Даниел 7 - Тхьэм и ГущыӀ

Тхьэм къыригъэлъэгъугъэхэр Даниел къызэриӀотагъэхэр (я 7:1-рэ – я 12:13-рэ шъхьэхэр) Яблэнэрэ шъхьэр Даниел хьэкӀэ-къокӀэ иныжъиплӀыр нэфапӀэу зэрилъэгъугъэр

¹ Бабилэн хэгъэгум ипачъыхьэу Бэлшэцар пачъыхьэгъум зытехьэгъэ апэрэ илъэсым Даниел ипӀэгу илъэу пкӀыхьапӀэм хэтэу нэфапӀэ горэ ылъэгъугъ. ЕтӀанэ а пкӀыхьапӀэр ытхыжьыгъ. Мары а къэбарыр:

² Даниел къытхыгъ – «Сэ, Даниел, чэщым нэфапӀэм сыхэтэу слъэгъугъэ – мары, уашъом щызезэрэхьэрэ жьыбгъиплӀым хышхор зэтырахэу, агъэуалъэщтыгъэ.

³ ХьэкӀэ-къокӀэ иныжъиплӀ зыр адрэм фэмыдэу хым къыхэкӀыгъэх.

⁴ Апэрэр – аслъаным фэдагъ, бгъэжъ тамэхэр готыгъэх. Сеплъызэ, синэрылъэгъоу ащ ытамэхэр гуатхъыхи, чӀыгум тыраӀэтыкӀи, цӀыфым фэдэу лъэкъуитӀукӀэ агъэуцугъ, цӀыфыгуи ратыгъ.

⁵ ЕтӀанэ мары ятӀонэрэу, джыри зы хьэкӀэ-къуакӀэ мышъэм фэдэу къыхэкӀыгъ. Ащ зыкъыӀэти ыужрэ лъэкъуитӀум къатеуцуагъ, ыцэмэ ахэтэу цэгищ ыжэ къыдэщыщтыгъэ. Ащ унашъо фашӀыгъ: „Къэтэджи, зыогъэшхэкӀыфэ лы шхы!“

⁶ Ащ ыуж слъэгъу пэтзэ: мары джыри хьэкӀэ-къуакӀэ хьашыумышым фэдэу къэлъэгъуагъ. Ащ ыкӀыб бзыу тэмиплӀ тетыгъ. А хьэкӀэ-къуакӀэм шъхьиплӀ шӀотыгъ, тетыгъор ащ ратыгъ.

⁷ Ащ ыуж чэщым нэфапӀэм сыхэтэу слъэгъугъэ яплӀэнэрэ хьэкӀэ-къуакӀэр: лъэшэу щынагъоу, къобэ-бжъэбэшхоу, кӀочӀэшхо дэдэу. Ащ гъучӀыцэ инхэр Ӏутыгъэх, ыпэ къифэрэр зэхишхыхьэщтыгъэ, зэхигъэтакъощтыгъэ, къэнэжьырэр лъакъокӀэ ыщытӀэжьыщтыгъэ. Ар ыпэрэ хьэкӀэ-къуакӀэмэ атекӀыщтыгъэ, бжъэкъуипшӀи тетыгъ.

⁸ А бжъакъохэм сяплъызэ, слъэгъу пэтзэ, мары ахэм азыфагу джыри бжъэкъо цӀыкӀу къыдэкӀыгъ. Адрэ бжъакъомэ ащыщэу щыр алъапсэхэр зэрапытхэу ащ къыхитхъыгъэх. А бжъакъом нэхэр цӀыфынэм фэдэу, жи пагэу гущыӀэу иӀагъэх».

Тхьэм ихьыкум нэфапӀэр

⁹ «ЕтӀани слъэгъугъэ: агъэуцугъэхэу, тахътэхэр щытыгъэх, Зимафэхэр Жъы дэдэр тахътэм тетӀысхьагъ; щыгъыр – ос фыжьэу, ышъхьацхэр – цы къабзэу; итахътэ – мэшӀотхъуабзэу, тахътэ щэрэхъхэр – мэшӀолыгъаеу.

¹⁰ КъычӀилъэсыкӀырэ машӀор псыорэу устхъоу, ыпашъхьэ Ащ щечъэхыщтыгъэ; минхэм яминижьхэр Ащ фэлажьэщтыгъэх, цӀыф жъугъэр Ащ ыпашъхьэ итыгъ; хьыкумэшӀхэр тӀысыгъэх, тхылъхэр къызэгуахыгъэх.

¹¹ Сыщытыгъ сеплъэу, бжъакъом гущыӀэ пагэу къыӀохэрэм сядэӀоу. Слъэгъугъэ хьэкӀэ-къуакӀэр зэраукӀыгъэр, ихьадэ зэрагъэкӀодыжьыгъэр – машӀом зэрэщагъэстыжьыгъэр.

¹² Адрэ хьэкӀэ-къуакӀэхэм тетыгъор къаӀахыжьи, къагъэшӀэжьынэу охътэ гъэнэфагъэрэ пӀэлъэ гъэнэфагъэрэ аратыгъэх.

¹³ Чэщым нэфапӀэм сыхэтэу слъэгъугъэ: мары ошъогум ит пщэхэм ахэтэу зыгорэ къэкӀо, цӀыфым ар фэд. Зимафэхэр Жъы дэдэм дэжь ар къынэсыгъ, Ащ ыпашъхьэ ращагъ.

¹⁴ Тетыгъуи, щытхъуи, пачъыхьэгъуи ащ ратыгъэх. Сыд фэдэ цӀыф лъэпкъи, лӀакъуи, сыд фэдэ бзэ зэфэшъхьаф рыгущыӀэрэ цӀыфхэри ащ еуцолӀэщтых. Ащ итетыгъо – егъэшӀэрэ тетыгъу, кӀодыжьыщтэп ипачъыхьэгъуи, егъашӀи зэхэтэкъощтэп».

Даниел ылъэгъугъэ нэфапӀэмэ къарыкӀырэр

¹⁵ «Сэ, Даниел, спсэ гузэжъогъу хэтыгъ, сынэгу кӀэкӀыгъэ а нэфапӀэхэм сыгучӀэ рахыгъ.

¹⁶ А чӀыпӀэм щытхэм яз горэм секӀуалӀи, а зэкӀэмэ къарыкӀырэ шъыпкъэр къысиӀонэу сеупчӀи, къезгъэӀуагъ. Джащыгъум нэфапӀэу слъэгъугъэм къикӀырэр ащ къысфызэхифыгъ:

¹⁷ „Мы хьэкӀэ-къокӀэ иныжъиплӀыр – чӀыгум зыкъыщызыӀэтыщт пачъыхьиплӀыр ары.

¹⁸ Аужыпкъэм Тхьэу зэкӀэмэ анахь Иным фэшъыпкъэ цӀыфхэм тетыгъор аӀэкӀэхьащт, егъашӀэми аӀэкӀэмыкӀэу а пачъыхьэгъур ахэм аӀэкӀэлъыщт“.

¹⁹ ЕтӀанэ адрэ зэкӀэмэ атекӀыщтыгъэ яплӀэнэрэ хьэкӀэ-къуакӀэм фэгъэхьыгъэ шъыпкъэр зэзгъашӀэмэ сшӀоигъо сыхъугъ. Ар лъэшэу щынагъоу, къобэ-бжъэбэшхоу, кӀочӀэшхо дэдэу, гъучӀыцэ инхэр зыӀутэу, зылъабжъэхэр джэрзэу, ыпэ къифэрэр зэхэзышхыхьэу, зэхэзыгъэтакъощтыгъэу, къэнэжьырэр лъакъокӀэ зыщытӀэжьыщтыгъэр ары.

²⁰ Джыри ащ ышъхьэ бжъэкъуипшӀэу тетыгъэми, ахэмэ азыфагу бжъакъоу къыдэкӀи, бжъэкъуищыр къыхэзытхъыгъэми якъэбар сшӀэнэу сыфэягъ. А бжъакъоу адрэмэ анахь ины къыпщыхъоу, нэхэри, пагэу гущыӀэрэ жэри зиӀагъэм фэгъэхьыгъэуи.

²¹ А бжъакъор, Тхьэм фэшъыпкъэхэм зао аришӀылӀагъэу, атекӀоу сэ слъэгъугъэ.

²² Джаущтэу щытыгъ Зимафэхэр Жъы дэдэр къэкӀофэ. Джащыгъум хьыкумым унашъо ышӀыгъ Тхьэу зэкӀэмэ анахь Иным фэшъыпкъэхэр ыухыеу. Иуахътэ къызэсым ахэмэ тетыгъор аӀэкӀэхьагъ.

²³ А зэкӀэмэ афэгъэхьыгъэу сызэупчӀыгъэм къысиӀуагъ моущтэу: „ЯплӀэнэрэ хьэкӀэ-къуакӀэр – адрэ пачъыхьэгъухэм афэмыдэу яплӀэнэрэ пачъыхьэгъоу чӀыгум тетыщтыр ары. Ащ чӀыгур зэкӀэ зэришхыщтыр, зэрищытӀэщтыр, зэригъэтэкъощтыр ары.

²⁴ БжъэкъуипшӀым къикӀрэр – а пачъыхьэгъум пачъыхьипшӀ къызэрэхэкӀыщтыр ары. Ахэмэ ауж зыми фэмыдэу нэмыкӀ пачъыхьэ зыкъыӀэтыщт, ащ пачъыхьищыр тыридзыщт.

²⁵ Ащ Тхьэу зэкӀэмэ анахь Иным пэшӀуекӀорэ гущыӀэхэр къыӀощтых. Тхьэу зэкӀэмэ анахь Иным фэшъыпкъэхэр ыгъэпщылӀыщтых; мэфэкӀ лъапӀэхэмрэ хабзэхэмрэ зэблихъунхэу пылъыщт. Тхьэм фэшъыпкъэхэр илъэсищрэ ныкъорэ ащ ыӀэ илъыщтых.

²⁶ Нэужым хьыкумышӀхэр зэхэтӀысхьанхэшъ, ащ итетыгъо Ӏахыщт, ежь егъэшӀэрэу агъэкӀодыщт.

²⁷ Ошъо чӀэгъым щыӀэ пачъыхьэгъухэм анахь лъэшэу пачъыхьэгъуи, тетыгъуи, лъытэныгъэшхуи Тхьэу зэкӀэмэ анахь Иным фэшъыпкъэ цӀыф лъэпкъым ратыщт. Ащ ипачъыхьэгъу егъэшӀэрэу щытыщт, зэкӀэ тетыгъо зиӀэхэри Ащ фэлэжьэщтых, фэӀорышӀэщтых“.

²⁸ Мыщ гущыӀэр щысэухы. Сэ, Даниел, сыгу къихьагъэмэ сагъэщынагъ, сынэгуи кӀыф хъугъэ, ау щытми мы зэкӀэри зыми фэсымыӀуатэу сыгу щысыухъумагъэх».