Лука 5 - Лукайин Китаб Месигь Ӏисайихъас Идже Хабар

Ӏисайин садпе ученикар

¹ Сагелай, Ӏиса Генисарет агъа хӀуьлин къирагъихъ хъаягуна, Гигьди завал хьуная ацӀуна инсанар, Ӏисайи агъа Аллагьдин Гафттил юркӀв алиянас.

² Ӏисайис агуная къирагъихъ Ӏу лодка. Балугъар фарцанттари, айчӀуна лодкабуриас, Ӏуьрччанди ахьуная чалар.

³ Ӏисайи, учӀуна са лодкайиъ (ге хьуная Симонан лодка), гӀачаях пуная са чӀукь къирагъихъас тич. Экьуна ге лодкайиъ, Аллагьдин Гаф ягӀар аркьай хьуная Ӏисайи инсанарис.

⁴ Учи пуна ккиркӀугуна, Ӏисайи пуная Симонас: – ГӀачушуна уьркӀе мукьуйигӀди, гӀихь чве чалар балугъар фацанас.

⁵ Симона джуваб йиная: – Е МегӀелим, чин кӀилин Ӏуьштти аяттаре мисаъ ул алдакьуна, амма фера фацуна адава. Вун лиштти агъахаб, зун гӀихьасе чалар.

⁶ ГӀихьуна, фацуная гебури гьеге къайда балугъар, къикъе хьуна, чалар чӀургъай хьуная.

⁷ Гъилар акьуная гебури сасра лодкайиъ ая илдешарис, кумак акьас гӀаттшаб пуна. Илдешар гӀаттиная. Ӏудар лодкабуриъ ахъуная гебури балугъар. Къакъ ппара хьуна, адивай ахьуная лодкабур.

⁸ Гебур агугуна, Симон Петтруйи, экьуна кьвакьварилди Ӏисайин удигь, пуная: – Е зе ХӀаф, ях загьас, зун гунагьар кея инсан э!

⁹ Симонна, гихъай аяттара муьхӀтал хьуна ахьуная гидегьен ппара балугъар агуф.

¹⁰ Гин илдешарисра, Якьубасна ЯхӀъяйис, Зебедайин шиниккварис, гучӀ хьуна ахьуная. Ӏисайи пуная Симонас: – ГучӀ мева. Гьалдихъас хаб вун инсанар фарцанф хьасе.

¹¹ ГӀаттивуна лодкабур къирагъихъди, кӀилди атуна, гебур чаб ушуная Ӏисайихъай.

Ӏисайи кабкар кеяф мертт акьуная

¹² Ӏиса ахьуная са шагьурдиъ. Багулифас гьаттвей хьуная кӀилди кабкари алацӀуна са инсан. Ӏиса агуф, Гин лекарикк аккерхьуна, миннат акьуная ге инсанди: – Е зе ХӀаф, Вафас зун мертт акьас хьасе, Вас кканхьехаб!

¹³ Ӏисайи дагъуна гъил, кирхӀуна гик, пуная: – Кканде, мертт ухь. Гьеге сеӀетти гулуная иттал.

¹⁴ Ӏисайи пуная гис: – Сайисра ахъамаркьа михъас. Ушуна маллайилди, хъуттурфанас акье вахъ, садакьара акье вун сагъ хьебахъас, Мусайин Закуни агъилди, джаллабурис вун сагъ хьунаф ягӀархьас.

¹⁵ Гьер усари унихьай хьуная Ӏисайихъас. Ппара халкь завал вей хьуная Гил юркӀв алиянас, Ги чаб сагъ акьас.

¹⁶ Уч Ӏиса ппара сакин мукьуйиди ушуна, дуьгӀебур аркьай хьуная.

Ӏисайи сагъ акьуная фалиджайи фацуна инсан

¹⁷ Сагелай, Ӏисайи Аллагьдин гаф ягӀар аркьагуна, Гил юркӀв алийинаттаригӀ гӀахьуная экьуна фарисеярна Ӏелимар, адинаттар Галилеяна Ягьудея агъа деребурин хӀурариасна Ерусалимдиас. Ӏисайис Аллагьди кьуват йина ахьуная иттаттар сагъ акьас.

¹⁸ Са Ӏу инсанари файдиная гисади ахунил алди, фалиджайи фацуна са инсан, Гебури ачагъас алучӀуная ге хулади, Ӏисайин удигь атас.

¹⁹ Инсанар ппара ай, сагъилдира гӀачавес дахьуна, алгъушуная гебур хулагъилди. Алттивуна гъвад, вартталас ахтт аладивуна гебури иттаф, ахунил алди, хулан яӀаниъ атуная Ӏисайин удигь.

²⁰ Гебурин хъугъувел агуна, Ӏисайи пуная иттаттис: – Ве гунагьарилас гъил гъушуная.

²¹ Фарисеярина Ӏелимари чиппикди фикир аркьай хьуная: «Фуш э ме мидегьен Аллагьсуз курар аркьа инсан? Са Аллагьдифас ду вереф гунагьарилас гъил гъушанас?»

²² Ӏисайис, ягӀархьуна фиттихъас ичин гебури фикир аркьаяф, пуная гебурис: – Фи фикирар э чве юркӀураъ аяф?

²³ «Ве гунагьарилас гъил гъушуная», рехӀет ду пас, «Гъайшина ях», пас дала?

²⁴ Магьа чвас ягӀар ухь, Инсандин КӀиркӀав хӀавел фая джилил гунагьарилас гъил гъушанас. Фалиджайи фацунаттис Ги пуная: – Зун вас агъая, гъайш, гъушуна ве ахунна ях хулади.

²⁵ Джаллабурин удигь гьеге сеӀетти гъайшиная ге, гъушуна уч алде уйи ахунна, ушуная хулади Аллагьдис шукур аркьай.

²⁶ Джалла ппара Ӏайи муьхӀтал хьуная. Гебури шукур аркьай Аллагьдис, агъай хьуная гучӀ архьуна: – Час ягӀа Ӏеламатар агуне.

Ӏисайи файшуная Учихъай налукар завал аркьа инсан

²⁷ Гисаас аттушуна ушугуна, Ӏисайис агуная налукар завал аркьа Леви агъа са инсан. Ге экьуна ахьуная учи кар аркьа усан багулив. – Шаб захъай, – пуная гис Ӏисайи.

²⁸ Леви гъайшина, фадахъуна джалла, ушуная Ӏисайихъай.

²⁹ Левияйи хъаттфайшуна Ӏиса учихъди, дуьхьуьная Ӏисайис батӀар суфра. Гисаъ ахьуная ацӀуна налукар завал аркьаттара, хъара сасра инсанара.

³⁰ Фарисеярина Ӏелимари хъел кей, агъай хьуная Гин ученикарис: – Фас чун Ӏелди ухай аяфе налукар завал аркьаттарихъайна гунагьар кеяттарихъай?

³¹ Ӏисайи джуваб йиная гебурис: – Духттур герек идеф сагъди аяттарис дава, иттаттарис э.

³² Зун Аллагьдин рекъуьъ аяттарилди дава адинаяф, зун адинаяфе Аллагьдилди алдарк пас гунагьар кеяттарис.

Ӏисайифас хабар гъушуная сивар ухӀубахъас

³³ Хаб гебури пуная Ӏисайис: ЯхӀъяйин ученикари ппара сивара ухӀа, дуьгӀебура аркьа, фарисеярин ученикарира гьегиштти, Веттар Ӏелди ухай ая!

³⁴ Ӏисайи гебурис пуная: – Фиштти э гӀулар хъучикаф цӀакинил сивар ухӀас, наврузбег гебурихъай амедегьен гагьди?

³⁵ Амма хъучадесе, наврузбег гебуригӀас гуджуникестти гӀаттиву вахтт, тагьа гьетегуна сивара ухӀасе, гьете ягъари.

³⁶ Ӏисайи ахъакьуная гебурис мишттин мисала: – Сайира цӀае кандикес кьатӀ аркьайдава кьурц, цӀуьре кандил алатӀас. АлатӀухаб, цӀае канна чӀир акьасе, цӀуьре кандис хъудуьхьесра дава цӀае кьумашин кьурц.

³⁷ Сайира агьартайдава цӀае чехир цӀуьре кӀечӀариди, агьатухаб цӀае чехири чурхъвас акьасе кечӀар – чехира адавесе, кӀечӀара бат хьасе.

³⁸ ЦӀае чехир агьатуна кканде цӀае кӀечӀариди!

³⁹ Ерсе чехир ухухаб, цӀаеф сайисра кканхьасттава, ги пасе: «Ерсеф иджеф э».