Лука 23 - Лукайин Китаб Месигь Ӏисайихъас Идже Хабар

Ӏиса файшуная Пилатагьди

¹ Ӏисайин диван аркьаяттари гъайшина, файшуная Ӏиса Пилаталди.

² Гебури Ӏисайик тахсирар кикӀай, пуная: – Час ягӀархьуне, гьеме инсанди э че халкь рекъуьас адихьаяф, халкьди ккесардис налукар ес адартаяф, Уч Месигь Паччагь э агъай.

³ Пилата хабар гъушуная Ӏисайифас: – Вун эв «ДжугьутӀарин Паччагь?» – Гьеле вун агъагъилди э, – пуная гис Ӏисайи.

⁴ Пилата хӀа маллабурисра, халкьдисра пуная: – Зас ме инсандик са тахсира кей аргвай адава.

⁵ Гебури агъай хьуная гуджуникестти чиппин чӀал хӀекь аркьай: – Галилея дерейиас мич хъучучӀуна, Учингъилди ягӀар аркьай, Ги гьал кӀилди Ягьудея дерейин халкь тӀулаас адихьая.

Ӏиса файшуная Иродалди

⁶ Галилея агъай унихьуна, Пилата хабар гъушуная: – Галилеяйиас эв ме инсан?

⁷ ЯгӀархьегуна, Ӏиса Ирод хӀавелдиъ ая дерейиас идеф, Пилата гьикуная Ӏиса Иродалди. Гьеге ягъари Иродра адина Ерусалимдиъ ахьуная.

⁸ Ӏиса агугуна, Ирод са Ӏайи шад хьуная. Гис ацӀуна гагь хьуная Ӏиса агвас кканди, учис Гихъас ппара унихьунахӀела. Хъара Иродас Ӏисайи аркьа фичира са Ӏеламатра агвас кканди ахьуная.

⁹ Ирода ппара суалар йиная Ӏисайис, амма Ӏисайи са джувабра йина адава.

¹⁰ ХӀа маллабурна Ӏелимар гъузуна, гуджунилди тахсирар кикӀай хьуная Ӏисайик.

¹¹ Иродан эскерарира Ге уджуз акьуна, келхъуьная Гик, аликӀуна Гил паччагьдин суман кунара гьикуная Ге хаб Пилаталди.

¹² Гьеге ягъанин хаб Иродна Пилат дусттар хьуная, авала душманар.

Завал хьуна инсанари йуькӀ пуная Ӏиса

¹³ Пилата завал акьуна хӀа маллабура, хӀекимара, халкьра

¹⁴ пуная: – Чун заалди файдиная ме инсан, ми халкь рекъуьас адихьая пуна. Магьа зун чве удигь диван акьуне Мин. Зас ме инсандик, чун кикӀая тахсирарикес, са тахсира кей аргвай адава.

¹⁵ Иродара, Мик тахсир кидаф агуна, Ме хаб хьелди гьикуная, йирхӀуна кӀес, Ме инсанди фера мишттин кар акьуна адава.

¹⁶ Къемчинф акьуна, зун Ме фатасе.

¹⁷ Пилата Пасхайин хӀа ягъас атуна кканди ахьуная фуш хьунара са ачикунаф.

¹⁸ Джаллабури вевер акьуна, пуная: – Ле йуькӀ, Варава фат!

¹⁹ Варава агъаф, шагьурдиъ къалабулугъ акьуна фушчин кӀина, ачикунаф хьуная дусттагъиъ.

²⁰ Ӏиса фатас кканди, Пилата хаб сагелай сара пуная гебурис.

²¹ Гебури вевер аркьай, агъай хьуная: – Къадакъарилди цӀагъунил алирхӀуна кейхь Ле! Кейхь Ле!

²² Хьибудпегелайра пуная гебурис Пилата: – Фи Ӏайвел э Ми акьунаф? Ме кӀес, зас Мик са тахсира кей аргвай адава. Къемчинф акьуна, зун Ме фатасе.

²³ Гебури мертти Ӏайи вевер аркьай хьуная, йуькӀ агъай Ӏиса. Гебурин чӀал варттал хьуная.

²⁴ Пилата гебурис ккандегъилди акьуна,

²⁵ атуная дусттагъиас гебури адат пе Варава агъаф, шагьурдиъ къалабулугъ акьуна, фушчин са инсанна кӀина ачикунаф. Ппай Ӏиса ихьуная кӀилихъди гебурин гъилиъ.

Къадакъарилди цӀагъунил алирхӀуна, кейхьуная Ӏиса

²⁶ Ӏиса кӀес гъагуна, эскерари фацуная хуйиас вея Симон агъа са инсан. Гебури хъучикуная ге инсан Ӏисайин кьабахъай Ӏиса алирхӀуна кейхьа цӀагъун гъас. Симон хьуная Кирена агъа хӀуриас.

²⁷ Ӏисайин кьабахъай ппара халкь вей хьуная. Ге халкьдигӀас хумбар Ӏешай рахвай хьуная Ӏисайихъас.

²⁸ Ӏисайи, гебурилди алдаркуна, пуная: – Ерусалимдин дишагьлибур, Захъас меӀеша! Чвахъас Ӏеш, чве шиниккварихъас Ӏеш!

²⁹ Хъучавея мишттин вахттар, инсанари агъай ахьасе: «Бахттлубур э шиниккв кидаваттар, шиниккв дахуруттар, шиникквдис бизи даеттар!»

³⁰ Тегуна агъай ахьасе дагьарарис: «АрчӀуна, алахъ чаалди!» – кӀунтӀарис агъай ахьасе: «Кичадив чин!»

³¹ Гъазе цӀаб адахъуна кӀуранис миштти аркьагуна, рукъу кӀуранис фикьасе?

³² Ӏисайихъай кӀес гъай хьуная Ӏу къачагъра.

³³ «Келла» агъа мукьуйиди адегуна, гебури къадакъарилди цӀагъунил алирхӀуна кейхьуная Ӏиса, Гин багулив Ӏудар къачагъара, сад хӀуьрджал багулихъ, сад чиппил багулихъ.

³⁴ Ӏисайи пуная: – Дад! Гъил гъушен гебурилас, гебурис ягӀай адава, фи ичин чиппи аркьаяф. КӀур ихьуна, пай аркьай хьуная гебури Ӏисайин кунар.

³⁵ Халкь гъузуна хъуланди ахьуная. ХӀекимар элхъенди ахьуная Ӏисайил, агъай: – Сасрабур ухӀуне, гьал Учи Уч ухӀурай, нагагь Уч Месигь идехаб, Уч Аллагьди гӀаттивунаф идехаб.

³⁶ Эскерара келхъенди ахьуная Ӏисайик. Гебури Гис сирка гьучагъай,

³⁷ агъай хьуная: – Нагагь Вун джугьутӀарин паччагь идехаб, Вун Вас кумак акье.

³⁸ Ӏисайин кӀилихъ ликӀина ахьуная: «Ме джугьутӀарин паччагь э».

³⁹ Ӏисайихъай кейхьуна са къачагъа, алурхӀанди агъай хьуная Ӏисайис: – Месигь ду Вун? Кумак акье васра, часра.

⁴⁰ Сасра къачагъа гис джуваб йина, ге гъургъас адатуна пуная: – Вас Аллагьдигьас гучӀайду, васра ме Ӏисайис суман джаза идегуна йинаф?

⁴¹ Хьес хӀекьданди хьин акьуна дава курарихъас йинаф э ме джаза, ппай Ӏисайи са дава кара акьуна адава.

⁴² Ӏисайис ге къачагъа пуная: – Вун ве Паччагьвелдиъ ушугуна, кӀвал акье зун, Ӏиса.

⁴³ Ӏисайи пуная гис: – Зун вас дузди агъая, вун ягӀа Захъай джайнаттиъ ахьасе.

Ӏиса кӀиная

⁴⁴ СеӀет цӀеӀударис кӀилди джилил мучӀ атӀуная сеӀет хьибударисттегьен,

⁴⁵ рагъ гулуна. Аллагьдин хулаъ Гирами мукьуйик кея парда, яӀанилас чӀургъуна, Ӏу кьатӀ хьуная.

⁴⁶ Ӏисайи, гьавайикес гъургъуна, пуная: – Дад! Ве гъилиди ицӀандея Зун Зе руьхӀ. Гьегера пуна, Ӏисайин руьхӀ дивуная.

⁴⁷ Эскерарин хӀатти, гисаъ хье кар агуна, Аллагьдис шукур акьуна, пуная: – ХӀекьданди, ге инсандик тахсир кидавуйи.

⁴⁸ КӀилди гисаъ завал хьуна халкь, гисаъ хье кар агуна, чиппин мухурис гъурданф аркьай далгъуная.

⁴⁹ КӀилди Ӏисайис ягӀаттара, Гихъай Галилеяйиас мич адина хумбара, вархайилас хъуттурфанди гъузуна ахьуная.

Ӏиса некьвариъ икӀуная

⁵⁰ Гисаъ ахьуная са Юсуф агъа юркӀуран дуз идже инсан. Юсуф гӀахьуная Ӏисайин диван аркьа инсанаригӀ,

⁵¹ амма ге рази хьуна адава Ӏисайис гебури аттивуна, акьу диванил. Ге Юсуф хьуная ягӀударин Аримафей агъа шагьурдиас, гъузунаф Аллагьдин Паччагьвелдихъ.

⁵² Юсуфа, ушуна Пилатагьди, тӀалаб акьуная Ӏисайин майит.

⁵³ Юсуфа, кеттивуна Ӏисайин майит, гӀадиджина кафанигӀ, дагьар атӀуна икӀуная некьвдиъ. Тисаъ гегунасттегьен садра икӀуна ахьуна адава.

⁵⁴ ДжумӀе ягъан гӀуьбехъмин гагь хьуная, вей хьуная киш ягъ.

⁵⁵ Галилея дерейиас Ӏисайихъай адина уйи хумбарисра агуная Гин некьвра, Гин майит некьвариъ икӀайра.

⁵⁶ Тисаас адегуна, ге хумбари хӀезур акьуная батӀар ниъ хъая ччамар. Киш ягъа гебури са кара акьуна адава, Мусайин Закуниъ ликӀинаф суман.