जकर्याह 3 - पवित्तर बाइबिल

महायाजक क बारे मँ दर्सन

¹ तब उ मोका महायाजक यहोसू क दिखाया। उ यहोवा क सरगदूत क समन्वा खड़ा भवा रहा। सइतान हुआँ यहोसू क जरिये कीन्ह गए बुरे करमन बरे दोख देइ बरे ओकर दहिना कइँती खड़ा रहा।

² तब यहोवा क सरगदूत कहेस, “सइतान, यहोवा तोहका फटकारइ। यहोवा जउन यरूसलेम क चुने रहा, तोहका फटकारइ। का इ मनई आगी स निकरा भवा बरत काठे क नाईं नाहीं बाटइ?”

³ यहोसू सरगदूत क समन्वा खड़ा रहा अउर ओकरे ओढ़नन गन्दा रहेन।

⁴ तब आपन निअरे खड़े भए दूसर सरगदूतन स सरगदूत कहेस, “यहोसू स गन्दा ओढ़नन क उतारि ल्या।” तब सरगदूत यहोसू स बातन किहेस। उ कहेस, “मइँ तोहरे अपराधन क छोरि लिहेउँ ह अउर मइँ तोहका नवा ओढ़ना देइउँ ह।”

⁵ तब उ कहेस, “ओकरे मूँड़ी पइ एक ठु साफ पगड़ी रखइ द्या।” यह बरे जब यहोवा क सरगदूत हुवाँ खड़ा रहा, उ पचे एक ठु साफ पगड़ी ओकरे मुँड़ी पइ रखेस अउर उ पचे ओका नवा ओढ़ना पहिराएन।

⁶ तब यहोवा क सरगदूत यहोसू स अधिकार क संग कहेन:

⁷ इ उहइ अहइ जउन सर्वसक्तीमान यहोवा कहत ह: “अगर तू मोर आदेसन क पालन करब्या अउर ओन बातन क करब्या जेका मइँ आदेस दिहेउँ ह, तउ तू मोर घरे पइ सासन करब्या अउर तू मोर मन्दिर क आँगन क अधिकारी होब्या। अउर मइँ तोहका ओन लगोन मँ आवइ-जावइ देब्या जउन हिआँ खड़ा अहइँ।

⁸ हे महायाजक यहोसू, सुना! तू अउर तोहका मीतन जउन तोहार समन्वा बइठा अहइ इ बात क प्रतीक अहइ कि इ सबइ बात होब्या! सच ही, मइँ आपन सेवक क लइ आउब जउन ‘साख’ कहा जात ह।

⁹ उ पाथर हिआँ अहइ जेका मँ यहोसू क समन्वा राखेउँ। इ पाथर मँ सात आँखन अहइँ। मइँ एह पइँ एक लेख खोदब। एक दिना मइँ ओह भूइँया प स पापन क खत्म करब” सर्वसक्तीमान यहोवा इ सब कहत ह।

¹⁰ सर्वसक्तीमान यहोवा कहत ह, “उ दिना तोहमाँ स प्रत्येक आपन पड़ोसियन क आपन दाख-लता अउर अंजीर क बृच्छ क नीचे आमंत्रित करब्या।”