स्रेस्ठगीत 8 - पवित्तर बाइबिल

¹ कास, तू मोर सिसु भाइ होत्या, मोर महतारी क छाती क दूध पिअत भए। अगर मइँ तोहसे हुवँइ बाहेर मिल जाइत तउ तोहार चुम्बन मइँ लइ लेतेउँ, अउर कउनो मनई मोर निन्दा नाहीं कइ पावत।

² तोहका मइँ आपन महतारी क घरे मँ लइ अवतेउँ जहाँ तू मोका सिच्छा देइ सकतेउँ। मइँ तोहका पिअइ बरे, आपन मिस्रित अनारे स निकरा भवा दाखरस देतेउँ।

मेहरारू क बचन मेहररूअन बरे

³ ओकर बाँया हाथ मोरे मूँड़े क छुअत ह, अउर ओकर दाहिन हाथ मोरे सरीर क छुअत ह।

⁴ मइँ तोहका चेताउनी देत हउँ हे यरूसलेम क कुँवरियन: पिरेम क जिन जगावा अउ उसकावा जब तलक एकर इच्छा न होइ!

यरूसलेम क बिटियन क बचन

⁵ इ कउन अहइ जउन आपन प्रियतम स लपटा भवा, रेगिस्तान स चली आवत ह? मइँ तोहका सेब क बृच्छ क खाले जगाए रहेउँ; हुवाँ तोहार महतारी तोहका गरभ मँ धरेस; हुवाँ तोहार मताहरी तोहार बरे प्रसव-पीड़ा सहेस अउर तोहार जनम भवा।

मेहरारू क बचन मनसेधू बरे

⁶ मोका तू आपन हिरदय मँ महर क नाई धरा। ताबजि क समान मोका आपन बाँहे बांध ल्या। काहेकि पिरेम मउत क जइसा मज़बूत अहइ। भावना कब्र क नाईं तेज होत ह। एकर चिंगारी आग क लपटन क नाईं होत ह। एकर धधक धधकत भइ लपटन स होइ जात ह।

⁷ बाढ़ पिरेम क नाहीं बूझाइ सकत। नदियन एका नीचा नाहीं कइ सकत। अगर कउनो मनई पिरेम आपन सारा धन देकर खरीदइ चाही, तउ पर भी ओकर धन बेकार ही समुझा जाब।

ओकरे भाइयन क बचन

⁸ हमार एक छोटकी बहिन अहइ, जेकर चूची अबहिं फूटी नाहीं। हमका का करइ चाही जउने दिन ओकर सगाई होइ?

⁹ अगर उ देवार अहइ तउ मइँ ओह पइ चाँदी क मीनार बनाइ देब। अगर उ दुअर अहइ तउ मइँ ओकरे पइ देवदारू क मुल्यवान पल्ला लगाइ देब।

ओकर आपन भाइयन क जवाब

¹⁰ मइँ परकोट हउँ अउर मोर चूची गुम्बद जइसे अहइँ। तउ मइँ ओकरे बरे सान्ति क दाता हउँ।

मनसेधू क बचन

¹¹ बाल्हामोन मँ सुलैमान क अंगूरे क बगिया रही। उ आपन बाग क रखवारी बरे दइ दिहस। हर रखवारा ओकरे फलन क बदले मँ चाँदी क एक हजार सेकेल लिआवत रहा।

¹² मुला सुलैमान, मोर आपन अंगूर क बाग मोरे बरे अहइ। हे सुलैमान, मोरी चाँदी क एक हजार सेकेल सब तू ही रख ल्या, अउर इ सबइ दुइ सौ सेकेल ओन लोगन बरे अहइँ। जउन खेतन मँ फलन क रखवारी करत हीं।

मनसेधू क बचन मेहरारू बरे

¹³ तू जउन बागे मँ रहति अहा, मोरे मित्र तोहार आवाज़ धियानपूवर्क सुनत अहइँ; मोका भी सुनइ दया!

मेहरारू क बचन मनसेधू बरे

¹⁴ मोर प्रियतम, हाली आवा! महकत द्रव्यन क पहाड़े पइ चिकारे या जवान हरिन जइसा बनि जा!