होसे 14 - पवित्तर बाइबिल

यहोवा कइँती मुड़ब

¹ हे इस्राएल, तोहार पतन भवा अउर तू परमेस्सर क खिलाफ पाप किहा। एह बरे अब तू पचे आपन परमेस्सर यहोवा कइँती लौटि आवा।

² यहोवा कइँती लौटि आवा अउर आपन जिन्नगी क बदल दे! यहोवा स कहा, “हमरे तमाम पापन माफ़ करा, मोर पराथना क सुना। बलिदान क जगह पइ हम पचे आपन मुँहे स तोहार स्तुति कइके तोहका भेंट करत हउँ।

³ अस्सूर हमका बचाइ नाहीं सकब, हम पचे जुद्ध क घोड़न पइ सवार नाहीं होब्या। हम पचे तोहसे प्रतिग्या करत हउँ कि तोहका ‘उ मूरतियन’ क जइसा नाहीं समुझब जेका हम आपन ही हाथन स बनाएस ह। काहेकि तू उहइ पमेस्सर अहइ जउन अनाथ बच्चन पइ दाया देखॉवइवाला ह तू हम पचन पइ भी दाया देखाउब।”

यहोवा इस्राएल क छिमा करी

⁴ यहोवा कहत ह, “उ पचे मोका तजि दिहन। मइँ ओनका एकरे बरे छिमा कइ देब। मइँ ओनसे मुक्त भाव स पिरेम करबउँ। मइँ अब ओन पइ कोहान नाहीं अहउँ।

⁵ मइँ इस्राएल बरे ओस क नाईं होइ जाब। चमेली क नाईं खिलब। उ लबानोन क देवदार बृच्छन नाइ बढ़ब्या।

⁶ उ नवा डारन निकारइ सुरू करब्या। उ जइतून क बृच्छ क नाईं सुन्नर होब्या। अउ ओकर सुगंध देवदार बृच्छन क नाईं होब्या।

⁷ इस्राएल फुन स उ लोगन क सहारा देइ जेका मदद क जरूरत अहइ। उ पचे अन्न क नाईं या अंगूरे क बेल क नाईं जउन कि बृच्छ क छाया मँ बढ़त ह। इस्राएल लबानोन क दाखरस क तरह प्रसिद्ध होइहीं।

इस्राएल क मूरतियन क बारे मँ यहोवा क चितउनी

⁸ “हे एप्रैम, मोका मूरतियन क बराबर जिन समुझा। उ मइँ ही अहउँ जउन सरग मँ स तोहका बचाएस। मइँ एक सदाबहार सनोवार क बृच्छ क नाईं हउँ। तोहार फल मोहसे ही आवत हीं।”

अन्तिम सम्मति

⁹ बुद्धिमान कउन अहइ? ओन व्यक्ति क एन बातन समुझइ द्या! कउनो समुझ रहत ह उ व्यक्ति क सच्चाइ क समुझइ द्या। काहेकि यहोवा क राहन नीक अहइँ। अच्छे लोग ओन पइ चलिहीं, लेकिन बिद्रोही लोग ओह पइ ठोकर खाइहीं।