Lulkavq 1 - Akeu (Gaolkheel)

Thaolphilluv bhai iqmoeq ilmoeq gevq bhiq-a nail haoqgavq

¹ Eeq nail heel nail Thaol phil luv-ol, nv juq nail lavqkhoel bhai pevq lal-a nail, Yeiqsul-i mail ganl nl-a nail juq bhai, tsaol-aq mee nia gaq khal khi kivq nail khe-ai, ganl al juq bhai haoqgavq gevq dov gaq-ai thaq nail ngaol.

² Yeiqsul-i mail nl-a nail ganl al juq bhai, iqmoeq-u phao nee ya moel thaq nail juq khi geeqlaoq daoq cavq nail juq-i mail, khal ge lavq-a nail khe-ai, aqyu juq gevq thaq-ai thaq nail ngaol.

³ Ngal iqsanl iqmoeq-u phao nee Yeiqsul-i mail nl-a nail ganl al juq bhai aqmeeq-ai tsao tsel duq-ai thaq nail ngaol.

⁴ Al heel ngel-i mail, naoq-i mail ya saol-a nail juq neq, mal dil tsaq ail nial dai, naol iqsanl heeq nia dai, Yeiqsul-i mail nl-a nail ganl al juq teevq phaq gil-aq teevq phaq naoq bhai gevq bhoel-ai leevq nail neq, tsaq nail ngaol dai, ngal noeq nail ngaol.

Yaol haq doevq lee-a nail ganl cavq gaiq lee-a nail

⁵ Yuldav milkhaoq bhai heeqphaq Heiq lol uv thaiq thaq-u phao, Aqbhilyav nail munl lavqkhoel bhai Saqkhaq lil dai khul nail Philma teevq gaq jaol nail ngaol. Aivq nail khaqma neq, Eillilsaqbhail dai, khul nail ngaol. Aqyu nvq maolyaq neq, Aqlonq nee mail yavq kha lee thaq nail yaq juq pevq nail ngaol.

⁶ Aqyu nvq maolyaq neq, Miqyail nail sivtavq bhai daol coev dai doevq khi, Miqyail nail aoldaoq kovqdaoq khi mail aolsaolkovq iqsanl bhai tsao the nail ngaol.

⁷ Eillilsaqbhail neq, maq bhao aqma pevq nail ngel-i mail, aqyu nvq maolyaq yaq maq jaol ail, nvq gaq nvq gaq ail joiqmaoq maoq lai-aoq nail ngaol.

⁸ Teevq n kev lee-al ngal-aq neq, Philma nail ganl nl nail haqbhoil, Saqkhaq lil nail munl bhai dol lee-a nail ngel-i mail, uqhuq thaoq nail ilkhaol il ma nail lavqkhoel bhai ganl nl nail ngaol.

⁹ Philma juq nail aol jiav nail khe-ai, ganl bhoil-u phao, Miqyail nail uqhuq thaoq nail ilkhaol il ma bhai aol lai khi, huqbhiq nil nail phaq tovq khi danq nail ganl al, Saqkhaq lil bhai tsaq lai-a nail ngaol.

¹⁰ Saqkhaq lil huqbhiq nil nail phaq tovq khi danq thail thaiq-u phao, lavqniil phao jaol-ail ceevq-a nail tsaol-aq munl munl ma juq iqsanl mail, geeqlaoq hal nail ngaol.

¹¹ Aq-u phao, Heeqphaq Miqyail nail nqtavq gaqkhoel teevq gaq, Saqkhaq lil nail sivtavq bhai dov lee khi, huqbhiq nil nail phaq tovq khi danq duq nail lavqmal phao, thul phaol lee-a nail ngaol.

¹² Saqkhaq lil nqtavq gaqkhoel al gaq bhai ya moel-u phao, neema lavqkhoel bhai bhaq dai ail khi, deel nq dee dee ail-a nail ngaol.

¹³ Thail hai ngaol-aoq, nqtavq gaqkhoel aivq bhai ge bhiq-a nail: “Saqkhaq lil-ol, thaq gee sil. Khul khi mail dai ngal-aq neq, naoq nail geeqlaoq hal daoq bhai Miqyail gaiq-ao nail ngaol. Naoq nail khaqma Eillilsaqbhail naoq nail haqbhoil, yaqyov teevq gaq tsiq nail ngaol. Naol yaqyov al gaq bhai Yaol haq dai ya mil bhiq nail ngaol.

¹⁴ Yaq al gaq doevq lee-a nail ngel-i mail, naol lavqkhiq tsail dee dee nail ngaol. Tsaol-aq mao dai iqsanl, lavqkhiq tsail nail ngaol.

¹⁵ Khul khi mail dai ngal-aq neq, aivq neq, Heeqphaq Miqyail nail sivtavq bhai eeq nail heel nail gaq pevq lal nail ngaol. Aivq neq, jil pheeq khi mail bov lal nail phaq teevq peivq ail maq daol-ail. Aq ma nail ovqmav lavqkhoel bhai aol-u phao nee mail, Meeq nail Haol nail Aqhaqlal teevq bhee aol nail ngaol.

¹⁶ Ilsaqleiqlav nail tsaol-aq mao dai bhai, aqyu juq nail Heeqphaq Miqyail jaol nail phao, aivq hevqkol lavq nail ngaol.

¹⁷ Yaol haq neq, Eillilya nail neema khi bhaqaoq aol nail lavqkhoel, Heeqphaq nail iqmoeq ail nail ngaol. Aqbhu khi yaq tsaq lai jil lai dai maqkhaiq, naqlaiq laiq nail tsaol-aq, tsaq nail daol nail tsaol-aq nail neenoeq neekha nail haoqnao tsao the dai maqkhaiq, Miqyail nail haqbhoil lainq-ai thaq nail jeq-e teevq jeq-e pevq lal dai maqkhaiq, Yaol haq nl nail ngaol” dai, nqtavq gaqkhoel aivq bhai ge bhiq-a nail ngaol.

¹⁸ Saqkhaq lil ge nail: “Al hai pevq lal naol dai, ngal khal hai khi ya heeq kivq nail-aiq. Ngal maoq lee-aoq nail ngaol. Ngaq nail khaqma iqsanl maoq lee-aoq nail ngaol” dai, nqtavq gaqkhoel bhai ge bhiq-a nail ngaol.

¹⁹ Nqtavq gaqkhoel al gaq gaoq ge nail: “Ngal neq, Miqyail nail sivtavq bhai thul phaol khi, Miqyail nail khillavq Gaqbheiqlal ngaol. Lavq khiq tsail nail daoq niil daoq cavq gaiq ail yaoq dai, Miqyail ngaq bhai khoel-ai leevq-a nail ngaol.

²⁰ Naol ngaq nail daoq bhai, ‘maq pevq lal nia-ail’ dai, neema lavqkhoel bhai noeq nail ngel-i mail, naoq nail yaqyov maq doevq lee-u kev dai, naol daoq maq ge nia mail, aq tsi tsu dai, ya jaol nail ngaol. Ngaq-i mail ge nail daoq niil daoq, aqyanq tsaq lal haq neq, pevq lal nail ngaol” dai, aivq bhai ge bhiq-a nail ngaol.

²¹ Aq-u phao, tsaol-aq al juq lavqniil-ai Saqkhaq lil bhai daonq nail ngaol. Khul khi mail dai ngal-aq neq, aivq uqhuq thaoq nail ilkhaol il ma nail lavqkhoel bhai tsaq dai maq lai-a nail ngel-i mail, aqyu juq noeq-u maq dov dai, pevq ail-a nail ngaol.

²² Aivq dov lee-u phao, aqyu juq bhai daoq maq ge tsaoq bhiq nia dai, pevq ail-a nail ngel-i mail, aivq uqhuq thaoq nail ilkhaol il ma nail lavqkhoel bhai phao daiq bhiq thaq nail teevq phaq ga nav bhai, ya moel thaq nail ngaol dai, aqyu juq heeq nia-a nail ngaol. Aivq daoq maq ge nia-ail pevq-ail khi, aqyu juq bhai aqlavq-i mail dao bhiq-a nail ngaol.

²³ Uqhuq thaoq nail ilkhaol il ma nail lavqkhoel bhai, aivq nail ganl nl nail aqyanq jel ail-u phao, Saqkhaq lil ilkhaol bha kovq ail-a nail ngaol.

²⁴ A bhai nee ngal-aq, aivq nail khaqma Eillilsaqbhail neq, yaq ceiv lai khi, bhala ngaq heeq bhee dai, khaq bha iqsanl maq dov-ail dai, ilkhaol bhai jaol nail ngaol.

²⁵ Eillilsaqbhail ge nail: “Miqyail ngaq bhai hel daiq lavq khi geeqlaoq bhiq lavq-a nail ngaol. Niai nee pultavq neq, tsaol-aq yaq ngaq bhai ge doil lavq nail phaq bhai, aivq oil ha lavq-a nail ngaol” dai, ge nail ngaol.

Yeiqsul khal hai khi doevq lee-a nail ganl

²⁶ Eillilsaqbhail aqhaq aqmaol liq lai-a nail bhala kovq heeq bhee lal-u phao, Gaq liq lail milkhaoq Naq saq lail meenq bhai jaol nail yaqmai-aq teevq gaq jaol nail bhai, Miqyail nail nqtavq gaqkhoel Gaqbheiqlal bhai khoel gai aivq-a nail ngaol.

²⁷ Yaqmai-aq al gaq neq, Daq bhil nee mail yavq kha lee thaq nail yaq Yaolsai dai mil-ai thaq nail gaq bhai maol ail naol dai, ge ceiv-ai thaq nail, haol taiv deel yaqmai-aq yaqnoil ngaol. Aivq nail aqmil neq, Maq lil ngaol.

²⁸ Nqtavq gaqkhoel al gaq, aivq jaol nail bha lee khi ge nail: “Geeq laoq eel jaol ya-a nail yaq miq-ol, naol geeqlaoq eeq dei-eiq. Heeqphaq Miqyail naoq-ai nee mail jaol nail ngaol” dai, ge bhiq-a nail ngaol.

²⁹ Maq lil neq, daoq al daoq bhaq da nee, neema lavqkhoel bhai suq saq lal khi, “Daoq ge tsaoq lavq-a nail niil khal hai ge movq nail meeq” dai, saol-nvq nail ngaol.

³⁰ Aq-u phao, nqtavq gaqkhoel aivq bhai ge bhiq-a nail: “Maq lil-ol, thaq gee sil. Khul khi mail dai ngal-aq neq, Miqyail naoq bhai geeqlaoq eel jaol bivq nail dai khi, tsel dov-ai thaq nail ngaol.

³¹ Hel daiq dei-eiq. Naol yaq ceiv lai khi, yaqyov teevq gaq ya tsiq nail ngaol. Aivq bhai, naol Yeiqsul dai, ya mil bhiq nail ngaol.

³² Yaqyov al gaq eeq dee heel dee dee khi, eeq nail heel nail gaq nail Yaqyov dai, yu khul nail ngaol. Heeqphaq Miqyail Yaqyov al gaq bhai heeqphaq Daq bhil nail joiq jaq doiqbev bev ma bhai, bhi jaol deel nail ngaol.

³³ Aivq neq, Yaqkov nee mail yavq kha lee thaq nail yaq juq nail kovtavq bhai Heeqphaq jiovq khi, aivq uv thaiq nail milkhaoq al neq, nqmaq maqluv halyeel loi lai nail maq bhao ail” dai, Maq lil bhai ge bhiq-a nail ngaol.

³⁴ Maq lil nqtavq gaqkhoel bhai ge bhiq-a nail: “Ngal yovjil maq bhao, naol ge nail khe-ai khal hai khi pevq lal nia nail-aiq” dai, ge kovq bhiq-a nail ngaol.

³⁵ Nqtavq gaqkhoel Maq lil bhai ge bhiq-a nail: “Meeq nail Haol nail Aqhaqlal naoq nail kovtavq bhai yavq kha lee khi, eeq dee heel dee dee nail Miqyail nail bhaqaoq, naoq bhai uv thaiq lee nail ngaol. Al heel ngel-i mail, doevq lee nail meeq nail haol nail yaqyov al gaq bhai, Miqyail nail Yaqyov dai, yu khul nail ngaol.

³⁶ Maq bhao aqma dai saol-nvq-ai thaq nail, naoq nail jeq-e jaq-a Eillilsaqbhail bhai hel daiq. Joiqmaoq maoq lai khi ngaol-aoq, yaq ceiv lai-a nail bhala kovq heeq bhee lal-aoq nail ngaol.

³⁷ Miqyail maq nl nia nail teevq phaq iqsanl maq jiav-ail” dai, Maq lil bhai ge bhiq-a nail ngaol.

³⁸ Maq lil ge nail: “Ngal neq, Miqyail nail yaqkav ngaol. Naoq-i mail ge nail khe-ai, ngaq bhai kev lee dei-eiq” dai, ge bhiq-a nail ngaol. A bhai nee ngal-aq, nqtavq gaqkhoel aivq jaol nail nee dov ail-a nail ngaol.

Maq lil Eillilsaqbhail jaol nail bha lai-a nail ganl

³⁹ A bhai nee ngal-aq, Maq lil dov-ail khi, Yuldav milkhaoq daoltavq phao jiav nail meenq teevq meenq bhai, lavqtsail mail lai-a nail ngaol.

⁴⁰ Aivq Saqkhaq lil nail ilkhaol bhai aol lai khi, Eillilsaqbhail bhai daoq tsaoq phuq-a nail ngaol.

⁴¹ Eillilsaqbhail Maq lil-i mail daoq tsaoq phuq nail daoq ya gaiq-u phao, aivq nail ovqmav lavqkhoel khe yaq, luv luv dai tev lal-a nail ngaol. A bhai nee ngal-aq, Eillilsaqbhail Meeq nail Haol nail Aqhaqlal bhee lal khi,

⁴² aivq mail ma-ail ge nail: “Naol neq, yaqmai-aq juq nail lavqkhoel bhai neq, geeqlaoq eeq dee dee nail gaq ngaol. Naoq nail ovqmav lavqkhoel khe yaq iqsanl, geeqlaoq eeq dee dee nail ngaol.

⁴³ Ngaq nail Heeqphaq nail aqma, ngal jaol nail bha lal-a nail geeqlaoq, khul khi mail ngal ya-a nail ngel-ail.

⁴⁴ Hel daiq daiq. Naol daoq tsaoqphuq nail daoq bhai ngal ya gaiq-u phao, ngaq nail ovqmav lavqkhoel khe yaq lavqkhiq tsail dee dee nail ngel-i mail, luv luv-ai tev lal-a nail ngaol.

⁴⁵ Naol neq, geeqlaoq eeq nail yaqmai-aq ngaol. Khul khi mail dai ngal-aq neq, Miqyail-i mail ge-ai thaq nail daoq mal dil bhee lal naol dai, neema thaq tsaol nail ngel-i mail ngaol” dai, ge bhiq-a nail ngaol.

Maq lil Miqyail bhai tsiq eeq-a nail ganl

⁴⁶ Aq-u phao Maq lil ge nail: “Ngaq nail neema lavqkhoel nee Heeqphaq Miqyail bhai tsiq eeq tsiq heel naol.

⁴⁷ Ngaq nail aqhaqlal iqsanl, ngaq bhai hevq kovq lavq-a nail Miqyail bhaq da nee lavqkhiq tsail dee dee ail nial.

⁴⁸ Khul khi mail dai ngal-aq neq, teevq peivq ail khaoqsail maq jiav nail aivq nail yaqkav bhai aivq gaoq haq lavq khi, hel daiq lavq-a nail ngaol. Niai nee pultavq neq, teevq yeel nee teevq yeel, ngaq bhai geeqlaoq eeq nail yaqmai-aq dai, yu khul nail ngaol.

⁴⁹ Khul khi mail dai ngal-aq neq, bhaqaoq eeq nail Miqyail neq, ngaq bhai eeq dee meeq dee dee nail phaq nl lavq-a nail ngaol. Aivq neq, meeq dee haol dee dee nail ngaol.

⁵⁰ Aivq bhai ev nail tsaol-aq bhai, aivq gaoq haq gaiq-a nail teevq yeel nee teevq yeel jiav nail ngaol.

⁵¹ Miqyail aivq nail aqlavq-i mail bhaqaoq eeq nail juq nl nail ngaol. Yovqgavq nail neekhaol taivq-ail nl khi, neema eeq nail heel nail tsaol-aq bhai, aivq lav luq lav seil bhiq nail ngaol.

⁵² Aivq heeqphaq juq bhai aqyu juq-i mail jaol deel-nvq thaq nail doiqbev bev ma nee tsiqkha khi, khaoqsail maq jiav nail neema thaqtheq nail phaq aol nail tsaol-aq bhai, thaq eeq thaq heel bhiq nail ngaol.

⁵³ Aivq moevq nail sivq nail tsaol-aq bhai aqmeeq phaq teevq bov bhi jaq khi, hulmeeq hul bhao juq bhai neq, aqnieivq ail bhi dov-ail nail ngaol.

^54-55 Aivq ngadao nail aqphiq aqbhal juq bhai ge bhiq-ai thaq nail khe-ai, ‘Aqbhaqlaqhaq aivq khi aivq nee mail yavq kha lee thaq nail yaq juq bhai kev dai, nqmaq maqluv halyeel maq nioil peivq mail, gaoq haq naol’ dai, ge khi, aivq aivq nail yaqkav Ilsaqleiqlav nail jeq-e bhai hel daiq bhiq-a nail ngaol” dai, ge bhiq-a nail ngaol.

⁵⁶ Maq lil neq, Eillilsaqbhail nee mail bhala hail heeq bhee dai jaol khi, aivq nail ilkhaol bhai kovq ail-a nail ngaol.

Ulcuvq saol bhiq nail Yaol haq doevq lee-a nail ganl

⁵⁷ Eillilsaqbhail yaq bhao nail yanq tsaq lal khi, bhao-a nail ngaol. Yaq al gaq neq, yaqyov ngaol.

⁵⁸ Miqyail aivq bhai eeq dee meeq dee dee nail geeqlaoq nl bhiq-a nail ganl al, aqjail bhai jaol nail juq khi mail aivq nail aqivq jaqbheq juq ya gaiq-u phao, aqyu juq iqsanl teevq gaq khe-ai, lavqkhiq tsao tsail nail ngaol.

⁵⁹ Eivq n bhee lal-u phao, yaq al gaq bhai bavkov uqjaq oev bhiq nail dai khi, aqyu juq bhoi lal jil lal-a nail ngaol. Yaq al gaq bhai aivq nail aqbhu nail aqmil khe-ai, Saqkhaq lil dai mil bhiq nail dai khi, lainq-ai thaq nail ngaol.

⁶⁰ Aq-u phao, aqma gaq ge nail: “Maq ngel-ail. Aivq bhai Yaol haq dai, ya mil bhiq naol” dai, ge bhiq-a nail ngaol.

⁶¹ “Naoq nail jeq-e jaq-a nail lavqkhoel, Yaol haq dai mil-ai thaq nail teevq gaq gail maq jaol ail” dai, aqyu juq aivq bhai ge bhiq-a nail ngaol.

⁶² Aq-u phao, yaq al gaq bhai, khal hai bhi mil bhiq movq nail-aiq dai, aqyu juq aqbhu gaq bhai aqlavq dao bhiq-a nail ngaol.

⁶³ Aqbhu gaq neq, haoqgavq gevq nail dailpav hal khi, aivq nail yaqyov nail aqmil neq, Yaol haq ngaol dai, gevq daiq bhiq-u phao, aqyu juq iqsanl mail noeq-u maq dov dai, pevq ail-a nail ngaol.

⁶⁴ Aq-u phao, teevq pov taivq-ail, aivq daoq ge nia lal-a nail ngaol. A bhai nee ngal-aq, aivq daoq ge ge ail, Miqyail bhai tsiq eeq-a nail ngaol.

⁶⁵ Aq jail bhai jaol nail tsaol-aq iqsanl mail ya moel-u phao, gee sil nail ngaol. Ganl al, Yuldav milkhaoq daoltavq bha doi dai, gaiq doi ail-a nail ngaol.

⁶⁶ Khal ya gaiq-a nail tsaol-aq iqsanl mail, yovqgavq nail neema lavqkhoel-ai yovqgavq noeq thaq-ai thaq khi, “Yaq niil gaq, khalheel nail tsaol-aq pevq lal nail maq heeq laq” dai, aqyu juq nail gaiqlaq bhai ge pheel jaq nail ngaol. Khul khi mail dai ngal-aq neq, Miqyail nail bhaqaoq aivq nail kovtavq bhai jiav nail ngaol.

Saqkhaq lil Miqyail nail daoq ge dan nail ganl

⁶⁷ Aq-u phao, Yaol haq nail aqbhu Yaqkhaq lil, Meeq nail Haol nail Aqhaqlal bhee lal khi, Miqyail nail daoq niail hai ge dan-a nail ngaol:

^68-69 “Ilsaqleiqlav nail Heeqphaq Miqyail bhai tsiq eeq yaoq. Khul khi mail dai ngal-aq neq, aivq aivq nail yaqkav Daq bhil nail jeq-e lavqkhoel khe, ngadao nail haqbhoil bhaqaoq eeq dee dee nail Hevq kovq nail gaq bhi dov lee-a nail ngaol. Aivq aivq nail jeq-e jaq-a bhai hel daiq lee khi hevq kovq-a nail ngaol.

⁷⁰ Miqyail al hai nl-a nail neq, milnee uqnee nee aivq nail haqbhoil ge dan nail meeq nail haol nail juq bhai juq khi ge-ai thaq nail khe-ai, nl-a nail ngaol.

⁷¹ Aivq ngadao bhai neejiav jiav nail tsaol-aq juq nail lavqkhoel nee maqkhaiq, ngadao bhai maq hel daiq nul nail tsaol-aq juq nail lavqkhoel nee maqkhaiq, ngadao bhai hevq kovq nail khi nl-a nail ngaol.

⁷² Aivq niail hai nl-u phao, ngadao nail aqphiq aqbhal juq bhai gaoq haq gaiq-a nail lavqkhoel nee nl-a nail ngaol. Aivq nail meeq nail haol nail daoq ma saljial bhai iqsanl, noeq kev khi nl-a nail ngaol.

⁷³ Daoqma saljial al daoq neq, ngadao nail aqbhu Aqbhaqlaqhaq bhai Miqyail aivq-i mail khanq-ai thaq nail daoqma saljial al daoq ngaol.

^74-75 Daoqma saljial al bhaq da nee, ngadao bhai neejiav jiav nail tsaol-aq juq nail lavqkhoel nee ngadao ya jel-ail khi, ngadao nail yeel gil-u kev dai, meeq nail haol nail tsaq nail daol nail lavqkhoel nee, Miqyail nail sivtavq bhai maq ya gee sil dai, ngadao ganl nl kivq nail ngaol.

⁷⁶ Ngaq nail yaq yov-ol, naoq bhai eeq dee heel dee dee nail Miqyail nail haqbhoil ge dan nail gaq nial dai, yu khul naol. Naol neq, Heeqphaq nail iqmoeq ya-ail khi aivq nail gailkhaol ya lav daol ail nail ngaol.

^77-78 Khul khi mail dai ngal-aq neq, ngadao nail Miqyail neq, gaoq haq gaiq-a nia dee dee nail ngaol. Al heel ngel-i mail, hevq kovq nail phaq neq, oeqbal phaiq bhiq-a nail lavqkhoel nee dov lee-a nail ngaol dai, aivq nail jeq-e jaq-a bhai bhiq heeq nia dai,

⁷⁹ nqtavq kovtavq khe aqbhaq ngadao nail kovtavq bhai bhaq lee-u phao, aqnav nail lavqkhoel bhai jaol nail tsaol-aq khi sil nail phaq nail kov-uvq bhai jaol nail tsaol-aq bhai iqsanl, aqbhaq bhaq bhiq khi, nee sal ovq nail gailkhaol bhai hevq daiq lavq naol” dai, Saqkhaq lil ge nail ngaol.

⁸⁰ Yaq al gaq aqmaol phao eeq lal heel lal khi, aqhaqlal phao iqsanl, eeq lal heel lal-a nail ngaol. Aivq Ilsaqleiqlav nail tsaol-aq nail sivtavq bhai maq dov lal-u phao, haqtsoiq haqyal bhai taivq-ail jaol-a nail ngaol.