ܡܙܡܘܪܐ 140 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܕܘܝܕ.

¹ ܦܲܨܝܼ ܠܝܼ، ܝܵܐ ܡܵܪܝܵܐ، ܡ̣ܢ ܒܲܪܢܵܫܵܐ ܒܝܼܫܵܐ، ܡ̣ܢ ܐܢܵܫܹ̈ܐ ܛܵܠܘܿܡܹ̈ܐ ܢܵܛܪܹܬ ܠܝܼ.

² ܐܵܢܝܼ ܕܚܫܝܼܒ݂ ܠܗܘܿܢ ܒܝܼܫܵܬܹ̈‌ܐ ܒܠܸܒܵܝܗ‌ܝ، ܒܟܠܹܗ ܝܵܘܡܵܐ ܟܹܐ ܚܲܦܛܝܼ ܦܠܵܫܹ̈ܐ.

³ ܡܘܼܚܪܸܦ ܠܗܘܿܢ ܠܸܫܵܢܵܝܗ‌ܝ ܐܲܝܟ݂ ܚܘܼܘܹܐ، ܣܲܡܵܐ ܕܐܸܣܦܸܣ ܬܚܘܿܬ ܣܸܦܘܵܬܵܝ̈ܗ‌ܝ.ܣܹܠܵܗ

⁴ ܢܛܘܿܪܝܼ، ܝܵܐ ܡܵܪܝܵܐ، ܡ̣ܢ ܐܝܼܕܵܬܹ̈‌ܐ ܕܪ̈ܲܫܝܼܥܹܐ، ܡ̣ܢ ܐܢܵܫܹ̈ܐ ܛܵܠܘܿܡܹ̈ܐ ܢܵܛܪܹܬ ܠܝܼ، ܐܵܢܝܼ ܕܚܫܝܼܒ݂ ܠܗܘܿܢ ܠܬܲܪܩܘܼܠܹܐ ܦܵܣܘܿܥܝܵܬ‌ܝܼ̈.

⁵ ܛܘܼܡܸܪܗܘܿܢ ܫܲܒ݂ܗܸܪ̈ܵܢܹܐ ܢܸܫܒ݂ܵܐ ܐܸܠܝܼ، ܘܒܚܲܒ݂ܠܹ̈ܐ ܦܪܝܼܣ ܠܗܘܿܢ ܓܲܪܕܵܐ ܥܲܠ ܐܘܼܪܚܝܼ، ܦܲܚܹ̈ܐ ܨܘܼܠܹܐ ܠܗܘܿܢ ܐܸܠܝܼ.ܣܹܠܵܗ

⁶ ܐܡܝܼܪܝܼ ܠܡܵܪܝܵܐ: ”ܐܲܠܵܗ‌ܝܼ ܝܘܸܬ ܐܲܢ݇ܬ، ܗܲܒ݂ܠ ܢܵܬܵ‌ܐ، ܝܵܐ ܡܵܪܝܵܐ، ܠܩܵܠܵܐ ܕܢܵܘܢܲܝܬ‌ܝܼ.

⁷ ”ܡܵܪܝܵܐ ܐܲܠܵܗܵܐ، ܚܲܝܠܵܐ ܕܦܘܼܪܩܵܢܝܼ، ܟܘܼܣܹܐ ܠܘܼܟ݂ ܪܹܝܫܝܼ ܒܝܵܘܡܵܐ ܕܦܠܵܫܵܐ.

⁸ ”ܠܵܐ ܝܵܗܒܹܬ، ܝܵܐ ܡܵܪܝܵܐ، ܫܲܗܘܲܬܝܵܬܹ̈‌ܐ ܕܪ̈ܲܫܝܼܥܹܐ، ܢܝܼܫܵܝܗ‌ܝ ܠܵܐ ܫܵܒ݂ܩܹܬ ܦܵܠܹܛ ܒܪܹܝܫܵܐ ܕܠܵܐ ܪܵܝܡܝܼ.ܣܹܠܵܗ

⁹ ”ܪܹܝܫܵܐ ܕܚܲܪ̈ܕܝܼܵܢܝܼ ܦܵܐܹܫ ܟܘܼܣܝܵܐ ܒܦܸܠܡܵܐ ܕܣܸܦܘܵܬܵܝ̈ܗ‌ܝ.

¹⁰ ”ܫܒ݂ܘܿܩ ܨܵܠܝܼ ܥܲܠܵܝܗ‌ܝ ܓܘܼܡܪܹ̈ܐ، ܓܵܘ ܢܘܼܪܵܐ ܦܵܝܫܝܼ ܡܘܼܢܦܸܠ ܠܹܗ، ܓܵܘ ܥܘܼܡܩܹ̈ܐ، ܕܠܵܐ ܩܵܝܡܝܼ.

¹¹ ”ܕܵܪܝܵܢܵܐ ܕܒܘܼܚܬܵܢ ܠܹܐ ܩܵܘܹܐ ܒܐܲܪܥܵܐ، ܐܢܵܫܵܐ ܛܵܠܘܿܡܵܐ ܒܝܼܫܬܵ‌ܐ ܒܸܬ ܨܵܝܕܵܐ ܠܹܗ ܒܓ̰ܲܠܕܘܼܬܵ‌ܐ.“

¹² ܟܹܐ ܝܵܕܥܹܢ ܕܒܸܬ ܥܵܒܹܕ ܡܵܪܝܵܐ ܕܝܼܢܵܐ ܕܡܘܼܠܝܸܨܹ̈ܐ، ܕܝܼܘܵܢ ܕܡܸܣܟܹܢܹ̈ܐ.

¹³ ܒܫܪܵܪܵܐ، ܙܲܕܝܼܩܹ̈ܐ ܒܸܬ ܫܲܟܪܝܼ ܠܫܸܡܘܼܟ݂، ܒܸܬ ܝܵܬܒ݂ܝܼ ܬܪ̈ܘܼܨܹܐ ܩܲܕܡ ܦܵܬܘܼܟ݂.