व्यवस्था विवरण 33 - पवित्तर बाइबिल

मूसा इस्राएल क लोगन क आसीर्बाद देत ह

¹ मरइ क पहिले परमेस्सर क मनई मूसा इस्राएल क लोगन क इ वरदान दिहस:

² मूसा कहेस, “यहोवा सिनाइ स आवा। यहोवा सेईर क भिन्सारे क रोसनी क नाई चमका। उ पारान पहाड़े स फूटइ वाला प्रकास क नाई रहा। यहोवा दस हजार पवित्तर लोगन क संग आवा। ओकरी दाहिन कइँती बलवान सिपाही रहेन।

³ हाँ, यहोवा पिरेम करत ह मनइयन स सबहिं पवित्तर मनइयन ओकरे हथवन मँ अहइँ अउर चलत हीं उ ओकरे पद चीन्हन पइ हर एक मनई अंगीकार करता ओकर उपदेस।

⁴ मूसा दिहस नेमन हम पचन्क उ सबइ-जउन अहइँ याकूब क सबहिं लोगन क।

⁵ उहइ समइया, इस्राएल क लोग अउ नेता लोग मिलेन अउ यहोवा भवा यसूरुन क राजा।

रूबेन क आसीर्बाद

⁶ “रूबेन जिअत रहइ, उ न मरइ होइ सकत ह रूबेन जिअत रहा उ न मरइ, मुला ओकर बंस मँ मनइयन अधिक न होब।”

यहूदा क आसीर्बाद

⁷ मूसा यहूदा क परिवार समूह बरे इ सबइ बातन कहेस: “यहोवा, सुन लेइ यहूदा क प्रमुख क जब उ माँगइ मदद लिआवइ ओका आपन लोगन मँ सक्तीसाली बनावइ ओका, करइ मदद ओकर दुस्मन क हरावइ मँ!”

लेवी क आसीर्बाद

⁸ मूसा लेवी क बारे मँ कहेस: “तोहार मनवइयन सच्चा लेवी धारण करत ऊरीम-तुम्मीम, मस्सा पइ तू लेवी क परीच्छा लिहा, तोहार विसेख मनई राखत रहा ओनका। लड़ा तू रह्या ओकरे बरे मरीबा क जलासयन पइ।

⁹ लेवी बताएस आपन महतारी-बाप क बारे मँ: मइँ न करब ओनकइ परवाइ, मानेस नाहीं उ आपन भाई क, या जानेस आपन गदेलन क; लेवीबंसियन पालेन आदेस तोहार, अउर निभाएन वाचा तोहसे जउन।

¹⁰ उ पचे सिखइहीं याकूब क नेम तोहार अउर इस्राएल क व्यवस्था जउन तोहार। उ पचे सुलगइहीं सुगन्धि तोहार आगे अउ तोहार सारी होमबलि वेदी क जगह पइ।

¹¹ “यहोवा, ओकर धन क आसीर्बाद द्या अउर ओकर काम क अंगीकार किहेस। उ ओका नास कइ द्या जउन उ पइ हमला किहेस अउ ओका हराइ द्या जउन ओहस घृना किहेस इस प्रकार उ फुन हमला नाहीं कइ सकत।”

बिन्यामीन क आसीर्बाद

¹² बिन्यामीन क बारे मँ मूसा कहेस: “यहोवा क पिआरा ओकरे संग सुरच्छित होइ। यहोवा आपन पिआरा क रच्छा करत सारा दिन, अउर बिन्यामीन क भुइँया पइ रहत यहोवा।”

यूसुफ क आसीर्बाद

¹³ मूसा युसुफ क बारे मँ कहेस: “यहोवा द्या आसीर्बाद ओकरे देस क सरग क उन्तिम बर्खा जहाँ होइँ; अउ धरती क तले स पानी अउ ओस मिलइ।

¹⁴ सूरज क दीन्ह उत्तिम फल होइँ ओकर अउर हर महीना मँ सब स बढ़िया फल होइँ।

¹⁵ पहाड़ियन अउ पुरान पहाड़न सब स बढ़िया फल उपजावइँ।

¹⁶ धरती देइ सब स बढ़िया फल यूसुफ बरे उ जउन भाइयन स अलगाइ दीन्ह ग रहा। तउ परमेस्सर जउन बरत भइ झाड़ी मँ रहत ह स सब स बढ़िया बरदान देइ यूसुफ क।

¹⁷ यूसुफ आपन गोरु क पहिला पइदा भवा क गौरव पाइ। ओकर दुइनउँ बेटवन बर्धा क सींगे क तरह अहइँ। उ पचे रास्ट्रन क धरती क आखिरी छोर तलक छेद देब। ओन मँ स हजारन क हजार मनस्सप स अहइ अउर ओन मँ स दसन हजार एप्रैम स ह।”

जबूलून क आसीर्बाद

¹⁸ जबूलून क बारे मँ मूसा कहेस: “जबूलून, खुस रहा जा जब बाहेर अउर इस्साकार, खुस रहइ आपन सिबिर पइ।

¹⁹ उ पचे लोगन क न्यौतिहीं आपन पहाड़े पइ हुआँ करिहीं भेंट सबहिं सच्ची बलि काहेकि उ पचे लोग सागर स निकारत हीं धन अउर पइहीं बालू मँ छिपा भवा जउन धन अहइ।”

गाद क आसीर्बाद

²⁰ मूसा गाद क बारे मँ कहेस: “स्तुति करा परमेस्सर क जउन गाद क बढ़ावत ह। गाद ओलरा रहत अउ जोहत सिंह क नाई, उ फड़ि देत ह बाजु अउ मूँड़े क टूकन मँ।

²¹ आपन खातिर चुनत ह उ, सब स खास हींसा राजा बरे सुरच्छित रहब। मनइयन क नेतन आवत हीं ओकरे लगे। उ करत ह उहइ जउन परमेस्सर क इच्छा बा। अउर यहोवा बरे इस्राएलियन क संग निआव करत ह।”

दान क आसीर्बाद

²² दान क बारे मँ मूसा कहेस: “दान सेरे क बच्चा अहइ जउन बासान स उछरा करत ह।”

नप्ताली क आसीर्बाद

²³ नप्ताली क बारे मँ मूसा कहेस: “नप्ताली, तू बहोतइ बढ़िया चीजन क रखब्या। यहोवा क आसीर्बाद तोहरे बारे भरपूर अहइ, लइ ल्या पच्छिम अउ दक्खिन क प्रदेस।”

आसेर क आसीर्बाद

²⁴ मूसा आसेर क बारे मँ कहेस: “आसेर क पूतन मँ सब स जियादा अहइ आसीर्बाद, ओका आपन भाई लोगन मँ सब स पियारा होइ द्या अउ ओका आपन गोड़ तेल स धोवइ द्या।

²⁵ तोहरे फाटकन क ताला होइहीं लोहा अउ काँसा क तू जिन्नगी भइ सक्ती स भरपूर रहब्या।”

मूसा परमेस्सर क स्तुति करत ह

²⁶ “यसूरुन, परमेस्सर क नाई नाहीं अहइ अउर कउनो परमेस्सर आपन महिमा मँ चलत ह चढ़िके बदरा पइ, अकासे स होइके आवत ह मदद करइ तू पचन्क।

²⁷ परमेस्सर सास्वत अहइ तोहार सरण सुरच्छित अहइ। परमेस्सर क सक्ती सास्वत अहइ उ तोहार सुरच्छा करत ह अउर बल स हटावत ह दुस्मनन क, कहत ह उ ‘नास करा दुस्मनन क।’

²⁸ तउ इस्राएल सुरच्छित रही सदा याकूब क जलस्रोत सुरच्छित अहइ धरती मँ। अन्न अउ नइ दाखरस क पइहीं सुन्नर धरती मँ अउ उ भुइँया सूबइ पाइ।

²⁹ इस्राएलियो, तू पचे आसीस पाए अहा तोहार जइसा कउनो रास्ट्र नाहीं। तू यहोवा क दुआरा सुरच्छा पाउब्या। उ तोहार सुरच्छा ढाल अहइ। यहोवा अहइ विजय तरवार तोहार करइ वाली। तोहार दुस्मनन तोहसे डेरइहीं, अउर तू रउँद देब्या ओनकइ लबार देवतन क ठउरन क।”