Даниел 4 - Тхьэм и ГущыӀ

ЯплӀэнэрэ шъхьэр Нэбухэднэцар иятӀонэрэ пкӀыхьапӀ

¹ «Сэ, Нэбухэднэцар, рэхьатэу сиунэ сисэу, нэхъоир къысэбэкӀэу къэлэсэраим сыщыпсэущтыгъ.

² Ау пкӀыхьапӀэ слъэгъуи, сигъэщынагъ; сипӀэгу сыхэлъэу, нэфапӀэу къысфэлъэгъуагъэхэм гущтэ сагъэшӀыгъ.

³ ПкӀыхьапӀэм къикӀырэр къысаӀоным пае, Бабилэн хэгъэгум ис акъылышӀохэр зэкӀэ къысфащэнхэу унашъо афэсшӀыгъагъ.

⁴ Арыти тхьагурымагъохэр, ушхъухьакӀохэр, усэрэжъхэр, жъогъуаплъэхэр садэжь къэкӀуагъэх; сипкӀыхьапӀэ ахэмэ афэсӀотагъ, ау ащ къикӀырэр къысфызэхафын алъэкӀыгъэп.

⁵ Аужыпкъэм Даниелэу, Бэлтэшэцар зыфаусыгъэр – ситхьэ ицӀэджэгъоу, тхьэ лъапӀэхэм апсэ зыхэлъыр, садэжь къэкӀуагъ. СипкӀыхьапӀэ ащ сэ фэсӀотагъ.

⁶ Сэ есӀуагъ: „О, Бэлтэшэцар, тхьагурымагъохэм ятхьэмат! Тхьэ лъапӀэхэм апсэ о зэрэпхэлъыр, сыд фэдэ шъэфи къызэхэпфыныр о къин къызэрэпщымыхъурэр сэ сэшӀэ. ПкӀыхьапӀэу слъэгъугъэм къедэӀуи, къикӀырэр къысфызэхэф“.

⁷ СипӀэ сыхэлъэу, нэфапӀэу сшъхьэ фэгъэхьыгъэу слъэгъугъэр мыщ фэд: мары – чӀыгу гузэгум чъыг лъэгэшхо ит.

⁸ Чъыгышхоу, пытэу хахъуи зиӀэтыгъ, ышъхьапэ уашъом нэсэу, тыдрэ чӀыпӀэ щыпсэухэрэми ар алъэгъун алъэкӀыщтыгъэ.

⁹ Ытхьэпэ дахэхэри Ӏужъухэу, пхъэшъхьэ-мышъхьаби къыпыкӀэу, зэкӀэми ашхын ащ пытыгъ; ащ ычӀэгъ, жьаум, чӀышъхьашъом тет хьэкӀэ-къуакӀэхэр чӀэсыщтыгъэх, икъутамэхэм ошъогум щыхьарзэрэ бзыухэм набгъохэр ащашӀыщтыгъ, псэ зыпыт пстэури ащ щышхэщтыгъ.

¹⁰ СипӀэ сыхэлъэу, пкӀыхьапӀэм щысэлъэгъу УхъумэкӀо ЛъапӀэр уашъом къызэрехыгъэр.

¹¹ Мэкъэ ӀэтыгъэкӀэ къыӀуагъ: „Мы чъыгыр ишъуупкӀ, икъутамэхэри гошъуупкӀых, итхьапэхэри пышъутхъыхэри пхъэшъхьэ-мышъхьэу пытхэри ишъутэкъухьэх; ащ ычӀэгъ чӀэс хьэкӀэ-къуакӀэхэри хэрэлъэдэжьых, икъутамэхэм атес бзыухэри орэбыбыжьых.

¹² Ау чъыг такъэмрэ лъапсэмрэ гъучӀ-джэрз пшъэхъухэр ателъхэу, губгъо уцмэ ахэтэу чӀыгум къытерэн. Ошъогу осэпсыр ащ къытехэу, губгъо уцым хэтэу, хьэкӀэ-къуакӀэмэ адэпсэунэу орэхъу.

¹³ ЦӀыф акъылыр чӀинагъэу, хьэкӀэ-къокӀэ гупшысакӀэм итэу, илъэсибл шъхьарыкӀыщт.

¹⁴ УхъумэкӀо ЛъапӀэхэр арых а унашъор зышӀыгъэхэр, шыихъ лъапӀэхэр арых хьыкумышӀыгъэхэр зыӀуатэхэрэр. Тхьэу зэкӀэмэ анахь иныр – псэ зыпыт пстэуми тыдэ ахэр щэпсэухэми – япачъыхьэгъухэм тетыгъор ащызыӀыгъыр, зыфаем ар реты, фаемэ анахь зэмыпэсыгъэхэри ашъхьагъ ригъэуцонхэ зэрилъэкӀырэр ашӀэным пай“.

¹⁵ Сэ, пачъыхьэу Нэбухэднэцар, джары пкӀыхьапӀэу слъэгъугъэр. Джы о, Бэлтэшэцар, ащ къикӀырэр къысаӀу, сыда пӀомэ сипачъыхьэгъу ис акъылышӀохэм зэкӀэми ащыщ горэми ащ къикӀырэр къысфызэхифын ылъэкӀыгъэп, ау о тхьэ лъапӀэхэм апсэ пхэлъышъ къызэхэпфын плъэкӀыщт».

ЯтӀонэрэ пкӀыхьапӀэр Даниел зэрэзэхифыгъэр

¹⁶ Джащыгъум Даниел, БэлтэшэцаркӀэ заджэхэрэр, игупшысэхэм атещыныхьи, зэтекъагъэу заулэрэ щытыгъ. Арыти пачъыхьэм къыриӀуагъ: «Бэлтэшэцар! Мы пкӀыхьапӀэми ащ къикӀырэми уащымыщын». Мыдрэм джэуап ритыжьыгъ: «Пачъыхьэу сизиусхьан! Узылъэгъу мыхъурэмэ а пкӀыхьапӀэр алъэгъугъагъот, уипыйхэм ащ къикӀырэр афэгъэхьыгъагъот!

¹⁷ Чъыгышхоу а плъэгъугъэр, пытэу хахъуи зызыӀэтыгъэр, ышъхьапэ уашъом нэсэу, тыдрэ чӀыпӀэ щыпсэухэрэми алъэгъун алъэкӀыщтыгъэр,

¹⁸ зитхьапэ дахэхэри Ӏужъухэу, пхъэшъхьэ-мышъхьаби къызыпыкӀэу, зэкӀэми ашхын зыпытыгъэр; зычӀэгъ чӀышъхьашъом тет хьэкӀэ-къуакӀэхэр чӀэсыщтыгъэхэр, зикъутамэхэм ошъогум щыхьарзэрэ бзыухэм набгъохэр щашӀыщтыгъэр,

¹⁹ ар оры, о типачъыхьэр – зилъэшыгъэ зэкӀэмэ апшъэ хъуи зитетыгъо пытагъэр. Уиинагъэ джарэу лъэшэу хахъуи, уашъомэ анэсыгъ, уипачъыхьэгъуи зэрэчӀыгоу зэлъеубыты.

²⁰ О, типачъыхь, плъэгъугъэ – уеплъызэ УхъумэкӀо ЛъапӀэр уашъом къехи, къыӀуагъэу: „Мы чъыгыр ишъуупкӀи, жъугъэкӀоды; ау чъыг такъэмрэ лъапсэмрэ гъучӀ-джэрз пшъэхъухэр ателъхэу, губгъо уцмэ ахэтэу чӀыгум къыхэжъугъан. Илъэсибл шъхьарэкӀыфэ ошъогу осэпсыр къытехэу, губгъо уцым хэтэу, хьэкӀэ-къуакӀэмэ адэпсэунэу орэхъу“.

²¹ Ащ къикӀырэр, о типачъыхь, Тхьэу зэкӀэмэ анахь Иным сизиусхьанэу пачъыхьэм къехъулӀэщтэу ыухэсыгъэр мары:

²² О цӀыфмэ уакӀэрычыгъэу, чӀышъхьашъом тет хьэкӀэ-къуакӀэхэм уадэпсэущт; цум фэдэу уцыр пхъущт, ошъогу осэпсыр къыптехэщт. Тхьэу зэкӀэмэ анахь Иным псэ зыпыт пстэуми япачъыхьэгъухэм тетыгъор ащиӀыгъэу, Ежь зыфаем ар ритэу зэрэщытыр къыбгурэӀофэ илъэсибл пшъхьарыкӀыщт.

²³ Чъыг такъэмрэ лъапсэмрэ къагъэнэнэу унашъо зэрашӀыгъэм къикӀырэр – Уашъомэ я Тхьэ зэкӀэ ыӀэ зэрилъыр къызыбгурыӀокӀэ, уипачъыхьэгъу къызэрэуатыжьыщтыр ары.

²⁴ Арышъ, типачъыхь, джэнджэшэгъу сызэрэпфэхъурэр сыолъэӀу уигуапэу бгъэцэкӀэнэу: псэкӀодшӀэным ыуж икӀи, шъыпкъагъэм тетэу псэуи, бзэджагъэхэм апыкӀыжьи, егъэзыгъэхэм гукӀэгъу афэшӀи – етӀанэ мамырэу Тхьэм бэрэ уигъэпсэунба!»

²⁵ А зэкӀэри Нэбухэднэцар пачъыхьэм къехъулӀагъ.

²⁶ Мэзэ пшӀыкӀутӀу тешӀагъэу, икъэлэсэраеу Бабилэн дэтым иунашъхьэ къыщикӀухьэзэ,

²⁷ пачъыхьэм ыӀуагъ: «Сэ скӀуачӀэрэ, силъэкӀышхорэ къырылъэгъонхэу сэрыба мы Бабилэнышхор зыгъэуцугъэр, пачъыхьэгъум икъэлашъхьэ зыгъэпсыгъэр!»

²⁸ Мы гущыӀэхэр къымыухызэ, уашъом макъэ къиӀукӀыгъ: «О къыпфэгъэхьыгъэу мыщ фэдэ унашъо ашӀыгъ, Нэбухэднэцар пачъыхьэр: уипачъыхьэгъу пӀэ илъыжьэп!

²⁹ О цӀыфмэ уакӀэрычыгъэу, чӀышъхьашъом тет хьэкӀэ-къуакӀэхэм уадэпсэущт; цум фэдэу уцыр пхъущт. Тхьэу зэкӀэмэ анахь Иным псэ зыпыт пстэуми япачъыхьэгъухэм тетыгъор ащиӀыгъэу, Ежь зыфаем ар ритэу зэрэщытыр къыбгурэӀофэ илъэсибл пшъхьарыкӀыщт!»

³⁰ Ар дэдэм Нэбухэднэцар раӀолӀагъэр хъугъэ. ЦӀыфхэм акӀэрачыгъ, цум фэдэу уцыр ыхъугъ. Ошъогу осэпсыр ыпкъ къытехагъ, ышъхьац бгъэжъым икъамзыйхэм афэдэу кӀыхьэу, ыӀэбжъанэхэри бзыу лъэбжъанэхэм афэдэхэу хъугъэх.

Нэбухэднэцар Тхьэм щытхъу зэрэфишӀыгъэр

³¹ «А уахътэр зытекӀым, сэ, Нэбухэднэцар, уашъом сыдэплъыягъ, сиакъыли згъотыжьыгъэ. Джащыгъум Тхьэу зэкӀэмэ анахь Иным щытхъу фэсшӀыгъ; ЕгъэшӀэрэу ЩыӀэ Тхьэр згъэлъэпӀагъэ, ищытхъу сӀуагъэ. Итетыгъо Ащ – мыкӀодыжьын, Ипачъыхьэгъу Ащ лӀэуж зэкӀэлъыкӀохэм ащылъыкӀотэщт.

³² ЧӀыгум цӀыфэу щыпсэурэ пстэури Ащ ыпашъхьэкӀэ цӀыкӀужъыех; Ошъогу кӀуачӀэхэми, чӀыгум тетхэм зэкӀэми Ар зэрэфаеу адэзекӀо; Ар зыми къыгъэуцун ылъэкӀыщтэп, е „Сыда о пшӀагъэр?“ ащ езыӀони щыӀэп».

³³ А охътэ дэдэм, сиакъыл зэрэзгъотыжьыгъэм тетэу, сипачъыхьэ щытхъуи, лъытэныгъи, шъхьэкӀэфэныгъи къысфагъэзэжьыгъ. Джащыгъум сиупчӀэжьэгъухэми, цӀыф лъэрыхьэхэми зыкъысфагъэзэжьыгъ, сипачъыхьэгъу сытырагъэуцожьыгъ, нахьыпэм нахьи нахь лъэш сыхъугъ.

³⁴ «Джы сэ, Нэбухэднэцар, сыщэтхъу, сэӀэты, сэгъэлъапӀэ Уашъомэ я Пачъыхьэ. Ащ иӀофхэр зэкӀэри шъыпкъэх, игъогухэри зафэх, пагэхэр ыгъэцӀыкӀунхи ылъэкӀыщт».