Эстер 5 - Тхьэм и ГущыӀ

Ятфэнэрэ шъхьэр Эстэр апэрэ ешхэ ешъошхоу ышӀыгъэр

¹ Ящэнэрэ мафэм Эстэр пачъыхьэ гуащэм ишъуашэхэр зыщилъагъэх. ЕтӀанэ пачъыхьэ унэшхом ищагу кӀоцӀ дэуцуагъ, пачъыхьэ тахътэр зыдэщыӀэ унэшхом пэчӀынатӀэу. Ащ дэжьым унэ ихьэгъум пэзанкӀэу пачъыхьэ тахътэм тесэу пачъыхьэр иунэшхо исыгъ.

² Щагум дэтэу пачъыхьэ гуащэу Эстэр зелъэгъум, ар ащ нэшӀукӀэ еплъыгъ. Пачъыхьэм дышъэ бэщэу ыӀыгъыр Эстэр фищэигъ, пачъыхьэ гуащэр ащ екӀуалӀи, дышъэ бэщ цыпэм теӀэбагъ.

³ Пачъыхьэм Эстэр риӀуагъ: «Сыда узгъэгумэкӀырэр, пачъыхьэ гуащэу Эстэр? Сыд фэдэ лъэӀуа уиӀэр? Пачъыхьагъум ызыныкъу пӀуагъэми, къыуатыщт».

⁴ Эстэр къыӀуагъ: «Пачъыхьэм игъоу елъытэмэ, Хамэн игъусэу ар ешхэ ешъоу сэ фэзгъэхьазырыгъэм непэ ерэблагъ».

⁵ Пачъыхьэм къыӀуагъ: «Эстэр шӀоигъор фэтшӀэнэу псынкӀэу Хамэн къашъущэ». Хамэн игъусэу пачъыхьэр Эстэр ыгъэхьазырыгъэ ешхэ ешъом кӀуагъэ.

⁶ Санэм ешъохэзэ, пачъыхьэр Эстэр еупчӀыгъ: «Сыда узфаер? КъаӀо, къыпфэсшӀэщт. Сыд лъэӀуа уиӀэр? Пачъыхьагъум ызыныкъо укъыкӀэлъэӀугъэми, къыпфэсшӀэщт».

⁷ Эстэр джэуап къытыгъ: «Мары сшӀоигъоу сыкъызкӀэлъэӀурэр:

⁸ Пачъыхьэр нэшӀукӀэ къысэплъымэ, пачъыхьэм сызыфаеу сыкъызкӀэлъэӀурэр къысфишӀэнэу игъоу елъытэмэ, ащыгъум пачъыхьэр Хамэн игъусэу афэзгъэхьазырыгъэ ешхэ ешъом джыри неущ орэкӀох. Джащыгъум сэ пачъыхьэм иупчӀэ джэуап къестыщт».

Мардохъай ыукӀынэу Хамэн гухэлъ зэриӀагъэр

⁹ А мафэм Хамэн чэфэу, нэгушӀоу къыдэкӀыгъ. Ау Хамэн пачъыхьэ къэлапчъэмэ адэжь Мардохъай щилъэгъуи, ар къыфэмытэджэу, ыпашъхьэ зызщемыгъэсысыми, Хамэн лъэшэу фэгубжыгъ.

¹⁰ Ау Хамэн ыгу теӀункӀэжьи, ядэжь кӀожьыгъ. ЕтӀанэ иныбджэгъухэмрэ ишъузэу Зэрэшрэ къащэнхэу алъигъэкӀуагъэх.

¹¹ Ахэмэ Хамэн зыщытхъужьызэ, къафиӀотагъ мылъкушхо зэриӀэр, ыкъохэр бэ зэрэхъухэрэр, ар пачъыхьэм зэригъэлъэпӀагъэм, пщыхэми пачъыхьэм икъулыкъушӀэхэми лъагэу зэратыриӀэтыкӀыгъэм икъэбар.

¹² Хамэн ащ къыхигъэхъуагъ: «Ежь пачъыхьэ гуащэу Эстэри къыгъэхьазырыгъэ ешхэ ешъом пачъыхьэмрэ сэррэ нэмыкӀ ригъэблэгъагъэп; джаущтэу неущи сэ пачъыхьэм сыригъусэу ащ сыригъэблэгъагъ.

¹³ Ау Мардохъай джуртыр пачъыхьэ къэлапчъэм дэжь щысэу сэлъэгъуфэ, а пстэуми сэркӀэ пкӀэ яӀэп».

¹⁴ Ишъузэу Зэрэши зэкӀэ ежь иныбджэгъухэми ащ раӀуагъ: «Ӏэнтэгъу шъэныкъо илъэгагъэу пылъапӀэ къарэгъэхьазыри, Мардохъай ащ палъэнэу пачъыхьэм пчэдыжьым елъэӀу; етӀанэ пачъыхьэм уригъусэу ешхэ ешъом чэфэу кӀо». Ар Хамэн ыгу рихьыгъ, пылъапӀэри аригъэгъэхьазырыгъ.