Лука 9 - Лукайин Китаб Месигь Ӏисайихъас Идже Хабар

Ӏисайи гьикуная Учин цӀеӀу ученик

¹ Унахъуна Учин цӀеӀу вакилас, Ӏисайи йиная гебурис хӀавелна кьуват кӀилди шейтӀанар адикасра, итталар сагъ акьасра.

² Ӏисайи гьикуная гебур Аллагьдин Паччагьвелдихъас хабар акьас, итталара сагъ акьас.

³ Ӏисайи пуная вакиларис: – Фера магъуяна рекъуьди: я Ӏесса, я чанта, я гуни, я пул, я духӀуба аркьа кунар.

⁴ Нае хулади ачушучин, гьетисаъ экьве, чун хаб рекъуьъ учӀасттегьен.

⁵ Чун кьабул дакьу мукьуйиъ, тебурин хӀуриас верегуна, чве лекарил алекьуна кумра кехӀей кейхӀуна ате тебурис. Гьегилди ягӀархьурай тебурис.

⁶ Вакилар ушуна алдаркай хьуная хӀурарил иджвелин хабар аркьай, джалла усари итта инсанара сагъ аркьай.

Иродас агвас кканди ахьуная Ӏиса

⁷ Ӏисайи аркьа джалла курарихъас унихьуная хӀекимвелдиъ ая Иродас. Гис фи фикир аркьайчира ягӀай хьуна адава, сур инсанари, кӀина ЯхӀъя э Те гъайшинаф агъай хьуная,

⁸ сури – Илйа пайгъамбар э Те адинаф, сасрабури – фушчин са авалдин пайгъамбар э Те джан керхьунаф агъахӀела.

⁹ Ирода пуная: – ЯхӀъяйин зун кӀил алдихьуне. Те инсан фуш эгьан, мидегьенттар унихьа зас Тихъас? Иродас агвас кканди ахьуная Ӏиса.

ГӀифу агъзур инсан тухъ хьуная

¹⁰ Адегуна, вакилари ахъакьуная Ӏисайис джалла чиппи акьуттарихъас. Сасрабури мушат дакьас, Ӏиса хъай Учин вакилара ушуная Вифсаида агъа шагьурдин багулив фая сакин мукьуйиди.

¹¹ Амма инсанарис хабар хьуна, Ӏисайин кьабахъай чабра ушуная. Ӏисайи гебур ачухъди кьабул акьуная, агъай хьуная гебурис Аллагьдин Паччагьвелдихъас, иттаттара сагъ аркьай хьуная.

¹² ГӀуьбехъми гагь вей хьуная. Вакилари, гьучадина, пуная Ӏисайис: – Фадат инсанар, ушуна багулив фая хӀураридина галариди, джикӀирай чиппис Ӏуьш акьас эркьва мукьна Ӏелеф, хьин мисаъ инсан адава мукьуйи э аяф.

¹³ Ӏисайи пуная вакиларис: – Чун фачи гебурис Ӏелеф. Вакилари пуная: – Чав фера фадава, Ӏаре гӀифу гунира Ӏу балугъ дала, гьал ягӀайдава чин ушуна джалла ге инсанарис гъуланчин Ӏелеф.

¹⁴ Гебур гӀифу агъзур дегьен инсан ахьуная. Ӏисайи пуная Учин ученикарис: – Гьер усагь гӀифцӀур инсан аркьай, экьвас акье гебур.

¹⁵ Гьегиштти акьуна, гебури джаллабур экьвас акьуная.

¹⁶ Гъушуна гӀифу гунира Ӏу балугъ, аккедурфуна завариккди, Ӏисайи акьуная дуьгӀе, ая баракатис шукур аркьай. Хуппай пай акьуна йиная ученикарилди, инсанарис алихьас.

¹⁷ ӀуьтӀуна, джаллабур тухъ хьуная, хъара цӀеӀу кӀватт ацӀу кьурцар амилгуна, завал акьуная гебури.

Аллагьдин Месигь. Ӏисайи пуная Учин Ӏеджалихъас

¹⁸ Сагелай Ӏиса ахьуная дуьгӀебур аркьай инсанар адава сакин мукьуйиъ. Гихъай ахьуная Учин ученикара. Ӏисайи хабар гъушуная гебурифас: – Фуш хӀисаб аркьа Зун халкьди?

¹⁹ Ученикари пуная: – Сури агъа, Вун – хьеттигӀ гӀучӀуна гӀайчӀва гӀедат аркьа ЯхӀъя э пуна, сури – Илйа э пуна, сасрабури агъа, Те авалдин са пайгъамбар э джан керхьуна гъайшинаф.

²⁰ Ӏисайи хабар гъушуная ученикарифас: – Ппай чун фуш хӀисаб аркьа Зун? – Вун – Аллагьдин Месигь э, – пуная Петтруйи.

²¹ Ӏисайи кьацӀра сайисра гихъас варттал маркьа пуна,

²² пуная Учин ученикарис: – Инсандин КӀиркӀ ацӀуна гӀезабарикк ккихуна ккандея, хӀа къуджабурира, хӀа маллабурира, Ӏелимарира Ге кьабул акьасттава, гебури Ге кӀесе, амма хьибудпе ягъас Ге джан керхьуна гъайшасе.

Фикьуна кканчин Ӏисайихъай вес кканетти

²³ Хуппай джаллабурис Ӏисайи пуная: – Захъай вес кканетти, учихъас кӀвалас гьатуна кканде, гьер ягъа ге хӀезурди кканде четинвеларин къакъ гъадивас, герек хьучин, учин Ӏуьмур есра кехӀей. Тагьа гьетегуна ге Захъай вей ахьасе.

²⁴ Учин Ӏуьмур ухӀас кканеттифас Ӏуьмур фаттархьасе. Зун бадала Ӏуьмур фаттархьетти, Ӏуьмур ухӀасе.

²⁵ Фи муфиӀет кея инсандис, кӀилди дуьнйа фацуна, учи уч пуч акьухаб, яра учис зарар хьехаб?

²⁶ Захъасра, Зе гафарихъасра неч хье инсан, Инсандин КӀиркӀасра неч хьасе кьабул акьас, Учинна, Учин Даданна гирами малайикаринна тегӀриф хъай адегуна.

²⁷ Зун чвас агъая, мисагь гъузунаттаригӀас са Ӏу инсанар, джилил Аллагьдин Паччагьвел дагуна, кӀесттава.

Пайгъамбар Мусана Илйа агуная Ӏисайихъай

²⁸ Ге гафар пуна, са муя ягъалас, Ӏиса хъай Петтрура, ЯхӀъяра, Якьубра алгъушуная сувалди дуьгӀе акьас.

²⁹ ДуьгӀе аркьа арайи, Ӏисайин сурат садпуна джуьре хьуная, кунар нур ичай, ибхь суман, джагвар хьуная.

³⁰ Ӏу инсан гъургъай ахьуная Ӏисайихъай, гебур хьуная Мусана Илйа,

³¹ заварин нуругӀай адинаттар. Гебур гъургъай хьуная Ерусалимдиъ хьас ккея, Ӏисайин Ӏеджалихъас.

³² Петтруна гин илдешар цӀуьппи гъархьуна ахьуная, кетӀугуна, гебурис агуная Ӏисайин Ӏекун нура, Ӏисайин багулив гъузуна Ӏу инсанна.

³³ Мусана Илйа Ӏисайигьас верегуна, Петтруйи пуная Ӏисайис: – Е МегӀелим, фи иджи ая хьин мисаъ! Див чин хьибу чардах акьас: сад Вас, сад Мусайис, сад Илйайис. Петтруйис учис ягӀай хьуна адава, фи ичин учи агъаяф.

³⁴ Петтру гъургъа арайи, алчадина къири, кичадивуная гебур учин эхъуьккди. Къири ахтт аладина, ученикар дифугӀ гӀачархьегуна, ученикарис гучӀ хьуная.

³⁵ КъиригӀас унихьуная сес: «Ле Зе КӀиркӀ э, Ле Зун гӀаттивунаф э. Лил юркӀв алихь!»

³⁶ Ле сес хъайшугуна, Ӏиса хаб сатти ахьуная. Ученикари джин акьуна, сайисра те вахттуни ахъакьуна адава те чиппис агуттарихъас.

Ӏисайи сагъ акьуная гӀанаъ шейтӀан архьа кӀиркӀ

³⁷ Сасра ягъас, гебур сувалас алаверегунас, Ӏисайигьди гьучадина гъузуна ахьуная ппара халкь.

³⁸ Садпуна халкьдигӀас са инсанди гьараяр акьуна пуная: – МегӀелим, Вас миннат э, хъуттурф зе кӀиркӀахъ! Ге хъая са кӀиркӀ э зе!

³⁹ ШейтӀан архьуна, кӀиркӀа садпуна вевер аркьа. ШейтӀанди гин джан зурзас аркьа, сивигӀас гъурт гӀархьасттегьен. АцӀуна гӀезаб егуна дала, сакинди артайдава кӀиркӀ шейтӀанди.

⁴⁰ Зун тӀалаб акьунуйи Ве ученикарис шейтӀан адик пуна, амма гебурифас хьундава.

⁴¹ Ӏисайи пуная: – Агь чун инсанар, хъудугъаттар, чӀир хьунаттар! Фидегьен вахттунисттегьен Зун чвахъай ахьасе? Фидегьен Зун чвакк ккиха? Фаша мич ве кӀиркӀ.

⁴² КӀиркӀ гьучаверегуна, шейтӀанди гин джан зурзас акьуна, фадихьуная ге джилилди. Ӏисайи къадагъа акьуная шейтӀандис, кӀиркӀ сагъ акьуна гьикуная дадалди.

Ӏисайи Учин Ӏеджалихъас пегуна, ученикар гъавурдиъ архьуна адава

⁴³ Джалла муьхӀтал хьуная Аллагьдин кьудратил. КӀилди Ӏисайи аркьа курарил муьхӀтал хьуна арайи, Ӏисайи пуная Учин ученикарис:

⁴⁴ – Ме гафарил юркӀв алийина кӀвалди ате: Инсандин КӀиркӀ инсанарин гъилиъ ихьасе.

⁴⁵ Амма ученикар ге гафарин гъавурдиъ архьуна адава, ге гафарин мегӀна ягӀар акьас вей хьуна адава гебурифас. Ӏисайифас хабар гъушанасра, фиттихъас ичин Ги пеф, гебурис гучӀай хьуная.

Фуш хӀаф ичин

⁴⁶ Ученикарин арайиъ хӀуьджат хьуная, фуш ичин чиппигӀас ке зурба.

⁴⁷ Ӏисайи, гебурин фикирар ягӀай, гъушуна бицӀи шиниккв, атуна Учин багулив,

⁴⁸ пуная ученикарис: – Зун бадалди гьина ме бицӀи шиниккв кьабул аркьаячин, ти Зунна кьабул аркьая, гьина Зун кьабул акьучин, ти Варттал Алефра кьабул аркьая, Зун джилилди Гьикунаеф. ЧвагӀас ке бицӀи инсан – джаллабурилас зурба инсан э.

«Чвас Ӏайвел даркьаф, те чвахъди э»

⁴⁹ ЯхӀъяйи пуная Ӏисайис: – МегӀелим, час ве ттур гъургъай, шейтӀанар адика са инсан агуне, амма чин гис къадагъа акьуне, ге хьехъай аяф давахӀела.

⁵⁰ Ӏисайи пуная: – Къадагъа маркьа. Чвас Ӏайвел даркьаф, те чвахъди э.

Самари дерейин хӀуриъ, Ӏиса кьабул акьуна адава

⁵¹ Ӏиса, Аллагьди уч завариди агъагъа вахтт хъучавехӀела, хӀезур хьуная вес Ерусалимдиди.

⁵² Ӏисайи Учин удигьай гьикуная Учин инсанар. Гебур адиная Самари дерейиъ ая са хӀуриди, джалла Ӏисайис геректтар хӀезур акьас.

⁵³ Амма Ӏиса кьабул акьуна адава тисаъ, Ӏиса Ерусалимдиди веяф идеф ягӀархьегуна.

⁵⁴ Гебури акьу кар агугуна, Ӏисайин ученикари, Якьубана ЯхӀъяйи, пуная Ӏисайис: – Е ХӀаф, кканчин заварин цӀа йирхӀуна ккедихь агъав чин ме инсанар?

⁵⁵ Ӏисайи, алдаркуна ученикарилди, маркьа пуная.

⁵⁶ Хаб ушуная гебур джуьре хӀуриди.

Ӏисайихъай вере инсан

⁵⁷ Гебур рекъуьъ ай верегуна, са инсанди пуная Ӏисайис: – Зун хӀезурди ая Вун вере усади найич кканчира Вахъай вес.

⁵⁸ Ӏисайи ге инсандис пуная: – Суларихъ мугар хъая, заварин нахширарихъ мугар хъая, Инсандин КӀиркӀахъ кӀил йирхӀас мукь хъудава.

⁵⁹ Сасра инсандис Ӏисайи пуная: – Шаб захъай вес. – Е зе ХӀаф, Ӏуьссе дад ая зе, те сакин дакьуна, зафас вес хьасттава, – пуная ги.

⁶⁰ Ӏисайи гис пуная: – ЮркӀвар кӀинаттари икӀурай чиппин кӀинаттар. Вун ях Аллагьдин Паччагьвелдихъас иджвелин хабар фай.

⁶¹ Джуьре инсанди пуная Ӏисайис: – Е зе ХӀаф, зун весе вахъай, амма сагелай ахттигьар тин зас хулаъ аттарис сагъди илгурай пас.

⁶² Ӏисайи гис пуная: – Сагелай гъилив дуруц гъушуна, хаб кьабахъди алдаркаф, герек дава Аллагьдин Паччагьвелдис.