Эстер 9 - Тхьэм и ГущыӀ

Ябгъонэрэ шъхьэр Джуртхэр япыйхэм зэратекӀуагъэхэр

¹ ЯпшӀыкӀутӀонэрэ мазэу, Адар мазэм ияпшӀыкӀущэнэрэ мафэ пачъыхьэм иунашъорэ ыухэбзыгъэмрэ агъэцэкӀэнэу игъо къэсыгъ. А мафэр ары джуртхэм тетыгъо афыряӀэнэу япыйхэр зыгугъэщтыгъэхэр. Ау Ӏофыр шъхьафэу къычӀэкӀыгъ – ежь пыйхэр джуртхэм аӀэ илъ хъугъэх.

² Пачъыхьэу Ахъашурэщ ихэку пстэуми арыт къалэхэм джуртхэр ащызэрэугъоигъэх – бзэджагъэ зыгу къафилъыгъэхэм язэонхэу; ахэмэ ащыщ гори джуртхэм къапэуцужьын ылъэкӀынэу щытыгъэп, сыда пӀомэ зэкӀэ цӀыф лъэпкъыхэр джуртхэм ащыщынэхэ хъугъагъэ.

³ Хэку пэпчъ Ӏэшъхьэтетэу иӀэр, сатрапхэр, хэку пэпчъ пщэу иӀэр, пачъыхьэм икъулыкъушӀэхэри джуртхэм къадеӀэщтыгъэх, сыда пӀомэ ахэм Мардохъай щынэгъошхо фашӀыгъагъ.

⁴ Пачъыхьэм иунэ Мардохъай щылъэшыгъ, икъэбар хэку пстэуми къащекӀокӀыщтыгъ, ежьыми нахь лъагэу зиӀэты зэпытыщтыгъ.

⁵ Джуртхэм япыйхэр чатэкӀэ яохэзэ аукӀыщтыгъэх, лъэпсэкӀод ашӀыхэзэ, зэрэфаехэу яджэгъогъухэм адэзекӀощтыгъэх.

⁶ Пачъыхьэ пытапӀэу Шушан дэтыми джуртхэм нэбгырэ шъитф фэдиз щаукӀыгъ ыкӀи щагъэкӀодыгъ.

^7-10 Ахэмэ джуртхэм япый Хьамэдат ыкъоу Хамэн ыкъуипшӀ ахэтыгъ, ахэр: Парщандат, Далфон, Аспат, Порат, Адалый, Арыдат, Пармашт, Арысай, Арыдай, Уайзэт. Ау хъункӀэн Ӏоф джуртхэм зэрахьагъэп.

¹¹ А мэфэ дэдэм пачъыхьэ пытапӀэу Шушан дэтым щаукӀыгъэм ипчъагъэ пачъыхьэм раӀожьыгъ.

¹² Пачъыхьэм пачъыхьэ гуащэу Эстэр риӀуагъ: «Пачъыхьэ пытапӀэу Шушан дэтым джуртхэм нэбгырэ шъитф фэдизырэ Хамэн ыкъуипшӀырэ апсэ щыхахыгъ. Адэ нэмыкӀ хэкоу пачъыхьэм ыӀэ илъхэм сыда ахэм ащашӀагъэр? Джыри зыгорэм уфая? КъыпфэсшӀэн. Сыд лъэӀуа джыри уиӀэр? Ари къыпфэсшӀэн».

¹³ Эстэр къыӀуагъ: «Пачъыхьэм игъоу елъытэмэ, Шушан дэс джуртхэм фитыныгъэ арарэт хабзэм теткӀэ непэ ашӀагъэм фэдэ неущи ашӀэнэу. Хамэн ыкъуипшӀымэ яхьадэхэр пылъапӀэм парэлъэх».

¹⁴ Пачъыхьэм джаущтэу ашӀынэу афигъэпыти, Шушан унашъо къыщыдигъэкӀыгъ. Хамэн ыкъуипшӀымэ яхьадэхэр пылъапӀэм палъагъэх.

¹⁵ Шушан дэс джуртхэр джащ фэдэу Адар мазэм ияпшӀыкӀуплӀэнэрэ мафи зэрэугъойхи, Шушан нэбгырэ шъищ фэдизмэ апсэ щыхахыгъ, ау ахъункӀагъэхэп.

¹⁶ НэмыкӀ джуртхэу пачъыхьэм ихэкухэм арысыгъэхэри апсэ къаухъумэжьынэу зэрэугъоигъагъэх, япыйхэмкӀэ гупсэф агъотынэу, яджэгъогъухэм ащыщэу нэбгырэ мин тӀокӀищырэ пшӀыкӀутфырэ фэдизмэ апсэ хахыгъ, ау хъункӀэ ашӀагъэп.

¹⁷ Ар зыхъугъэр Адар мазэм ияпшӀыкӀущэнэрэ маф ары. А мэзэ дэдэм ияпшӀыкӀуплӀэнэрэ мафэ ахэм загъэпсэфи, ешхэ ешъомрэ чэфыгъомрэ ямафэу ар ашӀыгъ.

¹⁸ Ау Шушан дэсыгъэ джуртхэр а мазэм ияпшӀыкӀущэнэрэ мафи, ияпшӀыкӀуплӀанэрэми зэонхэу зэрэугъоигъагъэх. ЯпшӀыкӀутфэнэрэ мафэм загъэпсэфыгъ, ар ешхэ ешъомрэ чэфыгъомрэ ямафэу ашӀыгъ.

¹⁹ Джащ пае джуртхэу, къоджэ, къэлэ цӀыкӀухэм адэсхэм Адар мазэм ияпшӀыкӀуплӀэнэрэ мафэ ешхэ ешъомрэ чэфыгъомрэ ахэтхэу, шхын ӀахьышӀухэр зэфагъэхьыжьызэ, мэфэкӀ мафэу агъэмэфэкӀы.

Мардохъай Пурим мэфэкӀыр зэригъэнэфагъэр

²⁰ Мардохъай а хъугъэ шӀагъэхэр зэкӀэ ытхыхи, пачъыхьэу Ахъашурэщ ихэкухэм зэкӀэ джуртэу арысхэм, чыжьэхэми благъэхэми, тхылъхэр афигъэхьыгъэх.

²¹ АщкӀэ афиухэсыгъ илъэс къэс Адар мазэм ияпшӀыкӀуплӀэнэрэ, ияпшӀыкӀутфэнэрэ мафэхэр агъэмэфэкӀынэу.

²² Мы мафэхэр арых джуртхэм япыйхэмкӀэ гупсэф зыщагъотыгъэр. Мы мазэр ары янэшхъэигъо – гушӀуагъо, ятхьамыкӀагъо – мэфэкӀ зыщыхъугъэхэр. Ащ пае апшъэ рилъхьагъ ешхэ ешъомрэ чэфыгъомрэ яӀэхэу а мафэхэр агъэмэфэкӀынэу, шхын ӀахьышӀухэр зэфагъэхьыжьынэу, тхьамыкӀэхэм шӀухьафтын аратызэ ашӀынэу.

²³ Аущтэу а мафэхэр, Мардохъай зэрафитхыгъэм тетэу агъэмэфэкӀынэу зэраублагъэм фэдэу, джуртхэм илъэс къэс лъагъэкӀуатэщтыгъ.

²⁴ Сыда пӀомэ агъагъ лъэпкъым щыщэу Хьамэдат ыкъо Хамэн, джурт пстэуми япыим, джуртхэр ыгъэкӀодынхэу рихъухьи, ахэр зыщигъэкӀодыщт мафэр ыгъэунэфынэу пур – къикӀырэр пхъэдз – ридзэгъагъ.

²⁵ Ау Эстэр пачъыхьэм дэжь зэкӀом, пачъыхьэм тхылъ аригъэтхыгъ гухэлъ бзаджэу Хамэн джуртхэм яхьылӀагъэу ышӀыгъагъэр ежь къытефэжьынэу, ежьыри ыкъохэри пылъапӀэм палъэнхэу унашъуи къыдигъэкӀыгъ.

²⁶ Джары а мафэхэм Пурим зыкӀафаусыгъэр, гущыӀэу «пур» зыфиӀорэм къытекӀэу. ЗэкӀэ мы тхылъым ит гущыӀэ пстэуми адиштэу, ежьхэми алъэгъугъэу, къяхъулӀагъэмэ адиштэу,

²⁷ джуртхэм зэдаштагъэ, ежьхэми атекӀыщтхэми апшъэ ралъхьажьыгъ, ядин зыштэхэри зэрахэтэу, Мардохъай иунашъо тетэу, охътэ гъэнэфагъэм илъэс къэс дэх имыӀэу а мэфитӀур агъэмэфэкӀынэу.

²⁸ А мафэхэр ащымыгъупшэу хагъэунэфыкӀызэ ашӀынэу, лӀэужэу къакӀэлъыкӀохэрэми, лӀакъо пэпчъ, хэку пэпчъ, къалэ пэпчъ агъэмэфэкӀын фае. Пурим мафэхэр джуртхэм аӀэкӀэмызэу, атекӀыщтхэми а мафэхэм ягъэмэфэкӀын щамыгъэтыжьынэу унашъо зэдаштагъ.

²⁹ ЕтӀанэ пачъыхьэ гуащэу Эстэр, Абихъаил ыпхъу, Мардохъай джуртыр игъусэу тхылъ ытхыгъ, ыпэкӀэ Пурим мэфэкӀым фэгъэхьыгъэ тхылъэу Мардохъай ытхыгъагъэр къыгъэшъыпкъэжьынэу.

³⁰ Ахъашурэщ ипачъыхьагъу ит хэкуишъэрэ тӀокӀырэ блырэмэ арыс джурт пстэуми мамырныгъэрэ зыпкъ итыныгъэрэ яӀэмэ зэрашӀоигъом ехьылӀэгъэ гущыӀэхэр зэрыт тхылъхэр афагъэхьыгъ.

³¹ ЕтӀани а тхылъхэм арытыгъ Пурим мафэхэр джуртхэмрэ ахэм ялӀэужхэмрэ охътэ гъэнэфагъэм агъэмэфэкӀынэу. А унашъом нэмыкӀ мэфэкӀхэмрэ нэкӀымрэ тхьаусхэнымрэ ямэфэкӀхэмрэ Пурим мэфэкӀхэр ахагъэхъонэу къыдилъытэщтыгъэ. А унашъор Мардохъайрэ пачъыхьэ гуащэу Эстэррэ къыдагъэкӀыгъагъ.

³² Эстэр мы иунашъо Пуримым фэгъэхьыгъэ хабзэхэр къыгъэшъыпкъэжьыгъэх ыкӀи ахэр тхылъым ратхагъэх.