Лука 22 - Лукайин Китаб Месигь Ӏисайихъас Идже Хабар

Ягьуда рази хьуная Ӏиса масса ес

¹ Хъучавей хьуная химир кидава лавашар аркьа Пасха агъа хӀа ягъ.

² ХӀа маллабурисна Ӏелимарис кӀес кканди ахьуная Ӏиса, амма халкьдигьас гучӀай ахьуная гебурис.

³ Ӏисайин цӀеӀу вакилакес, Ягьуда Искариут агъа вакилаъ учӀуная Иблис.

⁴ Ягьудайи, ушуна маслихӀет акьуная хӀа маллабурихъайна Аллагьдин хулан къаравуларин хӀаттихъай, зун чвас Ӏиса фацанас кумак акьасе пуна.

⁵ Гебур шад хьуна, рази хьуная Ягьудайис арсуран пул ес.

⁶ Гаф йина гебурис, Ягьуда гъузуна ахьуная халкь гьудава, хӀуьчӀан вахттунихъ, Ӏиса гебурин гъилиъ ихьас.

Пасхайис хӀезурвелар

⁷ Хъучадиная химир кидава лавашар аркьа хӀа ягъ. Ге хӀа ягъас руккай хьуная Пасхайин ккел.

⁸ – Ушуна, хӀезур акье Пасхайин ккел, хьес ӀуьтӀанас, – пуна, гьикуная Ӏисайи Петтруна ЯхӀъя.

⁹ Гебури хабар гъушуная Ӏисайифас: – Нандиъ хӀезур акьуна ккандея Вас чин?

¹⁰ Ӏисайи гебурис пуная: – Чун шагьурдиди ачушугуна, чвас агвасе хьеттин гвар фай вея са инсан. Гьегин кьабахъай ушуна, ачаях гьеге ачавере хулади.

¹¹ Ачушугуна, чун ге хулан эессис уп: «МегӀелимди вафас хабар гъуланде уйи, нае хулаъ э пуна, Учи Учин ученикара хъай Пасха аркьаф?»

¹² Ге хулан эесси агваракьасе чвас дуьхуьна варттал але хӀа хал; гьетисаъ хӀезур акье Пасхайин ямагар.

¹³ Гебури, Ӏисайи чиппис пегъилди, джикӀина хӀезур акьуная Пасхайин ямагар.

Ӏиса Учин вакиларихъай Пасайин суфрайихъ

¹⁴ Вахтт хъучадегуна, Ӏиса Учин вакилара хъай, экьуная суфрайихъ.

¹⁵ Ӏисайи Учин вакиларис пуная: – Зун гӀезабарикк ккерхьагунас, фидегьен кканде уйи Зас чвахъай экьуна Пасхайин ямагар ӀуьтӀанас.

¹⁶ Зун чвас агъая, сара Зун ме Пасхайин ямагар ӀуьтӀанасттава, Пасха Аллагьдин Паччагьвелдиъ дахьудегьен гагьди.

¹⁷ Ӏисайи, гъушуна чехир ая курушка, шукур акьуна Аллагьдисра, пуная Учин вакиларис: – Ма, чве арайи пай акье ме.

¹⁸ Зун чвас агъая, гьалдин хаб Зун ухасттава ме тӀибитӀарин чехир, Аллагьдин Паччагьвел хьасттегьен.

¹⁹ Ӏисайи, гъушуна гуни, шукур акьуна Аллагьдисра, пай акьуна йина вакиларис, пуная: – Ме гуни Зе джан э, Зун чвахъас ирцӀандеяф. Гьемиштти чун завал хьуна гуни Ӏелегуна, Зун кӀвал аркьай акье.

²⁰ ӀуьтӀуна кӀиркӀугуна, Ӏисайи гьетиштти гъушуна сасра курушка чехира, пуная: – Ме Зун чвахъас аларта Зе иилди ликӀина ЦӀае МаслихӀет э.

²¹ Магьа Зун масса ирцӀанде инсан, Захъай са суфрайихъ хъая.

²² Инсандин КӀиркӀ Учис ликӀина рекъуьъ ай э веяф. Амма язукъ э Ге масса е инсандин.

²³ Вакилари са сайис агъай хьуная: «Гьинас эгьан хьегӀас Ӏиса масса ес ккандеф?»

ХӀавелдихъас хӀуьджат

²⁴ Ученикарин арайиъ хьуная хӀуьджат, фуш чиппикес хӀавелдиъ хьуна кканчин. Ӏисайи пуная гебурис:

²⁵ – Паччагьари чиппин халкьарин хӀавел аркьа, чиппин гъилиъ хӀавел аяттари, чаб халкьдис иджвелар аркьаттар э агъа.

²⁶ Чун гиштти маркьа. ЧвагӀас хӀатти, уч бицӀиф суман фацурай, хӀавелдиъ аятти, уч лукӀ суман фацурай.

²⁷ Фуш э хӀаф? Суфрайихъ хъаяф эв, хъара гигь гьуруцаяф эв? Суфрайихъ хъаяф ду хӀаф?! Магьа Зун чве лукӀ суман ая.

²⁸ Чун Захъай кӀилди азиятар гъадивунаттар э.

²⁹ Зун ирцӀандея чвас Паччагьвел, Зас Зе Дада еф суман.

³⁰ Чун Зе Паччагьвелдиъ Зе суфрайихъ Ӏелди ухай ахьасе, чун экьуна тахттарил Ӏизраилдин цӀеӀу тухумдин диван аркьай ахьасе.

Вун хьибугелай пасе, вас Зун ягӀафттава пуна

³¹ – Симон, я Симон! Магьа Иблисас чун гӀаттирхӀас ккандея, кьурагӀас ттузар гӀаттирхӀаф суман.

³² Зун вахъас дуьгӀе акьуне ве хъугъувел дагулурай пуна; хаб мус хьунара, вун хъугъуна адегуна, ве чуппарин хъугъувелла цӀуьппе акье.

³³ Симон Петтруйи Ӏисайис пуная: – Е ХӀаф, Вахъай зун дусттагъидира, Ӏеджал акьасра вес хӀезурдея.

³⁴ Ӏисайи пуная: – Зун вас агъая, Петтру, завкураригӀди ккеккела ӀуьӀуь ахъасра хъучархьасттава, вун хьибугелай пасе, вас Зун ягӀафттава пуна.

³⁵ Ӏисайи хабар гъушуная вакиларифас: – Зун чун я пул фадавай, я чанта фадавай, я шумар алдавай гьикугуна, чвас фера гьудуркӀуф хьунев? – Хьундава, – пуная гебури.

³⁶ – Гьал, – пуная гебурис Ӏисайи, пӀапӀушник хъаятти гъушурай папушникӀра, гъушурай чӀилӀанна, ханджал хъудатти, учин къундж масса йина, гъушурай ханджалла.

³⁷ Зун чвас агъая, Захъас ликӀинаттар, закунар хӀисабсуз акьуф э пуна, аларкьвасе. Джалла Захъас пунаттар аларкьвасе.

³⁸ Вакилари пуная Ӏисайис: – Е ХӀаф, магьа мисаъ Ӏу ханджал ая. – ЧӀевене, – пуная гебурис Ӏисайи.

Ӏиса Учин ученикарихъай Элеун сувалди ушуная

³⁹ Хулаас аттина, Ӏиса Уч гьемишанди суман, ушуная Элеун сувалди. Гихъай ушуная ученикара.

⁴⁰ Гисалди адегуна, Ӏисайи гебурис пуная: – ТӀемехӀвелариъ адархьас, дуьгӀебур акье.

⁴¹ Ӏисайи гебуригьас са чӀукь манзили гьайчӀуна, гъузуна кьвакьварилди, дуьгӀе акьуная:

⁴² – Дад, Ве амур акьуна, ккеттив сара Зун ме гӀезабиккес. Зе амур ваъ, Ве амур хьурай.

⁴³ Ӏисайилди завариас малайик аладиная, Гин юркӀв цӀуьппе акьас.

⁴⁴ ГӀезабикк ккей, Ӏисайи хъара Ӏайи юркӀураастти дуьгӀебур аркьай хьуная. Гилас эмкӀ алавей хьуная джилилди, иин тӀинкӀар суман.

⁴⁵ ДуьгӀебур акьухаб, Ӏиса гъайшина гьучушуная Учин ученикаригьди. Гъамра хьуна, гъархьуна ахьуная ученикар.

⁴⁶ Ӏисайи гебурис пуная: – Фас гъархьунаттар э? Гъайшина дуьгӀебур акье, чун тӀемехӀвелдиъ адархьас.

Ягьудайи Ӏиса масса йина, Ӏиса фацуная

⁴⁷ Ӏиса гъургъай ай, гисагьди аттархьуная ацӀуна инсанар. Ке удигь гьахьуная цӀеӀуйигӀас сад, Ягьуда агъаф. Ге гьучадиная Ӏисайигьди мач икӀас пуна.

⁴⁸ Ӏисайи пуная гис: – Ягьуда, мачра икӀуна масса ирцӀандеяв вун Инсандин КӀиркӀ?

⁴⁹ Ӏисайихъай аяттарис агуная гисаъ фи хьунара вереф. Гебури хабар гъушуная Ӏисайифас: – Е ХӀаф, ханджалар аттивав чин?

⁵⁰ ГебуригӀас сайи ханджалилди йирхӀуна алдихьуная хӀа малайин лукӀун хӀуьрджал ибур.

⁵¹ – Маркьа, гъузен! – пуная гебурис Ӏисайи. Гъил кирхӀуна, сагъ акьуная Ӏисайи лукӀун ибур.

⁵² Уч гъас адина хӀа маллабурис, Аллагьдин хулан къаравуларин хӀаттарис, хӀа къуджабурис Ӏисайи пуная: – Чун къачагъ фацанас адеттар суман адиная Заалди ханджаларна ресар фай.

⁵³ Зун чвахъай гьер ягъа Аллагьдин хулаъ авейи, чун Заалди гъил гъадивундава. Гьал чве вахтт хъучадиная, Иблиса хӀавел аркьа вахтт.

Петтруйи учис Ӏиса ягӀафттава пуная

⁵⁴ Ӏиса фацуна файшуная гебури хӀа маллайин хулади. Петтру гебурин кьабахъай вей хьуная.

⁵⁵ ХӀеятин яӀаниъ акьуна цӀа, инсанар экьуна ахьуная цӀихъ. Петтрура экьуная гебурихъай.

⁵⁶ ЦӀихъ экьуна са къараваш руша, ачадаркуна Петтруйиъ, Петтру ягӀархьуна пуная: – Гьемера ай уйи Ӏисайихъай!

⁵⁷ Петтру мутӀеӀ хьуна адава: – Е руш, зас ягӀафттава Ге, – пуная Петтруйи.

⁵⁸ Са чӀукь гагьдилас сасра инсандира, Петтру агуна, пуная: – Вунна гьегебурихъай аяф э. – Дава, – пуная Петтруйи.

⁵⁹ Са сеӀет дегьен вахтт ккеттушугуна, джуьреттира Петтру ягӀархьуна, пуная: – ХӀекьди гьемера ай уйи Ӏисайихъай, Галилея дерейиас ду ме?

⁶⁰ – Зас ягӀайдава фиттихъас ичин вун агъаяф, – пуная Петтруйи ге инсандис. Петтруйи гиштти агъай ай, ккеккела ӀуьӀуь ахъуная.

⁶¹ Ӏиса, алдаркуна, хъуттурфуная Петтруйихъ. Петтруйис кӀвал хьуная Ӏисайи учис пе гафар: ккеккела ӀуьӀуь ахъасра хъучархьасттава, вун хьибугелай пасе, вас Зун ягӀафттава пуна.

⁶² Петтру гисаас аттушуна, юркӀурак хьуна, Ӏешуная.

Ӏисайик келхъенди ахьуная

⁶³ Ӏиса фацуна инсанари, келхъенди ахьуная Ӏисайик, йирхӀай хьуная Гис.

⁶⁴ ГьайтӀуна Ӏисайин уларигьас, гебури агъай хьуная Гис: – Нагагь Вун Пайгъамбар идехаб, уп, магьа гьина э Вас йирхӀуф?

⁶⁵ Хъара ппара келхъен чӀалар агъай хьуная Ӏисайис.

Ӏисайин диван акьас завал хьуная

⁶⁶ Багамингагь хьегуна, завал хьуная хӀа къуджабур, хӀа маллабур, Ӏелимар Ӏисайин диван акьас. Ӏиса аттивуная гебурин удигьди.

⁶⁷ Гебури пуная Ӏисайис: – Уп час, Вун Месигь эв? Ӏисайи пуная: – Зун чвас пичин, чун хъугъасттава;

⁶⁸ Зун чвафас фас хъугъафттава пуна, хабар гъушучин, чун джуваб есттава. –

⁶⁹ Гьалдилас тич Инсандин КӀиркӀ экьуна ахьасе Аллагьдин хӀуьрджал багулихъ.

⁷⁰ – Айчин, Вун Аллагьдин КӀиркӀ эв? – пуная джаллабури. Ӏисайи гебурис пуная: – Чун агъая Зун э пуна.

⁷¹ Гебури пуная: – Фиттис герек э хьес хъара шигьидвел? Хьес джалла Гикес Учикес унихьуне!