स्रेस्ठगीत 6 - पवित्तर बाइबिल

यरूसलेम क बिटियन क ओहसे कहब

¹ मेहररुअन मँ सबसे सुन्दर मेहरारू, बतावा तोहार प्रियतम कहाँ चला गवा? कउने राह स तोहार प्रियतम चला गवा ह हमका बतावा ताकि हम तोहरे साथ ओका हेरि सकी।

यरूसलेम क बिटियन क ओकर जवाब

² मोर प्रिय आपन बंगिया मँ चला गवा, मसालन क खेत मँ आपन भेड़ी चरावइ बरे अउर लिलियन क बटोरइ बरे।

³ मइँ आपन प्रियतम स हउँ अउर उ मोर प्रियतम मोसे अहइ। उ लिलियन क बीच भेड़ चरावा करत ह।

मनसेधू क बचन मेहरारू बरे

⁴ मोर प्रियतम, तू तिरसा क नाईं सुन्नर अहा। तू यरूसलेम मँ एक अद्भुत क नाई अहा। तू ऍतना अजूबा अहा जइसे कउनो फउज झण्डा क संग चलत ह।

⁵ तू मोह पइ स आपन आँखिन हटाइ ल्या, उ मोका उत्तेजित करत अहइँ। तोहार केस ऍतना लम्बा अउ लहरत अहइँ जइसे गिलाद क पहाड़ी क ढलान स बोकरियन क झुण्ड उछरत भवा उतरत आवत होइ।

⁶ तोहार दाँत एक भेड़न झुण्ड जइसे अहइँ जउन धोइके निकर आई; हरेक भेड़ जुड़ौवा बच्चन रखत हीं; ओन मँ स कउनो एक ठू भी गाएब नाहीं होत हीं।

⁷ घूँघट क नीचे तोहार गाल अनार क दुइ ठू फाँकन क तरह अहइँ।

⁸ होइ सकत ह हुआँ साठ रानियन, अस्सी रखैलन अउर अनगिनत जवान कुँवरियन होइँ,

⁹ किंन्तु हुवाँ ओकरे जइसा कउनो नाहीं अहइ! उ आपन महतारी क एक खास बिटिया अहइ, उ ओनमाँ बहोत प्रिय अहइ जउन ओका जनम दिहेस ह। कुँवरियन ओका लखेन अउ ओका सराहेन। हाँ, रानियन अउ सबइ रखैलन भी ओकर तारीफ किहे रहिन।

मेहररूअन क जरिये ओकर तारीफ

¹⁰ उ पचे कहेस: “उ कउन अहइ जउन बढ़त भवा उसा क समान अहइ? उ कउन अहइ जउन चाँद क नाईं सुन्नर अहइ? उ कउन अहइ जउन सूर्य क नाईं चमकत अहइ? उ कउन अहइ जउन फउज जइसा अजूबा अहइ जउन झण्डा लइ जात अहइ?”

मेहरारू क बचन

¹¹ मइँ अख़रोट क बगीचा स होत भवा इ देखइ बरे गवा कि का अंगूर क बेलन खिला अहइ अउर का अनार क कलियन खिली अहइँ या नाहीं।

¹² मोर राजकुमार, मइँ खुसी स भरि गवा जब तू मोका गन्धरस दिहे रहा।

यरूसलेम क बिटियन ओकरे बरे बोलत ह

¹³ हे “परिपूर्ण” मोर तरफ लउटि आवा! मोर तरफ आवा, मोर तरफ आवा, ताकि हम तोहका लखि सकी! काहे अइसे सुलेम्मिन क घूरति अहा जइसे उ महनैम क नाच क नर्तकी होइ?