka talenw, ale min ye Isirayɛli masacɛ ye.

² O kuun ye ka lɔnniya di, ka ladili di, ka hakilitigiya di koow la, kɔrɔ be minw na,

³ ka ladili gwɛnin di tilenninya, ni hɔrɔnya, ani kobɛnnin la.

⁴ O be yɛrɛminɛcogo di kolɔnbali ma ka lɔnniya ni miiriyaɲuman di kanbelenw ma.

⁵ Lɔnnikɛlaw bena u tulo malɔ u fɛ, ka dɔ fara u ka lɔnniya kan. Hakilitigiw ben'a lamɛn ka yɛrɛminɛcogokura sɔrɔ.

⁶ A kuun ye ka hakili di, talenw ni kuma kɔnɔmanw kɔrɔ lɔnko la, ani ka lɔnnikɛlaw ka kuma n'u ka siirinw faamu.

⁷ Masaba ɲasiran ye lɔnniya daminɛyɔrɔ ye. Nalomanw dama le be ban lɔnniya ni ladili ma.

Sɛbɛ fɔlɔ Kana tugu mɔgɔkolon kɔ

⁸ N deen, sɔn i faa ka ladili ma! Kana ban e bamuso darakan na.

⁹ Bari, o bena kɛ i ko fugulanɲuman e kuun na, ani masirifɛn ye i kaan na.

¹⁰ N deen, kana sɔn kojugukɛlaw k'i bila kojugukɛ la!

¹¹ N'u y'a fɔ i ye ko: «Na, an be taga sira kan tɛmɛbagaw ɲaa tigɛ k'u faga. An ka ben mɔgɔ dɔ kan gwansan,

¹² an k'a ɲanaman halaki k'a bila ka taga lahara, an k'a tunu pewu i ko suu, kaburu kɔnɔ.

¹³ O la, an bena fɛnɲuman caaman sɔrɔ. An bena u cɛ ka taga an ka soow fa.

¹⁴ I bena niyɔrɔ sɔrɔ an fɛ. Bari, o fɛɛn nunu bena kɛ an bɛɛ ta ye.»

¹⁵ N deen, kana taama n'u ye, i seen bɔ u ka sira kan.

¹⁶ Sabu, u ka teli kojugukɛ la, u ka teli ka mɔgɔ faga.

¹⁷ Ka jaan la kɔnɔ ɲa kɛnɛ kan, lakun t'o jaan na do.

¹⁸ Olu kɔni, u b'o kɛra u yɛrɛ le la. U be jaan lara u yɛrɛ le ɲa.

¹⁹ Soon bɛɛ laban bena kɛ ten. A nii bena bɔsi a la.

Lɔnniya be kumana

²⁰ Lɔnniya pɛrɛnkan be bɔra bɔlɔnw na. A kumakan be bɔra forobayɔrɔw la.

²¹ A pɛrɛnkan be bɔra mankanba yɔrɔ la. A kumakan be bɔra dugu donda la ko:

²² «Kolɔnbaliya bena diya aw kolɔnbaliw ye tuma jumɛn? Mɔgɔjagabɔbagaw bena to o la fɔɔ tuma jumɛn? Nalomanw bena ban lɔnniya ma tuma jumɛn?

²³ Aw ye sɔn ne ka ladiliw ma. O la, ne bena n ka hakilitigiya di aw ma, aw bena ne ka kuma faamu.

²⁴ Ne ye weleli kɛ, aw ma sɔn k'a laminɛ. Ne ye n bolo d'aw ma, mɔgɔ si ma janto a la.

²⁵ Aw ma sɔn ne ka ladiliw si ma. Aw ma sɔn ne ka kuma ma.

²⁶ Ne fana bena yɛlɛ aw ma aw ka sɛgɛn tuma na. Siranya bena aw minɛ tuma min na, ne bena aw dɔgɔya!

²⁷ Siranya bena se aw ma loon min na i ko sanfɔɲɔ, dusukasi bena se aw ma loon min na i ko sanfɔɲɔba, ni gwɛlɛya ni dusukasi sera aw ma tuma min na,

²⁸ o waati la, aw bena ne wele ne tena aw jaabi, aw bena ne yɔrɔ ɲini nga aw tena ne ye.

²⁹ Bari, lɔnniya koo ma diya aw ye, aw ma siran Masaba ɲa fana.

³⁰ Aw ma sɔn ne ka ladiliw ma minkɛ, aw ma sɔn ne ka kuma ma minkɛ,

³¹ o kama, aw bena aw yɛrɛ taamacogo sara sɔrɔ. Aw bena wasa aw yɛrɛ ka ladilikanw na.

³² Kolɔnbali ka sirajugu le b'a faga, miiribaliya le b'a kɛ naloman be tunu.

³³ Nga mɔgɔ min b'a tulo malɔ, o tigi bena to hakilisigi la. A bena to lafiya la, sigɛn yɔrɔ bena jaɲa a la.»