Эстер 7 - Тхьэм и ГущыӀ

Яблэнэрэ шъхьэр Хамэн къырыкӀуагъэр

¹ Пачъыхьэр Хамэн игъусэу пачъыхьэ гуащэу Эстэр дэжь ешхэ ешъом кӀуагъэ.

² А ятӀонэрэ мафэм, санэм ешъозэ, пачъыхьэр Эстэр еупчӀыгъ: «Пачъыхьэ гуащэу Эстэр, сыда узыфаер? КъаӀо, къыпфэсшӀэщт. Сыд лъэӀуа уиӀэр? Пачъыхьагъум ызыныкъо укъыкӀэлъэӀугъэми, къыпфэсшӀэщт».

³ Пачъыхьэ гуащэу Эстэр джэуап къытыжьыгъ: «О, пачъыхьэр, нэшӀукӀэ укъысэплъэу, игъоу олъытэмэ, сшӀоигъор – псаоу сыкъэбгъэнэнэу ары. ЛъэӀоу къыпфысиӀэр лъэпкъэу сызыщыщыр умыгъэкӀодынэу ары.

⁴ Сыда пӀомэ тэ ахъщэкӀэ тащагъ, сэри силъэпкъэгъухэри лъэпсэкӀоды ташӀынэу, таукӀынэу, тагъэкӀодынэу. ПщылӀы ташӀынэу тащэгъагъэмэ, зи сӀоныеп, сыда пӀомэ ащ фэдэм пае пачъыхьэр бгъэгумэкӀыныр тэрэзынэп».

⁵ Пачъыхьэу Ахъашурэщ пачъыхьэ гуащэу Эстэр еупчӀыгъ: «Хэта ар, тыдэ щыӀа, мыщынэу ащ фэдэ зыгу къэкӀыгъэр?»

⁶ Эстэр къыӀуагъ: «Пыйри джэгъогъури мы лӀы бзаджэу Хамэн ары!» Джащыгъум пачъыхьэмрэ пачъыхьэ гуащэмрэ апашъхьэ Хамэн зэрэщынэрэм къыхэкӀэу къыщыкӀэзэзыгъ.

⁷ Губжым хэтэу пачъыхьэр ешхэ ешъом къыхэтаджи, пачъыхьэ чъыгхатэм дэхьагъ. Хамэн, ыпсэ къыгъэнэжьыным пае, Эстэр елъэӀунэу къэнагъ, сыда пӀомэ ащ пачъыхьэм ыгъэкӀодынэу зэрэрихъухьагъэр къыгурыӀуагъ.

⁸ Пачъыхьэ чъыгхатэм пачъыхьэр къыдэкӀыжьи, зыщешъощтыгъэхэ унэм къызегъэзэжьым, Эстэр игъолъыпӀэ Хамэн зытыридзагъэу ылъэгъугъ. Арыти пачъыхьэр къэкууагъ: «Аужыпкъэм сиунэ кӀоцӀ сэ сапашъхьэ пачъыхьэ гуащэм лые щырихы шӀоигъу!» Пачъыхьэм ыжэ а гущыӀэр къызэрэдэкӀэу, агъэмысэхэрэм зэрарашӀэ хабзэу, Хамэн ынэгу рахъуагъ.

⁹ Пачъыхьэм иевнухмэ ащыщэу Хъарбонэ къыӀуагъ: «Марыба пылъапӀэри, Ӏэнтэгъу шъэныкъо илъэгагъэу Хамэн иунэ дэжь щыт. Пачъыхьэр къэзгъэнэжьыгъэ Мардохъай пае ар Хамэн ыгъэхьазырыгъагъ». Пачъыхьэм къыӀуагъ: «Ар джащ пышъулъ».

¹⁰ Мардохъай пае ыгъэхьазырыгъэ пылъапӀэм Хамэн палъагъ. Ащ нэуж ныӀэп пачъыхьэм игубж зыӀэсэжьыгъэр.