Лука 2 - Лукайин Китаб Месигь Ӏисайихъас Идже Хабар

Хуная Ӏиса

¹ Те вахттуни Август агъа паччагьди буюрмиш акьуная, сан аркьай ликӀен пуна джалла учин джилил ешемиш веядегьен инсанар.

² Гиштти сан аркьаяф инсанарин садпегелай хьуная Сирия агъа хӀуькуматтин хӀаф Квириний идегуна.

³ Джаллабур ушуная чаб учётариъ ихьас чиппин шагьурариди, хӀурариди, гьерф учин дадарин ватандилди.

⁴ Юсуфра ушуная Галилея дерейин Назарет агъа хӀуриас Ягьудеяйиди, Вифлеем агъа Давудан хӀуриди, Юсуф уч Давудан тухумдиас идехӀела.

⁵ Юсуфахъай ушуная гин фуни ая хьир Майрамра.

⁶ Са чӀукь гагьдилас Вифлеемдиъ хъучадиная хьиран руха вахттар.

⁷ Хуная Майрамас садпе шиниккв – кӀиркӀ. ГӀадиджина чаппаригӀ, икӀуная ги шиниккв тӀунаъ, гӀалашувар гъурзан хулаъ мукь ахьуна адава гебурис.

Малайикари хӀуьппехъенарис акьуна идже хабар

⁸ Майрамна Юсуф ая мукьуйигьас Ӏайи варха давай хӀуьппехъенар алхьуная чӀирил Ӏуьшан къаравулдиъ.

⁹ Сад пуна, заварин нур ичай, бадил хьуная гебурин удигьди малайик. ГучӀ хьуна тӀушас девей гъузуная хӀуьппехъенар.

¹⁰ – Чвас гучӀ мева, – пуная гебурис малайикди. – Зун кӀилди инсанарис, идже хабар фай адинафе.

¹¹ ЯгӀа Давудан хӀуриъ Вифлеемдиъ хуная Месигь, инсанар УхӀаф.

¹² Чвас те Шиниккв магьмилди ягӀархьасе: чаппаригӀ гӀадиджина тӀунаъ ахьасе Те.

¹³ Садпуна ге малайикдин багуливди бадил хьуная хъара ппара малайикар, дуьгӀебура аркьай:

¹⁴ – Шукур варттал але Аллагьдис. Дуьхьуьвелна нуьхӀуьбат Аллагь рази ая джилил аледегьен инсанарис.

¹⁵ Малайикар уларигьас гулугуна, хӀуьппехъенари пуная: – Див хьин, хьес Аллагьди акьуна хабарихъди Вифлеемдиди вес, агвас тисаъ хьунаеф.

¹⁶ ТегӀди кей учӀуная хӀуьппехъенар рекъуьъ. Адегуна, джикӀиная гебури Юсуфна Майрам. ТӀунаъ икӀуна бицӀи шиникквра ахьуная.

¹⁷ Шиниккв агуф, хӀуьппехъенари ахъакьуная чиппис малайикди Ге Шиникквдихъас петтар.

¹⁸ Джалла юркӀв алийинаттар муьхӀтал хьуна гъузуная, хӀуьппехъенари файдина хабарил.

¹⁹ Майрама кӀилди ге курар учин юркӀураъ икӀуна атуная.

²⁰ ХӀуьппехъенар адиная хаб алдаркуна, шукур аркьай Аллагьдисра, кӀилди чиппис агуттарисра унихьуттарисра. Малайикди гебурис пунагъилди хьуная.

²¹ Муйе ягъалас суннат аркьа вахтт хьегуна, алихьуная шиникквдил ттур Ӏиса. Фуниъ хьастти алийина ттур хьуная ге малайикди.

Ӏиса Аллагьдис бахш акьуб

²² Шиниккв хуна хумбеф мертт вере вахтт алттархьегуна, Юсуфана Майрама, Мусайин закунилди, файдиная Шиниккв Ерусалимдиди Аллагьдис бахш акьас,

²³ Аллагьдин закуниъ ликӀинагъилди: «Гьертти учин садпе кӀиркӀ бахш акьуна кканефе Аллагьдис»,

²⁴ садакьара акьас, Аллагьдин закуниъ пунагъилди: «Ӏу гӀуд я луфуран Ӏу чарккв».

²⁵ Ахьуная те вахттуни Ерусалимдиъ Симеон агъа са инсан. Ге хьуная Аллагьдин юлайиъ ай дуз юркӀуран инсан, гъузунаф Аллагьдин Кумакихъ Ӏизраилдис. Гил алхьуная Аллагьдин РуьхӀ.

²⁶ Симеонас Аллагьдин РуьхӀди пуна ахьуная: – Вун кӀесттава Месигь дагуна.

²⁷ Аллагьдин РуьхӀди ях агъаф суман, адиная ге Аллагьдин хулади. Гьеге ягъа Юсуфана Майрама файдиная гич бицӀи Ӏиса, закуниъ агъилди акьас пуна.

²⁸ Гебур ачадегуна, Симеона училди гъушуна Шиниккв, шукур акьуна Аллагьдис, пуная:

²⁹ – Гьал Вун фартая юркӀв сакинди Ве лукӀ, Аллагь ТегӀела. Аларкьуне Вун пуна гаф:

³⁰ Зе уларис агуне инсанар УхӀаф,

³¹ Вун джалла халкьарис гьикунаф.

³² Ӏекв, кӀилди халкьарин улар дархъаф, ТегӀрифе, Ве Ӏизраилдин халкьдин.

³³ Дадна баб муьхӀтал хьуная Симеона Шиникквдихъас петтарил.

³⁴ Симеона гебурис хайир дуьгӀера акьуна, Майрамас, Гин бабас, пуная: – Ме Шиниккв багьана хьуна, ппара инсанар Ӏизраилдиъ ахтт хьасе, ацӀунттар Гин кумак фай гъайшасе. Михъас ппара хӀуьджатар, гъургъубар хьасе,

³⁵ ве юркӀураас ханджал аттирхӀу суман хьасе вас джуьреттарин юркӀураъ ая джинабан хиялар ягӀархьегуна.

³⁶ Гисаъ ахьуная пайгъамбар Аннара, Фануилан руш, Асиран тухумдиас. ХӀа яшарин Ӏуьссе хьир хьуная ге, шувас ушуна ери исалас джигьилди ами ашкӀин хьунаеф.

³⁷ Аме Ӏуьмур фатуная ги ашкӀинди. МайцӀурна якьу ис хьуная гин. Сивара ухӀай, дуьгӀебура аркьай, гьемишан Аллагьдин хулаъ ахьуная Анна.

³⁸ Те арайи Аннара гьучушуна гебуригьди шукур акьуная Аллагьдис. Ерусалимдис Кумакихъ гъузунадегьен инсанарис ахъакьуная Аннайи ге шиникквдихъас.

Юсуфна Майрам хаб адиная Назаретиди

³⁹ Аллагьдин закуниъ пунадегьенттара акьуна, адиная Майрамна Юсуф Галилея дерейиди, чиппин Назарет агъа хӀуриди.

⁴⁰ Шиниккв хӀа вей батӀар джанра акьуная, фагьумра ппара хьуная, Аллагьдин дуьгӀебурин иджвел алхьуная Гил.

Ӏиса ахьуная Аллагьдин хулаъ

⁴¹ Гьер иса Ӏисайин дадар бабар вей хьуная Ерусалимдиди Пасхайин хӀа ягъас.

⁴² Ӏисайин цӀеӀу ис хьегуна, адиная гебур, гьемишан чаб верегъилди суман, хӀа ягъарис Ерусалимдиди.

⁴³ ХӀа ягъар кӀиркӀухаб, дадна баб ушуная хулади, Ӏиса экьуная Ерусалимдиъ. Дадар бабарис ягӀай хуна адава, Ге тисаъ амеф.

⁴⁴ Гебурин фикир хьуная джуьре инсанаригӀай рекъуьъ ай Ме пуна. Гиштти ушуная мебур кӀилин ягъди. Хабди, руцуная Майрамна Юсуф Гихъас багунттаригӀ, ягӀаттаригӀ.

⁴⁵ ДаджикӀина, хаб адиная мебур Ерусалимдиди Гихъас руцас.

⁴⁶ Хьибу ягъалас джикӀиная мебурис Ге Аллагьдин хулаъ. Ге гӀахьуная мегӀелимаригӀ, гебурил юркӀв алийина, гебурис суалар ирцӀанди.

⁴⁷ Джалла Гил юркӀв алихьунаттар муьхӀтал вей хьуная Гин фикирарил, Гин гъургъубарил.

⁴⁸ Дадна баб ппара муьхӀтал хьуная Ге агуф. Баба пуная Гис: – Е зе кӀиркӀ, Вун фас миштти акьуфе час? Ве дадра зунна гъамар аркьай руцай уйи Вахъас.

⁴⁹ Ӏисайи гебурис пуная: – Фас руцаттар э чун Захъас? Чвас ягӀай адавуйив Зун Зе Дадан хулаъ ахьуна кканеф?

⁵⁰ Гебур гъавурдиъ архьуна адава Ӏисайи чиппис петтин.

⁵¹ Ӏиса адиная гебурихъай Назаретиди, гебурин юлайиъ ахьуная Ге. Джалла хьунаттар Ӏисайин баба учин юркӀураъ икӀуна атуная.

⁵² Ӏиса хӀа вей, Ӏисайин фагьумра ппара хьуная, батӀар джанна акьуная. Ӏиса кканхьуная Аллагьдисра, инсанарисра.