Пачъыхьэхэр: Апэрэ тхылъыр 22 - Тхьэм и ГущыӀ

ЯтӀокӀэнэрэ тӀурэ шъхьэр ТхьэлӀыкӀоу Мыхаехъурэ Ахъабрэ

¹ Арамымрэ Израилымрэ зао зэдамышӀэу илъэсищэ щыӀагъэх.

² Ящэнэрэ илъэсым зыхэхьэм Ехъудэм ипачъыхьэу Ехъощафат Израилым итемыр лъэныкъо ипачъыхьэ дэжь кӀуагъэ.

³ Израилым ипачъыхьэ иӀумэтхэм ариӀуагъ: «ГъылыӀадым ит къалэу Рамот тэтыеба? Арамым ипачъыхьэ ар къыӀэкӀэтхыжьыным пае зи тшӀэрэп».

⁴ Арыти, ащ Ехъощафат риӀуагъ: «ГъылыӀадым ит къалэу Рамот пэшӀуекӀоу заом укъыздэкӀощта?» Ехъощафат Израилым ипачъыхьэ къыриӀожьыгъ: «О узэрэхъоу сэри сыхъущт, сицӀыфхэри уицӀыфмэ афэрэдэх, сишхэри уишхэм афэрэдэх».

⁵ ЕтӀани Ехъощафат Израилым ипачъыхьэ къыриӀуагъ: «Зиусхьаным къыупсэлъыщтыр апэ зэтэгъэгъашӀэ».

⁶ Арыти, Израилым ипачъыхьэ тхьэлӀыкӀоу нэбгырэ шъиплӀ фэдиз къызэӀуигъакӀи ариӀуагъ: «ГъылыӀадым ит Рамот пэшӀуекӀорэ заом сыкӀощта хьауми сымыкӀощта?» Ахэм къыраӀожьыгъ: «КӀо, Зиусхьаным ар пачъыхьэм ыӀэ къырилъхьащт».

⁷ Ау Ехъощафат къэупчӀагъ: «НэмыкӀ зиусхьанлӀыкӀо горэ мыщ щыӀэба ар едгъэупчӀыжьыным пае?»

⁸ Израилым ипачъыхьэ Ехъощафат риӀуагъ: «Зиусхьаным еупчӀын ылъэкӀынэу зы нэбгырэ горэ джыри щыӀ. Ар Имлэ ыкъо Мыхаехъу ары. Ау сэ ар сфэлъэгъурэп Тхьэм къыбгъодэкӀыгъэ псалъэу къышӀырэм дэи нэмыкӀ шӀу къысэмыхъулӀэнэу къырегъэкӀышъ». Ехъощафат къыӀуагъ: «Аущтэу умыӀо, пачъыхь».

⁹ Арыти, Израилым ипачъыхьэ тхьамэтэ пащэмэ ащыщ горэм къеджи риӀуагъ: «ПсынкӀаӀоу Имлэ ыкъо Мыхаехъу лъыкӀу».

¹⁰ Израилым ипачъыхьэрэ Ехъудэм ипачъыхьэрэ пачъыхьэ шъуашэхэр ащыгъхэу, шъхьадж итахътэ тесэу Щамэрэн икъэлапчъэ пэчӀынатӀэу пчэгушхом исыгъэх. ТхьэлӀыкӀохэр зэкӀэ ахэм апашъхьэ исхэу Тхьэм ыкӀочӀэ лые зэлъиштагъэхэм фэдэу зыраутэкӀыжьщтыгъэ.

¹¹ КъэнаӀан ыкъо Цыдкъый бжъакъохэр гъучӀым хишӀыкӀхи къыӀуагъ: «Зиусхьаным ыӀорэр мары: „Арамхэр огъэкӀодыпэфэ мыхэмкӀэ зэхэплӀыхьащтых“».

¹² ТхьэлӀыкӀо пстэуми, Тхьэм къариӀуагъэ фэдэу, ар дэдэр къаӀощтыгъэ: «ГъылыӀадым ит Рамот кӀо, къыбдэхъущт, Зиусхьаным ар пачъыхьэм ыӀэ къырилъхьащт».

Мыхаехъу къызэратекӀощтыхэр къызэрариӀуагъэр

¹³ Мыхаехъу къеджэнэу лъагъэкӀуагъэм ащ риӀуагъ: «ОшӀэмэ, тхьэлӀыкӀохэм зэдырагъаштэу къызэраӀорэмкӀэ, пачъыхьэм шӀу къыдэхъущт. О къэпӀощтри ахэм ащыщ пэпчъ къыӀорэм терэф, ори шӀу къаӀо».

¹⁴ Ау Мыхаехъу къыриӀожьыгъ: «Зиусхьаныр зэрэщыӀэр сэӀо! Зиусхьаным къысиӀорэр ары сэ къэсӀощтыр».

¹⁵ Ар пачъыхьэм дэжь къызэкӀом, пачъыхьэм ащ риӀуагъ: «Мыхаехъу! ГъылыӀадым ит Рамот пэшӀуекӀорэ заом сыкӀощта хьауми сымыкӀощта?» Адрэм ащ къыриӀожьыгъ: «КӀо, уатекӀощт. Зиусхьаным ар пачъыхьэм ыӀэ къырилъхьащт».

¹⁶ Пачъыхьэм ащ риӀуагъ: «Шъыпкъэ нэмыкӀ зыпари къысэмыӀонэу Зиусхьаным ыцӀэкӀэ тхьапшрэ тхьэлъанэ озгъэшӀын фая?»

¹⁷ Арыти, адрэм къыӀуагъ: «Мэлахъор зыпэмыт мэлхэр къушъхьэхэм зэращызэбгырыкӀхэрэм фэдэу, зэрэ Израилэу итэкъухьагъэу слъэгъугъэти Зиусхьаным къыӀуагъ: „Ӏэшъхьэтет пащэ ахэм яӀэп, хэти мамырэу ядэжь къерэгъэзэжь“».

¹⁸ Израилым ипачъыхьэ Ехъощафат риӀуагъ: «Ащ дэи нэмыкӀ дэгъу горэ къэхъунэу Тхьэм ыцӀэкӀэ сэщ пае къызэримыӀощтыр къыосӀогъагъэба?»

¹⁹ Арыти, Мыхаехъу къыриӀожьыгъ: «Зиусхьаным ипсалъэ зыфэдэм къедэӀу. Зиусхьаныр итахътэ тесэу, иошъогу кӀуачӀэхэр зэкӀэ къегъэуцокӀыгъэхэу, иджабгъукӀи исэмэгукӀи щытхэу слъэгъугъэ.

²⁰ Зиусхьаным къыӀуагъ: „Хэта Ахъаб ГъылыӀадым ит Рамот кӀонышъ, ащ къыщыхагъэфэным пае тезгъэгушӀухьащтыр?“ Зым зы къыӀуагъ, адрэм нэмыкӀ къыӀуагъ.

²¹ Зы псэ горэ къахэкӀоти Зиусхьаным ыпашъхьэ иуцуи риӀуагъ: „Сэ тезгъэгушӀухьащт“. Зиусхьаныр ащ еупчӀыгъ: „Сыдэущтэу?“

²² Адрэм къыӀуагъ: „СыкӀонышъ, пцӀыр къязгъэӀорэ псэу зысшӀынышъ, зэкӀэ тхьэлӀыкӀомэ къязгъэӀощт“. Зиусхьаным къыӀуагъ: „О тебгъэгушӀухьанышъ, джар бгъэцэкӀэщт. КӀуи джащ тетэу шӀы“.

²³ Арышъ, Зиусхьаным пцӀыр къязгъэӀорэ псэр мы уитхьэлӀыкӀомэ зэкӀэми къажэдигъэхьагъ. Ау Зиусхьаным ощ пае къыӀуагъэр дэи».

²⁴ КъынэӀанэ ыкъо Цыдкъый Мыхаехъу къекӀуалӀи, ынэӀупашъо къыкӀыригъэхи къыӀуагъ: «Зиусхьаным Ыпсэ сэ скӀэрыкӀыгъэу о укъегъэгущыӀа адэ джы?»

²⁵ Арыти, Мыхаехъу къыриӀуагъ: «Зыбгъэбылъыным пае зы кӀоцӀ унэм укъичъмэ адрэм уилъадэу къэпчъыхьэу узщыхъущт мафэм ар нафэ о къыпфэхъущт».

²⁶ Израилым ипачъыхьэ къыӀуагъ: «Мыхаехъу шъуубыти къалэм иӀэшъхьэтетэу Амонрэ пачъыхьэм ыкъо Иоащрэ афашъущи

²⁷ мыщ фэдэу яшъуӀу: „Пачъыхьэм ыӀорэр мары: ‘Мыр хьапсым чӀэшъудзи, сырэхьатыжьыгъэу къэсэгъэзэжьыфэ, хьалыгъу тӀэкӀурэ псы тӀэкӀурэ нахь ешъумытэу жъугъашхэ’“».

²⁸ Арыти, Мыхаехъу къыӀуагъ: «Рэхьатэу къэбгъэзэжьыщтмэ, ащыгъум Зиусхьаныр арэп къэсэзгъэӀуагъэр». Джыри къыӀуагъ: «ШъукъэдаӀу, зэкӀэ цӀыфхэр!»

Ахъаб ихьадэгъу

²⁹ Израилым ипачъыхьэрэ Ехъудэм ипачъыхьэу Ехъощафатрэ ГъылыӀадым ит Рамот екӀугъэх.

³⁰ Израилым ипачъыхьэ Ехъощафат риӀуагъ: «Сэ сыкъамышӀэжьынэу щыгъынхэр зэблэсхъунхэшъ заом сыӀухьащт, о уипачъыхьэ щыгъынхэр зыщылъэх». Израилым ипачъыхьэ къамышӀэжьынэу ищыгъынхэр зэблихъухи заом Ӏухьагъ.

³¹ Арамым ипачъыхьэ ку псынкӀэмэ яӀэшъхьэтет нэбгырэ щэкӀрэ тӀурэу иӀэхэм ариӀуагъ: «ЦӀыкӀу, ины шъуӀоу, нэмыкӀхэм шъуапымылъэу Израилым ипачъыхьэ закъо шъуезау».

³² Ку псынкӀэмэ яӀэшъхьэтетмэ Ехъощафат къызалъэгъум, «Израилым ипачъыхьэн фае» аӀуи, къезэонхэу къыфагъэзагъ. Арыти, Ехъощафат къякууагъ.

³³ Ку псынкӀэмэ яӀэшъхьэтетмэ ар Израилым зэримыпачъыхьэр къызашӀэм агъэзэжьыгъ.

³⁴ Зы лӀы горэм щэбзащэр ымышӀахэу къыкъудыйи щабзэр зетӀупщым, Израилым ипачъыхьэ тыригъафи, иашъоджэнэ ыгупэкӀэ ашъоджэнэ пӀон зэпыдзапӀэм дэжь щыпхыриути ыуӀагъ. Арыти, пачъыхьэм ишыкуао риӀуагъ: «Гъэзэжьи дзэм сыхэщыжь, сыкъауӀагъ».

³⁵ Ау а мафэм заор нахьи нахь къызэкӀэблагъэти, пачъыхьэр ику псынкӀэ рагъэуцуи, ар ащ итэу арэмхэм апыщытыгъ. Джаущтэу пчыхьэм ар лӀагъэ, лъыр иуӀагъэ къичъызэ, ку псынкӀэм илъадэщтыгъ.

³⁶ Арыти, тыгъэр зыкъохьахэм дзэуцупӀэм зэрэщытэу макъэ щагъэӀугъ: «Шъхьадж икъалэ орэкӀожь, шъхьадж ичӀыгу ерэгъэзэжь!»

³⁷ Пачъыхьэр лӀи Щамэрэн къащэжьыгъ, пачъыхьэр Щамэрэн щагъэтӀылъыжьыгъ.

³⁸ Ку псынкӀэр Щамэрэн псыутӀэм щатхьакӀыжьыгъ, Зиусхьаным къызэраригъэӀогъагъэм фэдэу, хьэхэм ащ ылъ абзэигъ, бзылъфыгъэ мыхъатэхэми ар атхьакӀыжьыгъ.

³⁹ Ахъаб иӀофшӀагъэхэри, нэмыкӀэу зэкӀэ ышӀагъэхэри, пыл къупшъхьэм унэр зэрэхишӀыкӀыгъэри, къалэу ыгъэпсыгъэхэри зэкӀэ израил пачъыхьэхэм яхьылӀэгъэ Ӏэпэрытххэм арытхагъэхэба.

⁴⁰ Ахъаб ятэ пӀашъэхэр зыдэщыӀэм зегъэзэжьым, ыкъо Ахъазыехъу ащ ычӀыпӀэ пачъыхьагъум техьагъ.

Ехъуд пачъыхьэу Ехъощафат

⁴¹ Израилым ипачъыхьэу Ахъаб пачъыхьэгъум зытетыр яплӀэнэрэ илъэсым хэхьагъэу Асэ ыкъо Ехъощафат Ехъудэм ипачъыхьэу техьагъ.

⁴² Ехъощафат пачъыхьагъум зытехьэм ыныбжьыгъэр илъэс щэкӀрэ тфырэ, илъэс тӀокӀырэ тфырэ Ерусэлэм щыпачъыхьагъ. Ащ янагъэр Щылхъый ыпхъу Ӏазубэ ары.

⁴³ Зиусхьаным къекӀущтыр ышӀэзэ, ятэ Асэ игъогу зэпстэумкӀи ар тетыгъ, ащ текӀыгъэп.

⁴⁴ Ау къурмэнхэр зыщашӀырэ лъэгапӀэхэр зэхаригъэкъутагъэхэп, цӀыфмэ ахэм къурмэнхэр ащашӀыщтыгъэх, гъомэ ӀашӀухэр къызыпиххэри ащагъэстщтыгъэх.

⁴⁵ Ехъощафат Израилым ипачъыхьэ мамыр зэзэгъыныгъэ дишӀыгъ.

⁴⁶ Ехъощафат нэмыкӀэу ышӀагъэхэри, лӀыгъэу зэрихьагъэхэри, зэрэзэуагъэри ехъуд пачъыхьэхэм яхьылӀэгъэ Ӏэпэрытххэм арытхагъэхэба.

⁴⁷ Ащ ятэ Асэ илъэхъан цӀэпӀагъэхэр зышӀэрэ хъулъфыгъэу ыкӀи бзылъфыгъэу къэнэжьыгъэхэри чӀыгум тыригъэкӀодыкӀыпагъэх.

⁴⁸ А уахътэм Едомым пачъыхьэ иӀагъэп, щыӀагъэр пачъыхьэу агъэнэфагъэр ары.

⁴⁹ Ехъощафат хымкӀэ кӀозэ дышъэр Офыр къырищыным пае тарщыщ къухьэмэ афэдэхэр ышӀыгъэх. Ау ахэр ащ нэсыгъэхэп, сыда пӀомэ Ӏэцыон-Гъэбэр дэжь щыкъутагъэх.

⁵⁰ Ахъаб ыкъо Ахъазыехъу Ехъощафат риӀуагъ: «СиӀумэтхэр уиӀумэтмэ ягъусэхэу къухьэхэмкӀэ орэкӀох». Ау Ехъощафат ащ къезэгъыгъэп.

⁵¹ Ехъощафат ятэ пӀашъэхэр зыдэщыӀэм зегъэзэжьым, ятэ Даут икъалэу ятэ пӀашъэхэр зыдэлъхэм щагъэтӀылъыжьыгъ. Ыкъо Ехъорам ащ ычӀыпӀэ пачъыхьагъум техьагъ.

Израил пачъыхьэу Ахъазыехъу

⁵² Ехъудэм ипачъыхьэу Ехъощафат зыпачъыхьэр япшӀыкӀублэнэрэ илъэсым хэхьагъэу Ахъаб ыкъо Ахъазыехъу Израилым ипачъыхьэу техьи, илъэситӀо Израилым ипачъыхьагъ.

⁵³ Зиусхьаным къемыкӀущтыр ышӀэщтыгъэ, ятэрэ янэрэ ягъогу, Израилыр псэкӀодым хэзыщэгъэ Нэуат ыкъо ЯрабӀам игъогу ар атетыгъ.

⁵⁴ Ар БаӀал фэлажьэщтыгъэти, шъхьащэ фишӀыщтыгъэти, ятэ ышӀэгъэ пстэумэ къахэкӀэу Зиусхьаныр лъэш дэдэу ыгъэгубжыгъ.