Даниел 8 - Тхьэм и ГущыӀ

Яенэрэ шъхьэр Даниел тӀымрэ ачъэмрэ нэфапӀэу зэрилъэгъугъэхэр

¹ «Бэлшэцар пачъыхьэм тетыгъор зиӀыгъым иящэнэрэ илъэс сэ, Даниел, апэ нэфапӀэу слъэгъугъагъэм ыуж, джыри зы слъэгъугъэ.

² Мары къысфэлъэгъуагъэр: Елам хэкум ит пытапӀэу Шушан сыщыӀэу нэфапӀэм зыщыслъэгъужьыгъ. Улай псыӀэрыщэм пэгъунэгъоу сыщытэу къысщыхъугъ.

³ Сызэплъэм псыӀэрыщэ Ӏупэм дэжь тӀы горэ щытэу слъэгъугъэ. Ащ бжъэкъуитӀу тетыгъ. БжъэкъуитӀури лъэгагъ, ау зыр адрэм нахьи нахь лъэгэжьыгъ, ыуж къыхэкӀыгъэ нахь мышӀэми.

⁴ ТыгъэкъохьапӀэмкӀэ, темырымкӀэ, къыблэмкӀэ зигъазэзэ а тӀыр зэрэпыджэрэр слъэгъугъэ. Псэ зыпыт гори ащ пэуцужьын ылъэкӀыщтыгъэп, зыгорэми ащ укъыӀэкӀихыжьын ылъэкӀынэу щытыгъэп. Ежь зыфаер ышӀэщтыгъэ, ащ рыпагэщтыгъэ.

⁵ Ащ сегупшысэу сыщытзэ слъэгъугъэ – мары тыгъэкъохьапӀэмкӀэ ачъэ къыщылъэгъуагъ. Ылъакъохэр чӀышъхьашъом нэмысэу, джарэу псынкӀэу зэкӀэ чӀыгур ащ зэпикӀухьагъ. А ачъэм ынитӀу азыфагу нэшъэгум бжъэкъошхо дэдэ умыгъэшӀэгъон умылъэкӀынэу дэтыгъ.

⁶ ПсыӀэрыщэ Ӏупэм дэжь бжъэкъуитӀу зытет тӀэу Ӏуслъэгъуагъэм ащ зыфигъэзагъ, губжышхом хэтэу тебэнагъ.

⁷ Сэ слъэгъугъэ, ар нахь лъэшэу губжызэ тӀым пэгъунэгъу зэрэхъугъэри, тӀым еозэ, ыбжъэкъуитӀу зэрэтыриутыгъэри. ТӀыр ащ къыпэлъэшыжьышъугъэп, ачъэм ар чӀыгум тыридзи, зэхищытӀагъ. Зыгорэми тӀыр ащ къыӀэкӀихыжьын ылъэкӀынэу щытыгъэп.

⁸ Ачъэр ащ лъэшэу рыпэгагъ. Джащыгъум ыкӀуачӀэ зыхэхъом, бжъэкъо иныр зэпыутыгъ. Ащ ычӀыпӀэ бжъэкъуиплӀ къыхэкӀыгъ дунаим ылъэныкъуиплӀмэ афэгъэзагъэу.

⁹ А бжъакъохэм ащыщ горэм дэжь зы бжъакъо къыхэкӀыгъ. Апэ ар цӀыкӀугъэ, етӀанэ хахъуи къыблэм, тыгъэкъокӀыпӀэм, Хэгъэгу дэхэ дэдэм афэгъэзагъэу зызэкӀищыгъ.

¹⁰ Уашъом идзэхэми анэсэу ащ зиӀэтыгъ. А дзэхэми жъуагъохэми ащыщ чӀыгум къыридзыхи, зэхищытӀагъэх.

¹¹ Ачъэм зигъэиныгъ, Уашъом идзэмэ я Пщы пэуцужьыным нэсэу ачъэр ипэгагъэ ыӀэтыгъ. Мафэ къэс Тхьэм фашӀырэ къурмэныр харигъэнагъ. ЕтӀанэ Ащ Иунэ ыушӀоигъ, имэхьанэ зэщигъэкъуагъ.

¹² Мафэ къэс ашӀырэ къурмэныр хъэтэпэмыхь ышӀыгъ, Уашъом идзэхэм бжъакъор кӀуачӀэкӀэ атекӀуагъ. Тхьэм дэжь къикӀырэ шъыпкъэр ащ чӀым хищытӀыхьагъ. Бжъакъом сыд ышӀагъэми, зэкӀэри къыдэхъугъ.

¹³ Ащ ыуж мэлэӀичитӀу ягущыӀэ макъэ зэхэсхыгъ. ТӀумэ яз адрэм еупчӀыгъ: „Сыд фэдизрэ ыкъудыищта мафэ къэс ашӀырэ къурмэнэу хъэтэпэмыхь хъугъэм, Тхьэм Иунэ ушӀоигъэм, Уашъом идзэ зэхэкъутагъэхэм афэгъэхьыгъэу нэфапӀэм къыщылъэгъуагъэм?“

¹⁴ Адрэм къыриӀожьыгъ: „Пчыхьэ пчэдыжьэу минитӀурэ шъищырэ, етӀанэ Тхьэм Иунэ агъэкъэбзэжьыщт, зэтырагъэуцожьыщт“».

ДжэбраӀил мэлэӀичым нэфапӀэр къызэрэзэхифыгъэр

¹⁵ «Сэ, Даниел, а нэфапӀэу слъэгъугъэр къызгурыӀоным сыпылъызэ, мары зыгорэ цӀыф теплъэ иӀэу сапашъхьэ къиуцуагъ.

¹⁶ Улай псыӀэрыщэ кӀыӀум къытеӀукӀэу цӀыф макъэ зэхэсхыгъ. Ар къаджи, къыӀуагъ: „ДжэбраӀил! НэфапӀэу ылъэгъугъэм къикӀырэр ащ гурыгъаӀу!“

¹⁷ Сыздэщыт чӀыпӀэм ДжэбраӀил къызыӀохьэм, сыгучӀэ изи, сынэгу егъэзыхыгъэу чӀыгум зычӀэсыдзыгъ. „О цӀыфыр, – къысиӀуагъ ащ, – мы нэфапӀэу плъэгъугъэр уахътэм икӀэухым зэрэфэгъэхьыгъэр зыгурыгъаӀу!“

¹⁸ Ар къеӀофэ, сынэгу егъэзыхыгъэу сиакъыл сиеу, сӀэпкъ-лъэпкъмэ сафимытэу чӀыгум сытелъыгъ. А гущыӀэхэм ауж къыстеӀаби, ащ слъэкъуитӀу сакъытыригъэуцожьыгъ.

¹⁹ ЕтӀанэ игущыӀэ къыпидзэжьыгъ: „Мары – уахътэм икӀэухым Тхьэм игубж къызынафэрэм ыуж къэхъущтыр. НэфапӀэр зыфэгъэхьыгъэр охътэ гъэнэфагъэм икӀэух ары.

²⁰ БжъэкъуитӀу зытет тӀэу плъэгъугъэр – Мадай Пэрсие пачъыхьэхэр арых.

²¹ Ачъэ пырацэр – урым пачъыхьэгъур ары. Бжъэкъошхоу ынитӀу азыфагу нэшъэгум дэтыр – Урымым иапэрэ пачъыхь.

²² Бжъэкъо инэу зэпыутыгъэм ычӀыпӀэ бжъэкъуиплӀэу къыхэкӀыгъэхэр – мы цӀыф лъэпкъым пачъыхьэгъуиплӀ къызэрэхэкӀыщтыр ары. Ау ахэр апэрэм фэдэу кӀочӀэшхощтхэп.

²³ А пачъыхьэгъухэм ятетыгъо икӀэухым, янэпэнчъагъэ джащ нахь хэмыфэжьынэу зызиушъомбгъукӀэ, нэхъоинчъэ нэплъэгъоу, къумалыгъэм фэӀазэу пачъыхьэ къэтэджыщт.

²⁴ Ар кӀочӀэшхощт, ау ежь лъэкӀ иӀэкӀэ арэп. ЗэкӀэри хъуафэ ышӀыщт, зыфежьэрэ Ӏоф пстэури къыдэхъущт, лъэрыхьэхэри Тхьэм фэшъыпкъэ цӀыфхэри лъэпсэкӀодэу ыгъэкӀодыщтых.

²⁵ Хьилэшъ, икъумалыгъэкӀэ апшъэ кӀощт – ащкӀэ зышӀошӀыжьыщт, ыгукӀэ зэкӀэмэ анахь инэуи зыщыхъужьыщт. АмышӀахэу атеозэ бэхэр зэхикъутэщтых, пачъыхьэмэ я Пачъыхьэжьи пэуцужьыни, цӀыфыӀэ къыхэмыхьэу ежь кӀодыщт.

²⁶ Пчыхьэ пчэдыжьмэ яхьылӀэгъэ нэфапӀэу плъэгъугъэр шъыпкъэ. Ар охътэ Ӏудзыгъэмэ афэгъэхьыгъэшъ, ушъэфы“.

²⁷ Сэ, Даниел, къинэу слъэгъугъэм къыхэкӀэу кӀочӀаджэ сыкъэхъуи, мэфэ заулэ сымаджэу сыщылъыгъ. Нэужым сыкъэтэджыжьи, пачъыхьэм сызфигъэзэгъэ Ӏофхэм ягъэцэкӀэн сыублэжьыгъ. СыгучӀэ изыхыгъэ нэфапӀэу слъэгъугъэм къикӀырэр къызгурыӀощтыгъэп».