Лука 3 - Лукайин Китаб Месигь Ӏисайихъас Идже Хабар

Пайгъамбар ЯхӀъя ушуная ягӀар аркьай, инсанарис хьеттигӀ гӀучӀуна гӀайчӀва гӀедат акье агъай

¹ Тиберия агъа паччагь Римдин паччагьвелди ай цӀегӀифудпе ис хьегуна, Ягьудея дерейин хӀавелдиъ ахьуная Понтий Пилат агъаф. Ирод хьуная Галилея дерейин хӀаф, гин чу Филип – Итурея дерейинна Трахания дерейин хӀаф. Лисаний хьуная Абилена дерейин хӀаф.

² Кайяфана Ханан агъаттар хьуная хӀа маллабур. Гьете иса, къумариъ ая Захарияйин кӀиркӀас, ЯхӀъяйис, Аллагьди гьикуная хабар.

³ ЯхӀъя ушуная Иордан агъа нецӀун къирагъарихъ хъая джиларилди. Ги инсанарис агъай хьуная хьеттигӀ гӀучӀуна гӀайчӀва гӀедат акье агъай, чве гунагьар чве гардандиъ гъушен агъай, чве гунагьарилас гъил гъушанас.

⁴ Пайгъамбар Ишаяйин китабиъ ликӀина суман: «Къумариъ унихьая сес: ХӀезур акье Аллагьдис рекъ, майдан акье Ги лек иша мукьар

⁵ АчӀар гьава хьурай гунтӀарна сувар хьеба хьурай, рекъер майдан хьурай уркӀар шергве хьурай;

⁶ Хуппай джалла инсанарис агвасе, Аллагьди чаб ухӀаяф».

⁷ ЯхӀъяйилди вей хьуная ппара инсанар хьеттигӀ гӀучӀуна гӀайчӀва гӀедат акьас. ЯхӀъяйи гебурис агъай хьуная: – Иланарис хуруттар! Гьина э чвас пеф чвафас Аллагьдин дивандиккес ккейчӀвас хьасе пуна?

⁸ Иджвелин курарилди агваракье чве гунагьар чун чве гардандиъ гъушунаеф! Чун имикӀа юркӀураъ: Че дад – Ибригьим э пуна! Зун чвас агъая, Аллагьдифас гьеме гъванарикес акьас хьасе Ибригьимас шиникквар.

⁹ ЯкӀв хъихьуная кӀурарин мерӀерихъ, идже емиш алгъадеве кӀур, атӀуна гӀихьая цӀигӀ.

¹⁰ – Айчин, фикьуна кканде чин? – пуна хабар гъуланди ахьуная гифас халкьди.

¹¹ ЯхӀъяйи пуная: – Ӏу берхӀем хъаятти, са берхӀем йирай садра хъадаваттис, Ӏелеф аяттира гьегиштти акьурай.

¹² Налукар завал аркьаттара адиная хьеттигӀ гӀучӀуна гӀайчӀва гӀедат акьас. Гебури хабар гъушуная: – Е мегӀелим, фикьуна кканде чин?

¹³ ЯхӀъяйи гебурис пуная: – Фаша магъа инсанарис алттухъинф, чвас дарукьаф.

¹⁴ Хаб са Ӏу аскерари хабар гъушуная гифас: – Чин фикьуна кканде? ЯхӀъяйи гебурис пуная: – Фаттмадива инсанарифас гуджунилдина гучӀар гьихьай пулар. Сайикра дава тахсир кимикӀа. Рази ухь чве ваджибил.

¹⁵ Халкь ппара Ӏайи гъузуна ахьуная Месигьахъ. Джаллабури фикир аркьай хьуная Месигь эгьан ЯхӀъя, агъай.

¹⁶ ЯхӀъяйи гебурис пуная: – Зун мертт аркьая чун хьеттилди, амма адесе Те, заалас кьудрат хъаяф. Зун Гин лекаригӀ гӀайа ччеӀер гӀатасра кехӀей хӀисаби ккея инсан дава. Ги чун мертт аркьай ахьасе Аллагьдин РуьхӀуьлдина цӀилди.

¹⁷ Гин кьур мертт аркьа кӀетӀа, сумар гӀадархъай, Гин гъилив фая. Кьур Ги завал акьасе тахаъ, сумар угасе кеттдеве цигӀ.

¹⁸ Гьегишттира хъара джуьре гафарилдира ягӀар аркьай, ЯхӀъяйи гъай хьуная халкьдис идже хабар.

¹⁹ Тегуна хӀавелдиъ ая Ирода ацӀуна дава курар акьуна ахьуная. Ги хьирди акьуна ахьуная Ирадиада агъа учин ччуччун хьир, ппара Ӏайвелара акьуна ахьуная инсанарис. ЯхӀъяйи агъай хьуная ги акьунадегьен дава курарихъас.

²⁰ Гьегихъас Ирода ачикуная ЯхӀъя дусттагъиъ, хъучихьуна джалла учин Ӏайвеларихъди сад сара.

Ӏисара ушуная ЯхӀъяйилди Учис хьеттигӀ гӀучӀуна гӀайчӀва гӀедат акьас

²¹ КӀилди халкьдис хьеттигӀ гӀучӀуна гӀайчӀва гӀедат аркьагуна, Ӏисара адиная Учис гьеге гӀедат акьас ЯхӀъяйилди. ХьеттигӀас гӀайчӀуна Ӏисайи дуьгӀе аркьагуна, дахъуная завар.

²² Гилди аладиная луфуран ухшарар кея Аллагьдин РуьхӀ. Завариас унихьуная сес: – Вун Зе ппара ккане КӀиркӀ. Вун Зе мурадар бегьем аркьаф э!

Ӏисайин тухум

²³ Инсанаригьди Аллагьдин гаф фай айчӀугуна, Ӏисайин вей хьуная хьибцӀур ис.

²⁴ Инсанари фикир аркьа суман, Ӏиса хьуная Юсуфан кӀиркӀ. Юсуф – Ӏелин кӀиркӀ. Джуьре Гин дадар хьуная: Матат, Леви, Малки, Янай, Юсуф,

²⁵ Матитай, АмуцӀ, Наум, Хесли, Нагъай,

²⁶ Махат, Матитай, Шими, Ясих, Яуда,

²⁷ Юханан, Риса, Зарубавил, Салафиэл, Нери,

²⁸ Малки, Ади, Хъусам, Элмадам, Эр,

²⁹ Яшуа, Ӏелизар, Ярим, Матат, Леви,

³⁰ Симеон, Юда, Юсуф, Янам, Элаким,

³¹ Мали, Мина, Матата, Натан, Давуд,

³² Ишай, Авид, Буаз, Сала, Нахшун,

³³ Аминадав, Админ, Арни, Гьесрум, Перец, Яуда,

³⁴ Якьуб, ИсхӀекь, Ибригьим, Терах, Нахур,

³⁵ Серух, Реу, Фалек, Эвер, Шалах,

³⁶ Каинан, Арпахшад, Сим, НухӀ, Ламех,

³⁷ Мафусал, Энух, Иред, Магьалай, Каинан,

³⁸ Энус, Сиф, Адам – Аллагь.