Юныс 1 - Тхьэм и ГущыӀ

Апэрэ шъхьэр Юныс Тхьэм зэремыдэӀугъэр

¹ Зиусхьаным игущыӀэ Юныс, Амытай ыкъо, къыфехыгъ:

² – Ежьи, Нинэуй къэлэшхом кӀо, гъэмысэхи, Тхьэм игущыӀэ ягъэӀу, сыда пӀомэ ахэмэ ябзэджэшӀагъэхэр къыслъыӀэсыгъэх.

³ Юныс зигъэхьазырыгъ Зиусхьаным пэчыжьэ зишӀынэу, Нинэуй мыкӀоу, ащ илъэныкъо шъхьафыкӀэ щыӀэ Тарщыщ ежьагъ. Яфо къалэм къэси, Тарщыщ кӀорэ къухьэ къыгъотыгъ, гъогупкӀэр арити, Зиусхьаным пэчыжьэ зишӀыным пае, Тарщыщ адэкӀонэу къухьэм итӀысхьагъ.

⁴ Ау Зиусхьаным хым жьыбгъэ лъэш къыщиӀэтыгъ, хым хыоешхо къыщыхъуи, къухьэр къызэхэкъутэу фежьагъ.

⁵ КъошъофылӀхэр къэщынагъэх, шъхьаджи итхьэ елъэӀущтыгъэ, къухьэр нахь псынкӀэ ашӀыным пае хым хьылъэхэр хадзэхэу аублагъ; ежь Юныс къухьэ кӀоцӀым ехи, гъолъи, пытэу хэчъыегъагъ.

⁶ Къухьэм ипащэ ащ ыдэжь къакӀуи, къыриӀуагъ: – Сыда узфэчъыерэр? Къэтэдж, уи Тхьэ елъэӀу; хэт ышӀэра, Тхьэр къытфэгумэкӀынкӀи мэхъу, тимыгъэкӀодынэу.

⁷ ЕтӀанэ къухьэм исхэм зэраӀожьыгъ: – НекӀо, пхъэдз итэжъугъадз мы тхьамыкӀагъор зыпкъ къикӀырэр зэдгъэшӀэнэу. – Пхъэдзыр зырадзэм, Юныс тефагъ.

⁸ Джащыгъум ащ раӀуагъ: – КъытаӀу, хэта мы тхьамыкӀагъор къызыпкъырыкӀырэр? Сыд Ӏофа узпылъыр, тыдэ укъикӀыра? Тыдэ щыӀа уихэгъэгу, сыд цӀыф лъэпкъа узщыщри?

⁹ Ащ къариӀуагъ: – Сэ сыджурт, хымрэ чӀыгумрэ къэзгъэшӀыгъэхэу, ошъогумэ я Тхьэу Зиусхьаныр сэгъэлъапӀэ.

¹⁰ ЦӀыфхэр лъэшэу къащтэхи, ащ раӀуагъ: – Сыда о зэхэпшӀыхьагъэр? – Ахэмэ ашӀэщтыгъэ Зиусхьаным зышӀуигъэбылъынэу ар зэрэхэхьажьыгъэр, сыда пӀомэ ежь ар къариӀогъагъ.

¹¹ Хыоешхор нахь лъэш хъущтыгъэти, ащ раӀуагъ: – Сыда къыотшӀэн фаер хыр Ӏэсэжьыным пае?

¹² Джащыгъум ащ ариӀожьыгъ: – Сэ сышъушти, псым сыхэшъудз, етӀанэ хыоешхор уцужьыщт, сыда пӀомэ мы хыоешхом сэ силажьэкӀэ шъузэрэхэфагъэр сэ къызгурыӀуагъ.

¹³ Аущтми лӀыхэм, нэпкъым екӀолӀэнхэу, псынкӀэу къухьэр афэу фежьагъэх, ау ар къадэхъущтыгъэп, сыда пӀомэ хыоешхор нахь лъэш хъущтыгъэ.

¹⁴ Арыти ахэр куохэзэ, Зиусхьаным елъэӀугъэх: – ТыолъэӀу, Зиусхьан, мы лӀым ыпсэ пае тэрэмыкӀод, тимылажьэмкӀэ тымыгъэмыс, сыда пӀомэ О пшӀоигъор, Зиусхьан, пшӀагъэ!

¹⁵ Юныс аубыти, ахэмэ хым хадзагъ; зэрэхадзэу хым игубж Ӏэсэжьыгъэ.

¹⁶ А лӀыхэм Зиусхьаным щынэгъошхо фыряӀэ хъугъэ. Зиусхьаным къурмэни тхьэрыӀохэри фашӀыгъэх.