ܡܙܡܘܪܐ 147 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܫܲܒܚܘܼܢ ܠܡܵܪܝܵܐ، ܣܵܒܵܒ ܨܦܵܝܝܼ ܝܠܵܗ̇ ܠܸܙܡܵܪܵܐ ܠܐܲܠܵܗܲܢ، ܣܵܒܵܒ ܒܲܣܝܼܡܬܵ‌ܐ ܝܠܵܗ̇؛ ܠܚܝܼܡܬܵ‌ܐ ܝܠܵܗ̇ ܐܸܠܹܗ ܬܸܫܒܘܿܚܬܵ‌ܐ.

² ܒܸܒܢܵܝܵܐ ܝܠܹܗ ܠܐܘܿܪܸܫܠܸܡ ܡܵܪܝܵܐ، ܒܘܼܪ̈ܒܸܙܹܐ ܕܐܝܼܣܪܵܐܹܝܠ ܓ̰ܲܡܘܼܥܵܝ ܝܠܹܗ.

³ ܟܹܐ ܒܲܣܸܡ ܠܬܒ݂ܝܼܪܹ̈ܐ ܕܠܸܒܵܐ، ܘܟܹܐ ܐܵܣܹܪ ܕܲܪ̈ܒܵܬܵܝܗ‌ܝ.

⁴ ܟܹܐ ܡܵܢܹܐ ܡܸܢܝܵܢܵܐ ܕܟܵܘܟ݂ܒܹ̈ܐ، ܠܟܠܵܝܗ‌ܝ ܟܹܐ ܩܵܪܹܐ ܫܸܡܵܢܹ̈ܐ.

⁵ ܓܘܼܪܵܐ ܝܠܹܗ ܡܵܪܲܢ ܘܪܵܒܵܐ ܚܲܝܠܵܢܵܐ، ܠܦܲܪܡܲܝܬܹܗ ܠܲܝܬ ܬܚܘܼܡܵܐ.

⁶ ܟܹܐ ܣܵܢܹܕ ܡܸܣܟܹܢܹ̈ܐ ܡܵܪܝܵܐ، ܟܹܐ ܡܲܟܸܦ ܪ̈ܲܫܝܼܥܹܐ ܗܲܠ ܐܲܪܥܵܐ.

⁷ ܙܡܘܿܪܘܼܢ ܠܡܵܪܝܵܐ ܒܫܲܟܲܪܬܵ‌ܐ، ܙܡܘܿܪܘܼܢ ܠܐܲܠܵܗܲܢ ܒܟܸܢܵܪܵܐ.

⁸ ܗ̇ܘ ܕܟܲܣܹܐ ܫܡܲܝܹ̈ܐ ܒܥܲܝܒܹ̈ܐ، ܗܲܕܸܪ ܩܵܐ ܐܲܪܥܵܐ ܡܸܛܪܵܐ، ܡܲܓ̰ܝܸܢ ܥܲܠ ܛܘܼܪܹ̈ܐ ܓܸܠܵܐ.

⁹ ܝܵܗܒܹܠ ܠܒܸܩܪܵܐ ܡܹܐܟ݂ܘܼܠܬܵܝܗ‌ܝ، ܠܙܲܥܝܹ̈ܐ ܕܥܘܼܪܒ݂ܵܐ ܕܟܹܐ ܩܵܪܝܼ.

¹⁰ ܠܵܐ ܒܓܲܒܵܪܘܼܬܵ‌ܐ ܕܣܘܼܣܵܐ ܟܹܐ ܒܵܣܡܵܐ ܠܹܗ، ܠܵܐ ܒܐܲܩܠܹ̈ܐ ܕܐܢܵܫܵܐ ܟܹܐ ܩܲܒܸܠ ܗܸܢܝܵܢܵܐ.

¹¹ ܟܹܐ ܒܵܣܡܵܐ ܠܹܗ ܡܵܪܝܵܐ ܒܙܕܝܼܥܘܼ̈ܗ‌ܝ، ܒܐܵܢܝܼ ܕܣܵܦܪܝܼ ܠܛܲܝܒܘܼܬܹܗ.

¹² ܫܲܒܸܚܝ، ܝܵܐ ܐܘܿܪܸܫܠܸܡ، ܠܡܵܪܝܵܐ، ܡܲܐܣܸܩܝ ܗܲܠܸܠܘܼܝܵܐ ܠܐܲܠܵܗܵܟ݂ܝ، ܝܵܐ ܨܸܗܝܘܿܢ.

¹³ ܣܵܒܵܒ ܚܘܼܠܸܢܵܝ ܠܹܗ ܕܵܒ݂ܪܹ̈ܐ ܕܕܲܪ̈ܘܵܙܵܟ݂ܝ، ܒܘܼܪܸܟ݂ ܠܹܗ ܠܒܢܘܿܢܵܟ݂ܝ̈ ܒܓܵܘܵܟ݂ܝ.

¹⁴ ܟܹܐ ܡܲܬܸܒ݂ ܫܠܵܡܵܐ ܒܬܚܘܼܡܵܟ݂ܝ، ܒܫܲܡܝܼܢܘܼܬܵ‌ܐ ܕܚܸܛܹ̈ܐ ܟܹܐ ܡܲܣܒܸܥ ܠܵܟ݂ܝ.

¹⁵ ܟܹܐ ܫܲܕܸܪ ܗܹܡܸܙܡܵܢܹܗ ܥܲܠ ܐܲܪܥܵܐ، ܓ̰ܲܠܕܹܐ ܟܹܐ ܪܵܚܹܛ ܚܲܒܪܹܗ.

¹⁶ ܟܹܐ ܝܵܗܒܹܠ ܬܲܠܓܵܐ ܐܲܝܟ݂ ܥܲܡܪܵܐ، ܛܠܘܼܠܵܐ ܡܘܼܓܕܸܠܵܐ ܐܲܝܟ݂ ܩܸܛܡܵܐ ܟܹܐ ܒܵܙܹܩ.

¹⁷ ܟܹܐ ܕܵܪܹܐ ܓܕܝܼܠܹܗ ܐܲܝܟ݂ ܦܸܪ̈ܬܘܼܚܹܐ، ܩܲܕܡ ܩܲܪܬܹܗ ܡܵܢܝܼ ܟܵܠܹܐ؟

¹⁸ ܟܹܐ ܫܲܕܸܪ ܚܲܒܪܹܗ ܘܟܹܐ ܡܲܦܫܸܪܗܘܿܢ، ܟܹܐ ܡܵܚܹܐ ܦܵܘܚܹܗ، ܟܹܐ ܓ̰ܵܪܝܼ ܡ̈ܝܼܵܐ.

¹⁹ ܟܹܐ ܡܲܕܸܥ ܚܲܒܪܹܗ ܠܝܲܥܩܘܿܒ݂، ܩܵܢܘܿܢܘܼ̈ܗ‌ܝ ܘܕܝܼܘܵܢܘܼ̈ܗ‌ܝ ܠܐܝܼܣܪܵܐܹܝܠ.

²⁰ ܠܵܐ ܥܒ݂ܝܼܕ ܠܹܗ ܗܵܕܟ݂ܵܐ ܠܟܠ ܐܘܼܡܬܵ‌ܐ، ܘܕܝܼܘܵܢܘܼ̈ܗ‌ܝ ܠܵܐ ܝܕܝܼܥܵܝ ܠܗܘܿܢ. ܗܲܠܸܠܘܼܝܵܐ