ܓܠܝܢܐ 8 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܚܬܡܐ ܕܫܒ݂ܥܐ ܘܦܝܪܡܐ ܕܕܗܒ݂ܐ

¹ ܐܝܼܡܲܢ ܕܦܬܝܼܚ ܠܹܗ ܦܹܐܪܵܐ ܠܚܵܬܡܵܐ ܕܫܲܒ݂ܥܵܐ، ܗܘܹܐ ܠܹܗ ܫܸܬܩܵܐ ܓܵܘ ܫܡܲܝܵܐ ܩܘܼܪܒܵܐ ܠܦܲܠܓܵܐ ܕܣܵܥܲܬ.

² ܘܚܙܹܐ ܠܝܼ ܠܫܲܒ݂ܥܵܐ ܡܲܠܲܐܟܹ̈ܐ، ܐܵܢܝܼ ܕܟܸܠܝܹܐ ܝܗܘܵܘ ܩܲܕܡ ܐܲܠܵܗܵܐ، ܘܦܝܼܫ ܠܗܘܿܢ ܝܘܼܗܒܹܐ ܐܸܠܵܝܗ‌ܝ ܫܲܒ݂ܥܵܐ ܫܝܼܦܘܿܪܹ̈ܐ.

³ ܡܲܠܲܐܟ݂ܵܐ ܐܚܹܪܢܵܐ ܐܬܹ‌ܐ ܠܹܗ ܘܟܠܹܐ ܠܹܗ ܥܲܠ ܡܲܕܒܚܵܐ، ܘܐܝܼܬ ܗܘܵܐ ܠܹܗ ܦܝܼܪܡܵܐ ܕܕܲܗܒ݂ܵܐ. ܦܝܼܫ ܠܹܗ ܝܘܼܗܒ݂ܵܐ ܐܸܠܹܗ ܒܸܣܡܵܐ ܪܵܒܵܐ ܕܡܲܩܪܸܒ݂ ܠܹܗ ܥܲܡ ܨܠܵܘܵܬܹ̈‌ܐ ܕܩܲܕܝܼܫܹ̈ܐ، ܥܲܠ ܡܲܕܒܚܵܐ ܕܕܲܗܒ݂ܵܐ ܩܲܕܡ ܬܪܘܿܢܘܿܣ.

⁴ ܘܐܣܝܼܩ ܠܹܗ ܩܲܕܡ ܐܲܠܵܗܵܐ ܡ̣ܢ ܐܝܼܕܵܐ ܕܡܲܠܲܐܟ݂ܵܐ ܬܸܢܵܐ ܕܒܸܣܡܵܐ ܥܲܡ ܨܠܵܘܵܬܹ̈‌ܐ ܕܩܲܕܝܼܫܹ̈ܐ.

⁵ ܗ̇ܝܓܵܗ ܫܩܝܼܠ ܠܹܗ ܡܲܠܲܐܟ݂ܵܐ ܠܦܝܼܪܡܵܐ، ܡܠܹܐ ܠܹܗ ܡ̣ܢ ܢܘܼܪܵܐ ܕܡܲܕܒܚܵܐ، ܘܕܪܹܐ ܠܹܗ ܥܲܠ ܐܲܪܥܵܐ. ܗܘܹܐ ܠܗܘܿܢ ܪ̈ܲܥܡܹܐ، ܘܩܵܠܹ̈ܐ، ܘܒܸܪ̈ܩܹܐ، ܘܪܵܘܕܵܢܵܐ.

ܫܝܦܘܪ̈ܐ

⁶ ܗ̇ܝܓܵܗ ܐܵܢܝܼ ܫܲܒ݂ܥܵܐ ܡܲܠܲܐܟܹ̈ܐ ܕܐܝܼܬ ܗܘܵܘ ܠܗܘܿܢ ܫܲܒ݂ܥܵܐ ܫܝܼܦܘܿܪܹ̈ܐ ܗܘܼܕܪܵܐ ܠܗܘܿܢ ܓܵܢܵܝܗ‌ܝ ܕܡܵܚܝܼ ܗܘܵܘ ܠܗܘܿܢ.

⁷ ܗ̇ܘ ܩܲܕܡܵܝܵܐ ܡܚܹܐ ܠܹܗ ܫܝܼܦܘܿܪܹܗ، ܘܗܘܹܐ ܠܹܗ ܒܲܪܕܵܐ ܘܢܘܼܪܵܐ ܚܒ݂ܝܼܛܹܐ ܒܕܸܡܵܐ، ܘܦܝܼܫ ܠܗܘܿܢ ܕܸܪܝܹܐ ܠܐܲܪܥܵܐ. ܚܲܕ ܬܠܝܼܬܵܝܵܐ ܕܐܲܪܥܵܐ ܝܩܝܼܕ ܠܹܗ، ܘܚܲܕ ܬܠܝܼܬܵܝܵܐ ܕܐܝܼܠܵܢܹ̈ܐ ܝܩܝܼܕ ܠܹܗ، ܘܟܠܹܗ ܓܸܠܵܐ ܩܝܼܢܵܐ ܝܩܝܼܕ ܠܹܗ.

⁸ ܘܡܲܠܲܐܟ݂ܵܐ ܕܬܪܹܝ ܡܚܹܐ ܠܹܗ ܫܝܼܦܘܿܪܹܗ، ܘܚܲܕ ܡܸܢܕܝܼ ܐܲܝܟ݂ ܛܘܼܪܵܐ ܓܘܼܪܵܐ، ܒܸܠܗܵܝܵܐ ܒܢܘܼܪܵܐ، ܦܝܼܫ ܠܹܗ ܪܘܼܦܝܵܐ ܒܝܵܡܵܐ؛ ܘܚܲܕ ܬܠܝܼܬܵܝܵܐ ܕܝܵܡܵܐ ܚܕܝܼܪܹܗ ܠܕܸܡܵܐ،

⁹ ܘܚܲܕ ܬܠܝܼܬܵܝܵܐ ܕܒܸܪ̈ܝܵܬܹ‌ܐ ܚܵܝܹ̈ܐ ܕܒܝܵܡܵܐ ܡܝܼܬ ܠܹܗ، ܘܚܲܕ ܬܠܝܼܬܵܝܵܐ ܕܓܵܡܝܼܹ̈ܐ ܦܝܼܫ ܠܹܗ ܡܘܼܚܪܸܒ݂ܵܐ.

¹⁰ ܡܲܠܲܐܟ݂ܵܐ ܕܬܠܵܬܵ‌ܐ ܡܚܹܐ ܠܹܗ ܫܝܼܦܘܿܪܹܗ، ܘܢܦܝܼܠ ܠܹܗ ܡ̣ܢ ܫܡܲܝܵܐ ܚܲܕ ܟܵܘܟ݂ܒ݂ܵܐ ܓܘܼܪܵܐ، ܒܸܩܝܵܕܵܐ ܐܲܝܟ݂ ܠܲܡܦܝܼܕܵܐ، ܘܢܦܝܼܠ ܠܹܗ ܥܲܠ ܚܲܕ ܬܠܝܼܬܵܝܵܐ ܕܢܲܗܪ̈ܵܘܵܬܹ‌ܐ ܘܥܲܠ ܥܲܝܢܵܬܹ̈‌ܐ ܕܡ̈ܝܼܵܐ.

¹¹ ܫܸܡܵܐ ܕܗ̇ܘ ܟܵܘܟ݂ܒ݂ܵܐ ܟܹܐ ܦܵܐܹܫ ܗܘܵܐ ܩܸܪܝܵܐ ܡܲܪܝܼܪܘܼܬܵ‌ܐ ܘܚܲܕ ܬܠܝܼܬܵܝܵܐ ܕܡ̈ܝܼܵܐ ܗܘܹܐ ܠܹܗ ܡܲܪܝܼܪܵܐ، ܘܪܵܒܵܐ ܐܢܵܫܹ̈ܐ ܡܝܼܬ ܠܗܘܿܢ ܣܵܒܵܒ ܡ̈ܝܼܵܐ ܗܘܹܐ ܠܗܘܿܢ ܡܲܪܝܼܪܹ̈ܐ.

¹² ܡܲܠܲܐܟ݂ܵܐ ܕܐܲܪܒܥܵܐ ܡܚܹܐ ܠܹܗ ܫܝܼܦܘܿܪܹܗ، ܘܚܲܕ ܬܠܝܼܬܵܝܵܐ ܕܫܸܡܫܵܐ ܦܝܼܫ ܠܹܗ ܡܸܚܝܵܐ، ܘܚܲܕ ܬܠܝܼܬܵܝܵܐ ܕܣܲܗܪܵܐ، ܘܚܲܕ ܬܠܝܼܬܵܝܵܐ ܕܟܵܘܟ݂ܒܹ̈ܐ، ܗܵܕܟ݂ܵܐ ܕܚܲܕ ܬܠܝܼܬܵܝܵܝܗ‌ܝ ܚܘܼܫܟܸܢܹܗ. ܘܚܲܕ ܬܠܝܼܬܵܝܵܐ ܕܝܵܘܡܵܐ ܠܵܐ ܝܘܼܗܒܹܠ ܠܹܗ ܒܲܗܪܵܐ، ܘܗܵܕܟ݂ܵܐ ܐܘܼܦ ܚܲܕ ܬܠܝܼܬܵܝܵܐ ܕܠܲܝܠܹܐ.

¹³ ܗ̇ܝܓܵܗ ܓܘܼܫܸܩ ܠܝܼ ܘܫܡܝܼܥ ܠܝܼ ܚܲܕ ܢܸܫܪܵܐ ܒܸܦܪܵܚܵܐ ܒܹܝܦܲܠܓܵܐ ܕܫܡܲܝܵܐ، ܡܲܩܘܘܼܚܹܐ ܒܩܵܠܵܐ ܪܵܡܵܐ: ”ܘܵܝ، ܘܵܝ، ܘܵܝ، ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ، ܡ̣ܢ ܩܵܠܹ̈ܐ ܕܫܝܼܦܘܿܪܹ̈ܐ ܕܬܠܵܬܵ‌ܐ ܡܲܠܲܐܟܹ̈ܐ ܐܚܹܪ̈ܢܹܐ ܕܗܕܝܼܪܹܐ ܝܢܵܐ ܠܸܡܚܵܝܵܐ.“