Даниел 6 - Тхьэм и ГущыӀ

Яхэнэрэ шъхьэр Даниел зэрагъэмысэн ипыйхэр зэрэлъыхъугъэхэр

¹ Дарый унашъо ышӀи, сатрап нэбгыришъэрэ тӀокӀырэ хэгъэгум тетыгъо щыряӀэнэу тыригъэуцуагъ.

² Даниел ахэтэу, ахэм ашъхьагъ тхьэмэтэшхоу нэбгырищ, Даниел ящэнэрэу, ригъэуцуагъ. Пачъыхьэм гумэкӀ гори имыӀэнэу сатрапмэ Ӏофэу ашӀэрэм якӀэух пстэури ахэм къарахьылӀэжьын фэягъ.

³ А Даниел шэнышӀоу хэлъхэмкӀэ сатрапхэмрэ тхьэмэтэшхохэмрэ къахэщыщтыгъ, ащ пае пачъыхьэгъур зэрэпсаоу ащ ыӀэ рилъхьэ шӀоигъоу пачъыхьэр егупшысэщтыгъэ.

⁴ Джащ пае сатрапхэмрэ тхьэмэтэшхохэмрэ Даниел пачъыхьэгъур зэригъэӀорышӀэрэм мытэрэз горэ къыхагъэщынэу, ащкӀэ зэрагъэмысэн горэм лъыхъухэу аублагъ. Ау Даниел шъыпкъагъэ хэлъыгъ, дагъокӀэ фэплъэгъун е зэрэбгъэмысэн гори къыхафэщтыгъэпти ушъхьагъу гори, щыкӀагъэ гори къагъотын алъэкӀыщтыгъэп.

⁵ Арыти а цӀыфмэ аӀуагъ: «Идин епхыгъэ горэ къыхэтымыгъэщыщтмэ, Даниел зэрэдгъэмысэн ушъхьагъу къэдгъотыщтэп».

⁶ ЕтӀанэ а тхьэмэтэшхохэмрэ сатрапхэмрэ шъэфэу зэгурыӀохи, пачъыхьэм дэжь кӀохи, раӀуагъ: «О пачъыхьэу Дарый! ЕгъашӀэм опсэу!

⁷ Пачъыхьэгъум зэкӀэ итхьэмэтэшхохэм, пачъыхьэныкъохэмрэ сатрапхэмрэ, упчӀэжьэгъухэмрэ Ӏэшъхьэтетхэмрэ пачъыхьэм унашъо къыдигъэкӀыныр, шапхъэ ыгъэнэфэныр игъоу тэлъэгъу: мэфэ щэкӀым къыкӀоцӀ тхьэ горэм е ощ нэмыкӀ цӀыф горэм, хэти орэхъу, зелъэӀукӀэ, аслъанхэр зэрыс машэм радзэнэу.

⁸ Арышъы, о типачъыхь, ащ фэдэ унашъо къыдэгъэкӀи, шапхъэ къэгъэнафи – Мадайми Пэрсиеми зэряхабзэу, ар зэбламыхъунэу пӀапэ къыкӀадзэба».

⁹ Джащыгъум пачъыхьэу Дарый къезэгъи, ащ фэдэ унашъо къыдигъэкӀыгъ, ыӀапи кӀидзэжьыгъ.

Даниел аслъанхэр зэрыс машэм зэрэрадзагъэр

¹⁰ Ащ фэдэ унашъо къызэрэдэкӀыгъэр Даниел зешӀэм иунэ кӀожьи, ашъхьагъырэ унэу зишъхьангъупчъэ Ӏухыгъэхэр Ерусэлэм ылъэныкъокӀэ гъэзагъэхэм ихьагъ. НахьыпэкӀэ зэрихабзэщтыгъэу, мафэм щэгъогогъо лъэгонджэмышъхьэкӀэ щысэу и Тхьэ елъэӀугъ, щытхъу фишӀыгъ.

¹¹ Модрэ шъэфэу зэгурыӀуагъэхэр, Даниел еплъакӀохи, тхьэлъэӀу ышӀэу, и Тхьэ ӀэпыӀэгъу къыфэхъунэу елъэӀоу алъэгъугъ.

¹² Залъэгъум пачъыхьэм дэжь кӀохи, иунашъоу къыдигъэкӀыгъэр ыгу къагъэкӀыжьыгъ: «О пачъыхь, мэфэ щэкӀым къыкӀоцӀ тхьэ горэм, е ощ нэмыкӀ цӀыф горэм, хэти орэхъу, зелъэӀукӀэ, аслъанхэр зэрыс машэм радзэнэу орыба унашъо зышӀыгъэр?» Пачъыхьэм къариӀожьыгъ: «Мадайми Пэрсиеми яхэбзэ гъэуцугъэу, зэблэпхъун умылъэкӀын унэшъо пытэу ар щыт».

¹³ Джащыгъум, ахэмэ пачъыхьэм джэуап ратыгъ: «А Даниелэу, Ехъуд хэкум къыращыгъэ гъэрхэм ащыщым, о типачъыхь, ори укъыридзэрэп, унашъоу узыкӀэтхагъэри ыгъэцакӀэрэп. Мафэм щэгъогогъо ар нахьыпэм фэдэу итхьэ елъэӀу».

¹⁴ Ар зэрэзэхихэу пачъыхьэр лъэшэу къэнэшхъэи, Даниел ымыгъэкӀодынэу ыгу риубытагъ, тыгъэ къохьажьыгъор къэсыфэ ылъэкӀ къымыгъанэу амалхэм яусагъ.

¹⁵ Ау шъэфэу зэгурыӀуагъэхэр зэгъусэхэу пачъыхьэм дэжь кӀохи, раӀуагъ: «Угу къэгъэкӀыжьба, о типачъыхь: Мадаймрэ Пэрсиемрэ яхабзэкӀэ пачъыхьэр зыкӀэтхэжьыгъэ сыд фэдэ унашъуи шапхъи зэблэпхъун зэрэмылъэкӀыщтыр».

¹⁶ Аущтэу зыраӀом пачъыхьэм унашъо ышӀи, Даниел къаригъащи, аслъанхэр зэрыс машэм раригъэдзагъ. Пачъыхьэм Даниел риӀуагъ: «Уцугъуи тӀысыгъуи уимыӀэу уи Тхьэу узыфэлажьэрэм укъерэгъэнэжь!»

¹⁷ Ыужым мыжъо къахьи, мэшэӀум тыралъхьагъ. Даниел фаухэсыгъэр шӀокӀ имыӀэу агъэцэкӀэным пае мыжъом пачъыхьэм имыхъури ицӀыф лъэрыхьэхэм ямыхъури тырадзагъ.

¹⁸ ЕтӀанэ пачъыхьэм икъэлэсэрай ыгъэзэжьыгъ, пчыхьэм шхагъэп, зэщтегъэу Ӏофи хэмыхьэу гъолъыжьыгъэ, ау чэщ реным чъыер къекӀугъэп.

Даниел аслъанхэм къызэраӀэкӀэкӀыгъэр

¹⁹ Нэфылъэр къызэрэзэкӀичэу пачъыхьэр къэтэджи, аслъанхэр зэрыс машэм дэжь лъэтемытэу кӀуагъэ.

²⁰ Машэм екӀуалӀи, гуӀэн макъэкӀэ Даниел еджагъ: «Даниел, Тхьэу егъашӀэм щыӀэм иӀумэт! Уцугъуи тӀысыгъуи уимыӀэу уи Тхьэу узыфэлажьэрэм аслъанхэм уакъыӀэкӀихын, укъыгъэнэжьын ылъэкӀыгъа?»

²¹ «О пачъыхьэр! ЕгъашӀэм опсэу! – Даниел пачъыхьэм къыриӀожьыгъ. –

²² Си Тхьэ имэлэӀич къыгъакӀуи, аслъанхэм ажэхэр зэфишӀыгъэх. Ащ ыпашъхьэ сыщыхыети ахэмэ зыпари къысашӀэшъугъэп. Ори уапашъхьэкӀэ, о пачъыхь, зы мыхъун закъуи сшӀагъэп».

²³ Ар зызэхехым пачъыхьэр лъэш дэдэу гушӀуагъэ, Даниел машэм къырахыжьынэу унашъо ышӀыгъ. Даниел машэм къызырахыжьым и Тхьэ шӀошъхъуныгъэ зэрэфыриӀэм къыхэкӀэу ыпкъ фыкъуагъэ гори зэримыӀэр нафэ къэхъугъ.

²⁴ ЕтӀанэ пачъыхьэм унашъо ышӀи, Даниел зыгъэмысэщтыгъэхэр къащэхи, ахэр, якӀалэхэри, яшъузхэри ягъусэхэу аслъанхэр зэрыс машэм радзагъэх. Ахэр машэм ычӀэ нэмысхэзэ, аслъанхэр къатебанэхи, зэкӀэ акъупшъхьэхэр зэхагъэтэкъуагъэх.

²⁵ Дарый пачъыхьэм лъэпкъи, лӀакъуи, сыд фэдэ бзэ зэфэшъхьаф рыгущыӀэрэ цӀыфхэуи чӀыгум зэфэдэкӀэ щыпсэухэрэм зэкӀэм афитхыгъ: «Мамырныгъэрэ хахъорэ шъуерэӀ, шъобагъу!

²⁶ Сэ унашъо сэшӀы: сипачъыхьэгъу итыдэрэ къуапи щыпсэурэ цӀыфхэр Даниел и Тхьэ ыпашъхьэ орэщынэх, орэкӀэзэзых, Ары Тхьэу щыӀэр, сыдигъуи щыӀэщтыр, Ащ Ипачъыхьэгъу мыкӀодыжьын, Итетыгъуи егъэшӀэрэу щытыщт.

²⁷ Ащ укъегъэнэжьы, укъеухъумэ, нэшэнэ гъэшӀэгъонхэр, Ӏоф шӀагъохэр уашъоми чӀыгуми ащызэшӀуехы; Ежьыр ары Даниел аслъан лъабжъэхэм къаӀэкӀэзыхыжьыгъэр, къэзыгъэнэжьыгъэр».

²⁸ А Даниел Дарый ипачъыхьэгъуми, пэрсиемэ ащыщэу Корэщ ипачъыхьэгъуми шӀур къыдэхъоу щыӀагъ.