Рут 1 - Тхьэм и ГущыӀ

Апэрэ шъхьэр Елимэлэхрэ иунагъорэ тхьамыкӀэгъошхоу къяхъулӀагъэр

¹ ХьыкумэшӀхэм израиль цӀыф лъэпкъыр зыщагъэӀорышӀэщтыгъэ мафэхэм ахэм яхэгъэгу гъаблэ къыщыхъугъагъ. Ащ къыхэкӀэу Ехъуд хэкум ит Бэтлэхъэм къалэм щыщэу лӀы горэ ишъузрэ ыкъуитӀурэ игъусэхэу Моаб хэгъэгум щыпсэуныгоу кӀогъагъэ.

² А лӀым ыцӀагъэр Елимэлэх, ишъузы ыцӀагъэр НэӀэмый, ыкъуитӀу ацӀагъэхэр Махълонрэ Къылионрэ; ахэр Ехъуд хэкум ит Бэтлэхъэм къалэм щыпсэурэ ефрат лъэпкъым щыщыгъэх. Моаб хэгъэгум ахэр кӀохи, ащ къэнагъэх.

³ Уахътэ тешӀагъэу НэӀэмый илӀэу Елимэлэх лӀагъэ, шъузабэмрэ ыкъуитӀурэ язакъоу къэнагъэх.

⁴ Ахэмэ Моаб щыщ пшъашъэхэр къащагъэх – зым Ӏорпэ ыцӀэу, адрэм Рут ыцӀэу. Ау илъэсипшӀ фэдизрэ ащ щыпсэугъэхэу,

⁵ НэӀэмый ыкъуитӀуи, Махълонрэ Къылионрэ, лӀагъэх. ЫкъуитӀуи илӀи имыӀэжьхэу а бзылъфыгъэр къэнагъ.

НэӀэмыйрэ Рутрэ Бэтлэхъэм къызэрэкӀожьыгъэхэр

⁶ Джащыгъум Моаб хэгъэгур ыбгынэнэу инысэхэр игъусэхэу НэӀэмый зиӀэтыгъ, сыда пӀомэ Зиусхьаныр Ежь ицӀыф лъэпкъ нэшӀукӀэ къеплъи, лэжьыгъэ къазэрэритыгъэр Моаб хэгъэгум ащ щызэхихыгъ.

⁷ Зыщыпсэущтыгъэ чӀыпӀэм инысэхэр игъусэхэу ар къикӀыжьыгъ. Ехъуд хэкум къагъэзэжьыгъэу, гъогум къырыкӀохэзэ,

⁸ НэӀэмый иныситӀу ариӀуагъ: «Шъуежьи, шъхьаджи янэ иунэ ерэгъэзэжь: дгъэтӀылъыгъэхэмрэ сэррэ шӀукӀэ шъукъызэрэтфыщытыгъэм фэдэу, Зиусхьаныр шӀукӀэ къышъуфыщэрэт!

⁹ Шъхьаджи лӀы дэкӀожьыгъэу, ащ иунэ шъхьэегъэзыпӀэ щигъотынэу Зиусхьаным шъуешӀ!» Джар НэӀэмый ыӀуи, ябэугъ. Ау куо макъэм зыкъырагъэӀэти, ахэр зэгоутэу гъыгъэх.

¹⁰ ЕтӀанэ къыраӀуагъ: «Хьау, тыуигъусэу узщыщ цӀыф лъэпкъыр зыщыпсэурэм тыкъыбдэкӀощт».

¹¹ Ау НэӀэмый къыӀуагъ: «Шъуадэжь шъукӀожь, сипшъашъэхэр; сыд пае сэ шъукъыскӀыгъуна? Сэ джыри шъэожъыехэр къысхэкӀынха, шъо лӀы шъуфэхъун алъэкӀынэу?

¹² Жъугъэзэжь, сипшъашъэхэр, шъукӀожь, сэ жъыщэ сыхъугъ лӀы сиӀэнкӀэ. Ау „сэ джыри гугъапӀэ сиӀ“ сӀуагъэми, ар хэгъэкӀыри, мы чэщ дэдэм лӀым сыкӀыгъоу, етӀанэ шъаохэр къэслъфыгъагъэхэми,

¹³ ины охъуфэхэ ахэмэ шъо шъуяжэныя? ШъудэмыкӀоу шъущысын шъулъэкӀына? Хьау, сипшъашъэхэр, шъощ фэмыдаӀоу, сэ сиӀоф нахь къин, сыда пӀомэ Зиусхьаныр къыспэшӀуекӀо».

¹⁴ Ахэмэ джыри кӀый макъэр къаӀэти, гъыхэу аублагъ. ЕтӀанэ Ӏорпэ игуащэ ебэуи, къыбгынагъ. Рут игуащэ къыгъэнагъэп, ӀаплӀи рищэкӀыгъ.

¹⁵ Ау НэӀэмый Рут риӀуагъ: «Мары, уинысэгъу зыщыщ цӀыф лъэпкъыми итхьэхэми афигъэзэжьыгъ; ори ащ ыуж уитэу кӀожь».

¹⁶ Ау Рут къыӀуагъ: «Семыгъэз усыбгынэнышъ, сыпкӀымыгъоу згъэзэжьынэу; о уздакӀорэм сэри сыкӀощт, о узщыпсэурэм сэри сыщыпсэущт; о уилъэпкъ сэ силъэпкъыщт, о уи Тхьи сэ си Тхьэщт.

¹⁷ О узщылӀэрэм сэри сыщылӀэщт, ащ сыщычӀалъхьажьынэуи сыфай. СӀуагъэр зысымыгъэцэкӀэжьыкӀэ, сифэшъуашэр Тхьэм серэгъэгъот, хьадэгъу закъом нэмыкӀэу зыгорэм усигъэбгынэмэ».

¹⁸ Рут къыкӀыгъунэу гухэлъ пытэ зэришӀыгъэр зелъэгъум, НэӀэмый нахьыбэрэ ащ елъэӀужьыгъэп.

¹⁹ НэбгыритӀури Бэтлэхъэм нэсыфэхэ кӀуагъэх. Ахэр Бэтлэхъэм дахьэхи, къызалъэгъухэм, зэрэкъалэу къэбырысырыгъэу, бзылъфыгъэхэм аӀощтыгъэ: «Мор НэӀэмыя?»

²⁰ «НэӀэмыйкӀэ шъукъысэмыджэжьэу, Марэ къысашъуӀу, сыда пӀомэ ЛъэкӀ Пстэури ЗиӀэм сищыӀэныгъэ дыджы ышӀыгъ», – ариӀуагъ ахэм НэӀэмый.

²¹ «Сэ сӀэхэр ушъагъэхэу мыщ сыдэкӀыгъ, ау Зиусхьаным ӀэнэкӀэу къысигъэгъэзэжьыгъ; Зиусхьаныр къыспэшӀуекӀоу, ЛъэкӀ Пстэури ЗиӀэм насыпынчъагъэр къысфигъэкӀуагъэмэ, сыда НэӀэмыйкӀэ шъукъызфысэджэщтыр?»

²² Джаущтэу НэӀэмый моаб бзылъфыгъэу, инысэу Рут игъусэу Моаб хэгъэгум къикӀыжьыгъ. Хьэм ихын зыщыфежьэхэрэм адэжь ахэр Бэтлэхъэм къэкӀожьыгъагъэх.