Лука 7 - Лукайин Китаб Месигь Ӏисайихъас Идже Хабар

Ӏисайи сагъ акьуная эскерарин хӀекиман лукӀ

¹ Халкьдис джалла пас ккандеттар пехаб, Ӏиса адиная Кафернагьумдиди.

² Римдин са эскерарин хӀекиман ппара ккане лукӀ Ӏайи иттай аккихьуна ахьуная.

³ Ӏисайихъас унихьуна, эскерарин хӀекима гьикуная Ӏисайилди джугьутӀарин хӀа къуджабур тӀалаб акьас Тикес, шаб пуна учин лукӀ сагъ акьас.

⁴ ХӀа къуджабури адина Ӏисайилди ппара Ӏайи миннат акьуна пуная: – Те лайикь иде инсан э, Вун кумак акьас.

⁵ Тис хье халкь кканве, дуьгӀебур хура халла кехӀей алихьуная ти хьес.

⁶ Ӏиса ушуная къуджабурихъай. Ӏиса гьучарукьагуна, эскерарин хӀекиман хулагьди, хӀекима гьикуная Гилди учин дусттар, пас: – Вун бизар мева, зе хӀаф. Вун зе хулади ачадес, зун лайикьлу инсан дава.

⁷ Зун Ваалди душуф гьемихъас э, зун лайикьлу инсан давахӀела. Вун Ӏаре са гаф уп – зе лукӀ сагъ хьасе.

⁸ Зунна хӀуькуматтис мутӀеӀ иде инсан э, амма зе гъиликкра ккея эскерар. Сайис агъа зун: «Ях» – ге ве; сасрайис: «Мич шаб» – ге гьучаве; лукӀус агъа: «Акье гьеме гьеме» – ги аркьа.

⁹ Ге гафар унихьугуна, Ӏиса муьхӀтал хьуная, алдаркуна учин кьабахъай вея инсанарилди, Ги пуная: – Зун чвас агъая миштти хъугъуна инсан Зас Ӏизраилдира кехӀей гьучархьуна адава.

¹⁰ Эскерарин хӀекима гьикунаттар хулади адегуна, гебурис агуная лукӀ сагъ хьуна.

¹¹ Са чӀукь вахттунилас Ӏиса ушуная Наин агъа шагьурдиди. Гихъай ахьуная Учин ученикара, ппара халкьра.

¹² Ӏиса шагьурдин къапубуригьди гьучарукьугуна, шагьурдиас аттгъай хьуная ашкӀин бабахъ хъая са кӀиркӀан майит. Шагьурдиас бабахъай вей хьуная ппара инсанара.

¹³ Ге баб агугуна, баб Ӏегвал хьуна Ӏисайи пуная: – МеӀеша.

¹⁴ Гьучушуна, гъил кирхӀуная Ӏисайи суьрик. Суьри гъая инсанар гъузуная. Ӏисайи пуная: – Е джигьил идеми, Зун вас агъая, гъайш!

¹⁵ КӀинаф гъайшина гъургъуная. Ӏисайи хаб йиная бабас кӀиркӀ.

¹⁶ Джаллабуриъ гучӀ архьуная, гебури шукур аркьай Аллагьдис агъай хьуная: – ЧагӀди зурба пайгъамбар адиная! Аллагь Учин халкьдилди адиная!

¹⁷ Ӏисайин ад архьуная кӀилди Ягьудея дерейиъра кӀилди Ягьудея дерейин багулив фая мукьвариъра.

Пайгъамбар ЯхӀъяйи гьикуная Ӏисайилди учин инсанар

¹⁸ ЯхӀъяйис учин ученикари ахъакьуная кӀилди ге курарихъас.

¹⁹ ЯхӀъяйи унахъуна учин Ӏу ученикдис, гьикуная гебур Ӏисайилди хабар гъушанас: «Вун эв – Те, чаалди адина ккандеф, хъара чин сасрайихъ гъузуна ккандеяв?»

²⁰ Ученикари адина Ӏисайилди пуная: – ХьеттигӀ гӀучӀуна гӀайчӀва гӀедат аркьа ЯхӀъяйи гьикунаттар э чин Ваалди хабар гъушанас: «Вун эв – Те, чаалди адина ккандеф, хъара чин сасрайихъ гъузуна ккандеяв?»

²¹ Те вахттуни Ӏисайи сагъ аркьай хьуная итталар кея инсанар, гӀанаъ шейтӀанар аяттар, сукъурар.

²² Ӏисайи джуваб йиная гьикунаттарис: – Ушуна ахъакь ЯхӀъяйис джалла чвас агуттара, чвас унихьуттара: сукъурарис – Ӏекв аргвая, хъурунаттар – вея, кабкар кеяттар – мертт вея, карабурис – унихьая, кӀинаттарик – джан керхьая, гӀеджизарис – иджвелин хабар аркьая.

²³ Бахттлу инсан э те, Захъ хъугъуф.

Пайгъамбар ЯхӀъяйихъас Ӏисайи пунаеф

²⁴ ЯхӀъяйи гьикунаттар ушугуна, Ӏисайи пуная халкьдис ЯхӀъяйихъас: – Фи агвас ушунаттари чун къумариди? Кулаки къамиш фиштти турттанчин агвас эв?

²⁵ Фи агвас ушунаттари чун? Багьа кунар але инсан агвас пуна эв? Багьа кунар але инсанар, ухьтанди ешемиш веттар, паччагьарин къалабуриъ э аяф.

²⁶ Фуш агвасе пуна юркӀураъ уйи чве? Пайгъамбар эв? Э, чвас пайгъамбар э агуф, Зун агъая чвас, те пайгъамбардиласра хӀаф э.

²⁷ ЯхӀъяйихъас Гирами Китабиъ ликӀиная: «Магьа Зун гьикая Ве удигьай Зе хабар фаяф, Ве удигь, Вас рекъ хӀезур акьас».

²⁸ Зун агъая чвас, джилил але инсанаригӀ, ЯхӀъяйилас хӀа пайгъамбар гӀадава. Амма Аллагьдин Паччагьвелдиъ джаллабурилас бицӀифра кехӀей хӀаф э, те далара.

²⁹ КӀилди халкьди ЯхӀъяйил юркӀв алихьуная. Налукар завал аркьаттарира кехӀей, Аллагь хӀекь акьуная, адина ЯхӀъяйилди хьеттигӀ гӀучӀуна гӀайчӀва гӀедат акьас.

³⁰ Фарисеярина Ӏелимари ЯхӀъяйин гӀедат дакьуна, Аллагьди чиппис акьуна ният кьабул акьуна адава.

³¹ Ӏисайи пуная: – Гьинахъай фачикӀа Зун ме гьалдин инсанар? Фушар суманттар э мебур?

³² Мебур гимил экьуна бицӀи шиникквар суман э, са сайис гьараяр аркьай: «Чин чвас суьретӀ йирхӀуне, чун лихъундава, чин Ӏешалар акьуне, чун Ӏешундава».

³³ Адине ЯхӀъя, ги я гуни Ӏелдава, я чехир ухайдава – чун агъа: «Гиъ шейтӀан ая!»

³⁴ Адине Инсандин КӀиркӀ, Ги Ӏелдира э, ухайра э – чун агъа: «Хъуттурфен, тагьа фунтай, чехир ухас кканеф, налукар завал аркьаттаринна сасра гунагьар кеяттарин дустт».

³⁵ Аллагьдин хӀа Ӏекьул аргвая Гин Ӏекьул фацунаттариъ.

Ӏисайи гъил гъушуная гунагьар кея дишагьлилас

³⁶ Са фарисея шаб пуная Ӏисайис учихъди гуни ӀуьтӀанас. Ӏиса адина фарисеян хулади, са багулихъди къархьил ирхӀуна экьуная суфрайихъ.

³⁷ Гьеге шагьурдиъ ая гунагьар кея са хьирас ягӀархьуная Ӏиса фарисеян хулаъ аяф. Ге хьир адиная тисади Ӏачин бицӀи гаджини ая батӀар ниъ хъая ччамра фай.

³⁸ Кьабахъас Ӏисайин лекарикк ккерхуна, Ӏешуная ге. Гин негъвар алавей хьуная Ӏисайин лекарилди, учин чӀарарилди джикай хьуная ги Ӏисайин лекар. Лекарис мачар икӀай, батӀар ниъ хъая ччам китӀиршанди хьуная ги Ӏисайин лекарик.

³⁹ Гьегиштти агугуна, Ӏиса хъаттфайшуна фарисеяйи, фикир акьуная: «Эгер ме инсан хӀекьданди пайгъамбар ичин, Мис ягӀай ахьаси, Учик гъилар кирхӀая хьир, гунагьар кеяф идеф».

⁴⁰ Ӏисайи пуная фарисеяс: – Е Симон, Зас вас са чӀал пас ккандея. – Уп, МегӀелим, – пуная ги.

⁴¹ Ӏисайи пуная: – Ӏу инсандик кехьуная са эессин бурдж. Сайик кехьуная гӀифуверш арсуран манат, сасрайик – гӀифцӀур.

⁴² Гебурифас бурдж ес девехӀела, Ӏударисра бурджар хуьлал акьуная эесси. Магьа гебурикес гьинас ппара кканхьасе эесси?

⁴³ Симона джуваб йиная: – Зун фикир аркьа, те ппара бурдж хӀуьлал акьуттис. – Вун дузди фикир акьуне, – пуная Ӏисайи.

⁴⁴ Ӏисайи, алдаркуна ге хьиралди, пуная Симонас: – Аргваяв вас ме дишагьли? Зун ве хулади адегуна, вун зас хьед йиндава лекар Ӏуьччанас. Ппай ме дишагьли учин негъварилди Ӏуьччуна Зе лекар, учин чӀарарилди джикуне.

⁴⁵ Зун ачадегуна, вун Зас мач икӀундава. Ппай ме дишагьли, Зун мисаъ а вахттунилас мич, гьайчӀундава Зе лекарис мачар икӀай.

⁴⁶ Вун ччам Зе кӀилик китӀишиндава, ппай ме дишагьли батӀар ниъ хъая ччам Зе лекарик китӀишине.

⁴⁷ Зун вас пасе фас ичин: Ме дишагьлин ппара гунагьарилас гъил гъушуная, дехӀела э мис ппара кканди аяф. Гьиналас чӀукь гъил гъушуна айчин, тис чӀукь кканди ая.

⁴⁸ Дишагьлис Ӏисайи пуная: – Гъил гъушуная ве гунагьарилас.

⁴⁹ Гихъай экьуна сасра гӀулари чаб чиппикди агъай хьуная: «Фуш эгьан Ме, гунагьариласра гъил гъуландеф?»

⁵⁰ Ӏисайи пуная ге дишагьлис: – Ве хъугъувелди вун ухӀуне. ЮркӀв сакинди ях.