Эстер 8 - Тхьэм и ГущыӀ

Яенэрэ шъхьэр Джуртмэ яӀоф нахьышӀум фэузэнкӀыгъэ зэрэхъугъэр

¹ А мафэм пачъыхьэу Ахъашурэщ джуртмэ япыеу Хамэн иуни зэкӀэ имылъкуи пачъыхьэ гуащэу Эстэр ритыгъ. Пачъыхьэр Мардохъай къеджагъ, сыда пӀомэ ар ежь Эстэр къызэрэфыщытыр ариӀогъагъ.

² Пачъыхьэм имыхъурэу Хамэн къыӀихыжьыгъагъэр ыӀапэ къыпихи, Мардохъай ритыгъ. Хамэн иуни зэкӀэ имылъкуи алъыплъэнэу Эстэр Мардохъай ыгъэнэфагъ.

³ Эстэр джыри зэ пачъыхьэм дэгущыӀагъ, ащ ыпашъхьэ зыщыридзыхи, гъызэ елъэӀугъ агъагъ лъэпкъым щыщэу Хамэн бзэджагъэу джуртмэ аришӀэнэу рихъухьагъэр ашъхьарищынэу.

⁴ Пачъыхьэм дышъэ бэщыр Эстэр фищэигъ. Эстэр къэтэджыгъ, пачъыхьэм ыпашъхьэ къиуцуи,

⁵ къыӀуагъ: «Пачъыхьэм игъоу ылъытэу, нэшӀукӀэ къысэплъэу, мы Ӏофыри шӀозафэу, ыгу сырехьэу щытымэ, ащыгъум унашъо къыдерэгъэкӀ Хамэн ытхыгъэ тхылъхэр къызэкӀагъэкӀожьынхэу. Пачъыхьэм ихэку пстэуми ащыпсэурэ джуртхэр ыгъэкӀодынхэу, агъагъ лъэпкъым щыщ Хьамэдат ыкъоу Хамэн ытхыгъэхэр арых зигугъу къэсшӀырэр.

⁶ Армырмэ тхьамыкӀагъоу силъэпкъ зыхэфэщтым сыдэущтэу сеплъын слъэкӀына, лӀакъоу сыкъызхэкӀыгъэр зэрэкӀодыщтыри сыдэущтэу сфэщэчына?»

⁷ ЕтӀанэ пачъыхьэу Ахъашурэщ пачъыхьэ гуащэу Эстэри Мардохъай джуртыми ариӀуагъ: «Мары, Хамэн иуни зэкӀэ имылъкуи сэ Эстэр естыгъ, джуртмэ ыӀэ зэратырищэягъэм пае ежьыри пылъапӀэм пязгъэлъагъ.

⁸ Шъо джы джуртмэ афэгъэхьыгъэу тэрэзэу шъулъытэрэр пачъыхьэм ыцӀэкӀэ шъутхы, пачъыхьэ мыхъурри кӀэшъудзэжь, сыда пӀомэ пачъыхьэм ыцӀэкӀэ атхыгъэу, ащ имыхъур зыкӀадзэжьыгъэр зэблэпхъун плъэкӀыщтэп».

⁹ А мэфэ дэдэм, ящэнэрэ мазэу, Сиуан мазэм иятӀокӀэнэрэ щырэ мафэ пачъыхьэм итхакӀохэм къяджагъэх. Мардохъай зэкӀэ къыӀуагъэм тет шъыпкъэу хэкуишъэрэ тӀокӀырэ блырэ хъурэмэ унашъо къафыдагъэкӀыгъ: джуртхэм, сатрапхэм, хэку пэпчъ Ӏэшъхьэтетэу иӀэм, лъэпкъ пэпчъ пщэу иӀэм, Индием щегъэжьагъэу Кущ нэсыжьэу. Хэку пэпчъ тхакӀэу илъымкӀэ, лъэпкъ пэпчъ ежь ыбзэкӀэ, джуртхэми ежьхэм ятхакӀэкӀи абзэкӀи ахэм атхыгъ.

¹⁰ Пачъыхьэу Ахъашурэщ ыцӀэкӀэ Мардохъай аригъэтхи, пачъыхьэ мыхъурыри акӀидзэжьыгъ, пачъыхьэм пае къыхахыгъэ шы лъэпкъ псынкӀэхэм атес мэкъэгъэӀухэм аӀэкӀилъхьи, тхылъхэр афаригъэщагъэх.

¹¹ Мары пачъыхьэм а иунашъо итыгъэр: сыдрэ къали дэс джуртхэр зэрэугъоинхэшъ, ящыӀэныгъэ къаухъумэжьын фитых. Лъэпкъхэу, хэкухэу джуртхэм ябзылъфыгъэхэри ясабыйхэри зэрахэтэу атебанэхэрэм ядзэхэр ахэм агъэкӀодынхэ, аукӀынхэ, лъэпсэкӀод ашӀынхэ, ямылъкуи зэрапхъон фитых.

¹² А пстэури тыдэкӀи гъэцэкӀагъэ зыщыхъун фэягъэр пачъыхьэу Ахъашурэщ зэкӀэ ихэкухэм а зы мафэм, япшӀыкӀутӀонэрэ мазэу Адар зыфаӀорэм ияпшӀыкӀущэнэрэ маф ары.

¹³ А унашъом тетхыкӀыгъэхэр хэбзэ кӀуачӀэ яӀэу хэку пэпчъ къыщыдагъэкӀын фэягъ. А унашъор лъэпкъ пстэуми арагъэӀунэу щытыгъ. А мафэм ехъулӀэу ежьхэм алъ ашӀэжьынэу джуртхэр хьазырынхэ фэягъ.

¹⁴ Пачъыхьэм ишы чъэрмэ атесхэу мэкъэгъэӀухэр, пачъыхьэм иунашъо фэӀорышӀэхэу, псынкӀэу езэрэгъэфыжьагъэх. Пачъыхьэ пытапӀэу Шушан дэтыми ежь къалэми унашъор щагъэӀугъ.

¹⁵ Пачъыхьэ шъуашэр, ышъокӀэ шхъонтӀэ шӀуцӀашъоу ыкӀи фыжьэу, дышъэ пэӀошхор, шэкӀ фыжьымрэ шэкӀ плъыжь чӀапцӀэмрэ ахэшӀыкӀыгъэ абэр щыгъхэу Мардохъай пачъыхьэм ыдэжь къикӀыжьыгъ. Къалэу Шушан къэчэфыжьи, къэгушӀожьыгъ.

¹⁶ А уахътэм джуртхэм дунаир къафэнэфыгъ, гушӀуагъуи яӀагъ, лъытэныгъи къафашӀыгъ.

¹⁷ Хэку пэпчъи, къалэ пэпчъи, сыдрэ чӀыпӀи, пачъыхьэм иунашъорэ ыухэбзыгъэмрэ зынэсыхэрэм, джуртхэр щычэфыщтыгъэх, гушӀуагъо яӀагъ, ешхэ ешъом хэтхэу ямэфэкӀыгъ. Хэгъэгум ицӀыф лъэпкъыхэм ащыщыбэхэм джурт зашӀыгъ, сыда пӀомэ джуртхэм ащыщынэхэ хъугъагъэх.