Пачъыхьэхэр: ЯтӀонэрэ тхылъыр 25 - Тхьэм и ГущыӀ

ЯтӀокӀэнэрэ тфырэ шъхьэр Ерусэлэм зэрэзэхакъутагъэр

¹ Цыдкъый зыпачъыхьэр ябгъонэрэ илъэсым хэхьагъэу, илъэсым ияпшӀэнэрэ мазэ ияпшӀэнэрэ мафэ бабилэн пачъыхьэу Нэбухаднэцар идзэ зэрэщытэу игъусэу Ерусэлэм къекӀуи ар къадзыхьагъ, къэлэ дэпкъым рыдэкӀоенхэу псэуалъэ горэ ашӀыгъ.

² Цыдкъый зыпачъыхьэр япшӀыкӀузэнэрэ илъэсым хэхьафэ къалэр джаущтэу къызэрыдзыхьэгъагъ.

³ ЯплӀэнэрэ мазэм иябгъонэрэ мафэ гъаблэр къалэм нахь щылъэшыгъ, цӀыфхэм ашхын яӀагъэп.

⁴ Къэлэ дэпкъым къыпхыраутыгъ. Цыдкъый идзэкӀолӀхэр чэщым пачъыхьэ хэтэщагум рекӀокӀырэ къэлэ дэпкъхэм азыфагу дэтхэу, къэлапчъэм пэблэгъэ лъагъом тетхэу чъагъэх. А уахътэм къасдыйхэр къалэм къегъэуцокӀыгъэхэу щытыгъэхэти, пачъыхьэмрэ идзэкӀолӀхэмрэ Ерыхъоу кӀэим екӀужьыгъэх.

⁵ Ау къасдыйхэм ядзэ пачъыхьэм лъежьи Ерыхъоу кӀэим щыкӀэхьагъ. Ащ идзэ зэрэщытэу шъхьадж ыпакӀэ хэлъэдэжьыгъ.

⁶ Джаущтэу пачъыхьэр къаубыти, бабилэн пачъыхьэм дэжь Рыблэ ащи ащ иӀоф щаӀуагъ.

⁷ Цыдкъый ыкъохэр ыпашъхьэ щаукӀхи, ежь Цыдкъый ынэхэр ракӀыхи, ыӀэхэм джэрз Ӏэхъу-лъэхъухэр атыралъхьи Бабилэн ащагъ.

Тхьэм и Унэ зэрэзэхакъутагъэр

⁸ Илъэсым иятфэнэрэ мазэ, мазэм ияблэнэрэ мафэ, бабилэн пачъыхьэу Нэбухаднэцар зыпачъыхьэр япшӀыкӀубгъонэрэ илъэсым хэхьагъэу, бабилэн пачъыхьэм иухъумэкӀо шъхьагъырытмэ яӀэшъхьэтетэу, ащ иӀумэт Нэбузарадан Ерусэлэм къэкӀуагъ.

⁹ Зиусхьаным и Уни, пачъыхьэм иуни, Ерусэлэм дэт унэхэри зэкӀэ, цӀыф лъэрыхьэхэм яунэхэри машӀо акӀидзи ащ ыгъэстыгъэх.

¹⁰ Къасдый дзэу пачъыхьэм иухъумэкӀо шъхьагъырытхэм яӀэшъхьэтет игъусагъэхэм Ерусэлэм къекӀокӀырэ дэпкъри зэхакъутагъ.

¹¹ Пачъыхьэм иухъумэкӀо шъхьагъырытмэ яӀэшъхьэтетэу Нэбузарадан къалэм дамыщыгъэу къэнэгъэгъэ цӀыфхэри, бабилэн пачъыхьэм ыпэкӀэ гохьэгъагъэхэри, нэмыкӀ цӀыф къызэрыкӀохэри къалэм даригъэщыгъэх.

¹² Пачъыхьэм иухъумэкӀо шъхьагъырытмэ яӀэшъхьэтет зынэмысэу къыгъэнагъэр сэнэшъхьэшӀапӀэхэмрэ чӀыгумрэ адэлэжьэнхэм пае къэлэдэс анахь тхьамыкӀэхэм ащыщэу тӀэкӀу гор ныӀэп.

¹³ Къасдыйхэм джэрз гъэткӀугъэм хэшӀыкӀыгъэ кӀэсэнхэу Зиусхьаным и Унэ иапэрэ ихьапӀэ чӀэтхэри, щэрэхъхэм атет тхьакӀыпӀэ-тегъэуцуапӀэхэри, джэрзым хэшӀыкӀыгъэ лэгъуп-псыубытыпӀэу Зиусхьаным и Унэ чӀэтыгъэри зэхацӀыцӀэхи, а джэрзыр Бабилэн ащагъ.

¹⁴ Джащ фэдэу ащагъэх лэгъупхэри, хьакужъонтхъухэри, остыгъэм ишъэгъэ стафэхэр къызэрэпахырэ Ӏадэхэри, Ӏэгубжъэхэри, джэрзым хэшӀыкӀыгъэ шыкъоу Тхьэм ыпашъхьэ итхэ зыхъукӀэ агъэфедэщтыгъэхэри,

¹⁵ жъапхъэхэри, лэджэнхэри ащагъэх, дышъэмрэ тыжьынымрэ ахэшӀыкӀыгъэхэри пачъыхьэм иухъумэкӀо шъхьагъырытмэ яӀэшъхьэтет ыштагъэх.

¹⁶ КӀэсэнитӀоу, лэгъуп-псыубытыпӀэхэу, щэрэхъхэм атет тхьакӀыпӀэ-тегъэуцуапӀэхэу Сэлмэн Зиусхьаным и Унэ пае джэрзым харигъэшӀыкӀыгъэхэм яонтэгъуагъэ зыфэдизыр ащэчыгъэу щытыгъэп.

¹⁷ Зы кӀэсэным метрий фэдиз илъэгэгъагъ, метрэрэ ныкъорэ фэдиз илъэгагъэу джэрзым хэгъэткӀукӀыгъэу тандж ащ шъхьащыгъэуцожьыгъагъ. Джэрз шъэгъэ блэрымрэ фэхъурэяшъоу къытепшырэ сатыритӀоу нар теплъэ зиӀэхэмрэ танджым хъурэябзэу къыдекӀокӀыщтыгъэх. Джэрз шъэгъэ блэрыр къыздекӀокӀырэ адрэ кӀэсэнри джащ фэдагъ.

Ехъуд цӀыфхэр Бабилэн зэрэращыгъэхэр

¹⁸ Бабилэн пачъыхьэм иухъумэкӀо шъхьагъырытмэ яӀэшъхьэтет къурмэнышӀ шъхьаӀэу Сэрай, къурмэнышӀ шъхьаӀэм игуадзэу Цэфаный, Зиусхьаным и Унэ чӀэхьапӀэ къэзыухъумэрэ къурмэнышӀ нэбгырищри ыубытыгъэх.

¹⁹ ДзэкӀолӀхэм яӀэшъхьэтет пащэщтыгъэхэм ащыщ горэ, пачъыхьэм ицыхьэшӀэгъу-упчӀэжьэгъу нэбгыритфэу къалэм дэсыгъэхэр, дзэм иӀэшъхьэтет итхакӀоу дзэм кӀощтхэр зытхыщтыгъэр, нахь цӀыф лъэрыхьэхэу къалэм дэсыгъэхэм ащыщхэу нэбгырэ тӀокӀищ ащ къалэм даригъэщыгъэх.

²⁰ Пачъыхьэм иухъумэкӀо шъхьагъырытмэ яӀэшъхьэтетэу Нэбузарадан ахэр ыубытхи бабилэн пачъыхьэм дэжь Рыблэ ыщагъэх.

²¹ Бабилэн пачъыхьэм ахэр аригъэутынхи, Хъамат хэкум ит Рыблэ къалэ щаригъэукӀыжьыгъэх. Джаущтэу ехъуд цӀыфхэр ячӀыгу ращыгъэх.

Ехъудэм иӀэшъхьэтет пащэу Гъэдалый

²² Бабилэн пачъыхьэу Нэбухаднэцар Ехъуд хэкум къыригъэнэжьыгъэ цӀыфхэм Щафан ыкъо Ахъыкъам ыкъо Гъэдалый Ӏэшъхьэтет пащэу афишӀыгъ.

²³ Дзэм иӀэшъхьэтет пащэхэми, ахэм ягъусэ дзэкӀолӀхэми бабилэн пачъыхьэм Гъэдалый Ӏэшъхьэтет пащэу зэрэтыригъэхьагъэр зызэхахым, Гъэдалый дэжь Мыцпэ къэкӀуагъэх: Нэтаный ыкъо Исмахьил, Къарыехъ ыкъо Иохъанан, нэтофэ лъэпкъым щыщ Танхъумэт ыкъо Сэрай, зятэ МэӀахэ щыщ Язаныехъу, ядзэкӀолӀхэр.

²⁴ Гъэдалый ахэми, зиӀэшъхьэтет ядзэкӀолӀхэми тхьэлъанэ афишӀи ариӀуагъ: «Къасдый Ӏэшъхьэтетхэм шъуащымыщынэу мы чӀыпӀэм унэхэр щышъушӀхи, бабилэн пачъыхьэм шъуфэӀорышӀи шъуиӀофхэр дэгъу хъущт».

²⁵ Ау яблэнэрэ мазэм тефэу пачъыхьэ лӀакъом щыщ ЕлыщамаӀ ыкъо Нэтаный ыкъожь Исмахьилэ нэбгырипшӀ игъусэу къакӀуи, Гъэдалыйи ащ игъусэу Мыцпэ дэсыгъэхэми къатебани ыукӀыгъэх.

²⁶ ЕтӀанэ цӀыфхэм, анахь къызэрыкӀохэм къащегъэжьагъэу анахь лъэрыхьэхэм анэсыжьэу, дзэкӀолӀ Ӏэшъхьэтетхэри зэрахэтхэу, къасдыйхэм ащэщынэхэти, заӀати зэкӀэ Мысырым икӀыжьыгъэх.

Ехъоехин хьапсым къызэрэчӀагъэкӀыжьыгъэр

²⁷ Ехъуд пачъыхьэу Ехъоехин зыращыгъэр ящэкӀэнэрэ блырэ илъэсым хэхьагъэу, илъэсым ияпшӀыкӀутӀонэрэ мазэ иятӀокӀэнэрэ блырэ мафэ бабилэн пачъыхьэу Еуил-Мэродах пачъыхьанэу зытехьэгъэ илъэсым, ехъуд пачъыхьэу Ехъоехин нэшӀукӀэ къеплъи, хьапсым къычӀаригъэщыжьыгъ.

²⁸ Ар ащ нэгушӀоу къыпэгъокӀыгъ, нэмыкӀ хэгъэгумэ япачъыхьэхэу Бабилэн щыӀагъэхэм анахьыбэу лъытэныгъэ къыфишӀыгъ.

²⁹ Пачъыхьэм Ехъоехин хьапсэчӀэс щыгъынэу щыгъыгъэхэр зыщыригъэхыжьхи, щэӀэфэ ышхыщтым ар щигъэкӀагъэп.

³⁰ Джаущтэу пачъыхьэм иунашъокӀэ, ищыкӀагъэр зэкӀэ мафэ къэс рагъэгъотзэ, олӀэжьыфэ ар щыӀагъ.