Даниел 12 - Тхьэм и ГущыӀ

ЯпшӀыкӀутӀонэрэ шъхьэр КӀэух уахътэр

¹ Чэтэным хэшӀыкӀыгъэ щыгъын зыщыгъ хъулъфыгъэм къыӀуагъ: «А уахътэм пщы мэлэӀичэу Микъаел, уицӀыф лъэпкъ иухъумакӀо, къэлъэгъощт. ЦӀыф лъэпкъыр къызыхъугъэм щегъэжьагъэу джырэ нэс зыфэдэ щымыӀэгъэ охътэ къиныр къэсыщт. Ау а уахътэм о уилъэпкъ щыщэу ЩыӀэныгъэ Тхылъым дэтхагъэу къычӀэкӀыщтхэр арых къэнэжьыщтхэр.

² Хьадэгъу сэпацэм хэлъэу чъыерэмэ ащыщыбэхэр къэущыжьыщтых: зыхэр егъашӀэм щыӀэнхэу, адрэхэр егъэшӀэрэ хъоныжьымрэ емыкӀумрэ хэтынхэу.

³ АкъылышӀохэр ошъочэпэплъэу нэфыщтых, Шъыпкъагъэм игъогу бэхэр тезыщагъэхэр – жъуагъоу лӀэшӀэгъу зэкӀэлъыкӀохэм ащышӀэтыщтых.

⁴ О, Даниел, мы гущыӀэхэр гъэбылъхи, кӀэух уахътэр ипӀалъэу тхылъым мыхъур тедз. Бэхэм ашӀэщтыр амышӀэу лъэныкъо зэфэшъхьафхэм зырадзыми, шӀэныгъэм хахъо ышӀыщт».

⁵ Ащ ыуж сэ, Даниел, сызэплъэм мары нэмыкӀ нэбгыритӀу щыт: зыр – мы псыхъо нэпкъым, адрэр – адрабгъу нэпкъым атетых.

⁶ Зым чэтэным хэшӀыкӀыгъэ щыгъын щыгъэу псыхъом шъхьарытыгъэм риӀуагъ: «Мы зыфэдэ къэмыхъугъэ хъугъэ-шӀагъэхэм сыдигъуа кӀэух зафэхъущтыр?»

⁷ Арыти чэтэным хэшӀыкӀыгъэ щыгъын щыгъэу псыхъопсым шъхьэрытыгъэ хъулъфыгъэм ыӀэ сэмэгурэ ыӀэ джабгъурэ уашъом диӀэтыехэзэ, ЕгъэшӀэрэу ЩыӀэм тхьэлъанэ зэрэфишӀырэр зэхэсхыгъ: – Илъэсищырэ ныкъорэ зытешӀэкӀэ. Тхьэм фэшъыпкъэ цӀыф лъэпкъым къинэу ылъэгъурэр ыкӀэм зыфакӀокӀэ, зэкӀэри къэхъущт.

⁸ КъыӀорэр сэ зэхэсхыгъ, ау къызгурыӀуагъэп, арыти сеупчӀыгъ: «Сизиусхьан! Адэ сыда мы зэкӀэмэ кӀэухы афэхъущтыр?»

⁹ Ащ джэуап къытыжьыгъ: «УмыгумэкӀ, Даниел. КӀэух уахътэр къэсыфэ ар гъэбылъыгъэщт, мыхъури тедзэжьыгъэщт.

¹⁰ Бэхэм загъэкъэбзэжьызэ, фыжь хъужьыхэзэ ушэтыпӀэхэр зэранэкӀыщтых. Ау бзаджэхэм бзэджэшӀэныр щагъэтыщтэп. Бзаджэхэм ар къагурыӀощтэп, ау акъылышӀомэ зэхашӀыкӀыщт.

¹¹ Мафэ къэс Тхьэм фашӀырэ къурмэныр зыщагъэтыгъэмрэ гущыкӀыгъо-емыкӀушхо теплъэр зыщагъэуцугъэмрэ щегъэжьагъэу мэфэ минрэ шъитӀурэ тӀокӀиплӀырэ пшӀырэ тешӀэщт.

¹² Сыхьатмафэ ежьагъ мэфэ минрэ шъищырэ щэкӀырэ тфырэм щэӀагъэ хэлъэу ежэрэр, ащ нэсырэр.

¹³ О уикӀэух къэсыфэ уигъогу рыкӀуи, гупсэфыгъо бгъотыщт. Джащыгъум кӀэух мафэм укъэтэджыжьынышъ, пфэгъэнэфэгъэ Ӏахьэр къыпӀукӀэщт».