Эстер 4 - Тхьэм и ГущыӀ

ЯплӀэнэрэ шъхьэр Мардохъай джуртмэ ӀэпыӀэгъу афэхъунэу Эстэр зэрелъэӀугъэр

¹ Мардохъай, хъугъэр зэкӀэ зешӀэм, ищыгъынхэр зэӀитхъыгъэх. Дзыуапхъэм хэшӀыкӀыгъэ щыгъынхэр зыщилъэхи, яжьэр ышъхьэ къыритэкъохыгъ, къэлэ гупчэм ихьи, гугъэузэу мэкъэшхокӀэ тхьаусыхэу фежьагъ.

² Джаущтэу пачъыхьэ къэлапчъэм нэсыгъ, ау дэхьагъэп, сыда пӀомэ дзыуапхъэм хэшӀыкӀыгъэ щыгъынхэр пщыгъхэу пачъыхьэ къэлапчъэм удэхьан уфитыгъэп.

³ Джащ фэдэу пачъыхьэм иунашъо зыщагъэӀугъэ хэку пстэуми нэшхъэигъэшхом джуртхэр ащызэлъиштэщтыгъэх, ащанэкӀыщтыгъ, ащытхьаусхэщтыгъэх. Ащыщыбэхэр дзыуапхъэм хэшӀыкӀыгъэ щыгъынхэр ащыгъэу яжьэм хэгъуалъхьэщтыгъэх.

⁴ Эстэр иунэӀут бзылъфыгъэхэмрэ иевнуххэмрэ ыдэжь къакӀохи, Мардохъай ышӀагъэр къыфаӀотагъэти, пачъыхьэ гуащэр лъэшэу къэгумэкӀыгъ. Мардохъай дзыуапхъэм хэшӀыкӀыгъэ щыгъынхэр зыщихынхэшъ, нэмыкӀ щыгъынхэр зыщилъэнхэу фаригъэхьыгъэх, ау адрэм аӀихыгъэхэп.

⁵ ЕтӀанэ пачъыхьэм иевнухэу Хъэтах, Эстэр унэӀутэу фагъэнэфагъэр, Эстэр къаригъащи, Мардохъай дэжь ыгъэкӀуагъ къэхъугъэр, ащ фэдэу зыкӀэзекӀорэри къызэригъэшӀэнэу.

⁶ Хьатах Мардохъай дэжь, къэлэ утыгоу пачъыхьэ къэлапчъэмэ адэжь щыӀэм кӀуагъэ.

⁷ Мардохъай зэкӀэ ащ къыриӀотагъ: ежь къехъулӀагъэхэри, джуртхэр зэраукӀыщтхэм пае тыжьын пчъэгъэ гъэнэфагъэ пачъыхьэм имылъку гъэтӀылъыгъэ хилъхьанэу Хамэн зэригъэгугъагъэхэри.

⁸ Джуртхэр агъэкӀодынхэм пае къалэу Шушан къыщыдагъэкӀыгъэ унашъом тетхыкӀыгъэр Мардохъай Хъэтах ритыгъ, Эстэр ригъэлъэгъунышъ, зэкӀэ Ӏофмэ язытет щигъэгъозэнэу. ЕтӀани фигъэпытагъ пачъыхьэм дэжь кӀонышъ, ежь илъэпкъэгъухэм гукӀэгъу къафишӀыным пае елъэӀунэу.

⁹ Хъатах кӀуи, Мардохъай игущыӀэхэр Эстэр риӀотэжьыгъэх.

¹⁰ Эстэр Хъэтах дэгущыӀи, ыӀофтагъ Мардохъай риӀожьынэу:

¹¹ «ЗэкӀэ пачъыхьэм икъулыкъушӀэхэми, пачъыхьэм ихэку щыпсэурэ цӀыф лъэпкъхэми ашӀэ: хэтми, орэхъулъфыгъ, орэбзылъфыгъ, къемыджагъэхэу пачъыхьэм ищагу кӀоцӀ дахьэрэм – хабзэм фигъэнэфагъэр зы: ар аукӀын фае. Пачъыхьэм идышъэ бэщ зыфищэйрэр ары ныӀэп псаоу къэнэжьыщтыр. Сэры пӀомэ, мары мэфэ щэкӀ хъугъэ пачъыхьэм дэжь сыкӀонэу къызысэмыджагъэр».

^12-13 Эстэр игущыӀэхэр Мардохъай зыраӀотэжьыхэм, ащ джэуап аритыжьыгъ: «Пачъыхьэм иунэшхо узэрэчӀэсым пае джурт пстэуми ащыщэу о зым псаоу укъэнэжьынэу умыгугъ.

¹⁴ Мыщ фэдэ уахътэм о зи умыӀомэ, ащыгъум шъхьафитныгъэмрэ кӀодыпӀэм икӀыжьыгъэным иамалрэ нэмыкӀ чӀыпӀэкӀэ джуртхэм къафэкӀощт, ау ори уятэ иунагъуи шъукӀодыщт. ЕтӀани, хэт ышӀэра, мыщ фэдэ уахътэм паенкӀи мэхъуба пачъыхьэ гуащэу узкӀэхъугъэр?»

¹⁵ Мардохъай раӀожьынэу Эстэр къыӀуагъ:

¹⁶ «Ежьи, Шушан джуртэу дэсыр зэкӀэ къэугъой, сэщ пае нэкӀыр шъуӀыгъ, мэфищым къыкӀоцӀ шъумышх ыкӀи шъуемышъу, чэщыми мафэми. Сэри сиунэӀут бзылъфыгъэхэр сигъусэхэу джащ фэдэу нэкӀыр сӀыгъыщт. Ащ ыуж, агъэуцугъэ хабзэм ымыдэми, пачъыхьэм дэжь сыкӀощт, сыкӀодынэу щытмэ – сэрэкӀод».

¹⁷ Мардохъай ежьи, Эстэр унашъоу къышӀыгъэм тетэу ышӀыгъ.