Даниел 9 - Тхьэм и ГущыӀ

Ябгъонэрэ шъхьэр Даниел илъэпкъ Тхьэм зэрэфелъэӀугъэр

¹ Мадай лъэпкъым щыщ Ахъашурэщ ыкъоу Дарый Бабилэн хэгъэгум ипачъыхьэу щытыгъ.

² Дарый пачъыхьэгъум зытехьагъэм иапэрэ илъэс, сэ, Даниел, тхыгъэхэм сяджэзэ, Зиусхьаным пегъымбарэу Ирмые къызэрэриӀуагъэм тетэу Ерусэлэм зэхэкъутагъэу илъэс тӀокӀищырэ пшӀырэ зэрэщытыщтыр къызгурыӀуагъ.

³ Джащыгъум сынэгу Зиусхьанэу Тхьэм фэзгъэзагъ. Дзыуапхъэм хэшӀыкӀыгъэ шъыгъо щыгъыныр сщыгъэу, синэкӀэу, яжьэр сшъхьэ къестэкъохызэ тхьэлъэӀу сшӀи, зыфэзгъэцӀыкӀузэ лъэшэу Ащ селъэӀугъ.

⁴ Зиусхьанэу си Тхьэм селъэӀугъ, типсэкӀодшӀагъэхэм ашъхьэ къисхи тобэ сшӀызэ: «Зиусхьанэу си Тхь, О Тхьэшхоу, зэкӀэри зышӀолӀыкӀэу шъхьэкӀэфэшхо зыфашӀырэр! О зэзэгъыныгъэу къыддэпшӀыгъэр оухъумэ, шӀулъэгъу мыкӀодыжь къыпфызиӀэу, уиунашъохэр зыгъэцакӀэрэм гукӀэгъу фэошӀы!

⁵ Тэ псэкӀодхэр тшӀагъэх, емыкӀоу тызекӀуагъ. БзэджэшӀэным тыфэкъаигъагъ, тыкъыппэуцужьыгъ, Уиунашъохэри, Уихьыкуми хъэтэпэмыхь тшӀыгъэх.

⁶ Пфэлэжьэрэ пегъымбарэу, О ПцӀэкӀэ типачъыхьэхэм, типащэхэм, тятэжъхэм, зэкӀэ хэгъэгум ис цӀыф лъэпкъхэм къыддэгущыӀэхэрэм тядэӀущтыгъэп.

⁷ О, си Зиусхьан, шъыпкъэр уалъэныкъо къэгъэзагъ, тэ хьайнэпагъэр къытэхъухыгъ. Тэ – Ехъуд хэкум ис цӀыфхэри, Ерусэлэм дэсхэри, Израил зэрэпсаоу ицӀыфхэри, хэгъэгу благъэхэмрэ чыжьэхэмрэ ащыпсэунхэу арыптэкъухьагъэхэри шъыпкъагъэ къызэрэпфытимыӀагъэм пае непэрэ мэфэм нэсыжьэуи тынэпэтехых.

⁸ О Зиусхьан, тэри, типачъыхьэхэри, типащэхэри, тятэжъхэри, уапашъхьэ псэкӀод зэрэщытшӀагъэм пае хьайнэпагъэр къытэхъухыгъ.

⁹ О Зиусхьанэу ти Тхь, гукӀэгъу пхэлъышъ, тэ тыкъыппэуцужьыгъэми къытфэбгъэгъуныр уиамал.

¹⁰ О Зиусхьанэу ти Тхь, уиӀумэт пегъымбарэхэм къытаӀорэм тедэӀугъэп, уиӀэмыркӀэ къытатыгъэ хабзэхэр дгъэцэкӀагъэхэп.

¹¹ О къапӀорэм едэӀуным фэмыеу, зэрэ Израилэу уихабзэ ыукъуагъ, уигъогуи текӀыгъ. ТипсэкӀодшӀагъэхэм апае Тхьэм иӀумэт Мосэ Хабзэу ытхыгъэм къыщиӀорэ бгыбзэхэмрэ тхьэлъанэхэмрэ тэ къыттефагъэх.

¹² ТхьамыкӀэгъошхом тыхабдзэзэ тэри типащэхэми афэгъэхьыгъэу къэӀогъэ гущыӀэхэр О къэбгъэшъыпкъэжьыгъэх. Ерусэлэм къехъулӀагъэм фэдэ ошъо чӀэгъым ныбжьи къыщыхъугъэп.

¹³ Мосэ и Хабзэ зэритым фэдэу, а тхьамыкӀагъор тэ къытфэкӀуагъ. Ауми Зиусхьанэу ти Тхьэм зыфэдгъэцӀыкӀузэ лъэшэу телъэӀугъэп, бзэджэшӀэныр зэпыдгъэугъэп, ынэшӀу къытщифэным тыщыгугъырэп.

¹⁴ Джащыгъум Зиусхьаным къытфигъэхьазырыгъэ тхьамыкӀагъор къытфигъэкӀуагъ. Зиусхьанэу Тхьэм ышӀэрэ пстэуми шъыпкъагъэ ахэлъба, ауми тэ Ащ тедэӀугъэп.

¹⁵ Зиусхьанэу ти Тхь, Оры Мысырым кӀочӀэшхокӀэ УицӀыф лъэпкъ къизыщыжьыгъэр, Зищытхъу къэзгъэлъэгъуагъэр, непи О ПцӀэ ищытхъу аӀо! ПсэкӀод тшӀагъэ, бзэджагъэкӀэ тызекӀуагъ.

¹⁶ О Зиусхьан! Шъыпкъэр О уалъэныкъокӀэ къэгъэзагъэшъ, О уигубжи – уигубжышхуи Уикъалэу Ерусэлэми, УиӀошъхьэ лъапӀи ашъхьащых. Тэ типсэкӀодшӀагъэхэмрэ тятэжъхэм ябзэджэшӀагъэхэмрэ къахэкӀэу Ерусэлэми УицӀыф лъэпкъи къегъэтӀысэкӀыгъэ лъэпкъхэм яхъэтэпэмыхь.

¹⁷ Джы къызэхэхыба ти Тхь, уиӀумэт итхьэлъэӀу, илъэӀу. Уиунэшхоу хэкужъ хъугъэм О уихьатыркӀэ, Зиусхьан, нэшӀукӀэ зыкъыфэгъаз.

¹⁸ Мыдэ къэдаӀуи, ти Тхь, къызэхэх. Уинэплъэгъу мыкӀэ къэгъази, хэкужъ тызэрэхъугъэм, О ПцӀэ зыхьырэ къалэу зэхэкъутагъэм къяплъ. Тэ шъыпкъагъэу тхэлъым тыщыгугъкӀэ тыолъэӀурэп, О гукӀэгъоу пхэлъым тыщэгугъы нахь. О гукӀэгъушхоу Пхэлъыр тигугъапӀэу тыолъэӀу.

¹⁹ О Зиусхьан, тыкъызэхэх! Зиусхьан, къытфэгъэгъу! Зиусхьан, къытэдэӀуи, къытфашӀ! О уихьатыркӀэ кӀыхьэ-лыхьэ земыгъэшӀ, си Тхь, Уикъали УицӀыф лъэпкъи О ПцӀэкӀэ яджэхэшъ».

ДжэбраӀил мэлэӀичым къэхъущтыр къызэрэфызэхифыгъэр

²⁰ СитхьэлъэӀу лъызгъэкӀуатэзэ, сипсэкӀодшӀагъэхэми, силъэпкъэу Израил ипсэкӀодшӀагъэхэми Зиусхьанэу си Тхьэм ыпашъхьэ сыщяуцолӀэжьзэ, си Тхьэ Ежь иӀошъхьэ лъапӀэ пае селъэӀугъ.

²¹ Джаущтэу Тхьэм селъэӀузэ, ащ ыпэрэ нэфапӀэм цӀыф теплъэ зиӀэ ДжэбраӀилэу щыслъэгъугъагъэр къысфэсыгъ, пчыхьэ къурмэн шӀыгъом тефэу псынкӀэу садэжь къэбыбыгъ.

²² КъызгуригъаӀозэ, ащ къысиӀуагъ: «Даниел! АкъылышӀуагъэрэ зэхэшӀыкӀыныгъэрэ остынэу сэ сыкъехыгъ.

²³ Тхьэм уелъэӀунэу зэребгъэжьагъэм лъыпытэу джэуап къыуитыгъ. Сэри ар къыплъызгъэӀэсынэу сыкъэкӀуагъ. Тхьэм о уегъэлъапӀэшъ гущыӀэм къедэӀуи, нэфапӀэм къикӀырэри зэхэшӀыкӀ.

²⁴ Илъэс тӀокӀищырэ пшӀырэр блыкӀэ штагъэу о уилъэпкърэ къэлэ лъапӀэмрэ афэухэсыгъ. БзэджэшӀагъэм, псэкӀодшӀэным гъунэ афашӀынышъ, хэбзэнчъагъэр апщыныжьынышъ егъэшӀэрэ зэфагъэр агъэуцуным пегъымбарым нэфапӀэу ылъэгъугъэр къэшъыпкъэжьыным, Тхьэм и Унэ агъэуцужьыным плъэгъугъэ нэфапӀэр фэгъэхьыгъ.

²⁵ Арышъ зэгъашӀи зыгурыгъаӀу: Ерусэлэм зэрагъэуцужьыщтым фэгъэхьыгъэ унашъор къызыдэкӀырэм щегъэжьагъэу, Тхьэм къыхихыгъэ Пащэр къэкӀофэ илъэсибл блыкӀэ штагъэу, ащ ыуж илъэс тӀокӀищырэ тӀурэ илъэс блырыблэу тешӀэщт. ЕтӀанэ цӀыфхэм къагъэзэжьыщт, къалэр агъэуцужьыщт, урамхэри дэпкъхэри иӀэхэу, а лъэхъаныр къиныщт.

²⁶ Илъэс тӀокӀищырэ тӀурэр блыкӀэ штагъэу зытекӀырэм ыуж Тхьэм къыхихыгъэ Пащэр аукӀыщт лажьи – хьакъи имыӀэу. ЕтӀанэ къэкӀощт пащэм ицӀыфхэм къалэмрэ Тхьэм и Унэрэ зэхакъутэщтых. Хыдзэ-псыдзэшхом фэдэщт ащ икӀэух. Заор аухыфэ зэраухэсыгъэу хэкужъ хъущт.

²⁷ Ащ илъэсиблым телъытэгъэ зэзэгъыныгъэ пытэ цӀыф лъэпкъыбэмэ адишӀыщт. А илъэсиблым ыгузэгухэм адэжь къурмэншӀыныри, тынхэри щагъэтыжьыщтых. Ащ фэдизыр хъуафэ зышӀыгъэм фагъэнэфэгъэ кӀэухыр къысыфэ Тхьэм и Унэ зыдэщыт чӀыпӀэм гущыкӀыгъо емыкӀушхо теплъэ иӀэщт».