स्रेस्ठगीत 7 - पवित्तर बाइबिल

मनसेधू क जरिये सुन्दरता क वर्णन

¹ हे सज्जन अउरत, तोहार गोड़ पनहियन मँ केतॅना सुन्नर अहइँ! तोहार जाँघन क गोलाइ कउनो कलाकार क बना गवा गहना क नाईं अहइँ

² तोहार नाभी क नीचे क भाग गोल कटोरा क समान अहइँ। होइ सकत ह एहमाँ कभी मिस्रित दाखरस कमी नाहीं होत। तोहार पेट गोहूँ क ढेरी क समान अहइ जेकर चउहददी लिलियन क अहइँ।

³ तोहार चूचियन दुई जवान हिरण क जइसा अहइ, कुरंगी क जुड़वा।

⁴ तोहार गटइ हाथी दाँत क मीनार क समान अहइँ। तोहार आँखिन हेसबोन क उ सबइ कुण्ड क समान अहइ जउन बेत-रब्बीम क फाटक क लगे अहइ। तोहार नाक लबानोन क मीनार क जइसा लम्बी अहइ जउन दमिस्क कइँती मुहँ किहे अहइ।

⁵ तोहार मूँड़ कर्मेल क पहाड़ क जइसा अहइ। तोहार मूँड़े क बार राजा क देवारन पइ लहरत भवा लम्बा वस्त्र क नाईं अहइ।

⁶ तू केतनी सुन्नर अउ मनमोहक अहा ओ मोर प्रिय! तू मोका केतॅॅना आनन्द देति अहा।

⁷ तू खजूरे क बृच्छ जइसी लम्बी अहा। तोहार चूचियन अइसे अहइँ जइसे खजूर क गुच्छन।

⁸ मइँ खजूर क बृच्छ पइ चढ़ब, मइँ एकर डारन क धरब, तू आपन चूचियन क अंगूरे क गुच्छन स बनइ द्या। तोहार साँस क गंध सेब क जइसा होइ द्या।

⁹ तोहार मुँहना उत्तिम दाखरस जइसा होइ द्या, जउन धीरे स मोर प्रियतम मँ बहत होइ, जउन ओठंन तलक बहत होइ जब हम साथ सोवत ह।

मेहरारू क बचन मनसेधू क बरे

¹⁰ मइँ आपन प्रियतम क अहउँ अउर उ मोका चाहत ह।

¹¹ आवा, मोर प्रियतम, आवा! हम खेतन मँ निकरी चली, हम गाँवन मँ राति बिताइ।

¹² हम बहोत हाली उठी अउर अंगूरे क बागन मँ निकरी जाइ। आवा, हम हुआँ लखी का अगूंरे क बेलन पइ कलियन खिलति अहइँ। आवा, हम लखी का बहारन खिल गइ अहइँ अउर का अनार क कलियन चटकति अहइँ। हुवँइ पइ मइँ आपन पिरेम तोहका अर्पण करबउँ।

¹³ दोदफलन क सुगन्ध फइल चुका अहइ। अउर सबहिं प्रकार क कीमती फलन हमरे दुआरन क ऊपर जमा अहइँ। तोहार बरे नवा अउ पुराना दुइनउँ प्रकार क चीज बचाइ रखेउँ ह, हे मोर प्रिय।