Эстер 3 - Тхьэм и ГущыӀ

Ящэнэрэ шъхьэр Джуртхэр ыгъэкӀодынхэу Хамэн зэрэрихъухьагъэр

¹ А хъугъэ шӀагъэхэм ауж агъагъ лъэпкъым щыщэу Хъэмэдат ыкъоу Хамэн пачъыхьэу Ахъашурэщ ыгъэини, ыӀэтыгъ, ар зэкӀэ пщэу иӀэмэ анахь лъагэуи ыгъэуцугъ.

² Пачъыхьэ къэлапчъэм дэжь пачъыхьэм къулыкъу щыфэзышӀэхэрэр зэкӀэ Хамэн лъытэныгъэ фашӀэу, ыпашъхьэ лъэгонджэмышъхьэкӀэ щытӀысыщтыгъэх, сыда пӀомэ пачъыхьэм ащ фэдэ унашъо ышӀыгъагъ. Ау Мардохъай ащ лъытэныгъи фишӀыщтыгъэп, зыфиуфэщтыгъэп ыкӀи.

³ Пачъыхьэ къэлапчъэм дэжь пачъыхьэм къулыкъу щыфэзышӀэрэмэ Мардохъай раӀощтыгъэ: «Пачъыхьэм иунашъо сыда зыфэмыгъэцакӀэрэр?»

⁴ Джаущтэу мафэ къэс раӀощтыгъэми, ежь ядэӀурэпти, Хамэн къэбарыр нагъэсыгъ – Мардохъай изекӀуакӀэ фигъэгъущтмэ зэригъэшӀэнэу, сыда пӀомэ зэрэджуртыр ахэмэ ариӀогъагъ.

⁵ ШъыпкъэмкӀи, Мардохъай ежь лъытэныгъэ къыфимышӀэу, ыпашъхьэ лъэгонджэмышъхьэкӀэ зэрэщымытӀысырэм гу зылъетэм, Хамэн губжым зэлъиштагъ.

⁶ Ау Мардохъай зыщыщ цӀыф лъэпкъыр къызыраӀом, ар изакъоу ыукӀыныр Хамэн шӀомакӀэ хъугъэ, Мардохъай илъэпкъэгъухэу, зэкӀэ Ахъашурэщ ипачъыхьагъу тыдэкӀи щыпсэущтыгъэ джуртхэр ыгъэкӀодынхэу рихъухьагъ.

⁷ Апэрэ мазэм, Нысан зыцӀэ мазэм, пачъыхьэу Ахъашурэщ итетыгъом ияпшӀыкӀутӀонэрэ илъэс, Хамэн ыпашъхьэ пур – къикӀырэр пхъэдз – радзагъ: мазэри мафэри агъэунэфыным пае. Пхъэдзыр зытефагъэр япшӀыкӀутӀонэрэ мазэу Адар зыфаӀорэр ары.

⁸ Арыти Хамэн пачъыхьэу Ахъашурэщ риӀуагъ: «Пачъыхьэгъум ихэку пстэуми ащыпсэурэ цӀыф лъэпкъмэ зы лъэпкъ гъэнэфагъэ горэ ахэт; ахэм яхабзэхэмкӀэ нэмыкӀ лъэпкъмэ захаушъхьафыкӀы; пачъыхьэм хабзэу къыдигъэкӀыгъэхэр агъэцакӀэхэрэп. Арышъ ахэр пачъыхьагъум аущтэу щыпсэунхэр пачъыхьэмкӀэ зэрар хъущт.

⁹ Пачъыхьэм игъоу елъытэмэ, ахэр аукӀынхэу унашъо къыдерэгъэкӀ. Тыжьын ахъщэ минипшӀ пачъыхьэм иӀофхэр зыӀэ илъхэм афэсщэчынышъ, ар пачъыхьэм имылъку гъэтӀылъыпӀэ ралъхьанэу ястыщт».

¹⁰ Джащыгъум пачъыхьэм имыхъур Ӏэлъын ыӀэхъуамбэ къыпихи, джуртмэ япыеу агъагъ лъэпкъым щыщэу, Хъэмэдат ыкъо Хамэн ритыгъ.

¹¹ Пачъыхьэм Хамэн риӀуагъ: «А тыжьыныр о къызфэгъани, цӀыф лъэпкъым узыфаер ешӀ».

¹² Апэрэ мазэм ияпшӀыкӀущэнэрэ мафэ пачъыхьэм итхакӀохэм къяджагъэх. Ахэмэ Хамэн унашъо зэришӀыгъэм тетэу сатрапхэм, хэку пэпчъ Ӏэшъхьэтетэу иӀэм, лъэпкъ пэпчъ пщэу иӀэм, хэку пэпчъ тхакӀэу илъымкӀэ, лъэпкъ пэпчъ бзэу зэрыгущыӀэрэмкӀэ афатхыгъ. Пачъыхьэу Ахъашурэщ ыцӀэкӀэ зэкӀэ тхыгъэу, пачъыхьэ мыхъур ӀэлъынымкӀэ къэгъэшъыпкъэжьыгъэуи щытыгъ.

¹³ Пачъыхьэм ихэку пстэуми унашъор мэкъэгъэӀухэм анагъэсыгъ. ЯпшӀыкӀутӀонэрэ мазэм изы мэфэ закъо къыкӀоцӀ – Адар мазэм ияпшӀыкӀущэнэрэ мафэ – зэкӀэ джуртхэр, цӀыкӀуи, ини, сабыий, бзылъфыгъи ахэтхэу аукӀынхэу, агъэкӀодынхэу, лъэпсэкӀод ашӀынхэу, ямылъкуи зэрапхъонэу а унашъом итыгъ.

¹⁴ Унашъом тетхыкӀыгъэхэр хэбзэ кӀуачӀэ яӀэу къыдагъэкӀын фэягъ. А унашъор хэку пэпчъ щагъэӀун, лъэпкъ пстэуми янэрылъэгъоу нэӀуасэ фашӀынхэ фэягъ зэкӀэри а мафэм фэхьазырынхэм пае.

¹⁵ МэкъэгъэӀухэр пачъыхьэм зэриӀуагъэу псынкӀэу гъогум техьэхи, пачъыхьэ пытапӀэр зыдэт къалэу Шушан а унашъор щагъэӀугъ. Пачъыхьэри Хамэни ешъохэу щысыгъэх, ау Шушан къалэр гумэкӀышхом зэлъиштэгъагъ.