Пачъыхьэхэр: ЯтӀонэрэ тхылъыр 2 - Тхьэм и ГущыӀ

ЯтӀонэрэ шъхьэр Тхьэм Илас уашъом зэрэдищэежьыгъэр

¹ Илас жьыбгъэшхоу къилъырэм дыхэтэу, Зиусхьаным Ежь дэжь зыщыригъэгъэзэжьын фэе уахътэр къэсыгъэу, Иласрэ ЕлыщаӀрэ Гъылгъал къыдэкӀыгъэхэу кӀощтыгъэх.

² Илас ЕлыщаӀ риӀуагъ: «О мыщ къыщыуцуба, сыда пӀомэ сэ Зиусхьаным Бэтэл сегъакӀо». Ау ЕлыщаӀ къыриӀожьыгъ: «Зиусхьаныр зэрэщыӀэри о узэрэщыӀэри сэӀо укъэсымыбгынэнкӀэ». Джаущтэу ахэр Бэтэл кӀуагъэх.

³ Арыти, тхьэлӀыкӀо зэкупэгъоу Бэтэл дэсыгъэхэр ЕлыщаӀ къыпэгъокӀыхи къыраӀуагъ: «Тхьэмэтэнчъэу непэ укъызэрэнэщтыр, Зиусхьаным ар непэ уашъом зэрэдищэежьыщтыр ошӀа?» Ащ ариӀожьыгъ: «Ар сэри сэшӀэ, щыжъугъэт».

⁴ Илас ащ риӀуагъ: «ЕлыщаӀ, о мыщ къыщыуцуба, сыда пӀомэ сэ Зиусхьаным Ерыхъоу сегъакӀо». Адрэм къыриӀожьыгъ: «Зиусхьаныр зэрэщыӀэри о узэрэщыӀэри сэӀо укъэсымыбгынэнкӀэ!» Джаущтэу ахэр Ерыхъоу къэсыгъэх.

⁵ Арыти, тхьэлӀыкӀо зэкупэгъоу Ерыхъоу дэсыгъэхэр ЕлыщаӀ къекӀуалӀэхи къыраӀуагъ: «Тхьэмэтэнчъэу непэ укъызэрэнэщтыр, Зиусхьаным ар непэ уашъом зэрэдищэежьыщтыр ошӀа?» Ащ ариӀожьыгъ: «Ар сэри сэшӀэ, щыжъугъэт».

⁶ ЕтӀани Илас ащ риӀуагъ: «ЕлыщаӀ, о мыщ къанэ, сыда пӀомэ сэ Зиусхьаным Иордан сегъакӀо». Адрэм къыриӀожьыгъ: «Зиусхьаныр зэрэщыӀэри о узэрэщыӀэри сэӀо укъэсымыбгынэнкӀэ!» Джаущтэу зэгъусэхэу ягъогу техьажьыгъэх.

⁷ Бэтэл дэсыгъэ тхьэлӀыкӀо зэкупэгъур нэбгырэ шъэныкъо хъухэу ауж итхэу къакӀощтыгъэх. Ахэр къапэзанкӀэу чыжьэкӀэ къызэуцухэм, мыдритӀур Иордан псыхъоӀум Ӏутыгъ.

⁸ Ащ дэжьым Илас ищыгъын кӀыӀутелъ къышти зэкӀоцӀищыхьагъ, ащкӀэ псым зыхэом, ар бгъуитӀумкӀэ зэгокӀи, тӀури игъушъыкӀыгъэ псы лъачӀэу къэлъэгъуагъэмкӀэ зэпырыкӀыгъэх.

⁹ Псым зызэпырэкӀхэм Илас ЕлыщаӀ риӀуагъ: «СыпкӀэрамыщыжьызэ узыфаер къаӀо». Арыти, ЕлыщаӀ къыриӀожьыгъ: «КӀуачӀэу пхэлъым фэдэу ӀахьитӀу къысфэгъанэба».

¹⁰ Адрэм къыӀуагъ: «УкъызкӀэлъэӀурэр шӀэгъуае. СызэрэпкӀэращыжьырэр къызыплъэгъукӀэ, узыфаер къыбдэхъущт, зымылъэгъукӀэ, къыбдэхъущтэп».

¹¹ Ахэр зэдэгущыӀэхэу гъогум рыкӀохэзэ, ку псынкӀэмрэ шыхэмрэ мэшӀогъэшӀыгъэу, ошӀэ-дэмышӀэу, къэсыхи, нэбгыритӀури зэпэшъхьаф хъугъэх. Илас жьыбгъэшхоу къилъыгъэм дыхэтэу уашъом дэкӀоежьыгъ.

¹² ЕлыщаӀ ащ еплъзэ къэкууагъ: «А тят! А тят! Израилым ику псынкӀэрэ ащ ишыудзэрэ!» Ащ нахьыбэрэ ар ащ ылъэгъужьыгъэп. ЕлыщаӀ ищыгъынхэр ыубытхи зэфэдитӀоу зэгуитхъыгъэх.

¹³ ЕтӀанэ Илас къыпызыгъэ щыгъын кӀыӀутелъыр къыштэжьи, къыгъэзэжьи, Иордан инэпкъ къыӀухьагъ.

¹⁴ Илас къыпызыгъэ щыгъын кӀыӀутелъыр къышти, псым рыхауи, къыӀуагъ: «Тыдэ щыӀа Илас и Зиусхьанэу Тхьэр, джа дэдэр ары?» Ар къыӀуи псым зыхэом, ар бгъуитӀумкӀэ зэгокӀи, ЕлыщаӀ ащ икӀыгъ.

¹⁵ Ерыхъоу щыщ тхьэлӀыкӀо зэкупэгъум чыжьэкӀэ ар къалъэгъугъэти, аӀуагъ: «Илас кӀуачӀэу хэлъыгъэр ЕлыщаӀ къыхэхьагъ». Ахэр ащ къыпэгъокӀыхи, чӀыгум нэс шъхьащэ къыфашӀи,

¹⁶ къыраӀуагъ: «Мары уиӀумэтхэм зишӀугъоу нэбгырэ шъэныкъо тэхъу. ОрэкӀохи, уитхьаматэ къылъэрэхъухэба. ЗыгорэкӀэ Зиусхьаным ы Псэ ар ышти, къушъхьэмэ къащыридзыхыгъэн е кӀэймэ ащыщ горэм дидзэгъэнкӀи мэхъуба». Ау ащ къыӀуагъ: «ШъумыгъакӀох».

¹⁷ Ау агъэукӀытэфэ ахэр бэрэ зелъэӀухэм, ащ ариӀуагъ: «ЖъугъакӀохэба адэ». Арыти, нэбгырэ шъэныкъо агъакӀуи, мэфищэ къылъыхъугъэх, ау ар къагъотыгъэп.

¹⁸ ЕлыщаӀ Ерыхъоу джыри щыӀэзэ, ахэм ащ дэжь къызагъэзэжьым, ариӀуагъ: «ШъумыкӀу сӀуи къышъосӀогъагъэба?»

ТхьэлӀыкӀоу ЕлыщаӀ иапэрэ шӀэгъошӀагъэхэр

¹⁹ ЕлыщаӀ Ерыхъоу къалэм дэсхэм къыраӀуагъ: «Тизиусхьан зэрилъэгъоу, мы къалэм итӀысыпӀэ дэгъу, ау ипс дэгъоп, ичӀыпӀи гъэбэжъулъэп».

²⁰ Ащ ыӀуагъ: «КӀэу лэгъуп къысэшъути, ащ щыгъу къишъутакъу». Арыти, къыратыгъ.

²¹ Ащ дэжьым псышъхьэм кӀуи, щыгъур хитакъуи ыӀуагъ: «Зиусхьаным ыӀорэр мары: „Мы псым ыпсэ къыпызгъэкӀэжьыгъ, ащ нахьыбэрэ ыгъэлӀэжьыщтхэп, гъэбэжъунчъагъэри щыӀэжьыщтэп“».

²² Джаущтэу ЕлыщаӀ зэрэтыриӀуагъэм тетэу, псыр джы къызнэсыгъэми дэгъу.

²³ Ащ ыуж Ерыхъоу къыдэкӀыжьи Бэтэл къалэ ежьагъ. Гъогум тетэу кӀозэ, шъэожъые куп ащ къыдэкӀи, къыкӀэнакӀэхэзэ къыраӀуагъ: «КӀо, шъхьэ къуй, кӀо, шъхьэ къуй!»

²⁴ Ар къызэплъэкӀыгъ, къяплъи, Зиусхьаным ыцӀэкӀэ къябгыгъ. Арыти, мышъэбзитӀу мэзым къыхэкӀхи шъэожъые нэбгырэ тӀокӀитӀурэ тӀурэ зэпкъыратхъыгъ.

²⁵ ЕтӀанэ ар Къармэл къушъхьэм дэкӀоягъ, ащ къехыжьи Щамэрэн ыгъэзэжьыгъ.