ܡܙܡܘܪܐ 10 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

¹ ܩܵܡܘܿܕܝܼ، ܝܵܐ ܡܵܪܝܵܐ، ܟܵܠܹܝܬ ܪܸܚܩܵܐ، ܛܲܫܹܝܬ ܓܵܢܘܼܟ݂ ܒܥܕܵܢܵܬܹ̈‌ܐ ܕܥܵܘܩܵܢܵܐ؟

² ܒܝܼܫܹ̈ܐ ܒܫܘܼܒ݂ܗܵܪܵܐ ܟܹܐ ܡܲܠܝܸܨܝܼ ܠܡܸܣܟܹܢܵܐ، ܫܒ݂ܘܿܩ ܦܵܝܫܝܼ ܕܒ݂ܝܼܩܹܐ ܒܚܘܼܫܵܒܹ̈ܐ ܕܥܒ݂ܝܼܕ ܠܗܘܿܢ.

³ ܣܵܒܵܒ ܟܹܐ ܚܵܬܹܪ ܒܝܼܫܵܐ ܒܘܼܬ ܫܲܗܘܲܬܬܵ‌ܐ ܕܢܲܦ̮ܫܹܗ، ܘܚܵܛܘܿܦܵܐ ܟܹܐ ܠܵܐܹܛ ܘܟܹܐ ܡܲܣܠܹܐ ܠܡܵܪܝܵܐ.

⁴ ܒܝܼܫܵܐ ܢܵܚܝܼܪܹܗ ܪܵܡܵܐ ܠܹܐ ܛܵܥܹܐ ܒܵܬܪܹܗ، ܠܲܝܬ ܐܲܠܵܗܵܐ ܒܟܠܵܝܗ‌ܝ ܚܘܼܫܵܒ݂ܘܼ̈ܗ‌ܝ.

⁵ ܡܲܢܬܝܼܵܢܹ̈ܐ ܝܢܵܐ ܐܘܼܪ̈ܚܵܬܘܼܗ‌ܝ ܒܟܠ ܥܕܵܢܵܐ، ܪ̈ܵܡܹܐ ܝܢܵܐ ܕܝܼܘܵܢܘܼ̈ܟ݂، ܥܸܠܸܠ ܡ̣ܢ ܚܙܵܝܬܹܗ، ܟܹܐ ܓܲܫܸܩ ܒܥܲܝܢܵܐ ܕܡܲܣܠܲܝܬܵ‌ܐ ܠܟܠܵܝܗ‌ܝ ܕܸܫ̃ܡܸܢܘܼ̈ܗ‌ܝ.

⁶ ܐܡܝܼܪܹܗ ܒܠܸܒܹܗ: ”ܠܹܐ ܫܵܥܫܹܢ، ܠܹܐ ܚܵܙܹܝܢ ܣܸܪܝܘܼܬܵ‌ܐ ܡ̣ܢ ܕܵܪܵܐ ܠܕܵܪܵܐ.“

⁷ ܦܘܼܡܹܗ ܡܸܠܝܵܐ ܝܠܹܗ ܠܵܘܛܬܵ‌ܐ ܘܦܸܠܡܹ̈ܐ ܘܓܸܙܡܵܐ، ܬܚܘܿܬ ܠܸܫܵܢܹܗ ܡܲܠܝܲܨܬܵ‌ܐ ܘܥܵܘܠܵܐ.

⁸ ܟܹܐ ܝܵܬܹܒ݂ ܒܟܡܹܐܢܵܐ ܓܵܘ ܡܵܬܘܵܬܹ̈‌ܐ، ܓܵܘ ܣܸܬܵܪܹ̈ܐ ܟܹܐ ܩܵܛܹܠ ܠܙܲܟܵܝܵܐ، ܥܲܝܢܘܼ̈ܗ‌ܝ ܒܛܸܫܘܵܐ ܟܹܐ ܛܵܥܝܼ ܠܒܝܼܫܓܲܕܹ̈ܐ.

⁹ ܟܹܐ ܝܵܬܹܒ݂ ܒܣܸܬܵܪܹ̈ܐ ܐܲܝܟ݂ ܐܲܪܝܵܐ ܒܓܘܼܒܹܗ، ܟܹܐ ܝܵܬܹܒ݂ ܒܟܡܹܐܢܵܐ ܠܸܚܛܵܦܵܐ ܠܡܸܣܟܹܢܵܐ، ܟܹܐ ܚܵܛܹܦ ܠܡܸܣܟܹܢܵܐ ܐܝܼܡܲܢ ܕܓܵܪܹܫ ܠܹܗ ܠܓܲܪܕܹܗ.

¹⁰ ܟܹܐ ܟܵܐܹܦ ܠܸܨܦܵܚܵܐ، ܘܒܚܲܝܠܹܗ ܟܹܐ ܢܵܦܠܝܼ ܒܝܼܫܓܲܕܹ̈ܐ.

¹¹ ܐܡܝܼܪܹܗ ܒܠܸܒܹܗ: ”ܠܹܐ ܡܲܣܸܡ ܒܵܠܵܐ ܐܲܠܵܗܵܐ، ܟܘܼܣܝܘܼܗ̇ ܝܠܹܗ ܦܵܬܹܗ، ܠܹܐ ܚܵܙܹܐ ܠܥܵܠܲܡ.“

¹² ܩܘܼܡ، ܝܵܐ ܡܵܪܝܵܐ ܐܲܠܵܗܵܐ، ܡܲܪܸܡ ܐܝܼܕܘܼܟ݂، ܠܵܐ ܢܵܫܹܝܬ ܠܡܸܣܟܹܢܹ̈ܐ.

¹³ ܩܵܡܘܿܕܝܼ ܡܲܣܠܹܐ ܪܲܫܝܼܥܵܐ ܠܐܲܠܵܗܵܐ؟ ܐܡܝܼܪܹܗ ܒܠܸܒܹܗ: ”ܠܹܐ ܚܲܫܒܸܢܵܗ̇ ܥܲܠܝܼ.“

¹⁴ ܐܝܼܢܵܐ ܚܸܙܝܵܐ ܠܘܼܟ݂ ܐܲܢ݇ܬ! ܟܹܐ ܚܵܝܪܹܬ ܠܥܵܘܩܵܢܵܐ ܘܠܚܲܫܵܐ، ܠܸܫܩܵܠܵܐ ܓܵܘ ܐܝܼܕܵܬܹ̈‌ܐ ܕܓܵܢܘܼܟ݂؛ ܥܲܠܘܼܟ݂ ܟܹܐ ܣܲܦܹܐ ܠܵܗ̇ ܓܵܢܹܗ ܒܝܼܫܓܲܕܵܐ، ܠܝܲܬܘܼܡܵܐ ܐܲܢ݇ܬ ܟܹܐ ܗܵܘܹܝܬ ܗܲܝܸܪܵܢܵܐ.

¹⁵ ܬܵܒ݂ܪܹܬ ܕܪܲܥܢܵܐ ܕܪܲܫܝܼܥܵܐ ܘܕܒܝܼܫܵܐ، ܬܲܥܠܡܸܬ ܠܒܝܼܫܬܹܗ ܗܲܠ ܕܠܵܐ ܡܲܫ݇ܟ̰ܚܸܬ ܠܵܗ̇ ܐܚܹܪܢܵܐ.

¹⁶ ܡܵܪܝܵܐ ܡܲܠܟܵܐ ܝܠܹܗ ܠܥܵܠܲܡ ܥܵܠܡܝܼܢ، ܛܠܝܼܩ ܠܗܘܿܢ ܐܸܡܘܵܬܹ̈‌ܐ ܡ̣ܢ ܐܲܪܥܹܗ.

¹⁷ ܛܠܵܒܬܵ‌ܐ ܕܡܸܣܟܹܢܹ̈ܐ ܫܡܝܼܥ ܠܘܼܟ݂، ܝܵܐ ܡܵܪܝܵܐ، ܒܸܬ ܡܲܩܘܹܝܬ ܠܸܒܵܝܗ‌ܝ، ܒܸܬ ܨܲܠܹܝܬ ܢܵܬܘܼܟ݂.

¹⁸ ܠܸܥܒ݂ܵܕܵܐ ܕܝܼܘܵܢ ܕܝܲܬܘܼܡܵܐ ܘܡܘܼܠܝܸܨܵܐ، ܕܐܢܵܫܵܐ ܕܡ̣ܢ ܐܲܪܥܵܐ ܠܵܐ ܡܲܙܝܸܕ ܐܚܹܪܢܵܐ ܠܡܲܙܕܘܼܥܹܐ.