Лука 8 - Лукайин Китаб Месигь Ӏисайихъас Идже Хабар

Ӏисайин рекъуьъ ушу дишагьлибур

¹ Тегунанхаб са чукь вахттунилас Ӏиса ушуная шагьурариди, хӀурариди инсанарис Аллагьдин Паччагьвелдихъас иджвелин хабар фай. Гихъай ахьуная цӀеӀу ученик.

² Хъара Ӏисайихъай ахьуная са Ӏу дишагьлира, гӀанаас шейтӀанар адикуна, итталарикесра сагъ акьунаттар: Майрам, Магдалина агъа ттур хъитӀунаф, гиас Ӏисайи адикуна ахьуная ери шейтӀан,

³ Югьана, Иродан мулкарин хӀавел аркьа Хуза агъаттин хьир, Сусана, хъара ацӀуна джуьреттара. Ге дишагьлибури, Ӏисайинна Гин ученикарин гереквеларис, чиппикес аркьай хьуная харджар.

Тум узаттихъас мисала

⁴ Сагелай гьер джуьре усариас адина завал хьунагуна ацӀуна инсанар, Ӏисайи ахъакьуная гебурис мисала:

⁵ – Са неджбер айчӀуна ахьуная тум узас. Узагуна, са Ӏу ударар алархьуная рекъуьлди – гебурил лекара алишиная, джакьварира ӀуьтӀуная.

⁶ Сур ударар алархьуная гъванарилди, гебур кегъучӀуная, амма Ӏаш адавай – кегъучӀуттар рукъуная.

⁷ Сур ударар гӀархьуная меркӀваригӀ – меркӀвар къалин хьуна, тум вартт гӀагъучӀуна адава.

⁸ Сур ударар алархьуная гӀане ругулди, кегъучӀуна, вершпай алтухъди мехӀсул йиная. Ме мисалара ахъакьуна, Ӏисайи пуная: – ЮркӀв алийинаттарис, унихьурай.

Мисалайин мегӀна

⁹ Ученикари хабар гъушуная Ӏисайифас: «Ле мисалайин мегӀна фи э?»

¹⁰ Ӏисайи джуваб йиная: – Чвас дахъуная Аллагьдин Паччагьвелдин сирар, аме инсанарис гебур мисалабурилди э ягӀаяф, хъуланди аячира, гебурис аргвай адава, унихьай аячира, гебур гъавурдиъ архьай адава.

¹¹ Ме мисалайин мегӀна ме э: Тум – Аллагьдин гаф э.

¹² Рекъуьлди алархьу тумун ударар – гебур Аллагьдин гаф унихьуна инсанар э; амма хаб адина Иблис, ге гаф юркӀуралас вес аркьа гебурин, гебур хъудугъурай пуна, гебур духӀас.

¹³ Гъванарилди алархьуна тумун ударар, гебур чиппис унихьуна Аллагьдин гаф, шатти кьабул аркьа инсанар э; амма мерӀер хъудава гебурин хъугъувелдихъ, дехӀела са вахттунисттегьен хъугьа гебур, четинвелар алчархьегуна, хаб йирхӀа.

¹⁴ МеркӀваригӀ гӀархьу тумун ударар, гебур Аллагьдин гаф унихьуна инсанар э; амма хаб гӀачӀугъуна, девлетарихъ, рехӀетарихъ ахъихьуна ве гебурин Ӏуьмур. Гебурин кӀетӀу бегьер ирцӀандава.

¹⁵ Авадан ругулди алархьу тумун ударар, гебур чиппис унихьуна Аллагьдин гаф, чиппин идже дуз юркӀураъ икӀуна, ухӀа инсанар э. Сабур хъахӀела, гебурин кӀетӀу бегьера ирцӀанде.

¹⁶ Сайира, лампа кикӀуна, гин варттал бахӀти алияндава, я ккараватин кӀенаккра ккичикӀайдава. Лампа алиланде кьасал, ачавереттарис Ӏекв агвас.

¹⁷ Фера афттава джинабанф, ашкара девеф, фера афттава джин акьас вереф, ягӀархьуна вартталди агъдархьаф.

¹⁸ Фикир акье чвас унихьа гафарил: хъаяттис – хъара ппара есе, хъудаваттифас, учихъ хъая суман верефра, фаттивасе.

Ӏисайин бабна чуппар

¹⁹ Адиная Ӏисайилди Учин бабна чуппар, халкь ппара ай, гӀайчӀвас хьуна адава гебурифас Ӏисайилди.

²⁰ Ӏисайис хабар акьуна пуная: – Ве бабна Ве чуппар гъузуная раккахъ, Вун агвас кканди.

²¹ Ӏисайи пуная гебурис: Зе бабна чуппар гьетебур э, Аллагьдин гафттил юркӀв алийина, гихъ хъучавереттар.

Ӏисайи сакин акьуная тӀурфан

²² Са ягъа, Ӏиса учӀуна Учин ученикарихъай лодкайиъ, пуная гебурис: – Див хьин алттвес сасра къирагъихъди. Гебур гӀачушуная.

²³ Лодкайи ай алттверегуна, Ӏиса гӀачушуная ахунигӀ. Садпуна хӀуьлилди тӀурфан гъайшиная, лепебур гӀагъархьуна, лодкайиди авей хьуная хьед. Ппара хӀа бала кьадайикк кичархьуная гебур.

²⁴ Ученикари кегъикуна Ӏиса пуная: – МегӀелим, МегӀелим хьин луькӀея! КетӀуна, Ги къадагъа акьуная кулакисра, гуджлу хӀа лепебурисра. Фера андавай, хӀуьл сакин хьуная.

²⁵ Ӏисайи пуная ученикарис: – Нахьи чве хъугъувел? ГучӀра муьхӀталла хьуна ученикари агъай хьуная сайи сайис: – Фуш э Ме? Ми кулакисра, хьеттисра кехӀей буюрмишар аркьа, гебура Мис мутӀеӀ ве.

ГӀанаъ шейтӀан аяф сагъ акьуная

²⁶ Гебур гӀаттиная Галилея дерейис гьучадаркуна Гераса агъа мукьуйин джилилди.

²⁷ Ӏиса къирагъихъди гӀайчӀугуна, Гис гьучархьуная гьеге дерейин шагьурдиас гӀанаъ шейтӀанар ая са инсан. Ге инсан ацӀуна гагь хьуная кунар алдавай вей, хулаъ ешемиш девей, некьваригӀ ешемиш вей.

²⁸ Ӏиса агугуна, ге инсанди акьуна вевер, ккерхьуна Гин лекарикк, гьавайикес пуная: – Фи э Вас закес ккандеф, Аллагь ТегӀелайин КӀиркӀ Ӏиса? Миннате Вас, азият майицӀана зас!

²⁹ Ге инсанди гиштти пеф, Ӏисайи шейтӀандис буюрмиш акьухӀела хьуная, айчӀв лин гӀанаас пуна. АцӀуна гагь хьуная гис гӀезаб ирцӀанди шейтӀанди. Гъилара лекара итӀуна синджилариъ алгъузучира, кьатӀ акьуна синджилара гъишай хьуная ге, шейтӀанди агьихьуна, инсан адава мукьвариди.

³⁰ Ӏисайи хабар гъушуная гифас: – Фуш агъа вас? – Къушум, – пуная ге инсанди, учин гӀанади ппара шейтӀанар ачушунахӀела.

³¹ ШейтӀанари миннат аркьай хьуная Ӏисайис, гьимика чин кӀен ккедава мукьуйиди агъай.

³² Тисаъ сувал алхьуная ваккарин хӀа лудж. ШейтӀанари тӀалаб акьуная Ӏисайис чиппис ахттигьар тин пуна, ваккарин гӀанаъ учӀас. Ӏисайи йиная ахттигьар.

³³ ШейтӀанар, айчӀуна инсандиас, учӀуная ваккариъ. Ваккарин кӀаратӀ дивуна адина аратӀихъди, алахъуна хӀуьлигӀди, адивуная.

³⁴ Ккабанари, ге хьуна кар чиппис агугуна, ушуна ахъакьуная гихъас шагьурдира, багулив фая галарира.

³⁵ Инсанар ушуная хъуттурфанас фи ичугвас хьунаф. Ӏисайилди адегуна, гебурис агуная те шейтӀанар айчӀуна инсан, кунара алди, учин гъавурдира ай, экьуна Ӏисайин лекаригь. Инсанарис гучӀ хьуная.

³⁶ Ге Ӏеламат агуттари, ахъаркьай хьуная инсанарис, фиштти сагъ хьучин гӀанаъ шейтӀанар ая инсан.

³⁷ Гераса дерейиъ ешемиш вея инсанарис ппара Ӏайи гучӀ хьуная, гебури миннат акьуная Ӏисайис ях пуна чиппин мукьариас. Ӏиса учӀуна лодкайиъ, хаб алттушуная.

³⁸ Ге гӀанаас шейтӀанар айчӀу инсанди, учра хъай ях пуна тӀалаб акьуная Ӏисайис. Амма Ӏисайи хаб гьикуная ге, пуна:

³⁹ – Ушуна ве хулади ахъакь вас Аллагьди акьудегьенттарихъас. Ге инсанди ушуна, кӀилди шагьурдис ахъаркьай хьуная, фикьунчин учис Ӏисайи.

«Ве хъугъувелди вун сагъ хьуне»

⁴⁰ КӀилди ахъутӀуна ахьуная Ӏисайихъ, дехӀела Ӏиса адегуна, халкьди шатти кьабул акьуная Ге.

⁴¹ Гьеге вахттуни адиная Ягьир агъа са инсан, ге хьуная дуьгӀебур хура хулан хӀаф. Ягьир, ккерхьуна Ӏисайин лекарикк, миннат акьуная Гис учин хулади шаб пуна.

⁴² Ягьиран цӀеӀу ис вея хъая са руш луькӀей хьуная. Ӏиса ушуная Ягьирахъай; джалла багварихъас алчахъуна, халкьдин арайиъ ахьуная Ӏиса.

⁴³ Са дишагьлин цӀеӀу ис хьуная, хъаттдартӀай, иъер вей. Ги учихъ хъаеф хъудаваф кӀилди хардж акьуна ахьуная духттурарис, амма сайифасра сагъ акьас вей хьуна адава ге.

⁴⁴ Кьабахъас гьучадина, ге дишагьли кирхӀуная гъил Ӏисайин палашин мурттук, гьеге сеӀетти иъ атӀуная.

⁴⁵ Ӏисайи хабар гъушуная: – Гьина э Зак кирхӀуф? Сайира чиппи кирхӀундава пегуна, Петтруйи пуная: – Е МегӀелим, Вун халкьдин арайиъ ая агуна, гьер багулихъас Вахъ хъузиландея.

⁴⁶ Ӏисайи пуная: – Дава, гьина ичин Зак кирхӀуне. Зас хабар хьуне, Заас кьуват аттушуна.

⁴⁷ Ге дишагьли, гъавурдиъ архьуная учифас джинихьвас девеф. КӀакӀ архьуна гьучадина, ккерхьуна Ӏисайин лекарикк, кӀилди халкьдин удигь ахъакьуная ге дишагьли, фиттихъас кирхӀуф ичин учи Ӏисайик, фиштти гьеге сеӀетти уч сагъ хьучин.

⁴⁸ Ӏисайи пуная ге дишагьлис: – Е руш, ве хъугъувелди вун сагъ хьуне. Архайин хьуна ях.

Ӏисайи джан кихьуная Ягьиран рушак

⁴⁹ Ӏиса гъургъай ай, адина Ягьиран хулаас са инсанди пуная: – Е Ягьир, ве руш кӀине. Сара бизар маркьа мегӀелим.

⁵⁰ Ге гафар унихьугуна, Ӏисайи пуная Ягьирас: – ГучӀ мева. Вун хъугъ, ве руш сагъ хьасе.

⁵¹ Ягьиран хулади адегуна, Ӏисайи сайисра ахттигьар йина адава Учихъай ачавес, са Петтруйисна, ЯхӀъяйисна, Якьубас дала. Рушан дадасра, бабасра ахттигьар йиная.

⁵² Джалла Ӏешай рахвай ахьуная ге рушахъас. Ӏисайи гебурис пуная: – МеӀеша. Ге кӀина адава, ге гъархьунаф э.

⁵³ Гебур элхъенди ахьуная Ӏисайил, ге кӀинаф ягӀахӀела.

⁵⁴ Ӏисайи, фацуна ге рушан гъил, гьавайикес пуная: – Е руш, гъайш!

⁵⁵ Руш гьеге сеӀетти, джан керхьуна гъайшиная. Ӏисайи Ӏелеф фачи пуная гис.

⁵⁶ Дадна баб муьхӀтал хьуная. Ӏисайи сайисра магъа пуная гебурис ме кардихъас.