Yuldav 1 - Akeu (Gaolkheel)

Iqmoeq ilmoeq khe daoq

¹ Ngal neq, Yeiqsul Khali nail yaqkav khi mail Yaqkov nail jaqbheq Yuldav ngaol. Miqyail-i mail khul-ai thaq nail nul juq bhai haoqgavq niil gevq bhoel-ai leevq-a nail ngaol. Aqbhu Miqyail nul juq bhai gaiq-a khi, Yeiqsul Khali nul juq bhai hel daiq phail nail ngaol.

² Gaoq haq gaiq-a nail phaq, nee sal ovq nail phaq khi mail, goil nail gaiq-a nail phaq nul juq nail lavqkhoel teevq pov nee teevq pov maol lal dei-eiq.

Mal dil saq laq maq ngel nail juq nail ganl

³ Ngal mail ma-ail gaiq-a nail aqtsaoq juq-ol, Miqyail ngadao juq bhai hevq kovq lavq-a nail ganl ngal nul juq bhai gevq bhoel-ai leevq movq dee dee ail nial. Thail hai ngaol-aoq, Miqyail-i mail teevq pov taivq-ail aivq nail tsaol-aq juq bhai av bhiq-ai thaq nail neema thaq tsaol nail phaq nail haqbhoil lai jai dee dee yaoq dai, ngal nul juq bhai gaq bivq nail lavqkhoel haoqgavq niil gevq bhoel-ai leevq-a nail ngaol.

⁴ Khul khi mail dai ngal-aq neq, tsaol-aq teevq pav ga nav juq nul juq nail lavqkhoel bhai aol khoiq lal-a nail ngaol. Miqyail bhai maq ev nail tsaol-aq al juq neq, haqeiv nail phaq khi mail, aq jiivq aq cavq phaq ya nl dai, Miqyail nail geeqlaoq eel jaol bhai lav phal-a nail ngaol. Yeiqsul Khali taivq-ail ngadao bhai uv thaiq nail gaq khi mail, ngadao nail Heeqphaq pevq nail bhai, aqyu juq khaonq ha-a nail ngaol. Aqyu juq neq, yalkhaq dal nail bhai ya daq naol dai, aq-u nee mail Jal liq lavqkhoel bhai gevq-ai thaq nail ngaol.

⁵ Ilsaqleiqlav nail tsaol-aq juq bhai Iljiltuv milkhaoq lavqkhoel nee Heeqphaq Miqyail khal hai hevq kovq bhiq khi, haoqnao aqyu juq nail lavqkhoel khe neema maq thaq tsaol nail tsaol-aq juq bhai lav luq lav seil bhiq-a nail bhai ya daq-a nail ganl al nul juq heeq nia nail ngaol. Thail hai ngaol-aoq, ngal nul juq bhai teevq pov gaoq ge noeq movq nail ngaol.

⁶ Al ovqtavq, yovqgavq nail alyaq bhai khaonq ha khi yovqgavq nail jaol duq nee mail tsaoq-a nail nqtavq gaqkhoel bhai, nqmaq maqluv halyeel ivq niail hailcav-i mail pheethaiq khi, nav tsee deel jaol duq bhai laol thaiq-ai thaq nail ngaol. Yalkhaq dal nail aqn n ma kev lal-u kev dai, aivq aqyu juq bhai al hai laol thaiq-ai thaq nail ngaol.

⁷ Al hai dul dai, Saoldoq meenq, Gaolmaollav meenq khi mail, aqjail bhai jiav nail meenq juq iqsanl, ngadao juq nail haqbhoil saol oil duq pevq nail ngaol. Meenq al juq nail lavqkhoel bhai jaol nail tsaol-aq juq neq, khaqmiq sev dee dee khi, aqsivq haqjoil phao khe maq nl khaoq nail mee nia phaq nl-a nail ngel-i mail, nqmaq maqluv halyeel tovq thail thaiq nail miqjaq nail lavqkhoel, khoeq nail jiovq nail bhai ya daq nail ngaol.

⁸ Mal dil maq ngel nail saq laq juq iqsanl al hai dul dai, nv mav mav moel-a nail phaq bhai juq juq ail, yovqgavq nail aqmaol bhai yovqgavq oeqbal nl-a nail ngaol. Aqyu juq neq, Miqyail uv thaiq nail bhaqaoq bhai khal nl movq ail nl khi, nqtavq kovtavq bhai jaol nail seiqleiq khaoqsail eeq nail juq bhai khal ge movq ail ge-a nail ngaol.

⁹ Nqtavq gaqkhoel juq nail lavqkhoel yu nee maq tsil eeq jaiq nail nqtavq gaqkhoel Milkheiqlal neq, sil thaq nail Maolseiq nail aqmaol nail ganl nee tavq lai khi, neivq heeqphaq nee jil pheel jaq-u phao, aivq bhai khal ge movq ail ge ge ail yalkhaq maq dal tseq-ail. “Heeqphaq Miqyail naoq bhai khaq dei-eiq” dai, neivq heeqphaq bhai ge bhiq-a nail ngaol.

¹⁰ Thail hai ngaol-aoq, tsaol-aq niil juq neq, aqyu juq maq heeq nia nail phaq nail ganl bhai khal ge movq ail ge nail ngaol. Aqyu juq neq, khul teevq phaq iqsanl maq saol-nvq nia nail haqtsoiq jaiqyaq khe-ai, yovqgavq-i mail heeq nia nail phaq nail haoqnao taivq-ail tsao the nail ngel-i mail, luq ail seil ail nail ngaol.

¹¹ Aqyu juq neq, geeqlaoq aqdoil ya nail ngaol. Khul khi mail dai ngal-aq, aqyu juq Gaqilnav nail haoqnao tsao the nail ngaol. Al ovqtavq, aqyu juq phul heel bhai neekhaol jiav nail lavqkhoel, Bhaqlaq nl bheeq-a nail haoqnao tsao the tsao the ail nl-a nail ngaol. Gaollav Miqyail bhai pheeq-a nail khe-ai, aqyu juq iqsanl pheeq-a nail ngel-i mail, ya luq ya seil ail nail ngaol.

¹² Nul juq goil nail gaiq-a nail aqbhee lav sav khi, jaq thail thaiq-u phao, Khali yaq juq nail seiqleiq khaoqsail bhai lav jiivq lav cavq nail phaq pevq nail ngaol. Aqyu juq jaq tavq daol tavq-u phao, yu bhai maq haq sil nail nee ovqtavq, yu bhai maq ev dai, yovqgavq nail yaol yaq bhai maq hel daiq mail, yovqgavq nail haqbhoil taivq-ail saol-nvq nail ngaol. Aqyu juq neq, lilmoel-i mail, bhoel aivq thail thaiq nail maoq-aol maq aol nail nqdil khe-ai dul nail ngaol. Aq heeq heeq nail yanq bhai aqheeq maq heeq lee nail ngel-i mail, daoqthaoq nee mail bhi ngaoq bov khi nvq pov sil-a nail aqheeq aqbhaol khe-ai iqsanl, dul nail ngaol.

¹³ Aqyu juq neq, iqyaq iqma lavqkhoel eel khaol thaoq dee dee-u phao, bheelmevq dov lal nail khe-ai, aqyu juq yovqgavq-i mail haq sil nail phaq bhai, yovqgavq bhi dov lal-a nail ngaol. Aqyu juq neq, yovqgavq nail gailkhaol bhai yovqgavq maq tsaiq nail aqgil khe-ai, dul nail ngaol. Aqyu juq nail haqbhoil nav tsee deel jaol duq bhai nqmaq maqluv halyeel lav sav-ai thaq nail ngaol.

¹⁴ Aqdaq nee mail aq ceevq ge khal leevq-u phao, sivq yeel teevq yeel nail lavqkhoel bhai jaol-a nail Eilnaov iqsanl aqyu juq nail ganl niail hai ge dan-ai thaq nail jiav nail ngaol: “Hel daiq dei-eiq, Heeqphaq Miqyail neq, aivq nail meeq nail haol nail tsaol-aq aq meel-nvq aqsainv gaq nee mail yavq kha lee nail ngaol.

¹⁵ Tsaol-aq iqsanl bhai yalkhaq dal lee nail dai khi, aivq lee nail ngaol. Aqyu juq Miqyail bhai maq ev dai nl-ai hal-ai thaq nail ngel-i mail maqkhaiq, Miqyail bhai maq ev nail oeqbal yaq juq-i mail aivq bhai khal ge movq ail ge doil-a nail ngel-i mail maqkhaiq, aqyu juq khoeq nail jiovq nail bhai ya daq nail ngaol” dai, ge dan-ai thaq nail ngaol.

¹⁶ Tsaol-aq al juq neq, khaq mao iqsanl meel nul khi, yu bhai oeqbal thaq nail ngaol. Yovqgavq nail aqsivq haqjoil nail neekhaol sil nail haoqnao tsao the nail ngaol. Yovqgavq nail ganl bhai khaoqsail he khi, yovqgavq phao meeq lal dai, yu bhai ge meeq nia nail ngaol.

Bhi yaol phaol nail daoq khi mail gaq bivq nail daoq

¹⁷ Thail hai ngaol-aoq, ngal mail ma-ail gaiq-a nail aqtsaoq juq-ol, jel lal-u phao, ngadao nail Heeqphaq Yeiqsul Khali nail gaqkhoel juq-i mail ge thaq ail ceevq-a nail daoq bhai nul juq thaq nioil peivq dei-eiq.

¹⁸ Aqyu juq ge nail: “Haoqnao nao saq nail yanq lavqkhoel Miqyail bhai maq ev dai, aqsivq haqjoil nail neekhaol sil dai, nl nail nee ovqtavq, uqhuq thaoq nail aol bhai khal meel naq movq ail meel naq nail tsaol-aq juq dov lal nail ngaol” dai, nul juq bhai ge bhiq-ai thaq nail ngaol.

¹⁹ Tsaol-aq al juq neq, nul juq nail munl bhai lav pav nail tsaol-aq ngaol. Aqyu juq nail lavqkhoel bhai Aqhaqlal Miqyail maq jaol nail ngel-i mail, aqsivq haqjoil phao taivq-ail tavq lai nail phaq nl nail ngaol.

²⁰ Ngal mail ma-ail gaiq-a nail aqtsaoq juq-ol, nul juq meeq dee haol dee dee nail neema thaq tsaol nail phaq nail lavqkhoel eeq lal heel lal khi, Meeq nail Haol nail Aqhaqlal nail lavqkhoel geeqlaoq hal hal ail jaol yaoq.

²¹ Miqyail nail goil nail gaiq-a nail phaq nail lavqkhoel bhai jaol ivq yaoq. Nq maq maq luv hal yeel doevq nail phaq ya dai, ngadao nail Heeqphaq Yeiqsul Khali nail gaoq haq gaiq-a nail phaq bhai daonq daonq ail jaol yaoq.

²² Neema thaq tsaol nail phaq bhai maq ivq nail tsaol-aq juq bhai, gaoq haq bhiq yaoq.

²³ Tsaol-aq teevq pav ga nav juq ya jel-ail dai, miqjaq lavqkhoel nee he dov bhiq yaoq. Al ovqtavq, tsaol-aq teevq pav ga nav juq bhai, gee sil nail neema aol khi, gaoq haq bhiq yaoq. Thail hai ngaol-aoq, aqsivq haqjoil nail neekhaol nl nail aq jiivq aq cavq phaq leivq nail aqyu juq nail aqgaq aqdoi bhai bhe yaoq.

Geeq laoq bivq nail daoq

²⁴ Nul juq maq ya laiq ail dai, Miqyail nul juq bhai hel daiq phail nia nail ngaol. Nul juq oeqbal thaq duq maq jiav dai, aivq nail seiqleiq khaoqsail teevq bhee jiav nail jaol duq bhai, lavqkhiq teevq tsail ya jaol lai dai iqsanl, aivq lav sav nia nail ngaol.

²⁵ Ngadao bhai hevq kovq lavq-a nail teevq gaq teevq-eel pevq nail Miqyail, ngadao nail Heeqphaq Yeiqsul Khali bhaq da nee, seiqleiq khaoqsail maqkhaiq, eeq nail heel nail phaq maqkhaiq, bhaqaoq maqkhaiq, uv thaiq nail phaq maqkhaiq, iqmoeq ilmoeq-u nee maqkhaiq, niil aq-il maqkhaiq, nqmaq maqluv halyeel maqkhaiq, aivq nail kovtavq bhai jiav dei-eiq. Aq miq.