Даниел 5 - Тхьэм и ГущыӀ

Ятфэнэрэ шъхьэр Дэпкъым тетхэгъэ гущыӀэхэр

¹ Бэлшэцар пачъыхьэм ицӀыф лъэрыхьэ минмэ апае ешхэ-ешъошхо ышӀи, а минхэм санэм адешъуагъ.

² Санэм зешъуахэм, дышъэмрэ тыжьынымрэ ахэшӀыкӀыгъэ хьакъу-шыкъухэу атэжъэу Нэбухэднэцар Ерусэлэм Тхьэм и Унэу дэтым къычӀаригъэхыгъагъэхэр къыфахьынхэу Бэлшэцар унашъо ышӀыгъ. Ежь пачъыхьэри, ицӀыф лъэрыхьэхэри, ишъузхэри, ишъузгуадзэхэри арешъонхэм пае.

³ Арыти дышъэм хэшӀыкӀыгъэ хьакъу-шыкъухэу Ерусэлэм Тхьэм и Унэу дэтым къычӀахыгъэхэр къахьыгъэх; пачъыхьэри, ащ ицӀыф лъэрыхьэхэри, ишъузхэри, ишъузгуадзэхэри ахэм арешъонхэу рагъэжьагъ.

⁴ Санэм ешъохэзэ, дышъэмрэ тыжьынымрэ, джэрзымрэ гъучӀымрэ, пхъэмрэ мыжъомрэ ахэшӀыкӀыгъэ тхьэ нэпцӀхэр агъэлъапӀэщтыгъэх.

⁵ А сыхьатыпэ дэдэм цӀыфыӀэм ыӀэхъуамбэхэр къэлъэгъуагъэх, остыгъэр зытетым пэчӀынатэу, пачъыхьэм икъэлэсэрай дэпкъэу етӀэфкӀэ игъэм къытетхэхэу аублагъ. Пачъыхьэм цӀыф Ӏашъхьэу тхэрэр инэрылъэгъугъ.

⁶ Арыти пачъыхьэм ынэгу кӀыфы хъугъэ; ыгу къихьагъэмэ къагъэщынагъ, ылъакъохэм амыӀыгъыжьэу къэмэхагъэх, ылъэгуанджэхэр къэкӀэзэзыхи зэутэкӀхэу хъугъэ.

⁷ Пачъыхьэр лъэшэу къэкууагъ ушхъухьакӀохэр, усэрэжъхэр, удыхэр къащэнхэу унашъо ышӀыгъ. Пачъыхьэр къэгущыӀи Бабилэн ис акъылышӀомэ ариӀуагъ: «Мо тхыгъэм къеджэу, ащ къикӀырэр къызгурызгъаӀорэм щыгъын плъыжь-чӀапцӀашъо щязгъэлъэщт, дышъэ пшъэхъуи ыпшъэ рязгъэлъхьащт, хэгъэгур зыӀэ илъхэм ящэнэрэу ахэзгъэуцощт».

⁸ Пачъыхьэм зэкӀэ иакъылышӀохэр къэзэрэугъоигъэх, ау тхыгъэм къеджэнхэуи, ащ къикӀырэри пачъыхьэм къыфызэхафынэуи афэлъэкӀыгъэп.

⁹ Джащыгъум Бэлшэцар пачъыхьэр нахьи нахь лъэшэу къэщынагъ, ынэгуи нахьи нахь кӀыф къэхъугъ, ицӀыф лъэрыхьэхэри ашӀэн амышӀэу къызэхэнагъэх.

¹⁰ Пачъыхьэмрэ ащ ицӀыф лъэрыхьэхэмрэ ягущыӀэхэр зэхихыгъэти пачъыхьэ гуащэр ешхэ-ешъошхор зыщырагъэкӀокӀырэ унэм чӀэхьагъ. «О пачъыхь, егъашӀэм опсэу! – риӀуагъ ащ. – Угу къихьагъэхэм уарэмыгъэщын, унэгуи зэрэмыокӀ!

¹¹ Тхьэ лъапӀэхэм апсэ зыхэлъ лӀы уипачъыхьэгъу ис. Уятэжъ итетыгъо лъэхъаным шӀэныгъи, зэхэшӀыкӀыныгъи, акъылышӀуагъи, тхьэхэм яакъылышӀуагъэ лъыкӀахьэу, ащ зэрэхэлъыр къэнэфэгъагъ. Арыти о уятэжъэу, Нэбухэднэцар пачъыхьэм, тхьагурымагъохэм, удыхэм, ушхъухьакӀохэм, усэрэжъхэм ежь пачъыхьэу уятэжъ ар ашъхьагъ ригъэуцогъагъ.

¹² А Даниелэу, Бэлтэшэцар пачъыхьэм зыфиусыгъагъэр, пкӀыхьапӀэ зэхэфыгъуаехэм къарыкӀырэр зэхифышъунэу, сыд фэдэ шъэфи къышӀэшъунэу, Ӏоф зэкъодзагъэхэр зэшӀуихыжьышъунэу акъылышӀуагъэрэ шӀэныгъэрэ, зэхэшӀыкӀыныгъэрэ хэлъхэу къычӀэкӀыгъагъ. Арышъ Даниел къягъащ, тхыгъэм къикӀырэр ащ къызэхегъэф».

Даниел тхыгъэр къызэрэзэхифыгъэр

¹³ Пачъыхьэм ыпашъхьэ Даниел къыращагъ. Пачъыхьэм Даниелы риӀуагъ: «Ора Даниелэу, сятэжъэу пачъыхьэм Ехъуд хэкум къырищыгъэгъэ гъэрмэ ащыщыр?

¹⁴ О Тхьэ лъапӀэхэм апсэ пхэлъэу, шӀэныгъэрэ зэхэшӀыкӀыныгъэрэ, акъылышӀогъэ инрэ къыпхагъотагъэхэу сэ зэхэсхыгъэ.

¹⁵ Мары, акъылышӀохэмрэ ушхъухьакӀохэмрэ къысфащэгъагъэх, мо тхыгъэм къеджэнхи, ащ къикӀырэр къызгурагъэӀонэу; ау ахэмэ ар афэшӀагъэп.

¹⁶ Ау о пкӀыхьапӀэмэ къарыкӀырэр, Ӏоф зэкъодзагъэхэр зэшӀопхыжьынхэ плъэкӀэу ощ пае аӀоу сэ зэхэсхыгъэ. Арышъ, мо тхыгъэм укъеджэн плъэкӀэу, ащ къикӀырэр къысфызэхэпфымэ, щыгъын плъыжь-чӀапцӀашъо къыпщязгъэлъэщт, дышъэ пшъэхъуи упшъэ къырязгъэлъхьащт, хэгъэгур зыӀэ илъхэм ящэнэрэу уахэзгъэуцощт».

¹⁷ Даниел пачъыхьэм джэуап ритыжьыгъ: «Уитынхэр къызыфэгъэнэжьых, лъытэныгъэри нэмыкӀ горэм фэгъэшъуаш. Сэ ахэр хэмытхэми дэпкъым тетхагъэм пачъыхьэм сыкъыфеджэни, къикӀырэри къыфызэхэсфыщт.

¹⁸ О пачъыхь! Тхьэу зэкӀэмэ анахь Иным пачъыхьэгъуи, тетыгъошхуи, кӀуачӀи, щытхъуи, уятэжъэу Нэбухэднэцар къыритыгъагъэх.

¹⁹ Тетыгъошхоу Тхьэм ащ къырипэсыгъэм зэкӀэ цӀыф лъэпкъи, лӀакъуи, сыд фэдэ бзэ зэфэшъхьаф рыгущыӀэрэ цӀыфхэри ыгъэтхыощтыгъэх, ыгъэщынэщтыгъэх: зыфаер пачъыхьэм аригъэукӀыщтыгъэ, зыфаер псаоу къыгъэнэжьыщтыгъэ; зыфаер ыӀэтыщтыгъэ, зыфаер ыушъхьакӀущтыгъэ.

²⁰ Ау ыгу пэгагъэр зетӀысхьэм, шӀыкӀэягъэм нэсэу жъалымыгъэм зызэлъештэм, ипачъыхьэ тахътэ къырадзыхи, ищытхъуи шӀуагъэкӀодыгъ.

²¹ Тхьэу зэкӀэмэ анахь Иным псэ зыпыт пстэуми япачъыхьэгъухэм тетыгъор ащиӀыгъэу, Ежь зыфаем ар ритэу зэрэщытыр къыгурэӀофэ цӀыфхэм ахафыгъ, хьэкӀэ-къуакӀэхэм афэдэу ар акъылынчъэ хъугъэ, щыд Ӏэлхэм ягъусэу адэпсэугъ; ащ цум фэдэу уц рагъэхъугъ, уашъом къехырэ осэпсыр ыпкъ къытехагъ.

²² Ау, ори, ащ ыкъоу Бэлшэцар, а пстэум уащыгъуазэу щытыгъэми, угукӀэ уеуцолӀагъэп.

²³ Уашъохэм я Зиусхьаным упэшӀуекӀоу о зыпӀэтыгъ. Ащ и Унэ ит хьакъу-шыкъухэр къыпфахьынхэу унашъо пшӀыгъэ. Ори, уицӀыф лъэрыхьэхэри, уишъузхэри, уишъузгуадзэхэри ахэмкӀэ санэм шъуешъуагъ. Дышъэмрэ тыжьынымрэ, джэрзымрэ гъучӀымрэ, пхъэмрэ мыжъомрэ ахэшӀыкӀыгъэ тхьэ нэпцӀхэу зыпари зымылъэгъухэрэм, зэхэзымыхыхэрэм, зэхэшӀыкӀ зимыӀэхэм щытхъу афэпшӀыгъ. Ау уигъашӀэрэ уигъогухэмрэ зэкӀэ ЗыӀэ илъ Тхьэм лъытэныгъэ фэпшӀыгъэп.

²⁴ Джары Ӏэу мор зытхыгъэр Ащ къызыкӀыплъигъэӀэсыгъэр.

²⁵ Мыщ тетхагъэр мары: МЕНЕ, МЕНЕ, ТЕКЕЛ, ПАРСИН.

²⁶ ГущыӀэхэм къарыкӀырэр мары: МЕНЕ – къылъытагъ уипачъыхьэгъу имафэхэр Тхьэм, ахэм кӀэух къафишӀыгъ;

²⁷ ТЕКЕЛ – уищэчыгъ щэчалъэмкӀэ, упсынкӀэ дэдэу къычӀэкӀыгъ;

²⁸ ПЕРЕС – ыгощыгъ уипачъыхьэгъу, мадай цӀыфхэмрэ пэрсий цӀыфхэмрэ аритыгъ».

²⁹ Джащыгъум Бэлшэцар иунашъокӀэ Даниел щыгъын плъыжь-чӀапцӀашъо щалъагъ, дышъэ пшъэхъури ыпшъэ ралъхьагъ, хэгъэгур зыӀэ илъхэм ящэнэрэуи ахагъэуцуагъ.

³⁰ КъыкӀэлъыкӀорэ чэщым Бэлшэцар, бабилэн пачъыхьэр, аукӀыгъ.

³¹ Мадаймэ ащыщэу Дарый илъэс тӀокӀищырэ тӀурэ ыныбжьэу пачъыхьагъум техьагъ.