Даниел 3 - Тхьэм и ГущыӀ

Ящэнэрэ шъхьэр Дышъэм хэшӀыкӀыгъэ саугъэтым фэгъэхьыгъэ унашъор

¹ Нэбухэднэцар пачъыхьэм дышъэм хэшӀыкӀыгъэ саугъэт шъэджашъэ ашӀынэу унашъо ышӀыгъ. Илъэгагъэ – Ӏэнтэгъу тӀокӀищ, ишъомбгъуагъэ – Ӏэнтэгъуих хъоу аригъэшӀи, Бабилэн хэкум щыӀэ Дурэ губгъом раригъэгъэуцуагъ.

² Нэбухэднэцар ыӀофтагъэх къаугъоинхэу сатрапхэр, тхьэмэтэшхохэр, хьэблэ Ӏэшъхьэтетхэр, упчӀэжьэгъухэр, къэралыгъо ахъщэр зезыгъакӀохэрэр, хьыкумышӀхэр, хэбзэухэсхэр, зэкӀэ хэкухэм япащэхэр – Нэбухэднэцар пачъыхьэм аригъэгъэуцугъэ дышъэ саугъэт шъэджашъэм шъхьащэ фашӀыныр зыщаублэрэ мафэм къекӀолӀэнхэу, мэфэкӀым хэлэжьэнхэу.

³ Арыти сатрапхэр, тхьэмэтэшхохэр, хьэблэ Ӏэшъхьэтетхэр, упчӀэжьэгъухэр, къэралыгъо ахъщэр зезыгъакӀохэрэр, хьыкумышӀхэр, хэбзэухэсхэр, зэкӀэ хэкухэм япащэхэр Нэбухэднэцар ыгъэуцугъэ саугъэт шъэджашъэм фэгъэхьыгъэ мэфэкӀым хэлэжьэнхэу къэзэрэугъойхи, саугъэт шъэджашъэм ыпашъхьэ иуцуагъэх.

⁴ Джащыгъум гъоум мэкъэ ӀэтыгъэкӀэ къыӀуагъ: «Шъо, сыд фэдэ цӀыф лъэпкъи, лӀакъуи, сыд фэдэ бзэ зэфэшъхьаф рыгущыӀэрэ цӀыфхэри, пачъыхьэм унашъо къышъуфешӀы:

⁵ бжъэмыем, къамылым, бзэпспщынэм, пхъонтэпщынэм, пщынэтӀаркъом, сырынэм, орэдышъо къызэращырэ нэмыкӀ Ӏэмэ-псымэхэм амакъэ зызэхэшъухыкӀэ, чӀыгум бгъэгукӀэ зытешъудзэзэ, дышъэ саугъэт шъэджашъэу Нэбухэднэцар пачъыхьэм аригъэгъэуцугъэм шъхьащэ фэшъушӀ.

⁶ Хэтми зычӀидзэу, шъхьащэ фэзымышӀырэр машӀокӀэ агъэплъыгъэ хьакум ащ лъыпытэу радзэщт».

⁷ Арыти, бжъэмыем, къамылым, бзэпспщынэм, пхъонтэпщынэм, пщынэтӀаркъом, сырынэм, орэдышъо къызэращырэ нэмыкӀ Ӏэмэ-псымэ зэфэшъхьафхэм амакъэ цӀыфхэм зызэхахым, сыд фэдэ цӀыф лъэпкъи, лӀакъуи, сыд фэдэ бзэ зэфэшъхьаф рыгущыӀэрэ цӀыфхэми зычӀадзи, дышъэ саугъэт шъэджашъэу Нэбухэднэцар аригъэгъэуцугъэм шъхьащэ фашӀыгъ.

Даниел ишъэогъуищ зэрагъэмысагъэхэр

⁸ А охътэ дэдэм бабилэн цӀыфхэм ащыщхэр къэсыхи, пачъыхьэм дэжь Ӏухьэхи, джурт лъэпкъым щыщхэр бзэгу ахьыгъэх.

⁹ Ахэмэ Нэбухэднэцар пачъыхьэм раӀуагъ: «ЕгъашӀэм ущэрэӀ, пачъыхьэр!

¹⁰ О, пачъыхь, унашъо пшӀыгъэ бжъэмыем, къамылым, бзэпспщынэм, пхъонтэпщынэм, пщынэтӀаркъом, сырынэм, нэмыкӀ орэдышъохэр къызэращырэ Ӏэмэ-псымэ зэфэшъхьафхэм амакъэ зызэхахыкӀэ, цӀыф пэпчъ чӀыгум бгъэгукӀэ зычӀидзынышъ, дышъэ саугъэт шъэджашъэм шъхьащэ фишӀынэу;

¹¹ зычӀидзэу, хэтми шъхьащэ зымышӀырэр машӀокӀэ агъэплъыгъэ хьакум ащ лъыпытэу радзэнэу.

¹² Ау джурт лъэпкъым щыщхэу: Шадрах, Мэщэх, Абэднэгу Бабилэн хэкум иӀофхэр зэрагъэзекӀонхэу бгъэнэфагъэхэр – мы хъулъфыгъэхэм, о типачъыхь, уиунашъо агъэцакӀэрэп, уитхьэмэ афэлажьэхэрэп, дышъэ саугъэт шъэджашъэу о ябгъэгъэуцугъэми шъхьащэ фашӀырэп».

¹³ Ар зэрэзэхихэу Нэбухэднэцар лъэш дэдэу къэгубжи, Шадрахи, Мэщэхи, Абэднэгуи къыфащэнхэу унашъо ышӀыгъэти, ахэр къыфащагъэх.

¹⁴ Нэбухэднэцар ахэм яупчӀыгъ: «Шадрах, Мэщэх, Абэднэгу, шъо шъыпкъэмкӀэ шъушӀэзэ ситхьэмэ шъуафэмылажьа, дышъэ саугъэт шъэджашъэу язгъэгъэуцугъэми шъхьащэ фэшъумышӀа?

¹⁵ Арэу щытмэ, джыдэдэм шъухьазырмэ, бжъэмыем, къамылым, бзэпспщынэм, пхъонтэпщынэм, пщынэтӀаркъом, сырынэм, нэмыкӀ орэдышъохэр къызэращырэ Ӏэмэ-псымэ зэфэшъхьафхэм амакъэ зэрэзэхэшъухэу, бгъэгукӀэ чӀыгум зытешъудзи, саугъэт шъэджашъэу язгъэшӀыгъэм шъхьащэ фэшъушӀ! Шъхьащэ фэшъумышӀымэ, ащ лъыпытэу машӀокӀэ агъэплъыгъэ хьакум шъурязгъэдзэщт. Аущтэу зыхъукӀэ, сэ шъусӀэкӀэзыхыжьын зылъэкӀын тхьэ щыӀа?»

¹⁶ Шадрах, Мэщэх, Абэднэгу Нэбухэднэцар пачъыхьэм къыраӀожьыгъ: «Зытыухыижьыныр, ащ иджэуап тэ къыоттыжьыныр ищыкӀагъэп.

¹⁷ Тэ ти Тхьэу тызыфэлажьэрэм машӀокӀэ агъэплъыгъэ хьакум тыкъырищыжьынэу лъэкӀ иӀ, ори, пачъыхь, тыкъыпӀэкӀихыжьыщт.

¹⁸ Аущтэу мыхъуми, о типачъыхь, пшӀэнэу тыфай уитхьэхэм тэ тызэрафэмылэжьэщтыри, дышъэ саугъэт шъэджашъэу ябгъэгъэуцугъэми шъхьащэ зэрэфэтымышӀыщтыри».

Нэбгырищыр хьаку гъэплъыгъэм зэрэрадзагъэхэр

¹⁹ Джащыгъум Нэбухэднэцар губжышхом зэлъиштагъ: Шадрахи, Мэщэхи, Абэднэгуи ыгъэпыйхэу, ышъо къызэокӀыгъ, пхъашэу ажэхэплъагъ. Хьакур зэрагъэплъы хабзэм фэдиблыкӀэ нахь лъэшэу агъэплъынэу унашъо ышӀыгъ.

²⁰ Анахь хъулъфыгъэ кӀочӀэшхохэу идзэ хэтхэм Шадрахи, Мэщэхи, Абэднэгуи зэкӀоцӀапхэнхи, машӀокӀэ агъэплъыгъэ хьакум радзэнхэу унашъо афишӀыгъ.

²¹ Арыти а лӀыхэр, кӀыӀутелъхэри, гъончэдж лъэпэ быхъухэри зэращыгъхэу, шъхьэкӀапхэхэри зэракӀэпхагъэхэу зэкӀэ щыгъынхэр зэращыгъхэу апхыхи, машӀокӀэ агъэплъыгъэ хьакум радзагъэх.

²² Пачъыхьэм иунашъо пхъашэти, хьакури лъэш дэдэу агъэплъыгъэти, Шадрах, Мэщэх, Абэднэгу хьакум изыдзагъэхэ дзэкӀолӀ хъулъфыгъэхэр мэшӀо тхъуабзэм къыстыгъэх.

²³ Модрэ лӀищыр – Шадрахи, Мэщэхи, Абэднэгуи машӀокӀэ агъэплъыгъэ хьакум зэкӀоцӀыпхагъэхэу ифагъэх.

²⁴ Ылъэгъугъэр ыгъэшӀагъуи, Нэбухэднэцар пачъыхьэр къызыщылъэти упчӀэжьэгъухэм ариӀуагъ: «ЗэкӀоцӀыпхагъэу машӀом пэтыдзагъэр лӀищыба?» «Ары дэд, типачъыхь!» – къыратыжьыгъ адрэхэм пачъыхьэм джэуап.

²⁵ Нэбухэднэцар къыӀуагъ: «Арышъхьае сэ мары мыпхыгъэхэу, машӀом хэтхэу, ащ къыщакӀухьэу хъулъфыгъиплӀ сэлъэгъу: лыягъи къяхъулӀэрэп; тхьэ теплъэ иӀэу яплӀанэрэр къэлъагъо».

Пачъыхьэм нэбгырищым лъытэныгъэ зэрафишӀыгъэр

²⁶ Нэбухэднэцар машӀокӀэ агъэплъыгъэ хьакум екӀуалӀи хьакуӀум иджагъ: «Тхьэу ЗэкӀэмэ анахь Иным фэлажьэхэу Шадрах, Мэщэх, Абэднэгу! ШъукъикӀи, моу шъукъысэкӀуалӀ!» Арыти Шадрахи, Мэщэхи, Абэднэгуи мэшӀо гузэгум къыхэкӀыгъэх.

²⁷ Сатрапхэу, тхьэмэтэшхохэу, хьэблэ Ӏэшъхьэтетхэу, упчӀэжьэгъухэу къэзэрэугъоигъэхэм нэрылъэгъу къафэхъугъ мо лӀымэ апкъышъолхэм машӀор кӀочӀэгъу зэрафэмыхъугъэр: ашъхьацхэри лыгъуагъэхэп, ящыгъынхэми иягъэ якӀыгъэп. Ар хэгъэкӀи, аужыпкъэм ахэм мэшӀо-Ӏугъуами къапихыщтыгъэп.

²⁸ Джащыгъум Нэбухэднэцар къыӀуагъ: «Шадрахи, Мэщэхи, Абэднэгуи я Тхьэ щытхъушхор ий. ИмэлэӀич Ащ къыгъэкӀуагъэба, Ежь цыхьэ фэзышӀэу къин чӀыпӀэ ифагъэхэр къыхыригъэщыжьыгъэхэба. Ахэм пачъыхьэм иунашъо агъэцэкӀагъэп, ежьхэм я Тхьэ нэмыкӀ тхьэ горэми зэрэфэмылэжьэщтхэм, шъхьащэ зэрэфамышӀыщтым пае, апсэ атыным фэхьазырыгъэх!

²⁹ Ащ къыхэкӀэу сэ унашъо сэшӀы: „Сыд фэдэ цӀыф лъэпкъи, лӀакъуи, сыд фэдэ бзэ зэфэшъхьаф рыгущыӀэрэ цӀыфхэми ащыщэу Шадрах, Мэщэх, Абэднэгу я Тхьэ мыхъун езыӀолӀэрэ пстэури лы цӀыкӀу-лы цӀыкӀоу зэхарэупкӀат, иунэ чӀышъхьашъом щизэу зэхарэкъут. Укъыкъонэжьынэу сыд фэдэ тхьэ гори ахэм я Тхьэ нэмыкӀ щыӀэп“».

³⁰ Ащ ыуж пачъыхьэу Нэбухэднэцар Шадрахи, Мэщэхи, Абэднэгуи лъытэныгъэ афишӀи, Бабилэн хэкум иӀофхэр зэрагъэзекӀонхэу ӀэнатӀэу яӀагъэхэм ахигъэхъуагъ.

Пачъыхьэу Нэбухэднэцар имэкъэгъэӀу

³¹ «Сэ, Нэбухэднэцар пачъыхьэм, сыд фэдэ цӀыф лъэпкъи, лӀакъуи, сыд фэдэ бзэ зэфэшъхьаф рыгущыӀэрэ цӀыфхэми зэкӀэ чӀыгум щыпсэухэрэм шъосэӀо: мамырныгъэрэ хахъорэ шъуерэӀ, шъорэбагъу!

³² Тхьэу ЗэкӀэмэ анахь Иным нэшэнэ гъэшӀэгъонхэу къысигъэлъэгъугъэхэр, Ӏоф шӀагъохэу къысфишӀагъэхэр къышъуфэсӀуатэхэ сшӀоигъу.

³³ Сыдэу ин дэдэха Ащ инэшанэхэр, Сыдэуи гъэшӀэгъонха Ащ иӀофышхохэр! Ипачъыхьэгъу Ащ – мыкӀодыжьын, Итетыгъо Ащ лӀэуж зэкӀэлъыкӀохэм ащылъыкӀотэщт».