Лука 21 - Лукайин Китаб Месигь Ӏисайихъас Идже Хабар

АшкӀин хьиран садакьа

¹ Ӏисайис агуная Аллагьдин хулаъ девлетлу инсанари садакьайин къабудиъ пулар ихьай.

² Ӏисайис агуная са гӀеджиз ашкӀин хьирара ифан Ӏу кепек ихьай ге къабуди.

³ Тегуна Ӏисайи пуная: – Зун чвас дузди агъая, ге гӀеджиз ашкӀин хьира джаллабурилас ппара ихьуная пуна.

⁴ Джаллабури садакьайис ихьуне чиппин алтухъди аяттикес, ппай ге гӀеджиз хьира, учихъ хъая хъудаваф кӀилди ихьуне.

Аллагьдин хал аккетасе

⁵ Аллагьдин хулахъас гъургъагуна, Ӏисайин ученикарикес са Ӏудари пуная: «Фидегьен батӀар гъванарикес акьуная ме Аллагьдин хал, фидегьен багьайин садакьайин шейъерилди дуьхьуьная ме хал». Ӏисайи пуная гебурис:

⁶ Хъучадесе, лишттин вахттар, чвас аргваттикес гъван гъвандил илгванасттава, кӀилди аккетасе.

⁷ Ӏисайифас хабар гъушуная гебури: – МегӀелим, мус хьасе лишттин кар, фи ишарат агвар акьасе ле верегунас?

⁸ Ӏисайи гебурис пуная: – Хъуттурфен гьа, чун элдемиш дакьас. Ппараттар адесе чваалди «Зун Месигь э!» «Вахтт хъучадиная!» агъай. Чун мева гебурихъай.

⁹ ДегӀвибурихъас, къал макъаларихъас унихьугуна, гучӀ мева. Гебур дахьуна илгван курар дава, амма гебурилди ахир хьасттава.

¹⁰ Хаб Ӏисайи гебурис пуная: – ГӀахъасе са халкь сасра халкьдихъай, са паччагь сасра паччагьдихъай.

¹¹ Сур усари зурбадалди джилар ттуттанасе, сур усариъ азарарна гаш архьасе, завариас гучӀ гьархьа курарна хӀа Ӏеламатин ишаратар агвар акьасе.

¹² Сагелай гебур хьастти, чун Захъ хъугъуна, Захъай вехӀела, чваал алгъузуна, чун фарцанди ахьасе. ДуьгӀебур хура хулариъ чве сутар аркьай ахьасе, чун дусттагъариъ ачикай ахьасе, чун паччагьарина хӀекимарин удигь джуваб йина кканхьасе.

¹³ Гьетегуна Заалас шигьидвел акьас хьасе чвафас.

¹⁴ Чун фикир маркьа, фишттин джувабар ицӀандегьан чин тисал пуна.

¹⁵ Зун чвас гьелишттин Ӏекьулдин гафар ягӀар акьасе, сайифасра чвахъай гъургъуна, хаб чвас джуваб ес девегъилди.

¹⁶ Дадар бабарира, чуппарира, багунттарира, дусттарира чун масса есе, са хубджи инсанар чвакес йирхӀуна кӀесе.

¹⁷ Захъас Чун сайисра кканди ахьасттава.

¹⁸ Амма чвас гучӀ мева, са чӀара кехӀей чве кӀилилас алархьасттава.

¹⁹ Чве сабурди чун ухӀасе.

Ерусалим аккетасе

²⁰ – Чвас Ерусалим якьу багухъас эскерари фацуна агугуна, ягӀарухь, ге шагьур гебури аккетасе.

²¹ Тегуна Ягьудея дерейиъ аяттар гьиширай дагьарариди; Ерусалимдиъ аяттара тегӀди гьишина ушурай; шагьурдиас аттушунаттар, хаб шагьурдиди ачадайдирай.

²² Хъучадиная инсанарин диван аркьа ягъар, алуркьвая кӀилди ликӀинаттар.

²³ Язукъ хьасе фуни аяттаринна бизихъ шиниккв хъая хумбарин. Ппара хӀа гуджлу зулумар хьасе ме джилил. Аллагьдин хъелакк ккичархьасе ме халкь.

²⁴ Сур ханджалифас кӀесе, сур фацуна сасра вилаятариди гъасе. Сасра халкьди аккертай ахьасе Ерусалим, чаб гисаъ амедегьен гагьди.

Инсандин КӀиркӀ адесе

²⁵ – Завариъ рагъулла, вазуралла, гӀадарилла Ӏеламатин ишаратар агвар акьасе; джилил халкь гучӀ гьархьуна, фиркьайчира дагӀай, зар загьла хьуна ахьасе; хӀуьлар гъутуна лепебурин ун алхьасе.

²⁶ Инсанар, джилил вея бедбахттвелар аргвай, юркӀвар чурхъай алгъадаркай ахьасе, сара фи агвас амегьан час агъай. Завун гӀадара кехӀей ттуттанасе.

²⁷ Ттагьтегуна Инсандин КӀиркӀ агвасе дифу гӀай вей ппара хӀа кьуватна тегӀриф хъай.

²⁸ – Ме курар хьас хъучучӀугуна, чвас гучӀ мева. Дузди гъайшина, кӀилар вартт акье. Чвас азадвел вере вахтт хъучавея.

Аллагьдин паччагьвел багу ая

²⁹ Хаб Ӏисайи ахъакьуная гебурис мисала: – Хъуттурфен инджирин кӀуранихъра, джалла сасра кӀурарихъра.

³⁰ Гебуриъ тук архъай агугуна, чвас ягӀай аве, гӀул хъучавеяф.

³¹ Гьегиштти, Зун педегьенттара аларкьвай чвас агугуна, ягӀарухь, Аллагьдин Паччагьвел багу хьунаф.

³² Зун чвас дузди агъая, ме гьалдин инсанар дуьйилас алаверегунас, Зун Ерусалимдихъас петтар джалла аларкьвасе.

³³ Заварна джилар гуланасе, Зе гафар амилгвасе.

Гьемишанди хӀезурди ухь

³⁴ – Те ягъ хабарсузди адесе. Хъуттурфен гьа чун ухай адахьас, пиянди адахьас, я ппара фикирар аркьай, гъамар аркьай адахьас.

³⁵ ТӀабариъ архьаттис учис тӀабар гьахъунаф хабарди адаф суман, гьегиштти джилил ешемиш вея инсанарисра сайисра хабарди ахьасттава мус хъучадес ичин те ягъ.

³⁶ Чун гьемишанди хӀезурди ухь, дуьгӀебура аркьай, те хьас кке бедбахттвелариккес чун ккеттархьас, чвафас Инсандин КӀиркӀан удигь гъузанас хьас.

³⁷ Ягъуй Ӏиса Аллагьдин хулаъ авей хьуная халкьдис ягӀар аркьай, ппай Ӏуьш акьас вей хьуная Элеун сув агъа кӀунтӀалди.

³⁸ Багами дахи халкь хаб завал вей хьуная Аллагьдин хулаъ Ӏисайил юркӀв алиянас.