УблапӀэ 1 - Тхьэм и ГущыӀ

Апэрэ шъхьэр Тхьэм дунаир къызэригъэшӀыгъэр

¹ УблапӀэм Тхьэм уашъомрэ чӀыгумрэ къыгъэшӀыгъэх.

² ЧӀыгум гъэпсыкӀэ иӀагъэп ыкӀи нэкӀыгъэ, шӀункӀыр чӀэ зимыӀэм шъхьэщытыгъ; Тхьэм Ыпсэ псымэ акӀыӀу щыхьарзэщтыгъэ.

³ Тхьэм ыӀуагъ: «Нэфынэр къэрэхъу». Нэфынэр къэхъугъ.

⁴ Нэфынэр зэрэдэгъур Тхьэм ылъэгъугъ; Тхьэм нэфынэр шӀункӀым къыгуигъэкӀыгъ.

⁵ Нэфынэм «мафэкӀэ» Тхьэр еджагъ, шӀункӀым «чэщкӀэ» еджагъ. Пчыхьэ къэхъугъ, пчэдыжь къэхъугъ – апэрэ маф.

⁶ Тхьэм ыӀуагъ: «Псым ыгузэгу, псыр тӀоу ыгощэу, ошъо гъэӀагъэ щэрэӀ».

⁷ Тхьэм ошъо гъэӀагъэ ыгъэпси, псэу ошъо гъэӀагъэм ычӀэгъ чӀэтыр псэу ошъо гъэӀагъэм ыкӀыӀу щыӀэм гуищыгъ. Аущтэуи хъугъэ.

⁸ Тхьэр ошъо гъэӀагъэм «уашъокӀэ» еджагъ. Пчыхьэ къэхъугъ, пчэдыжь къэхъугъ – ятӀонэрэ маф.

⁹ Тхьэм ыӀуагъ: «Уашъом ычӀэгъ псэу чӀэтыр зэкӀэ зы чӀыпӀэ орэхъуи, гъушъапӀэр къэрэлъагъу». Аущтэуи хъугъэ.

¹⁰ ГъушъапӀэм Тхьэр «чӀыгукӀэ» еджагъ, псэу зэхэлъэдагъэмэ «хыкӀэ» яджагъ. Ар зэрэдэгъур Тхьэм ылъэгъугъ.

¹¹ Тхьэм ыӀуагъ: «КъэкӀыхэрэр чӀыгум къерэгъэкӀых: кӀэ зиӀэ уцхэри чъыг лъэпкъ зэфэшъхьафхэу кӀэ зиӀэ пхъэшъхьэ мышъхьэ къызпыкӀэхэри». Аущтэуи хъугъэ.

¹² ЧӀым къэкӀыхэрэр къыгъэкӀыгъэх: кӀэ зиӀэ уц лъэпкъ зэфэшъхьафхэри кӀэ зиӀэу, пхъэшъхьэ мышъхьэ къызпыкӀэрэ чъыг лъэпкъ зэфэшъхьафхэри. Ар зэрэдэгъур Тхьэм ылъэгъугъ.

¹³ Пчыхьэ къэхъугъ, пчэдыжь къэхъугъ – ящэнэрэ маф.

¹⁴ Тхьэм ыӀуагъ: «Мафэмрэ чэщымрэ зэфэшъхьаф ашӀынхэу, ошъо гъэӀагъэм нэфынэхэр къыщэрэхъух, пӀалъэхэр къагъэлъэгъонхэу, мафэхэр, илъэсхэр къагъэнэфэнхэу тамыгъэ орэхъух.

¹⁵ ЧӀыгур къагъэнэфыным пае ошъо гъэӀагъэм а нэфынэхэр къыщэрэнэфых». Аущтэуи хъугъэ.

¹⁶ Тхьэм нэфынэ инитӀу къыгъэшӀыгъ: нахь иныр – мафэр зэригъэзекӀонэу, нахь цӀыкӀур – чэщыр зэригъэзекӀонэу; жъуагъохэри къыгъэшӀыгъэх.

¹⁷ Ахэр Тхьэм ошъо гъэӀагъэм зыкӀытыригъэуцуагъэхэр чӀыгур къагъэнэфынэу,

¹⁸ мафэмрэ чэщымрэ зэрагъэзекӀонхэу ыкӀи нэфынэр шӀункӀым гуащызэ ашӀынэу ары. Ар зэрэдэгъур Тхьэм ылъэгъугъ.

¹⁹ Пчыхьэ къэхъугъ, пчэдыжь къэхъугъ – яплӀэнэрэ маф.

²⁰ Тхьэм ыӀуагъ: «Псэ зыпытхэр псым хиз орэхъу. ЧӀым ышъхьагъ ошъо гъэӀагъэм бзыухэр щэрэбыбых».

²¹ Тхьэм къыгъэшӀыгъэх хым хэс шъэджашъэхэр, нэмыкӀ псэушъхьэ лъэпкъ зэфэшъхьафхэу псым бэдэдэ хъухэу щызекӀохэри тамэ зиӀэ бзыу лъэпкъ зэфэшъхьафхэри. Ар зэрэдэгъур Тхьэм ылъэгъугъ.

²² Тхьэм ынэшӀу ахэмэ ащифи, ыӀуагъ: «Зыжъугъэбагъу, зыхэжъугъахъу, хыпсыхэм ахизы шъухъу. Бзыухэри чӀым щэрэбагъох».

²³ Пчыхьэ къэхъугъ, пчэдыжь къэхъугъ – ятфэнэрэ маф.

²⁴ Тхьэм ыӀуагъ: «Псэ зыпыт лъэпкъ зэфэшъхьафхэр чӀым къерэгъэхъух: былымхэр, цохъорэ пшырэ псэушъхьэхэр, хьакӀэ къокӀэ зэфэшъхьафхэр». Аущтэуи хъугъэ.

²⁵ Тхьэм къыгъэхъугъэх хьакӀэ къуакӀэхэр, былым зэфэшъхьафхэр, чӀыгум щыцохъорэ щыпшырэ псэушъхьэ зэмылӀэужыгъохэр. Тхьэм ылъэгъугъ ар зэрэдэгъур.

²⁶ Тхьэм ыӀуагъ: «КъэдгъэшӀын цӀыфыр, Тэ титеплъэу, Тэ тяхьщырыр, хыхэм ахэс пцэжъыехэм, ошъогу бзыухэм, былымхэм, зэкӀэ чӀыгуми чӀыгум зэкӀэ щыцохъорэ щыпшырэ псэушъхьэхэми тетыгъо афыриӀэнэу».

²⁷ Джаущтэу Ежь итеплъэу цӀыфыр Тхьэм ар къыгъэшӀыгъ, Ежь итеплъэу къыгъэшӀыгъ ар, къыгъэшӀыгъ хъулъфыгъи Ащ, бзылъфыгъи къыгъэшӀыгъ.

²⁸ Тхьэм ынэшӀу ахэмэ ащифи, ариӀуагъ: «Зыжъугъэбагъу, зыхэжъугъахъу, чӀыгум тиз зышъушӀи, ар шъуӀэ къижъугъахь, тетыгъо афышъуиӀ хым хэс пцэжъыехэм, ошъогу бзыухэм, сыд фэдэрэ псэушъхьэу чӀыгум тет пстэуми».

²⁹ Тхьэм ыӀуагъ: «Мары къышъостыгъ шъушхынэу кӀэ зиӀэ уцэу зэкӀэ чӀыгум тетыр, сыд фэдэрэ чъыги кӀэ хэлъэу къызпыкӀэрэр.

³⁰ ХьакӀэ къуакӀи, бзыуи, чӀыгум щыцохъорэ щыпшырэ сыд фэдэрэ псэушъхьи – псэ зыпытэу чӀыгум тет пстэуми – Сэ ашхынэу уц шхъуантӀэр ястыгъ». Аущтэуи хъугъэ.

³¹ Тхьэм зэкӀэ къыгъэхъугъэхэр къыплъыхьагъэх – зэкӀэри дэгъу дэдагъ. Пчыхьэ къэхъугъ, пчэдыжь къэхъугъ – яхэнэрэ маф.