Даниел 11 - Тхьэм и ГущыӀ

ЯпшӀыкӀузэнэрэ шъхьэр

¹ Джаущтэу сэ сшъхьэкӀэ, Мадай пачъыхьэу Дарый итетыгъо иапэрэ илъэс а Микъаелым кӀэгъэкъонэуи, ӀэпыӀэгъоуи сыриӀагъ.

Къыблэмрэ Темырымрэ япачъыхьэхэр

² Джы сэ о шъыпкъэр къыосӀощт: мары, джыри пачъыхьищ Пэрсием къитэджэщт. ЕтӀанэ яплӀэнэрэу зыкъэзыӀэтыщтыр – ар зэкӀэмэ анахь баищт. МылъкумкӀэ ылъапсэ ыгъэпытэнышъ, Урым пачъыхьэгъум ригъэпыинхэу зэкӀэри къыӀэтыщт.

³ Ащ нэужым пачъыхьэ лъэш дэдэ къыкъокӀыщт. Ащ чӀыгубэ дэдэ зыӀэкӀилъхьащт, зыфаер ышӀэщт, ежь зэрэшӀоигъоу зекӀощт.

⁴ Ащ икъарыу джыри зэрэхахъозэ, ипачъыхьэгъушхо зэхэтэкъущт. Дунаим ылъэныкъуиплӀымкӀэ гощыгъэ хъущт. Ыуж къикӀыщт лӀэужмэ а пачъыхьэгъур аӀукӀэжьыщтэп, ежь зэпсаум зыфэдагъэм фэдэжьыщтэп. Ащ ипачъыхьэгъу ӀэкӀахынышъ, нэмыкӀхэм аӀэкӀалъхьащт.

⁵ Къыблэ пачъыхьэр лъэш дэдэщт, ау идзэпщымэ ащыщ горэ ежь нахьи нахь лъэш хъуни, тетыгъор ыубытыщт, ипачъыхьэгъуи кӀочӀэшхокӀэ ыӀыгъыщт.

⁶ Илъэс заулэ зытешӀэкӀэ, ахэм зэзэгъыныгъэ зэдашӀыщт. А зэзэгъыныгъэр гъэпытэгъэным пае, Къыблэ пачъыхьэм ыпхъу Темыр пачъыхьэм ритыщт. Ау тетыгъом фищэн ылъэкӀыщтэп, илӀэужи лъыкӀотэщтэп. А бзылъфыгъэри, кӀыгъугъэхэри, илъфыгъи, дэӀэпыӀэщтыгъэхэри къумалыгъэкӀэ агъэкӀодыщтых.

⁷ Ау а бзылъфыгъэм иӀахьылмэ ащыщ горэ Къыблэ пачъыхьэм итахътэ тетӀысхьащт. Ар Темыр пачъыхьэм идзэ езэони, ипытапӀэ дэхьащт, атеони атекӀощт.

⁸ Ятхьэ нэпцӀхэм ясаугъэт гъэчъыгъэхэр, дышъэмрэ тыжьынымрэ ахэшӀыкӀыгъэ хьакъу-шыкъу лъапӀэхэр ашӀуиштэни, Мысырым къонтхъэу ыщэщтых. Илъэс заулэ Темыр пачъыхьэм емызаоу, мамырэу щигъэӀэщт.

⁹ Ащ ыуж Темыр пачъыхьэр Къыблэ пачъыхьэм ичӀыгу ихьащт, ау ихэгъэгу къыгъэзэжьыщт.

¹⁰ Темыр пачъыхьэм ыкъомэ заом зыфагъэхьазырэу, дзэшхо аугъоеу аублэщт. Дзэшхор хыдзэ-псыдзэшхоу ежьэнышъ зэкӀэ зэлъиубытыщт, ыпэ ригъэхъуни пыим ипытапӀэ нэсыщт.

¹¹ Джащыгъум Къыблэ пачъыхьэр лъэш дэдэу къэгубжыщт, Темыр пачъыхьэм езэонэу ригъэжьэщт. Адрэм дзэшхо къыгъэуцущт, ау а дзэр пыим ыӀэ ихьащт.

¹² Дзэр зызэкӀакӀокӀэ Къыблэ пачъыхьэм ыгу пэгагъэм зэлъиубытыщт. ДзэкӀолӀ минипшӀ пчъагъэ ащ ыгъэкӀодыщт, ау текӀоныгъэ къыфыдэхыщтэп.

¹³ Темыр пачъыхьэм нэмыкӀыдзэ къыугъоищт, ыпэрэм нахьи ар нахь иныщт. Илъэс заулэ зытешӀэкӀэ дэгъоу узэндыгъэ дзэшхо игъусэу къыгъэзэжьыщт.

¹⁴ А лъэхъаным Къыблэ пачъыхьэм бэхэр пэуцужьыщтых. О уицӀыф лъэпкъ щыщэу жъалымыхэм нэфапӀэр шъыпкъэ хъуным пае зыкъаӀэтыщт, ау яӀоф къадэхъущтэп.

¹⁵ Джащыгъум Темыр пачъыхьэр къэкӀощт, къэлэ дэпкъым рыдэкӀоенхэу чӀысае зэтыритэкъони, къэлэ зэтегъэпытыхьагъэр ыштэщт. Къыблэр кӀуачӀэкӀи пыщытышъущтэп, идзэ хэшыпыкӀыгъэкӀи пэуцушъущтэп.

¹⁶ Ар ежь зэрэфаем фэдэу зекӀощт, зыпари ащ къыпэуцужьын ылъэкӀыщтэп. Хэгъэгу шӀагъом ащ тетыгъор щиубытыщт, хъуафэ ышӀынэу амал иӀэщт.

¹⁷ Зэрэпачъыхьэгъоу ыубытынэу Темыр пачъыхьэм рихъухьащт, зэзэгъыныгъэ дишӀыщт. Ипый ипачъыхьэгъу ыгъэкӀодыным пае ыпхъу ритыщт, ау игухэлъ, ежь зыфаер къыдэхъущтэп.

¹⁸ Джащыгъум хы Ӏушъом Ӏус хэкухэм якӀущт, атеони ащыщыбэ ыӀэ къыригъэхьащт. Ау дзэпщ горэм ащ ипхъэшагъэ гъунэ фишӀыщт. Ары пакӀопышъ, ащ ипхъэшагъэ къызфигъэфедэни фыригъэгъэзэжьыщт.

¹⁹ ЕтӀанэ ихэгъэгу пытапӀэу итмэ къафигъэзэжьыщт, ау тефэнышъ, лъэужынчъэу кӀодыщт.

²⁰ Ащ ычӀыпӀэ иуцощт пачъыхьэм хьакъулахьхэр къэзыугъойрэ цӀыфыр ипачъыхьэгъу имылъку хигъэхъоным пае ыӀофтэщт. Ау охътабэ темышӀэу зауи-пыджи ахэмыкӀуадэу ар фэхыщт.

Темыр пачъыхьэ бзаджэр

²¹ Ащ ычӀыпӀэ пачъыхьэ тахътэр зыфыхамыхыгъэ къырамыдзэрэ цӀыф иуцощт. Ар амышӀахэзэ къэтэджыщт, тхьагъэпцӀыгъэкӀэ пачъыхьэгъур ашӀуиубытыщт.

²² Ащ ыпашъхьэ пыидзэу итыщтымрэ зэзэгъыныгъэм ипащэрэ хыдзэ-псыдзэшхом дэкӀодыщтых.

²³ Зэзэгъыныгъэ дишӀынышъ къэрарынчъэу зекӀощт, цӀыф макӀэ ыӀэ илъ нахь мышӀэми тетыгъом къыфэкӀощт.

²⁴ АмышӀахэу гъэбэжъулъэ хэкухэм арыхьанышъ, ежь ятэхэми, ятэмэ ятэжъхэми амышӀагъэр ышӀэщт: къонтхъымрэ, къатырихыгъэ ӀапӀэмрэ мылъкумрэ икъотэгъухэм афигощыщт. ПытапӀэхэр зэрикъутэщтым фэгъэхьыгъэ гухэлъхэр охътэ гъэнэфагъэм нэс рихъухьащтых.

²⁵ ЕтӀанэ идзэрэ ежь ипхъэшагъэрэ Къыблэ пачъыхьэм пигъэуцущт, езэонэу дзэшхо игъусэу екӀущт. Къыблэ пачъыхьэм идзэ нахь инэу, нахь кӀочӀэшхоу заом къыдэкӀыщт, ау тхьагъэпцӀыгъэ зэрэфызэкъуадзагъэм къыхэкӀэу пыщытышъущтэп.

²⁶ Аужыпкъэм пачъыхьэм иӀанэ телъ гъомлэпхъэшӀухэр зышхыхэрэми ар агъэкӀодынэу пылъыщтых. Хыдзэ-псыдзэшхом дзэр тырихынышъ, дзэкӀолӀыби заом щыфэхыщт.

²⁷ ПачъыхьитӀум агу хьилагъэ зэфилъыщт, зы Ӏанэм зэдыпэсхэми пцӀы зэфаусыщт. Ау кӀэухым иуахътэ къэмысэу япцӀыусыгъэ зыпари къикӀыщтэп. Сыда пӀомэ кӀэухыр къызысыщтым иуахътэ гъэнэфагъэшъ ары.

²⁸ Мылъкушхо ӀэкӀэлъэу Темыр пачъыхьэр ихэгъэгу кӀожьыщт, ау зэзэгъыныгъэ лъапӀэм джэгъогъу ыгу филъыщт. Ащ пэшӀуекӀоу зекӀощт, етӀанэ ихэгъэгу ыгъэзэжьыщт.

²⁹ Охътэ гъэнэфагъэм ар джыри къыблэм екӀущт. Ау мызэгъогурэ кӀэухыр нахьыпэрэм фэдэщтэп.

³⁰ Ащ игъогупэ къохьэпӀэ хыӀушъомкӀэ къухьэхэм къыпабзыкӀыщт. Темыр пачъыхьэр ащ ыгъэщынэни зэкӀэкӀожьыщт. Игубжышхо зэзэгъыныгъэ лъапӀэм тырикъутэщт. КъызигъэзэжькӀэ зэзэгъыныгъэ лъапӀэм дэхыгъэмэ къотэгъу афэхъущт.

³¹ ДзэлӀэу ыгъэкӀуагъэхэм Тхьэм и Унэ ипытапӀэ аштэщт, аушӀоищт. Мафэ къэс ашӀырэ къурмэныр щаригъэгъэтыжьыщт, гущыкӀыгъо-емыкӀушхо теплъэр а чӀыпӀэм щагъэуцущт.

³² Зэзэгъыныгъэ лъапӀэр зыукъуагъэхэр щытхъу нэпцӀыкӀэ дихьыхыщтых. Ау зи Тхьэ фэшъыпкъэ цӀыфхэр зэкӀакӀо ямыӀэу пэуцущтых.

³³ Лъэпкъым щыщ акъылышӀохэм бэхэр агъэдэӀонышъ, етӀанэ охътэ заулэм чатэкӀэ аукӀыщтых, агъэстыщтых, гъэрыпӀэм ифэщтых, ахъункӀэщтых.

³⁴ АукӀыхэрэм якъинихьагъу уахътэм ӀэпыӀэгъу тӀэкӀу дэд агъотыщтыр. Агу имылъэу бэмэ гъусэ къафэхъугъэ фэдэу зыкъагъэлъэгъощт.

³⁵ АкъылышӀу зиӀэхэм ащыщхэр къырафэкӀыщтых – кӀэух гъэнэфагъэм иуахътэ къэсыгъэпышъ нахь къабзэ, нахь фыжь хъухэзэ ахэм ушэтыпӀэхэр зэранэкӀыщтых.

³⁶ Темыр пачъыхьэм зигъэиныщт, сыд тхьэ нахьи нахь зигъэлъэгэщт. ГущыӀэ гущыкӀыгъохэр тхьэхэм я Тхьэжьым риӀолӀэщтых. Ащ зыфаер зэкӀэ къыдэхъущт Тхьэм игубж мафэ текӀыфэ: агъэнэфагъэр арыба хъущтыр!

³⁷ Ятэжъмэ агъэлъэпӀэгъэ тхьэхэми, бзылъфыгъэмэ шӀу алъэгъурэ тхьэми, сыд фэдэ тхьи зафигъэзэщтэп. ЗэкӀэмэ анахь инэуи зыкъыщыхъужьыщт.

³⁸ Ахэм ачӀыпӀэ пытапӀэхэм ятхьэ ыгъэлъэпӀэщт. Ятэжъхэм амышӀэщтыгъэ тхьэр дышъэрэ тыжьынрэкӀэ, мыжъо лъапӀэрэ осэшхо зиӀэ нэмыкӀ тынхэмрэкӀэ ыгъэлъэпӀэщт.

³⁹ Хымэ тхьэр иӀэпыӀэгъоу ар пытапӀэхэм атеощт. Ежь пачъыхьэу зыштагъэхэм лъытэныгъэшхо афишӀыщт, цӀыфхэм ашъхьагъ ригъэуцощтых, шӀу тынэу чӀыгуи афигощыщт.

⁴⁰ КӀэух уахътэм Къыблэ пачъыхьэр ащ заокӀэ екӀущт. Ау Темыр пачъыхьэр ку псынкӀэхэр, шыухэр, къухьабэ кӀыгъухэу ащ жьыфыртынэшхоу теощт. Хэгъэгубэмэ арыхьанышъ хыдзэ-псыдзэшхоу азэпырыкӀыщт.

⁴¹ Хэгъэгу шӀагъом ар ихьащт, минипшӀ пчъагъэ ыгъэкӀодыщт. Ау хэгъэгухэу Едомрэ Моабрэ, Ӏамон щыщ цӀыфхэр ащ ӀэкӀэкӀыжьыщтых.

⁴² Ащ ыӀэ хэгъэгу зэфэшъхьафмэ атырищэещт. Аужыпкъэм Мысыри ащ зыщиухъумэн ылъэкӀыщтэп.

⁴³ Мысырым ибайныгъэ ащ зыӀэкӀигъэхьащт – дышъэмрэ тыжьынымрэ, осэшхо зиӀэ нэмыкӀ мылъку лъапӀэхэмрэ зыӀэкӀилъхьащтых. Лыбый цӀыфхэу, Куш цӀыфхэу ыӀэ илъ хъугъэхэр ыуж ихьащтых.

⁴⁴ Ау тыгъэкъокӀыпӀэ, темыр лъэныкъохэм къэбарэу къарыкӀыщтхэм Темыр пачъыхьэр къагъэгумэкӀынышъ, губжышхом хэтэу зафигъэзэщт. Бэхэр ыукӀыщтых, ыгъэкӀодыщтых.

⁴⁵ Хымрэ Тхьэм и Унэ зытет Ӏуашъхьэмрэ азыфагу ипачъыхьэ щэтырэхэр щигъэуцущтых. Ау кӀэух къыфэкӀощт, зыпари ӀэпыӀэгъу къыфэхъушъущтэп».