Даниел 10 - Тхьэм и ГущыӀ

Даниел аужырэ нэфапӀэу псыхъоу Тигр дэжь щилъэгъугъэр (я 10:1-рэ – я 12:13-рэ шъхьэхэр) ЯпшӀэнэрэ шъхьэр Чэтэным хэшӀыкӀыгъэ щыгъын зыщыгъ горэм фэгъэхьыгъэ нэфапӀэр

¹ Пэрсие пачъыхьэу Корэщ тетыгъор зиӀыгъым иящэнэрэ илъэс Даниелэу БэлтэшэцаркӀэ заджэщтыгъэхэм зыгорэ шъхьэихыгъэ къыфэхъугъ. А шъхьэихыгъэ къыфэхъугъэр къэбар шъыпкъагъ, зэошхом фэгъэхьыгъэу щытыгъ. НэфапӀэкӀэ шъхьэихыгъэ къыфэхъугъэр ащ къыгурыӀуагъ, къикӀырэри зэхишӀыкӀыгъ.

² Ащыгъум сэ, Даниел, тхьамэфищым шъыгъом сыхэтыгъ.

³ Шхын хэхыгъэ сшхыгъэп, лырэ санэрэ сӀупэ нэзгъэсыгъэп. Тхьамэфищыр екӀыфи дагъэ зыщысфагъэп.

⁴ Апэрэ мазэм иятӀокӀэнэрэ плӀырэ мафэ Тигр псыхъошхом инэпкъы сытетыгъ.

⁵ Сызэплъэм слъэгъугъэ: мары зы хъулъфыгъэ горэ чэтэным хэшӀыкӀыгъэ щыгъын щыгъэу, дышъэ къабзэм хэшӀыкӀыгъэ бгырыпхи ыбгы къещэкӀыгъэу щыт.

⁶ Ыпкъышъол – налмэс-налкъутэу, ынэгу – пчыкӀэ нэфэу, ынэхэм пхъэкъомашӀор къакӀэустхъукӀэу, ылъакъохэмрэ ыӀэхэмрэ – джэрз лъэкӀыгъакӀэу жъыухэу, игущыӀэ макъэ – цӀыф жъот мэкъэшхом ар фэдагъ.

⁷ Сэ, Даниел, закъор ары а нэфапӀэр зылъэгъугъэр, сигъусэгъэ цӀыфхэм ар алъэгъугъэп. Ау щытми щынэгъошхом зэлъиубытыхи, зэбгырыхъушъутыхи, загъэбылъыжьыгъ.

⁸ Сэ сизакъоу сыкъэнагъэу, а нэфапӀэу мэхьанэшхо зиӀэм сеплъызэ кӀуачӀэ гори схэмылъыжьэу, сынэгуи лъы гъуаткӀо кӀэмытыжьэу кӀыфыбзэу, къарыунчъэ сыхъугъ.

⁹ ЕтӀанэ ащ ымакъэ зэхэсхыгъ – ащ ымакъэ зэрэзэхэсхэу сынэгу егъэзыхыгъэу, сиакъыл сиеу, сӀэпкъ-лъэпкъмэ сафимытэу чӀыгум сытефагъ.

¹⁰ Ау мары Ӏэ горэ къысатхъуи, сыкъыӀэти, сызэрэкӀэзэз-кӀэзэзэу сӀэхэр чӀыгум егъэкъугъэу лъэгонджэмышъхьэкӀэ сыкъыгъэуцугъ.

¹¹ Ащ къысиӀуагъ: «О, Даниелэу Тхьэм ыгъэлъэпӀагъ! КъыосӀощтыр угу иубыт, сэ джы уадэжь сыкъагъэкӀуагъэшъ плъакъо къытеуцожь». Джаущтэу ащ къызысеӀом, сыкӀэзэззэ слъэкъуитӀу сакъытеуцожьыгъ.

¹² Ау сэ ащ къысиӀуагъ: «Умыщын, Даниел! Апэрэ мафэу зэхэшӀыкӀ зэбгъэгъотыным узыпыхьагъэм, Тхьэм ыпашъхьэ зыщыбгъэцӀыкӀунэу зебгъэжьагъэм щегъэжьагъэу Ащ уигущыӀэхэр зэхихыгъэхэти, сэ ахэм япэгъокӀэу сыкъигъэкӀуагъ.

¹³ Ау Пэрсие пачъыхьэгъум ипщ-мэлэӀич мэфэ тӀокӀырэ зырэ къыспэуцужьыгъ. ЕтӀанэ Пэрсием ипачъыхьэхэм сапэуцужьызэ, сизакъоу сыкъэнагъэти апшъэрэ пщы-мэлэӀичхэм ащыщэу Микъаел ӀэпыӀэгъу къысфэхъунэу къэкӀуагъ.

¹⁴ Сэ сыкъэкӀуагъ уилъэпкъ иаужыпкъэрэ лъэхъанэ къырыкӀощтыр къыбгурызгъэӀонэу, къэхъущтыр арыти нэфапӀэу плъэгъугъэр зыфэгъэхьыгъэр».

¹⁵ Джаущтэу сэ ащ къысиӀо зэхъум, чӀыгум сеплъыхэу, бзэмыӀоу сыщытыгъ.

¹⁶ Мары зыгорэ цӀыф теплъэ иӀэу сӀупэ къынэси сыбзэгу къытӀэтӀэжьыгъ, сыкъэгущыӀи сапашъхьэ итым есӀуагъ: «Сизиусхьан! Мы нэфапӀэм узым сызэлъыригъэубытыгъ, кӀуачӀэми сыкъыригъэбгынагъ.

¹⁷ Сэ, зиусхьан, сыуиӀумэтэу, сыдэущтэу О, сизиусхьаным, гущыӀэгъу сыпфэхъун слъэкӀына! Сэ кӀуачӀи схэлъыжьэп, сижьи пиубытыкӀыгъ».

¹⁸ Джащыгъум а цӀыф теплъэ зиӀэр икӀэрыкӀэу къыстеӀаби, кӀуачӀэ къысхилъхьажьыгъ.

¹⁹ Ащ къыӀуагъ: «Тхьэм ыгъэлъэпӀэгъэ цӀыф, умыщын! Мамыр огъот, зыгъэлъэш, зыгъэгушху!» Ар къыздэгущыӀэ зэхъум, сэ кӀуачӀэ згъотыжьи есӀуагъ: «КъэгущыӀ, сизиусхьан! Сэ о кӀуачӀэ сэбгъэгъотыжьыгъ».

²⁰ Джащыгъум ащ къыӀуагъ: «Уадэжь сыкъызкӀэкӀуагъэр о ошӀа? Пэрсие пачъыхьэгъум ипщ-мэлэӀичым сезэонэу джы сэ сыкӀожьыщт. Ащ сызытекӀорэм ыуж Урымым ипщэу мэлэӀич къэкӀощт.

²¹ Арэу щытми шъыпкъагъэр зэрыт тхыгъэм итыр къыосӀощт. Шъо шъуи пщы-мэлэӀичэу Микъаел нэмыкӀ ащкӀэ гъусэгъу къысфэхъун зыпари щыӀэп.