Лука 24 - Лукайин Китаб Месигь Ӏисайихъас Идже Хабар

Ӏисайик джан керхьуная

¹ ЭлхӀед ягъа, багами дахи, чиппи хӀезур акьуна батӀар ниъ хъая шейъера фай, адиная ге хумбар Ӏисайин некьваригьди.

² Некьвдигь гьихьуна гъван гебурис гьаттивуна алчархьуная.

³ ГӀанади ачушуна хъуттурфугуна, Ӏисайин майит аме хьуна адава гисаъ.

⁴ Хумбар муьхӀтал хьуна гъавурдиъ ачадархьай гъузуная. Те вахттуни садпуна аттархьуная гебурин удигьди Ӏу инсан, джагвар нур ицӀан кунара алди.

⁵ Хумбари, гучӀ хьуна, кӀилар агьукӀуная. Гебури пуная хумбарис: – Фас джан кеттихъас руцаф э чун кӀинаттаригӀ?

⁶ Ле мисаъ андава, Лик джан керхьуне. КӀвал акье, чвас Ли фиштти пичин, Уч Галилея дерейиъ ами:

⁷ «Инсандин КӀиркӀ гунагьар кеяттарин гъилиъ архьасе, гебури Те къадакъарилди цӀагъунил алирхӀасе, амма хьибудпе ягъас Тик джан керхьасе».

⁸ КӀвал хьуная гебурис Ӏисайин ге гафар.

⁹ Некьваригьас адегуна, ге хумбари джалла ахъакьуная цӀеса вакиласра, сасра инсанарисра.

¹⁰ Ге хумбар хьуная Магдалина Майрамра, Югьанара, Якьубан баб Майрамра. Гебурихъай ахьуна сасра хумбарира дузди гьегиштти ахъаркьай хьуная вакиларис.

¹¹ ХъиртӀанди ахъаркьаттар суман хьуна, вакилар хъугъуна адава хумбарихъ.

¹² Петтру гъагьархьуна гьуккай ушуная Ӏисайин некьваригьди. КӀил алчикӀуна хъуттурфугуна, гис агуная Ӏаре кафанар. Петтру муьхӀтал хьуна ушуная хулади.

Рекъди ученикарихъай веяф Ӏиса хьуная

¹³ Гьеге ягъа Ӏисайин Ӏу ученик вей хьуная Ерусалимдиас Эммаус агъа хӀуриди. Ерусалимдиас ге хӀуриди цӀеса километр дегьен рекъ ахьуная.

¹⁴ Гебури ахттилатар аркьай хьуная Ӏисайихъас, тисаъ хьуна ге курарихъас.

¹⁵ Гебур гъургъай, ахттилатар аркьай веягуна, Уч Ӏиса, багу хьуна гебуригьди, ушуная гебурихъай.

¹⁶ Гебурин улар сукъур хьуттар суман акьуная, Ӏиса ягӀардахьас.

¹⁷ Ӏисайи хабар гъушуная гебурифас: – Фи ахттилатар э чун рекъди вей аркьаяттар? Гебур пушмалди гъузуная.

¹⁸ Гебурикес Клеупа агъатти пуная Ӏисайис: – Са Вас идеф хьасе ме ягъари Ерусалимдиъ хьуна кар дагӀаяф?

¹⁹ – Фи кар э? – пуная Ӏисайи. Гебури пуная: – Назаретарин Ӏисайихъас. Ге инсан Аллагьдин удигьра, кӀилди халкьдин удигьра гуджлу пайгъамбар и Учин курарилдира, гафарилдира.

²⁰ Че хӀа маллабурина хӀекимари Ге йуькӀ пуне. Ге къадакъарилди кӀуранил алирхӀуна кейхьуне.

²¹ Чин гъузунуйи, Ӏизраилдин халкь азад аркьа инсан Гьеге э пуна. Магьа хьибудпе ягъ э те кар хьуна.

²² Гьал са Ӏу хумбарира муьхӀтал акьуная чин. Багами дахи Ӏисайин некьваригьди ушугуна,

²³ тебурис майит андавай алчархьуная. Тебур адиная чагьди, чиппис тисаъ малайикар агвар акьуне агъай, малайикари Ӏисайик джан керхьуная пуне агъа.

²⁴ Четтарикес са Ӏу инсан ушуна некьваригьди хъуттурфугуна, гьеге хумбари пеф суман ахьуная, Ӏисайин майит агуна адава гебурис.

²⁵ – Агь кӀилиъ адаттар! – пуная гебурис Ӏисайи. – Фидегьен яваштти хъугъа чве юркӀвар кӀилди пайгъамбарари пунаттарихъ.

²⁶ КӀилди ле гӀезабарикк ккихуна кканди адавуйив Месигь, Учис тегӀриф хьас?

²⁷ Хуппай Ӏисайи гъавурдиъ ихьуная гебур кӀилди Гирами китабариъ Учихъас ликӀинаттарин, Мусайилас мич джалла пайгъамбарари.

²⁸ Гьучарукьуная гебур чаб вея хӀуригьди. Ӏисайи Уч хъара гисаас тич ушуна ккандеяф суман акьуная.

²⁹ Гебури гудж аркьай Ӏиса гьадартай, агъай хьуная: – Мева, гьал сара гӀуьбехъмин гагьра хьуная, экьве чахъай. Ӏиса ачушуна экьуная гебурихъай.

³⁰ Гебурихъай суфрайихъ экьугуна, Ӏисайи гъушуна гуни, шукур акьуна Аллагьдисра, кьатӀ акьуна йиная гебурис.

³¹ Гьеге арайи улар дахъуттар суман, ягӀархьуная гебурис Ӏиса. Амма садпуна Ӏиса гулуная гебурин уларигьас.

³² Гебури са сайис пуная: – Хье юркӀвар тегӀде хьуна ишай адавуйив, Ге рекъди хьехъай гъургъай веягуна, Ги хьес Гирами китабариъ ликӀинаттар ахъаркьагуна?

³³ Гебур Ӏудара гьеге сеӀетти гъайшина, хаб ушуная Ерусалимдиди. Тич адегуна, гебури джикӀиная цӀеса вакил сасра ученикара хъай завал хьуна мукь.

³⁴ Вакилари агъай хьуная: – Ӏисайик хӀекьданди джан керхьуная, Симонагьди адинуйи Ле.

³⁵ Хуппай ге Ӏуйира ахъакьуная фи хьучин рекъуьъ, фиштти хаб ягӀархьунчин чиппис Ӏиса, Ги гуни кьатӀ аркьагуна.

Ӏиса адиная Учин ученикаригьди

³⁶ Гебури ахъаркьагуна, Ӏиса гебуригӀди аттархьуна, пуная: – Чве маслихӀет хьурай.

³⁷ ГучӀ хьуна, кӀакӀар хьуная гебур, руьхӀ эгьан пуна чиппис агвар аркьаяф.

³⁸ Ӏисайи пуная гебурис: – Фас лидегьен Ӏайи гучӀ хьунаф э чвас? Фас хъудугъаттар э чве юркӀвар?

³⁹ Хъуттурфен Зе гъиларихъ, Зе лекарихъ – магьа ме Зун э. Зак кирхӀуна, хъуттурфен, руьхӀдин джан ирккар авефттава, Зе ая, магьа чвас аргваф суман.

⁴⁰ Гишттира пуна, Ӏисайи агвар акьуная гебурис Учин гъиларна лекар.

⁴¹ Шад хьуна, хъугъас девей, муьхӀтал хьуная гебур. Ӏисайи пуная гебурис: – Фичира Ӏелеф аяв чве мисаъ?

⁴² Гебури йиная Ӏисайис уджуна балугъин кьурц.

⁴³ Ӏисайи, гъушуна, гебурин удигь ӀуьтӀуная.

⁴⁴ Хуппай Ӏисайи гебурис пуная: – Зун чвахъай ами, ме гафар Зун чвас пунуйи: кӀилди Захъас ликӀинаттар Мусайин Закунира, Пайгъамбарарин китабариъра, Забуриъра аларкьуна ккандея пуна.

⁴⁵ Ӏисайи ягӀар акьуная гебурис Гирами китабарин гъавурдиъ архьас.

⁴⁶ Ӏисайи гебурис пуная: – Гирами китабариъ гьемиштти ликӀиная: Месигь гӀезабарикк ккихуна, хьибудпе ягъас джан керхьуна гъайшина ккандея;

⁴⁷ Гин ттур фацуна иджвелин хабар акьуна ккандея Ерусалимдиас тич кӀилди халкьарис, чве гунагьар чве гардандиъ гъушен пуна, Аллагьди чве гунагьарилас гъил гъушанас.

⁴⁸ Магьа чун шигьидар э.

⁴⁹ Магьа Зун гьикая чвас Зе Дада чвас йина гаф. Чун сагелай Ерусалим шагьурдиъ экьве, чвас Аллагьди кьуват есттегьен.

Ӏиса агъафайшуная завариди

⁵⁰ Ӏисайихъай ушуная ученикар шагьурдиас Вифани агъа хӀуригьди рукьуна. Гъадивуна гъилар, Ӏисайи акьуная гебурис иджвелин дуьгӀе.

⁵¹ Гьеге дуьгӀера аркьай, варха вей ученикаригьас, Ӏиса агъафайшуная завариди.

⁵² Гебур кьвакьварилди джилил алирхӀуная Лин удигь. Хаб зурба шадвел фай адиная ученикар Ерусалимдиди.

⁵³ Гебур гьемишанди Аллагьдин хулаъ авей хьуная, Аллагьдис Шукур аркьай.