Эстер 6 - Тхьэм и ГущыӀ

Яхэнэрэ шъхьэр Пачъыхьэм Мардохъай лъытэныгъэ зэрэфишӀыгъэр

¹ А чэщым пачъыхьэм чъыен ылъэкӀыгъэп, арыти ащ унашъо ышӀыгъ ипачъыхьагъу лъэхъан фэгъэхьыгъэ хъугъэ шӀагъэхэр зыдатхэрэ тхылъыр къыфахьынэу; пачъыхьэм ащ къыфеджагъэх.

² Ащ итхагъэу къырагъотагъ пачъыхьэм фэлажьэрэ къэрэгъулитӀоу, ащ ипчъэшъхьаӀу къэзгъэгъунэщтыгъэхэ Быхътанрэ Тэрэщрэ пачъыхьэу Ахъашурэщ аукӀынэу зэрэрахъухьэгъагъэр Мардохъай зэраригъэшӀэгъагъэр.

³ Пачъыхьэм къыӀуагъ: «Сыд фэдэ лъытэныгъа, сыд фэдэ ӀахьышӀуа Мардохъай фагъэшъошагъэр?» Пачъыхьэм иунэӀутхэм джэуап къатыгъ: «Зи ащ фашӀагъэ щыӀэп».

⁴ «ӀофышӀэ горэ дэта щагум?» – къэупчӀагъ пачъыхьэр. Хамэн ащыгъум пачъыхьэм иунэшхо кӀыб щыӀэ щагум дэтыгъ; Мардохъай фагъэхьазырыгъэ пылъапӀэм паригъалъэ зэрэшӀоигъор пачъыхьэм риӀонэу ар къэкӀогъагъ.

⁵ Пачъыхьэм иунэӀутхэм къаӀуагъ: «Хамэн къэкӀуагъэу щагум дэт». Пачъыхьэм къыӀуагъ: «Къерэхь».

⁶ Хамэн къызехьэм, пачъыхьэр ащ еупчӀыгъ: «Сэ лъытэныгъэ зыфэсшӀы сшӀоигъо цӀыфым сыд фасшӀэмэ хъуна?» Хамэн ыгукӀэ зэриӀожьыгъ: сэщ пэмыкӀэу, хэта пачъыхьэм лъытэныгъэ зыфишӀы шӀоигъощтыр?

⁷ Хамэн пачъыхьэм риӀуагъ: «Пачъыхьэм лъытэныгъэ зыфишӀы шӀоигъо цӀыфым

⁸ пачъыхьэм щыгъырэ шъуашэр къыфарэхь, пачъыхьэр зытесырэ шымэ ащыщ къыфарэщ, пачъыхьэ паӀом яхьыщырэу пачъыхьэм ишыхэр зэрагъэдахэрэм фэдэ шым ышъхьэ тырарэлъхь.

⁹ Шъуашэмрэ шымрэ пачъыхьэм иапэрэ пщымэ ащыщ горэм рарэти, а цӀыфэу пачъыхьэм лъытэныгъэ зыфишӀы шӀоигъом ахэр ащ щерэлъ, шым тесэу къэлэ утыгум къырерэщ. Мэкъэ лъэшыкӀэ ащ ыпашъхьэ къыщерэӀу: „Пачъыхьэм лъытэныгъэ зыфишӀы шӀоигъо цӀыфым джаущтэу дэзекӀох!“»

¹⁰ Арыти пачъыхьэм Хамэн фигъэпытагъ: «Джыдэдэм шъуашэри шыри штэхи, джа къызэрэпӀуагъэм фэдэу, пачъыхьэ къэлапчъэм дэжь щыс Мардохъай джуртым дэзекӀу. КъэпӀуагъэм щыщ гори хэмыгъэз».

¹¹ Хамэн шъуашэри шыри ыштэхи, Мардохъай ыфэпагъ, ар шым тесэу къэлэ пчэгум къырищи, мэкъэ лъэшыкӀэ ащ ыпашъхьэ къыщиӀуагъ: «Пачъыхьэм лъытэныгъэ зыфишӀы шӀоигъо цӀыфым джаущтэу дэзекӀох!»

¹² Ащ ыуж Мардохъай пачъыхьэ къэлапчъэм дэжь къыгъэзэжьыгъ. Ежь Хамэн, гукъэошхоу ышӀыгъэм къыхэкӀэу ышъхьэ шъхьарыхъоныр къехъухыгъэу, гуӀэзэ, ядэжь кӀожьыгъэ.

¹³ Ишъузэу Зэрэши зэкӀэ ежь иныбджэгъухэми къехъулӀэгъэ пстэури Хамэн къафиӀотэжьыгъ. Арыти ащ иныбджэгъу акъылышӀохэми ишъузи къыраӀуагъ: «Мардохъаеу зыпкъ къикӀыкӀэ улъэпэонэу ебгъэжьагъэр джуртмэ ащыщышъ, ащ о упэшӀуекӀон плъэкӀыщтэп, ежь, щэч хэмылъэу, о къыптекӀощт нахь».

¹⁴ Ахэр ащ дэгущыӀэхэзэ, пачъыхьэм иевнуххэр къэсхи, Эстэр къыгъэхьазырыгъэ ешхэ ешъом гуӀэным хэтхэу Хамэн зыдащагъ.