ܡܙܡܘܪܐ 144 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܙܡܘܪܐ ܕܕܘܝܕ.

¹ ܒܪܝܼܟ݂ܵܐ ܝܠܹܗ ܡܵܪܝܵܐ ܐܝܼܨܵܪܝܼ، ܕܡܘܼܠܦܵܝ ܠܹܗ ܐܝܼܕܵܬ‌ܝܼ̈ ܠܩܪܵܒ݂ܵܐ، ܘܨܸܒܥܵܬ‌ܝܼ̈ ܠܦܠܵܫܵܐ.

² ܛܲܝܒܘܼܬ‌ܝܼ ܘܚܸܣܢܝܼ، ܒܹܝܬ ܓܵܘܣܝܼ ܘܦܲܨܝܵܢܝܼ، ܡܵܛܵܠܝܼ ܕܒܝܼܹܗ ܫܩܝܼܠ ܠܝܼ ܓܵܘܣܵܐ، ܙܲܒܛܸܢܵܢܵܐ ܕܥܲܡܡܹ̈ܐ ܬܚܘܿܬ ܐܝܼܕܝܼ.

³ ܝܵܐ ܡܵܪܝܵܐ، ܡܘܼܕܝܼ ܝܠܹܗ ܐܢܵܫܵܐ ܕܝܵܕܥܹܬ ܠܹܗ؟ ܒܲܪܢܵܫܵܐ ܕܚܵܫܒܹܬ ܠܹܗ؟

⁴ ܐܢܵܫܵܐ ܠܢܫܲܡܬܵ‌ܐ ܟܹܐ ܕܵܡܹܐ، ܝܵܘܡܵܢܘܼ̈ܗ‌ܝ ܐܲܝܟ݂ ܛܸܠܵܢܝܼܬܵ‌ܐ ܥܵܒ݂ܪܵܢܬܵ‌ܐ ܝܢܵܐ.

⁵ ܝܵܐ ܡܵܪܝܵܐ، ܡܲܟܸܦ ܫܡܲܝܘܼ̈ܟ݂ ܘܨܠܝܼ، ܕܩܘܿܪ ܒܛܘܼܪ̈ܵܢܹܐ ܕܬܲܢܬܸܢܝܼ.

⁶ ܡܲܒܪܸܩ ܒܸܪܩܵܐ ܘܒܲܪܒܸܙ ܠܗܘܿܢ، ܫܲܕܸܪ ܓܹܐܪ̈ܘܼܟ݂ ܘܚܒ݂ܘܿܛ ܠܵܗ̇ ܥܲܠܵܝܗ‌ܝ.

⁷ ܦܲܫܸܛ ܐܝܼܕܘܼ̈ܟ݂ ܡ̣ܢ ܡܪܵܘܡܵܐ، ܦܲܨܝܼ ܠܝܼ ܘܦܲܪܸܩ ܠܝܼ ܡ̣ܢ ܡ̈ܝܼܵܐ ܪܵܒܵܐ، ܡ̣ܢ ܐܝܼܕܵܐ ܕܢܘܼܟ݂ܪ̈ܵܝܹܐ،

⁸ ܐܲܝܢܝܼ ܕܦܘܼܡܵܝܗ‌ܝ ܟܹܐ ܗܲܡܙܸܡ ܒܲܛܝܼܠܘܼܬܵ‌ܐ، ܘܝܲܡܝܼܢܵܝܗ‌ܝ ܝܲܡܝܼܢܵܐ ܕܕܘܼܓܠܵܐ ܝܠܵܗ̇.

⁹ ܝܵܐ ܐܲܠܵܗܵܐ، ܙܡܵܪܬܵ‌ܐ ܚܲܕܬܵ‌ܐ ܒܸܬ ܙܵܡܪܹܢ ܐܸܠܘܼܟ݂، ܒܩܝܼܬܵܪܵܐ ܕܥܸܣܪܵܐ ܣܝܼܡܹ̈ܐ ܒܸܬ ܫܲܒܚܸܢ ܐܸܠܘܼܟ݂.

¹⁰ ܗ̇ܘ ܕܟܹܐ ܝܵܗܒܹܠ ܦܘܼܪܩܵܢܵܐ ܠܡܲܠܟܹ̈ܐ، ܕܟܹܐ ܦܲܨܹܐ ܠܕܵܘܝܼܕ ܪܹܓܹܗ ܡ̣ܢ ܣܲܝܦܵܐ ܒܝܼܫܵܐ.

¹¹ ܦܲܨܝܼ ܠܝܼ ܘܦܲܪܸܩ ܠܝܼ ܡ̣ܢ ܐܝܼܕܵܐ ܕܢܘܼܟ݂ܪ̈ܵܝܹܐ، ܐܲܝܢܝܼ ܕܦܘܼܡܵܝܗ‌ܝ ܟܹܐ ܗܲܡܙܸܡ ܒܲܛܝܼܠܘܼܬܵ‌ܐ، ܘܝܲܡܝܼܢܵܝܗ‌ܝ ܝܲܡܝܼܢܵܐ ܕܕܘܼܓܠܵܐ ܝܠܵܗ̇.

¹² ܗ̇ܝܓܵܗ ܒܢܘܿܢܲܢ̈ ܒܥܠܲܝܡܘܼܬܵܝܗ‌ܝ ܒܸܬ ܗܵܘܝܼ ܐܲܝܟ݂ ܢܨܝܼܒ݂ܝܵܬܹ̈‌ܐ ܒܓ̰ܝܼܪܹ̈ܐ، ܒܢܵܬܲܢ̈ ܐܲܝܟ݂ ܥܲܡܘܼܕܹ̈ܐ ܦܪ̈ܝܼܡܹܐ ܕܩܘܼܪ̈ܢܝܼܵܬܹ‌ܐ ܓܵܘ ܒܸܢܝܵܢܵܐ ܕܩܲܨܪܵܐ.

¹³ ܐܲܢܒܵܪ̈ܲܢ ܒܸܬ ܗܵܘܝܼ ܡܸܠܝܹ̈ܐ، ܦܲܠܘܼܛܹܐ ܡ̣ܢ ܟܠ ܬܘܼܚܡܵܐ، ܥܸܪ̈ܒܲܢ ܒܸܬ ܝܵܠܕܝܼ ܒܐܲܠܦܹ̈ܐ، ܒܝܼܠܵܕܵܐ ܪܸ̈ܒܘܵܬܹ‌ܐ ܒܥܵܠܘܿܠܵܢܲܢ̈.

¹⁴ ܬܵܘܸܪ̈ܝܵܬܲܢ ܒܸܬ ܗܵܘܝܼ ܒܛܝܼܢܹܐ، ܠܹܐ ܗܵܘܹܐ ܬܪܵܥܬܵ‌ܐ ܕܫܘܼܪܵܐ، ܘܠܵܐ ܠܲܒܲܠܬܵ‌ܐ ܠܓܵܠܘܼܬܵ‌ܐ، ܘܠܹܐ ܗܵܘܝܵܐ ܡܲܩܘܲܚܬܵ‌ܐ ܒܫܘܼܩܲܢ̈.

¹⁵ ܛܘܼܒ݂ܵܐ ܠܥܲܡܵܐ ܕܗܵܕܟ݂ܵܐ ܝܠܵܗ̇ ܐܸܠܹܗ، ܛܘܼܒ݂ܵܐ ܠܥܲܡܵܐ ܕܡܵܪܝܵܐ ܝܠܹܗ ܐܲܠܵܗܹܗ.